Sapit Trwa

Atas for avek Parol Bondye

1. (a) Konman bann Izraelit ti vwar pour zot menm ki parol Bondye i vre? (b) Akoz sa i konsern nou ozordi?

“ZOT konn byen avek tou zot leker e avek tou zot nanm ki napa okenn parol parmi tou bann bon parol ki Zeova zot Bondye in koz avek zot ki pa’n reisi. Zot tou zot in vin vre pour zot.” (Zozye 23:14-16) Se sa ki Zozye ti dir avek bann zonm Izraelit ki ti annan responsabilite apre ki zot ti’n enstal zot dan Later Promiz. Vreman, bann promes Zeova ti ganny trouve diny konfyans. Sa resi—osi larestan Labib—in ganny prezerve pour nou afen ki “nou posed lesperans.”—Romen 15:4.

2. (a) Dan ki sans Labib i ganny “enspire par Bondye”? (b) Vi ki nou konnen ki Labib i ganny enspire par Bondye, ki nou responsabilite?

² Kantmenm anviron 40 imen ti ganny servi pour ekri Labib, Zeova li menm i son Loter. Eski sa i vedir ki i ti aktivman diriz tou sa ki’n ganny ekri ladan? Byensir. I ti fer sa par mwayen son lespri sen pwisan, son lafors aktif. Zapot Pol ti dir laverite kan i ti dir: “Tou Lekritir i enspire par Bondye . . . pour ki dimoun ki servi Bondye i byen prepare e byen ekipe pour fer tou aksyon ki bon.” Partou dan lemonn, dimoun ki konvenki ki Labib i ganny enspire par Bondye i port latansyon lo li e viv zot lavi dapre son lansennyman.—2 Timote 3:16, 17; 1 Tesalonisyen 2:13.

Ed lezot pour apresye Labib

3. Ki pli bon fason pour ed bokou dimoun ki pa konvenki ki Labib i Parol Bondye?

³ Bokou dimoun ki nou koz avek pa partaz nou konviksyon ki Labib i Parol Bondye. Ki mannyer nou kapab ed zot? Souvannfwa, pli bon fason se ouver Labib e montre zot ki i kontyen. “Parol Bondye i vivan e i annan pisans. I pli koupe ki en lepe ki koup de kote. . . . I arive desifre tou dezir ek sekre leker imen.” (Ebre 4:12) “Parol Bondye” pa senpleman en vye resi istorik, ki nepli annan valer pour nou; i vivan! Dan en fason ki enposib pour reziste, son bann promes pe bouz ver lakonplisman. Mesaz Labib i kapab enfliyans motivasyon ki sorti dan leker en dimoun plis ki okenn keksoz ki nou ti a kapab dir sa dimoun personnelman.

4. Ki bann leksplikasyon ki’n ganny donnen lo bann laverite Biblik ki’n sanz latitid serten dimoun anver Labib, e akoz?

⁴ Apre ki zot in vwar non Bondye dan Labib, bokou dimoun in al egzamin Labib pli oprofon. Lezot in deside pour etidye Labib kan zot in ganny montre sa ki Labib i dir konsernan bi lavi, akoz Bondye i permet mesanste, sinifikasyon bann levennman ki pe arive, oubyen lesperans lavi eternel lo en later paradi. Dan bann landrwa kot bann pratik relizye in ekspoz bann dimoun avek latak bann move lespri, leksplikasyon ki Labib i donnen konsernan zot lorizin e konman pour ganny soulaze avek zot in revey lentere dimoun. Akoz sa bann pwen i enpresyonn bann dimoun senser? Parski Labib i sel sours lenformasyon ki nou kapab depan lo la pour sa bann keksoz enportan.—Psonm 119:130.

5. (a) Pour ki rezon petet ki bann dimoun i dir ki zot pa krwar Labib? (b) Ki mannyer nou kapab ed zot?

⁵ Parkont, ki nou pou fer si dimoun i dir nou ki zot pa krwar Labib? Eski sa i devret termin sa konversasyon? Non, sirtou si zot pare pour rezonnen. I kapab ki zot vwar Labib konman en liv Kretyente. E vi ki Kretyente i annan en rikord lipokrizi, enterfer dan politik, osi byen ki en labitid mandyan larzan, sa i kapab rezon akoz sa bann dimoun i annan en reaksyon negatif lo Labib. Akoz ou pa demann zot si sa i leka? Zot lentere i kapab ganny reveye par lefe ki Labib i kondann bann konportman lemonn ki Kretyente i annan, e osi par bann laspe ki fer Kretyente ek vre Kristyanism diferan.—Mika 3:11, 12; Matye 15:7-9; Zak 4:4.

6. (a) Kwa ki konvenk ou ki Labib i Parol Bondye? (b) Ki bann lezot fe ki kapab ganny prezante pour ed lezot dimoun rekonnet ki Labib i vreman sorti kot Bondye?

⁶ Pour lezot, en diskisyon senp e kler lo bann levidans ki Labib in ganny enspire par Bondye i kapab itil. Kwa ki klerman prouv ou ki Labib i sorti kot Zeova Bondye? Eski sa ki Labib i dir li menm konsernan son lorizin? Oubyen eski lefe ki Labib i kontyen en kantite profesi ki reflekte en konnesans detaye lo lavenir, i montre ki zot in bezwen sorti kot en sours pli siperyer ki imen? (2 Pyer 1:20, 21) Eski petet akoz Labib i posed en larmoni entern ki merveye, kantmenm i’n ganny ekri par 40 zonm dan en peryod 1,600 lannen? Oubyen akoz i egzakt lo kote syantifik konpare avek bann lezot liv ki’n ganny ekri pandan sa letan? Oubyen akoz son bann ekriven in ekri dan en fason onnet e fran? Oubyen akoz i’n ganny prezerve kantmenm bann zefor vyolan pour esey detri li? Nenport keksoz ki ou’n personnelman vwar i enpresyonan, i osi kapab ganny servi pour ed lezot dimoun.a

Nou Lektir Labib

7, 8. (a) Ki nou devret pe fer avek Labib? (b) Ki nou bezwen apard ki lir Labib lo nou menm? (c) Konman ki ou’n personnelman ganny en konprenezon konsernan bann plan Zeova?

⁷ Anplis ki ed lezot krwar Labib, nou menm nou bezwen pran letan pour lir li regilyerman. Eski ou pe fer sa? Parmi tou bann liv ki’n deza ganny pibliye, Labib i sa enn pli enportan. Byensir, sa pa vedir ki si nou lir li lo nou menm, nou pa bezwen okenn lezot keksoz. Lekritir i met nou an gard kont izol nou lekor. Nou pa devret panse ki nou kapab dekouver larepons tou keksoz par en resers endepandan. Afen ki nou kapab vin bann Kretyen ekilibre nou bezwen annan letid personnel me osi asiste regilyerman bann renyon pep Bondye.—Proverb 18:1; Ebre 10:24, 25.

⁸ Konsernan sa, Labib i koz konsernan en zofisye Etyopyen ki ti pe lir profesi Izai. En lanz ti diriz Filip, en evanzelis, pour demann sa zonm: “Eski ou konpran sa ki ou pe lir?” Avek limilite, sa Etyopyen ti reponn: “Ki mannyer mon kapab konpran si personn pa eksplik mwan.” I ti sipliy Filip pour eksplik li sa pasaz. Me, Filip pa ti zis en dimoun ki ti lir Labib lo li menm e donn son lopinyon lo Lekritir. I ti reste pros avek lorganizasyon vizib Bondye. Se pour sa ki i ti kapab ed sa Etyopyen pour benefisye avek lenstriksyon ki Zeova ti pe fer disponib atraver son lorganizasyon. (Akt 6:5, 6; 8:5, 26-35) I menm parey denozour, napa personn ki kapab arive konpran bann plan Zeova lo li menm. Nou tou nou bezwen led ki Zeova in donn avek lanmour atraver son lorganizasyon vizib.

9. Ki progranm lektir Labib ki kapab benefisye nou tou?

⁹ Pour ed nou konpran Labib, lorganizasyon Zeova in fourni bann lenformasyon Biblik ekselan dan plizyer piblikasyon. Deplis, en progranm lektir Labib regilye in ganny etabli pour nou an konneksyon avek Lekol Minister Teokratik ki ganny fer dan tou bann kongregasyon Temwen Zeova atraver lemonn. Nou kapab retir bokou benefis par egzamin Labib personnelman. (Psonm 1:1-3; 19:7, 8) Fer en zefor spesyal pour lir Labib regilyerman. Kantmenm ou pa konpran tou keksoz antyerman, ou kapab ganny en lide zeneral lo Labib ki pou en gran valer. Par egzanp, si ou lir kat oubyen senk paz par zour, ou kapab konplet Labib dan enn an.

10. (a) Kan ki ou fer ou lektir Labib? (b) Ki sennla ki devret partisipe kan lektir Labib pe ganny fer, e akoz regilarite i enportan?

¹⁰ Kan ki ou kapab fer ou lektir Labib? Si ou met dekote 10 oubyen 15 minit par zour pour lir li, ou pou benefisye bokou. Si non, omwen fer en progranm ki permet ou pour lir Labib plizyer fwa sak semenn, e apre reste fidel avek sa progranm. Si ou’n marye, ansanm avek ou konzwen ou kapab rezwir lektir Labib aotvwa avek kanmarad. Si i annan zanfan ki kapab lir, zot kapab lir aotvwa sakenn son tour. Lektir Labib i devret vin en labitid pour touzour, parey manze. Parey ou konnen, si en dimoun pa manz bann manze nourisan, son lasante pou ganny afekte. Alor pareyman, nou lasante spirityel e an konsekans nou lavi eternel i depan lo nouri regilyerman lo “tou parol ki sorti dan labous Bondye.”—Matye 4:4.

Nou Lobzektif

11. Ki lobzektif nou devret annan kan nou lir Labib?

¹¹ Ki lobzektif nou devret annan kan nou lir Labib? Nou lobzektif pa devret senpleman pour lir en serten kantite paz. Nou lentansyon i devret pour konn Bondye pli byen afen ki nou kapab ogmant nou lanmour pour li e ador li dan en fason akseptab. (Zan 5:39-42) Nou latitid i devret parey sa ki en ekriven Labib ti dir: “Fer mwan konn ou bann semen, O Zeova; ansenny mwan ou bann santye.”—Psonm 25:4.

12. (a) Akoz ganny ‘konnesans egzakt’ i neseser, e ki zefor en dimoun ki pe lir i bezwen fer pour ganny sa konnesans? (b) Ki lapros nou kapab servi pour analiz sa ki nou lir dan Labib e retir benefis? (Vwar bwat lo paz 30.) (c) Fer kler sa bann pwen par reponn sa bann kestyon ki ganny fourni dan sa paragraf. Regard bann verse Labib ki’n ganny mansyonnen me ki pa’n ganny site.

¹² Vi ki nou resevwar lansennyman sorti kot Zeova, i devret nou dezir pour ganny ‘konnesans egzakt.’ San li, konman nou pou kapab aplik byen Parol Bondye dan nou lavi oubyen eksplik li korekteman avek lezot? (Kolosyen 3:10; 2 Timote 2:15) Pour ganny konnesans egzakt nou bezwen lir atantivman, e si en porsyon i pli profon, petet nou bezwen lir li plis ki en fwa pour kapab ganny son sans. Osi nou pou benefisye si nou pran letan pour medit lo sa lenformasyon, reflesir lo li an servan diferan lapros. Lo paz 30, nou kapab vwar kat lapros ki nou kapab servi letan nou pe medit lo sa ki nou lir dan Labib. Bokou porsyon dan Labib i kapab, avek benefis, ganny analize par servi enn oubyen plis sa bann lapros. Anmezir ki ou reponn sa bann kestyon lo bann paz swivan, ou pou vwar konman ki sa i leka.

(1) Souvannfwa, sa porsyon Labib ki ou pe lir i kapab dir ou en keksoz lo ki kalite Bondye Zeova i ete. Par egzanp, dan Psonm 139:13, 14, nou aprann sa gran lentere ki Bondye i annan pour en baba ki pa ankor ne: “Ou’n protez mwan dan vant mon manman. Mon pou loue ou parski dan en fason ki enspir lakrent mon’n ganny fer dan en fason merveye. Ou bann travay i merveye, parey mon nanm i byen okouran.” Wi vreman bann kreasyon Zeova i merveye! Lafason ki imen in ganny fer i temwanny son gran lanmour pour nou.

An rapor avek sa ki Zan 14:9, 10 i dir, kan nou lir lafason ki Zezi ti azir avek lezot, nou an realite pe vwar konman Zeova li menm ti pou azir. Avek sa antet, ki nou kapab konklir konsernan Zeova par sa bann lensidan ki ganny rikorde dan Lik 5:12, 13 ek Lik 7:11-15?

(2) Reflesir konman ki sa resi i relye avek tenm Labib: demontre ki dominasyon Zeova i pli meyer e sangtifye son non par Rwayonm Zezi Kri, sa Semans promiz.

Ki mannyer tenm Labib ti ganny aksantye par Ezekyel ek Danyel? (Ezekyel 38:21-23; Danyel 2:44; 4:17; 7:9-14)

Konman Labib i klerman idantifye Zezi konman sa Semans promiz? (Galat 3:16)

Ki mannyer Revelasyon i dekrir moman for sa tenm ki Labib i devlope? (Revelasyon 11:15; 12:7-10; 17:16-18; 19:11-16; 20:1-3; 21:1-5)

(3) Demann ou lekor konman ou kapab fer laplikasyon personnel sa ki ou pe lir. Par egzanp, dan Egzod ziska Deterononm nou lir konsernan rebelyon ek imoralite bann Izraelit. Nou aprann ki sa bann latitid ek aksyon ti anmenn bann move konsekans. Alor, nou devret ganny pouse pour fer plezir Zeova par pa imit move legzanp bann Izraelit. “Tousala ti ariv zot pour servi konman legzanp pour lezot, me in ganny ekri konman en lavertisman pour nou, ki’n ariv dan letan lafen.”—1 Korentyen 10:11.

Sa resi kot Kaen ti touy Abel i annan ki leson pour nou? (Zenez 4:3-12; Ebre 11:4; 1 Zan 3:10-15; 4:20, 21)

Eski konsey Labib pour bann Kretyen ki annan lesperans seles i osi aplik pour sa bann ki annan lesperans pour viv eternelman lo later? (Nonm 15:16; Zan 10:16)

Menm si nou annan en bon repitasyon dan kongregasyon Kretyen, akoz nou bezwen reflesir konman pour aplik pli plennman konsey Labib ki nou deza konnen? (2 Korentyen 13:5; 1 Tesalonisyen 4:1)

(4) Reflesir lo konman ou kapab servi sa ki ou pe lir pour ed lezot. Tou dimoun i konsernen avek bann problenm lasante, alor nou kapab lir avek zot sa ki Zezi ti fer pour demontre sa ki i pou fer lo en gran lesel letan i rennyen konman Lerwa pwisan dan Rwayonm Bondye: “Bann lafoul ti vin kot li. Zot ti anmenn bann dimoun bwete, bann envalid, bann aveg, bann kozpa e en kantite lezot dimoun . . . e i ti geri zot.”—Matye 15:30.

Lekel ki nou kapab ede an servan sa resi lo rezireksyon fiy Zairis? (Lik 8:41, 42, 49-56)

13. Ki rezilta nou kapab ekspekte si nou toultan swiv progranm lektir ek letid Labib regilye lorganizasyon Zeova?

¹³ Lektir Labib i anmenn vreman bokou rekonpans kan nou konsider sa kat pwen ki’n fek ganny mansyonnen! I vre, lektir Labib i en defi. Me i kapab benefisye nou pour lavi diran, akoz kan nou lir Labib, nou pou vin pli for spirityelman. Lektir Labib regilye pou apros nou pli pros avek nou Papa lanmour, Zeova, e avek nou bann frer ek ser Kretyen. I pou ed nou pour port latansyon lo sa konsey pour ‘atas nou for avek parol lavi.’—Filipyen 2:16.

[Not anba lo paz]

Revizyon

• Akoz Labib in ganny ekri e prezerve ziska nou lepok?

• Konman nou kapab ed lezot pour apresye Labib?

• Akoz lir Labib regilyerman i itil? Lekel sa kat lapros ki nou kapab servi pour analiz avek benefis sa ki nou lir?

[Bwat/Portre lo paz 30]

KAN OU LIR EN PORSYON LABIB, MAZINEN

Ki i dir ou lo sa kalite Bondye ki Zeova i ete

Konman i relye avek tenm Labib

Ki lefe i devret annan lo ou lavi

Konman ou kapab servi li pour ed lezot