Kestyon Lekter
Lefe ki Zeova i pare pour pardonn bann pese par merit sakrifis ranson, akoz ki i neseser pour bann Kretyen konfes avek bann ansyen dan kongregasyon?
Parey nou kapab vwar dan ka David ek Bat-seba, Zeova ti pardonn pese David menm si i ti grav, akoz David ti senserman repantir. Kan profet Natan ti apros li, David ti ouvertman konfese: “Mon’n fer pese kont Zeova.”—2 Samyel 12:13.
Toutfwa, Zeova pa senpleman pardonn e aksepte konfesyon senser en dimoun me avek lanmour i osi fer bann provizyon pour ed sa enn ki’n fer pese pour progrese spirityelman. Dan ka David, sa led ti vin atraver profet Natan. Ozordi, dan kongregasyon Kretyen, i annan bann zonm ki matir spirityelman, oubyen bann ansyen. Disip Zak ti eksplike: ‘Eski i annan ki malad [spirityelman] parmi zot? I devre apel bann ansyen dan [kongregasyon], e zot a priy pour li e zot a vers delwil lo li o non Senyer. Lapriyer avek lafwa i a sov sa malad, e Senyer i a donn li lasante; e si i’n komet okenn pese i a ganny pardonnen.’—Zak 5:14, 15.
Bann ansyen kalifye i kapab fer en kantite pour ed en dimoun ki’n fer pese e ki regrete. Zot esey imit Zeova dan fason ki zot tret sa dimoun. Zot pa zanmen esey vin dir, menm si i neseser pour administre en disiplin sever. Plito, avek konpasyon zot konsider bann bezwen sa endividi. Avek pasyans zot esey redres fason panse sa dimoun an servan Parol Bondye. (Galat 6:1) Menm si en dimoun pa volonterman konfes son pese, i kapab repantir kan i ganny aprose par bann ansyen, parey David ti fer letan Natan ti apros li. Soutyen ki bann ansyen i donnen i ed sa dimoun pour evit danze pour repet sa fot ek bann konsekans grav ki ariv lo en dimoun ki kontinyen fer pese.—Ebre 10:26-31.
En dimoun ki’n fer en keksoz mal e ki kanmi i pa vwar li fasil pour konfes avek lezot e resers pardon. I demann en gran zefor. Toudmenm, reflesir pour en moman lo lot posibilite. En frer ki pa ti kapab devwal son fot grav avek bann ansyen dan kongregasyon ti dir: “Mon ti santi en douler dan mon leker ki pa ti pou zanmen arete. Mon ti fer plis zefor dan predikasyon, me sa regre ti reste.” I ti panse ki konfes avek Zeova dan lapriyer ti sifi, me i kler ki sa pa ti leka, akoz i ti eksperyans menm santiman avek Lerwa David. (Psonm 51:8, 11) Pa i pli byen si nou aksepte lasistans ki Zeova i fourni avek lanmour atraver bann ansyen!