Deklarasyon ki egzakt

AKOZ en Kretyen i kapab fer en deklarasyon ki pa vre? I kapab pe senpleman repet en keksoz ki i’n tande, san pran letan pour verifye bann fe. Oubyen i kapab san realize egzazer en keksoz parski i mal lir son sours lenformasyon. Ler nou akord bokou latansyon pour fer sir ki sa ki nou dir i egzakt, menm dan bann pti keksoz, alor ler nou koz lo bann laspe pli enportan nou mesaz, sa bann ki ekout nou, pou realize ki zot kapab annan konfyans ki sa mesaz i vre.

Dan Predikasyon. Bokou ki realize ki zot ankor annan en bon pe pour aprann, zot per pour konmans prese. Toudmenm, zot vitman dekouver ki zot kapab donn en temwannyaz efikas, kantmenm zot annan zis en konnesans debaz lo laverite. Konman? Lakle se preparasyon.

Avan al dan predikasyon, konn byen sa topik ki ou anvi diskite. Esey prevwar bann kestyon ki dimoun i kapab souleve. Rod bann larepons ki baze lo Labib e ki satisfezan. Sa pou prepar ou pour donn bann larepons egzakt san bezwen trakase. Eski ou pe al kondwir en letid Labib? Reviz sa lenformasyon letid byen. Fer sir ki ou konpran baz Biblik pour bann larepons pour bann kestyon dan sa lenformasyon.

Me ki ou pou fer si en met lakour oubyen en koleg travay i demann en kestyon ki ou pa’n prepare pour reponn? Si ou pa asir bann fe, reziste tantasyon pour devinen. “Leker sa enn drwat i medite pour reponn.” (Prov. 15:28) Ou kapab trouv led ki ou bezwen dan liv Comment raisonner à partir des Écritures oubyen dan “Sujets de conversation bibliques”. Si napa okenn sa bann piblikasyon avek ou, ofer pour fer resers e retournen apre. Si sa dimoun ki’n poz sa kestyon i senser, i pou pare pour esper larepons korek. Annefe, i kapab ki i pou byen enpresyonnen par ou limilite.

Travay dan predikasyon avek bann proklanmater eksperyanse i kapab ed ou pour devlop lar pour anons Parol Bondye korekteman. Obzerv bann verse ki zot servi e konman zot rezonn lo sa bann verse. Avek limilite aksepte nenport sizesyon oubyen koreksyon ki zot ofer. Apolos, en disip zele, ti benefisye avek led ki i ti resevwar avek lezot. Lik ti dekrir Apolos konman ‘elokan,’ avek “en gran konnesans,” e “avek lantouzyas,” en zonm ki “ti prese e ansenny egzakteman bann fe konsernan Zezi.” Toudmenm, i ti annan en defo dan son konpreansyon. Ler Prisil ek Akilas ti remark sa, “zot ti anmenn li kot zot e eksplik li pli byen Semen Bondye.”—Akt 18:24-28.

‘Reste atase avek Parol fidel.’ Nou prezantasyon dan bann renyon i devret reflekte en gran respe pour rol kongregasyon konman “pilye ek sipor laverite.” (1 Tim. 3:15) Pour kapab soutenir laverite, i enportan ki nou byen konpran bann verse ki nou deside servi dan bann ekspoze. Pran an konsiderasyon bann verse ki swiv avan e apre sa verse e lobzektif sa verse.

Sa ki ou dir dan en renyon kongregasyon i kapab ganny repete. Byensir, nou tou “nou komet lerer” plizyer fwa. (Zak 3:2) Me ou pou benefisye par devlop bann labitid ki kontribye pour ou dir bann parol ki egzakt. Bokou frer ki’n antre dan Lekol Minister Teokratik pou, avek letan, vin bann ansyen. Bokou plis i ekspekte avek sa bann ki ganny konfye bann tel responsabilite. (Lik 12:48) Si san fer atansyon, en ansyen i donn move konsey ki anmenn bann problenm grav pour bann manm kongregasyon, sa ansyen i kapab resevwar dezaprouvasyon Zeova. (Mat. 12:36, 37) Alor, en frer ki kalifye konman en ansyen i devret renonmen pour reste “atase avek parol fidel an sa ki konsern son lar ansennyen.”—Tit 1:9, NW.

Fer atansyon ki ou konklizyon i an akor avek “model parol laverite” ki evidan dan lansanm laverite Biblik. (2 Tim. 1:13) Sa pa devret fer ou per. Petet ou pa ankor arive lir Labib konpletman. Kontinyen travay lo la. Me antretan, not sa bann sizesyon swivan ki kapab ed ou pour analiz lenformasyon ki ou pe panse pour servi dan ou lansennyman.

Premyerman, demann ou lekor: ‘Eski sa lenformasyon i an armoni avek sa ki mon’n deza aprann dan Labib? Eski i pou atir bann ki pe ekoute ver Zeova, oubyen eski i elev lasazes lemonn, par ankouraz dimoun pour ganny gide par sa?’ Zezi ti dir: “Ou parol i laverite.” (Zan 17:17; Det. 13:1-5; 1 Kor. 1:19-21) Apre, servi byen bann zouti letid ki ganny fourni par lesklav fidel e pridan. Sa bann keksoz pou ed ou pour pa selman konpran bann verse korekteman me osi ki ler ou aplik zot ou pa al an ekse me ki ou rezonnab. Si ou baz ou diskour lo “model parol laverite” e depan lo sours kominikasyon ki Zeova in met an plas ler ou pe eksplik e aplik bann verse, ou deklarasyon pou egzakt.

Verifye si ou Lenformasyon i egzakt. Bann levennman resan, sitasyon ek leksperyans i kapab itil ler pe ilistre e aplik serten pwen. Konman ou kapab sir ki zot egzakt? En fason se par obtenir bann lenformasyon dan bann sours diny konfyans. Pa oubliye pour verifye ki sa lenformasyon i azour. Bann statistik i ganny ranplase; bann dekouvert lasyans i vitman vin pli meyer; e anmezir ki zonm i grandi dan konpreansyon listwar ek bann langaz ansyen, bann konklizyon baze lo bann konnesans presedan i bezwen ganny revize. Demontre bokou prekosyon si ou pe mazin pour servi lenformasyon dan bann zournal, televizyon, radyo, lenformasyon lo Internet. Proverb 14:15 i konseye: “Sa ki napa leksperyans i met lafwa dan tou parol, me sa enn ki malen i egzamin son bann lepa.” Demann ou lekor: ‘Eski sa sours i annan en repitasyon pour dir sa ki laverite? Eski sa lenformasyon i kapab ganny verifye par lezot mwayen?’ Si ou doute ki sa keksoz i vre, pa servi li.

Apard ki verifye si ou kapab depan lo sa sours lenformasyon, konsider byen konman ou plàn pour servi sa lenformasyon. Fer sir ki sitasyon ek statistik ki ou servi i an akor avek konteks kot zot in ganny retire. Dan en zefor pour aksantye ou pwen, fer atansyon ki “detrwa dimoun” pa vin “lamazorite dimoun” ki “bokou dimoun” pa vin “tou dimoun” e ki “dan serten ka” pa vin “toultan.” Egzazer bann keksoz, lenformasyon ki enplik sif, degre, oubyen gravite i kapab soulev bann dout lo si vreman ou pe koz laverite.

Ler ou toultan dir bann keksoz egzakt, ou pou ganny en repitasyon konman en dimoun ki respekte laverite. Sa i reflekte byen lo Temwen Zeova konman en group. Pli enportan, i onor “Zeova Bondye laverite.”—Pson. 31:5.