LESON 49
Ki mannyer ou fanmir i kapab ere?—Parti 1
Bann koup ki fek marye ti a kontan ki sa lazwa ki zot santi zour zot maryaz i dire pour touzour. Sa i posib. Bann Kretyen ki’n marye depi byen lontan e ki’n fer bokou zefor pour aplik bann konsey Labib, i konnen ki sa i posib.
1. Ki konsey Labib i donn bann msye?
Zeova in apwent bann msye konman sef lafanmir. (Lir Efezyen 5:23.) I ekspekte en msye pour fer bann desizyon ki pou benefisye lafanmir antye. Labib i donn sa konsey bann msye: “Kontinyen kontan zot madanm.” (Efezyen 5:25) Ki sa i vedir? En msye ki kontan son madanm i tret li dan en fason zantiy an piblik e osi dan lakour. I protez li kont danze e i fer son mye pour pran swen avek son bezwen fizik e emosyonnel. (1 Timote 5:8) Pli enportan ankor, i ed son madanm pour pran swen avek son bezwen spirityel. (Matye 4:4) Par egzanp, i kapab priye e lir Labib ansanm avek son madanm. Ler en msye i demontre lanmour dan lafason ki i pran swen avek son madanm, i gard en bon lanmitye avek Zeova.—Lir 1 Pyer 3:7.
2. Ki konsey Labib i donn bann madanm?
Parol Bondye i dir ki en madanm “i devret annan en gran respe pour son msye.” (Efezyen 5:33) Ki mannyer i kapab fer sa? I kapab konsantre lo bann bon kalite ki son msye i annan ek zefor ki i fer pour pran swen avek li ek zot zanfan. I kapab montre respe par siport bann desizyon ki i fer e koz dan en fason zantiy avek li. I osi koz an byen lo son msye menm si i pa en Temwen Zeova.
3. Ki mannyer en koup i kapab fer zot maryaz vin pli for?
Labib i dir sa lo bann koup marye: “Zot de pou vin en sel.” (Matye 19:5) Sa i vedir ki zot devret lalit kont okenn keksoz ki kapab afebli zot lanmour pour kanmarad. Zot fer sa ler zot pas letan ansanm e senserman partaz zot panse ek santiman anver kanmarad. Zot pa les okenn keksoz ouswa personn, apard ki Zeova, vin pli enportan ki zot konzwen. Zot fer sir ki zot pa devlop okenn relasyon ki pa apropriye avek okenn lezot dimoun.
AL PLI O PROFON
Vwar bann prensip Labib ki kapab fer ou maryaz vin pli for.
4. Msye, kontan ou madanm e pran byen swen avek li
Labib i dir ki “bann msye i devret kontan zot madanm parey zot prop lekor.” (Efezyen 5:28, 29) Ki sa i vedir? Zwe sa VIDEO e apre reponn sa kestyon.
Ki serten fason en msye i kapab montre ki i kontan e pran swen avek son madanm?
Lir Kolosyen 3:12 e apre reponn sa kestyon:
Ki mannyer en msye i kapab demontre sa bann kalite dan son maryaz?
5. Madanm, kontan e montre respe pour ou msye
Labib i ankouraz en madanm pour montre respe pour son msye ki swa i servi Zeova ouswa non. Lir 1 Pyer 3:1, 2 e apre reponn sa bann kestyon:
Si ou annan en msye ki pa servi Zeova, sirman ou ti a kontan li osi i ador Zeova. Dapre ou, kwa ki pou ed li? Pres avek li toultan oubyen annan en bon kondwit ek respe pour li? Akoz?
Bann msye ek madanm i kapab fer bann bon desizyon ansanm. Me parfwa en madanm i kapab pa tonm dakor avek son msye. Dan sa ka, i kapab eksprim son pwennvi dan en fason kalm e avek respe. Me i devret realize ki Zeova in donn son msye sa responsabilite pour deside kwa ki pli bon pour lafanmir. I devret fer son mye pour siport desizyon son msye. Ler i fer sa, i kontribye pour annan en bon latmosfer kot lakour. Lir 1 Pyer 3:3-5 e apre reponn sa kestyon:
Ki mannyer Zeova i santi ler en madanm i montre respe pour son msye?
6. Ou kapab rezourd bann problenm dan ou maryaz
Napa maryaz ki parfe. Alor bann koup i bezwen travay ansanm pour sirmont bann difikilte ki zot rankontre. Zwe sa VIDEO e apre reponn sa bann kestyon.
Dan sa video, ki bann siny ki montre ki sa koup ti pe elwannyen avek kanmarad?
Ki zot kapab fer pour zot maryaz vin pli for?
Lir 1 Korentyen 10:24 ek Kolosyen 3:13. Apre ki ou’n lir sak verse, reponn sa kestyon:
Ki mannyer aplik sa konsey i fer en maryaz vin pli for?
Labib i dir ki nou devret onor kanmarad. Ler nou onor en dimoun nou tret li dan en fason zantiy e avek respe. Lir Romen 12:10 e apre reponn sa bann kestyon:
Eski bann msye ouswa madanm i devret ekspekte zot konzwen pour onor zot premye? Akoz?
SERTEN DIMOUN I DIR: “Mwan ek mon konzwen nou nepli pros parey nou ti ete avan.”
Ki mannyer ou pou eksplike ki Labib i kapab ed zot?
REZIMEN
En msye ek son madanm i kapab ere ler zot kontan kanmarad, montre respe pour kanmarad e aplik bann prensip Labib.
Revizyon
Ki en msye i kapab fer pour son maryaz ere?
Ki en madanm i kapab fer pour son maryaz ere?
Si ou marye, ki prensip Labib ki kapab ede fer ou maryaz vin pli for?
FER PLIS RESERS
Vwar bann bon sizesyon ki kapab ed ou pour annan en lavi fanmir ere.
Get en video lanmizik ki montre bann benediksyon ki ou gannyen ler ou aplik konsey Bondye dan ou maryaz.
Gete ki savedir soumet avek lotorite en msye.
“Madanm, akoz soumet avek lotorite zot msye?” (Latour Veyer 1 Me 2010)
Ki mannyer en koup in kapab fer fas avek bann problenm grav, enkli zot divors?