Nou devret onnet dan tou keksoz

1, 2. Ki mannyer Zeova i santi ler i vwar nou pe fer zefor pour nou onnet?

EN ZOUR ler en garson ti pe marse sorti lekol ti anmas en portfey plen avek larzan. Ki i ti fer? I ti’n kapab gard pour li, me i ti deside rann sa portfey son met. Ler manman sa garson ti tande ki i ti’n fer, i ti vreman fyer.

² Bokou paran i kontan ler zot zanfan i onnet. Nou Papa ki dan lesyel, Zeova, i “en Bondye laverite” e i kontan ler nou onnet. (Psonm 31:5, NWT) Nou anvi fer li plezir e “konport nou onnetman dan tou keksoz.” (Ebre 13:18) Annou egzamin kat domenn dan lavi kot nou kapab vwar li difisil pour nou onnet. Apre sa, nou pou vwar bann byenfe ki nou gannyen ler nou onnet.

NOU BEZWEN ONNET AVEK NOU LEKOR

3-5. (a) Ki mannyer nou kapab onnet avek nou lekor? (b) Kwa ki pou ed nou pour onnet avek nou lekor?

³ Pour nou onnet avek lezot, premyerman nou bezwen onnet avek nou lekor. Sa pa toultan fasil. Dan premye syek, bann Kretyen dan kongregasyon Laodise ti anbet zot lekor e krwar ki zot ti pe fer plezir Zeova me an realite, i pa ti leka. (Revelasyon 3:17) Nou osi nou kapab anbet nou lekor e krwar ki nou en dimoun ki nou pa vreman ete.

⁴ Zapot Zak ti eksplike: “Si en dimoun i panse ki i pe ador Bondye me i pa seryezman kontrol son labous, i pe anbet son lekor e son ladorasyon i initil.” (Zak 1:26) Nou pou anbet nou lekor si nou krwar ki osi lontan ki nou pe fer bann bon keksoz, Bondye pa pou fatig li si nou koz brit, koz dimoun mirak oubyen koz manti. Kwa ki kapab ed nou pour pa anbet nou lekor?

⁵ Ler nou get dan laglas, nou kapab vwar nou lekor fizik. Ler nou lir Labib, nou kapab vwar sa ki nou ete anndan. Labib i kapab ed nou pour konn nou pwen for ek nou pwen feb. Nou pou konn bann sanzman ki nou bezwen fer dan nou fason panse, azir e koze. (Lir Zak 1:23-25.) Me si nou krwar ki nou napa okenn defo, nou pa pou fer bann sanzman neseser. Alor, nou bezwen servi Labib pour egzamin nou onnetman. (Lamantasyon 3:40; Agai 1:5) Lapriyer osi i ed nou pour vwar sa ki nou vreman ete. Nou kapab demann Zeova dan lapriyer pour egzamin nou e ed nou pour vwar nou bann defo pour ki nou kapab travay lo la. (Psonm 139:23, 24) Mazinen ki “Zeova i deteste en dimoun ki rize, me i bon zanmi avek dimoun ki drwat.”​—Proverb 3:32, NWT.

LONNEKTE DAN FANMIR

6. Akoz en msye ek en madanm i devret onnet avek kanmarad?

⁶ Lonnekte i vreman enportan dan fanmir. Ler en msye ek en madanm pa kasyet nanryen avek kanmarad, zot pou santi zot an sekirite e zot kapab vreman annan konfyans dan kanmarad. Nou kapab dezonnet dan maryaz dan diferan fason. Par egzanp, en dimoun i kapab konmans rod latansyon en lot dimoun, get pornografi oubyen devlop en relasyon romantik avek en lot dimoun an sekre. Remarke ki en psalmis ti dir: “Mon pa frekant bann ki anbet lezot e mon reste lwen avek bann ki kasyet sa ki zot ete.” (Psonm 26:4, NWT) Si ou pa onnet avek ou konzwen menm dan ou panse, i pou gat ou maryaz.

7, 8. Ki mannyer ou kapab ansenny ou zanfan lenportans lonnekte?

⁷ Bann zanfan osi i bezwen aprann ki lonnekte i enportan. Paran i kapab servi Labib pour ansenny zot sa. Labib i koz lo bann move legzanp kot dimoun ti dezonnet: Akan ti vin en voler, Geazi ti koz manti pour li ganny larzan e Zida ti vol larzan e pli tar i ti trai Zezi pour 30 pyes larzan.​—Zozye 6:17-19; 7:11-25; 2 Lerwa 5:14-16, 20-27; Matye 26:14, 15; Zan 12:6.

⁸ I osi annan bann bon legzanp dan Labib kot dimoun ti onnet: Zakob ti ankouraz son bann garson pour retourn avek sa larzan ki zot ti’n trouve, Zefta ek son fiy ti gard promes ki Zefta ti’n fer avek Bondye e Zezi ti onnet menm dan bann sityasyon difisil. (Zenez 43:12; Ziz 11:30-40; Zan 18:3-11) Sa bann legzanp i kapab ed zanfan pour konpran lenportans lonnekte.

9. Si paran i onnet, ki mannyer sa pou ed zot zanfan?

⁹ Paran i kapab aprann en leson atraver sa prensip Labib ki enportan: “Me ou ki pe ansenny lezot, akoz ou pa ansenny ou prop lekor? Ou ki pe ansennyen, ‘Pa vole,’ eski ou vole?” (Romen 2:21) Bann zanfan i konnen ler zot paran i dir en keksoz me apre fer en lot. Si nou dir nou zanfan ki zot bezwen onnet me nou nou pa onnet, nou zanfan pou konfize. Si zanfan i remarke ki zot paran i koz manti, menm lo bann pti keksoz, tre probab zot pou fer parey. (Lir Lik 16:10.) De lot kote, ler zanfan i vwar ki zot paran i onnet, sa i kapab ed zot pour vin bann paran ki diny konfyans ler zot menm zot ganny zanfan.​—Proverb 22:6; Efezyen 6:4.

LONNEKTE DAN KONGREGASYON

10. Ki mannyer nou kapab onnet ler nou koz avek nou bann frer ek ser?

¹⁰ Nou osi bezwen onnet avek nou bann frer ek ser dan kongregasyon. I fasil dan nou konversasyon toulezour pour konmans fann rimer oubyen menm fer bann fo lakizasyon. Si nou repet en keksoz ki nou pa ni menm asire si i vre, nou kapab pe propaz en mansonz. I pli bon si nou ‘kontrol nou lalang.’ (Proverb 10:19) Par kont, lonnekte pa vedir ki nou bezwen dir tou sa ki nou pe mazinen, konnen oubyen tande. Menm si sa ki nou pe al dir i vre, petet sa sityasyon pa konsern nou oubyen i pa neseser repete ouswa i mal pour repete. (1 Tesalonisyen 4:11) Serten dimoun i koz brit akoz dapre zot, zot fran. Me konman pep Zeova, nou anvi ki nou parol i toultan bon e agreab.​—Lir Kolosyen 4:6.

11, 12. (a) Akoz i pa fer sans pour kasyet en pese grav? (b) Ki serten kestyon nou kapab demande? (c) Ki mannyer nou kapab onnet avek lorganizasyon Zeova?

¹¹ Zeova in donn bann ansyen sa responsabilite pour ed kongregasyon. I pli fasil pour bann ansyen ed nou ler nou onnet avek zot. Akoz? Si ou malad e ou al kot dokter, eski ou pou kasyet serten sentonm avek li? Si ou fer sa, ki mannyer i pou kapab ed ou? Pareyman, si nou fer en fot grav, nou pa devret koz manti. O kontrer, nou devret al koz avek bann ansyen. (Psonm 12:2, NWT; Akt 5:1-11) Prezan esey mazin sa sityasyon: Ki ou pou fer si ou konnen ki ou zanmi in fer en fot grav? (Levitik 5:1) Eski ou pou dir: “Si mon vreman son zanmi, mon pa pou dir nanryen”? Oubyen eski ou pou rapel ki bann ansyen i la pour donn li sa led ki neseser pour rebatir e ranforsi son relasyon avek Zeova?​—Ebre 13:17; Zak 5:14, 15.

¹² Nou bezwen onnet osi avek lorganizasyon Zeova ler nou pe ranpli bann form. Par egzanp, ler nou pe ranpli nou rapor predikasyon. Nou osi onnet ler nou pe ranpli en laplikasyon pour pran servis pionye oubyen lezot form servis.​—Lir Proverb 6:16-19.

13. Ki mannyer nou kapab onnet ler nou fer biznes avek en lot Temwen?

¹³ Dan kongregasyon, nou pa devret melanz biznes ek ladorasyon pour Zeova. Par egzanp, nou pa pou fer biznes kot Lasal Rwayonm oubyen dan predikasyon. Osi, nou pa pou profit lo nou bann frer ek ser dan biznes. Si ou anploy en Temwen, pey li aler e donn li sa saler ki zot ti tonm dakor lo la e osi bann benefis ki’n ganny demande par lalwa. Sa i kapab enkli deklar bann travayer, pey bann taks e pey bann travayer ler zot dan konze. (1 Timote 5:18; Zak 5:1-4) Si ou’n ganny anploye par en Temwen, ou pa devret ekspekte ki ou pou ganny trete dan en fason spesyal. (Efezyen 6:5-8) Fer sir ki ou travay dapre sa kantite letan ki zot in tonm dakor lo la e fer sa travay ki ou pe ganny peye pour fer.​—2 Tesalonisyen 3:10.

14. Ki en Kretyen i devret fer avan konmans fer en biznes avek en lot Kretyen?

¹⁴ Ki nou devret fer si nou konmans en biznes avek en lot Temwen? Sa i kapab enplik envestir oubyen pret en sonm larzan. Dan bann sityasyon koumsa, i annan en bon prensip Labib: Met tou keksoz an ekri! Ler profet Zeremi ti aste en bout later, i ti fer de kopi sa lagreman. I ti fer bann temwen siny en kopi e i ti anmas sa de dokiman konman en laprev ki ti pou kapab ganny servi pli tar. (Zeremi 32:9-12; vwar osi Zenez 23:16-20.) Serten i santi ki si zot fer en lagreman an ekri, i pou konmsi zot napa konfyans dan zot frer oubyen ser. Me an realite, fer en lagreman an ekri i kapab ede pour evit bann mal konprenezon, dezapwentman ek dezakor. Osi, pa bliye ki lape dan kongregasyon i pli enportan ki fer profi dan biznes.​—1 Korentyen 6:1-8; vwar Lezot lenformasyon nimero 30.

LONNEKTE DAN SA LEMONN

15. Ki pwennvi Zeova lo bann pratik malonnet dan biznes?

¹⁵ Nou devret onnet avek tou dimoun, enkli bann ki pa Temwen Zeova. Pour Zeova, i enportan ki nou onnet. “Zeova pa kontan en balans ki pa egzakt me en pwa egzakt i fer li plezir.” (Proverb 11:1, NWT; 20:10, 23) Dan letan lontan, balans ti ganny servi dan bann tranzaksyon biznes. Me serten marsan ti vol zot kliyan par donn mwens marsandiz oubyen fer zot pey pli ser ki sipoze. Ozordi, parey dan letan Labib, en kantite dimoun i malonnet dan biznes. Zis parey dan letan Labib, Zeova i deteste bann pratik malonnet.

16, 17. Ki bann pratik dezonnet ki nou devret rezete?

¹⁶ Nou tou nou fer fas avek bann sityasyon kot i posib pour nou azir dan en fason dezonnet. Par egzanp, ler nou pe fer laplikasyon pour en plas travay, ranpli bann form gouvernman e ler nou pe fer legzanmen. En kantite dimoun i krwar ki napa nanryen mal avek koz manti, egzazere oubyen donn larepons ki pa egzakt. Sa pa drol akoz Labib ti predir ki dan bann dernyen zour sa lemonn Satan, dimoun ti pou “egois, kontan larzan, . . . zot pa [ti] pou kontan sa ki byen.”​—2 Timote 3:1-5.

¹⁷ Par fwa, i kapab paret ki dimoun ki dezonnet i pli byen reisi dan sa lemonn ozordi. (Psonm 73:1-8) En Kretyen i kapab menm perdi son travay, perdi larzan oubyen ganny viktimize kot travay akoz i onnet. Me i vo lapenn pour nou onnet. Akoz?

BENEDIKSYON KI NOU GANNYEN LER NOU ONNET

18. Akoz en bon repitasyon i annan en gran valer?

¹⁸ En repitasyon konman en dimoun onnet, diny konfyans e ki dimoun i kapab depan lo la i vreman annan valer e i rar dan sa lemonn. Nou tou nou kapab devlop en repitasyon koumsa. (Mika 7:2) I vre, serten dimoun i kapab sikann ou si ou onnet e menm dir ki ou bet. Me i annan dimoun ki pou apresye ki ou en dimoun onnet e zot pou annan konfyans dan ou. Partou dan lemonn, Temwen Zeova i renonmen pour zot lonnekte. Serten anployer i prefere pran bann Temwen pour travay pour zot akoz zot konnen ki zot onnet. Ler lezot dimoun i ganny pouse akoz zot dezonnet, souvandfwa bann Temwen pa perdi zot plas travay.

19. Ki lefe ou lonnekte pou annan lo ou lanmitye avek Zeova?

¹⁹ Ler ou onnet dan tou keksoz, ou pou annan en konsyans kler ek lape lespri. Nou kapab vin parey Pol ki ti ekri: “Nou annan konfyans ki nou annan en bon konsyans.” (Ebre 13:18) Pli enportan ankor, ou Papa, Zeova pou vwar e i pou apresye ou zefor pour ou onnet dan tou keksoz.​—Lir Psonm 15:1, 2; Proverb 22:1.