Annou touzour fer lape

“Annou rod sa bann keksoz ki prodwi lape.” ​—ROM. 14:19.

1, 2. Akoz Temwen Zeova i anpe antre zot?

I PA fasil pour eksperyans vre lape dan sa lemonn. Menm bann dimoun ki sorti dan menm pei oubyen ki koz menm langaz i souvan pa ini ansanm lo plan relizye, politik e sosyal. Par kont, pep Zeova i ini menm si zot sorti “dan tou nasyon, tribi, pep ek lalang.”​—Rev. 7:9.

² I pa par azar ki i annan sa lape ki egziste parmi pep Bondye. Rezon prensipal akoz sa i posib se ki nou “annan lape avek Bondye” akoz nou annan lafwa dan son Garson ki’n delivre nou dan nou pese par son disan. (Rom. 5:1; Efe. 1:7) Deplis, Bondye i donn son lespri sen son bann serviter fidel ensi ki fri lespri ki enkli lape. (Gal. 5:22) En lot rezon ki promouvwar sa linite ek lape se ki nou “pa fer parti lemonn.” (Zan 15:19) Nou pa pran okenn kote dan bann zafer politik. Vi ki nou’n ‘forz nou lepe an pyos,’ nou pa partisip dan bann lager sivil e enternasyonal.​—Iza. 2:4.

3. Ki nou kapab fer gras a sa lape ki egziste dan kongregasyon e ki nou pou etidye dan sa lartik?

³ Sa lape ki egziste parmi nou i pa zis vedir nou pa fer ditor kanmarad. Menm si tou dimoun dan kongregasyon i diferan, sorti dan diferan group etnik ek kiltir, nou “kontan kanmarad.” (Zan 15:17) Gras a sa lape, nou “fer dibyen tou dimoun, sirtou nou bann frer dan lafwa.” (Gal. 6:10) Nou bezwen apresye e protez sa paradi spirityel kot i annan lape. Alor, annou gete ki mannyer nou kapab touzour fer lape dan kongregasyon.

Ler nou komet lerer

4. Ki nou kapab fer pour fer lape si nou’n ofans en dimoun?

⁴ Disip Zak ti ekrir: “Nou [tou nou] komet lerer dan plizyer mannyer. Si en dimoun pa komet lerer dan sa ki i dir i en dimoun parfe.” (Zak 3:2) Pour sa rezon, i pou annan bann pti problenm ek mal konprenezon ant bann Kretyen dan kongregasyon. (Fili. 4:2, 3) Toudmenm, sa bann pti problenm i kapab ganny rezourd san ki i afekte lape dan kongregasyon. Par egzanp, egzamin sa konsey ki nou devret swiv si nou realize ki nou’n ofans en dimoun.​—Lir Matye 5:23, 24.

5. Ki mannyer nou kapab fer lape ler en dimoun in ofans nou?

⁵ Me si en dimoun in ofans nou dan en fason ki pa sitan grav? Eski nou ekspekte ki sa dimoun i vin kot nou pour demann leskiz? 1 Korentyen 13:5 i dir: “[Lanmour] pa gard rankin.” Ler nou ganny ofanse, nou devret kontinyen fer lape par pardonnen e oubliy sa ki’n arive. Si nou fer sa, nou pou montre ki nou ‘pa pe gard rankin.’ (Lir Kolosyen 3:13.) Sa fason fer i pli bon sirtou avek bann pti lofans ki arive dan lavi tou le zour akoz i ede pour gard en relasyon anpe avek lezot dan kongregasyon e nou pou annan lape lespri. En proverb i dir: “I en zoli keksoz . . . pour les pase lofans.”​—Prov. 19:11.

6. Ki nou devret fer si nou vwar li difisil pour les pase en serten lofans?

⁶ Me si nou vwar li difisil pour les pase en serten lofans? I pa en bon lide pour koz lo sa sityasyon avek tou dimoun ki anvi tande. Sa bann bavardaz i zis kas linite ek lape dan kongregasyon. Ki nou kapab fer pour rezourd sa problenm dan lape? Matye 18:15 i dir: “Si ou frer in ofans ou, al rod li e montre li son fot, priveman, zis ant zot de. Si i ekout ou, ou a’n reganny ou frer.” Matye 18:15-17 i koz lo bann pese grav me nou kapab aplik prensip ki dan verse 15. Avek lanmour, apros sa dimoun ki’n ofans nou e an prive esey fer lape avek li.a

7. Akoz nou devret rezourd bann dispit deswit?

⁷ Zapot Pol ti ekrir: “Si zot pran lakoler fer atansyon pour zot pa tonm dan pese, e fer atansyon pa les zot lakoler dire ziska aswar. Pa les dyab pran lavantaz lo zot.” (Efe. 4:26, 27) Zezi ti dir: “Si en dimoun i akiz ou e pe anmenn ou devan lakour, depese fer zanmi avek li.” (Mat. 5:25) Alor, fer lape i vedir rezourd problenm deswit. Akoz? Parski i anpese ki sa sityasyon i deteryore, en pe parey en boubou ki enfekte akoz i pa’n ganny byen netwaye. Alor, pa les lorgey, zalouzi ek lanmour pour larzan anpes nou rezourd bann dispit desito ki zot arive.​—Zak 4:1-6.

Kan en problenm i enplik plizyer dimoun

8, 9. (a) Ki diferan pwennvi i ti annan ant bann Kretyen Ronm dan premye syek? (b) Ki konsey Pol ti donn bann Kretyen Ronm konsernan sa dispit?

⁸ Par ler bann difikilte ki leve dan kongregasyon i kapab enplik plis ki de dimoun. Pol ti ekrir en let pour bann Kretyen Ronm akoz zot ti pe rankontre sa problenm. I ti annan en dispit ant bann Kretyen Zwif ek non Zwif. Aparaman, serten dan sa kongregasyon ti krwar ki zot ti pli byen ki zot frer ki zot konsyans ti pli feb oubyen pli strik dan lafason ki zot ti aplik sa ki Labib i dir. Sa bann dimoun ti ziz lezot dan kongregasyon lo bann keksoz vreman personnel. Ki konsey Pol ti donn sa kongregasyon? ​—Rom. 14:1-6.

⁹ Pol ti konsey tou le de group Kretyen. I ti dir sa bann ki ti konpran ki zot pa ti anba Lalwa Moiz ki zot pa ti devret krwar ki zot pli siperyer ki zot bann frer. (Rom. 14:2, 10) Akoz en latitid koumsa ti kapab fer tonbe bann krwayan ki ti vwar li mal pour manz bann manze ki zot pa ti devret manze dapre Lalwa. Pol ti konsey zot: “Pa detri travay Bondye pour en kestyon manze . . . I byen si ou pa manz lavyann, ou pa bwar diven, oubyen nenport ki keksoz ki kapab fer ou frer tonbe.” (Rom. 14:14, 15, 20, 21) De lot kote, Pol ti konsey bann Kretyen ki ti annan en pwennvi pli strik lo sa size pour pa ziz zot bann frer konman enfidel akoz zot ti annan en pwennvi mwen strik. (Rom. 14:13) I ti dir tou le de group ki ti enplike dan sa problenm ki zot pa devret annan “en tro gran lopinyon lo zot menm.” (Rom. 12:3) Apre ki i ti’n konsey zot, Pol ti ekrir: “Alor annou rod sa bann keksoz ki prodwi lape, e rann nou for ansanm dan lafwa.”​—Rom. 14:19.

10. Parey bann Kretyen Ronm dan premye syek, kwa ki neseser pour rezourd bann problenm denozour?

¹⁰ Nou kapab asire ki sa kongregasyon Ronm ti swiv konsey Pol e fer bann sanzman neseser. Pareyman, ler i annan problenm koumsa ant bann Kretyen dan kongregasyon ozordi, nou devret rezourd sa bann dispit avek labonte ek limilite par rod bann prensip Labib ki aplikab e swiv zot. Parey i ti le ka avek bann Romen, tou le de group ki enplike dan en serten dispit i kapab fer serten azisteman pour “viv an-pe avek kanmarad.”​—Mark 9:50.

Si ou’n ganny demande pour ede

11. Ki en ansyen i devret fer sir si en dimoun i vin koz avek li lo en problenm ki i’n gannyen avek son frer?

¹¹ Meton en Kretyen i anvi koz avek en ansyen lo en problenm ki i’n gannyen avek en manm son fanmir ouswa en lot Kretyen dan kongregasyon. Proverb 21:13 i dir: “Tou sa ki bous son zorey ler en malere pe plennyen, li osi i pou kriye me personn pa pou reponn.” En ansyen pa pou anvi “bous son zorey.” Par kont, en lot proverb i donn sa lavertisman: “Premye pour pled son koz i paret byen ziska ki son adverser i kontredir li.” (Prov. 18:17, La Bible en français courant) En ansyen i devret ekout avek pasyans, me i devret veye ki i pa pran kote avek sa enn ki’n vin raport sa lofans. Ler i’n fini ekoute, tre probab i pou demann li si i’n fini koz avek sa enn ki’n ofans li. Sa ansyen pou osi revwar bann diferan letap dapre Labib ki kapab ed sa dimoun ki’n ganny ofanse pour fer lape.

12. Donn legzanp pour montre danze ki i annan pour azir deswit apre ki nou’n tann en konplent.

¹² I annan trwa legzanp dan Labib ki montre nou danze ki i annan pour pran kote deswit apre ki ou’n ekout zis en dimoun ki enplike dan sa problenm. Potifar ti krwar zistwar son madanm ler i ti akiz Zozef konmkwa i ti’n esey vyol li. Menm si son lakoler pa ti zistifye, Potifar ti fer Zozef ganny zete dan prizon. (Zen. 39:19, 20) Lerwa David ti krwar Tsiba, ler i ti dir ki son met, Mefiboset ti’n pran kote avek bann lennmi David. David ti reponn deswit an dizan: “Gete! Tou sa ki pour Mefiboset i vin pour ou.” (2 Sam. 16:4; 19:25-27) Bann dimoun ti dir Lerwa Artakzerses ki bann Zwif ti pe rekonstri miray Zerizalenm e ki zot ti pe al rebel kont Lanpir Pers. Lerwa ti krwar sa fo rapor e i ti demande ki travay pour rekonstri Zerizalenm ti arete. Finalman, bann Zwif ti bezwen aret travay lo tanp Bondye. (Ezra 4:11-13, 23, 24) Avek lasazes, bann ansyen i swiv konsey ki Pol ti donn Timote, pour evite ziz bann sityasyon tro vitman.​—Lir 1 Timote 5:21.

13, 14. (a) Ki nou tou nou devret mazinen si i annan en dispit ki leve ant de dimoun? (b) Ki led bann ansyen i annan si zot bezwen ziz en sityasyon ki enplik bann frer ek ser dan kongregasyon?

¹³ Menm ler i paret ki nou’n ekout tou le de kote dan en dispit, i enportan pour mazinen ki “si en dimoun i pretann ki i konn keksoz, an realite i pa ankor konnen [parey] i devret konnen.” (1 Kor. 8:2) Eski nou konn tou lo ki mannyer sa dispit in konmanse? Eski nou konpran tou detay lo personnalite sa de dimoun ki enplike? Ler bann ansyen i bezwen ziz en zafer, i vreman enportan ki zot veye ki zot pa ganny anbete par bann mansonz, taktik ouswa rimer. Zezi Kri, sa Ziz ki Bondye in apwente i ziz avek lazistis. I pa “ziz selman dapre sa ki son lizye i vwar, e ni koriz zis dapre sa ki son zorey i tande.” (Iza. 11:3, 4) O kontrer, se lespri sen Zeova ki gid Zezi. Pareyman, bann ansyen dan kongregasyon i devret les lespri sen Bondye gid zot.

¹⁴ Avan ki zot ziz en sityasyon ki enplik bann frer ek ser dan kongregasyon, bann ansyen i devret priye pour ganny lespri sen Bondye e depan lo gidans Parol Bondye ek bann piblikasyon pibliye par lesklav fidel e pridan.​—Mat. 24:45, NW.

Lape a tou pri?

15. Akoz nou devret fer bann ansyen konnen si nou okouran ki en fot grav in ganny komet?

¹⁵ Konman Kretyen nou ganny demande pour fer lape. Toudmenm, Labib i osi dir: “Me lasazes ki sorti dan lesyel i premyerman pir, answit i kontan lape.” (Zak 3:17, nou ki’n met an italik.) I pli enportan reste pir ki fer lape, andotmo, toultan anvi gard bann standar drwat Bondye e viv dan en fason ki fer Bondye kontan. Si en Kretyen i okouran ki en manm kongregasyon in fer en pese grav, i devret ankouraz li pour al konfes son fot avek bann ansyen. (1 Kor. 6:9, 10; Zak 5:14-16) Si i pa fer li, sa Kretyen i devret met bann ansyen okouran. Si sa Kretyen pa fer sa akoz i anvi prezerv lape avek sa enn ki’n fer fot, li osi i pe partisip dan son pese.​—Lev. 5:1; lir Proverb 29:24.b

16. Ki nou kapab aprann avek lafason ki Yeou ti tret Lerwa Yeoram?

¹⁶ I annan en resi dan Labib konsernan Yeou ki montre ki en kondwit drwat devan Bondye i pli enportan ki reste anpe avek en dimoun. Bondye ti anvoy Yeou egzekit zizman lo fanmir Lerwa Aab. Move Lerwa Yeoram, garson Aab ek Zezabel ti al zwenn Yeou e dir li: “Eski i annan lape, Yeou?” Ki Yeou ti reponn? I ti dir: “Ki lape i kapab annan osi lontan ki i annan fornikasyon Zezabel ou manman ek son kantite grigri?” (2 Rwa. 9:22) Alor, Yeou ti pran son lark e tir en dart dan leker Yeoram. Pour prezerv lape dan kongregasyon, bann ansyen i devret pran aksyon parey Yeou ti fer, avek bann ki pratik pese volonterman e ki pa repantir. Bann peser ki pa repantir i ganny ekskli dan kongregasyon pour ki lape avek Bondye i ganny prezerve.​—1 Kor. 5:1, 2, 11-13.

17. Ki rol tou Kretyen i bezwen zwe pour prezerv lape?

¹⁷ Laplipar dispit dan kongregasyon pa enplik bann pese grav kot en konmite disiplin pou ganny formen. Pa i bon alor pour kouver fot lezot avek lanmour! Parol Bondye i dir: “Sa enn ki kontan son kanmarad i kouver lofans, me sa enn ki kontinyen koz lo sa size i separ bann ki pros avek kanmarad.” (Prov. 17:9) Si nou swiv sa bann parol, sa pou ed nou prezerv lape dan kongregasyon e gard en bon relasyon avek Zeova.​—Mat. 6:14, 15.

Benediksyon pour bann ki fer lape

18, 19. Ki byenfe bann ki fer lape pou gannyen?

¹⁸ Bann ki “rod sa bann keksoz ki prodwi lape” pou ganny bokou benediksyon. Nou annan en relasyon pros avek Zeova ler nou imit son fason azir e nou pou kontribye pour ki i annan lape ek linite dan nou paradi spirityel. Ler nou abitye fer lape dan kongregasyon, sa pou osi ed nou pour vwar bann diferan fason pour fer parey avek bann ki nou pe anons bon nouvel lape. (Efe. 6:15) Nou pou pli byen prepare pour ‘byen avek tou dimoun e annan pasyans.’​—2 Tim. 2:24.

¹⁹ Mazinen osi ki “dimoun bon konman move, pour resisite.” (Akt 24:15) Mazin sa letan ler plizyer milyon dimoun avek diferan lorizin, latitid ek personnalite, “depi fondasyon lemonn” ziska nou lepok, pou ganny resisite lo later. (Lik 11:50, 51) I pou en gran privilez pour ansenny tou sa bann dimoun ki pou resisite konman pour demontre lape. Sa formasyon ki nou gannyen la konmela pou ed nou prezerv lape sa letan, pa i vre!

[Not anba lo paz]

Ki ou’n aprann?

• Ki mannyer nou kapab fer lape si nou’n ofans en dimoun?

• Ki nou devret fer pour fer lape si en dimoun in ofans nou?

• Akoz i pa en bon keksoz pour pran kote avek en dimoun kan en problenm i leve?

• Eksplike akoz nou pa devret fer lape a tou pri.

[Portre lo paz 25]

Zeova i kontan sa bann ki pardonn lezot volonterman