“Avan tou, zot devre annan en gran Lanmour pour Kanmarad”

“Lafen tou keksoz i pros. . . . Avan tou, zot devre annan en gran lanmour pour kanmarad.”—1 PYER 4:7, 8.

ZEZI ti konnen ki son bann dernyen moman avek son bann zapot ti presye. I ti konnen kwa ki ti pe esper zot plitar. Zot ti annan en gran travay pour akonpli, me dimoun ti pou ay zot e osi persekit zot, zis parey li Zezi ti gannyen. (Zan 15:18-20) Sa dernyen sware avek zot, Zezi ti rapel zot plizyer fwa lenportans pour “kontan kanmarad.”—Zan 13:34, 35; 15:12, 13, 17.

² Zapot Pyer ki ti la sa zour swar, ti konpran lenportans sa ki Zezi ti’n dir. Detrwa lannen plitar, ler i ti pe ekrir zis en pe letan avan destriksyon Zerizalenm, Pyer ti fer resorti lenportans lanmour. I ti konsey bann Kretyen: “Lafen tou keksoz i pros. . . . Avan tou, zot devre annan en gran lanmour pour kanmarad.” (1 Pyer 4:7, 8) Parol Pyer i annan bokou sinifikasyon pour bann ki pe viv dan “bann dernyen zour” sa sistenm. (2 Timote 3:1) Ki savedir sa lekspresyon “en gran lanmour”? Akoz i enportan ki nou annan en tel lanmour pour kanmarad? Ki mannyer nou kapab demontre ki nou annan sa kalite lanmour?

“En gran Lanmour”—Kwa sa?

³ Bokou dimoun i panse ki lanmour i en santiman ki devret arive natirelman. Me Pyer pa ti koz lo nenport kalite lanmour. I ti pe koz lo sa pli gran kalite lanmour. Sa mo “lanmour” dan 1 Pyer 4:8 i en tradiksyon sa mo Grek a·gaʹpe. Sa mo i vedir en lanmour ki pa egois, ki ganny dirize oubyen enfliyanse par bann prensip. Dapre en serten resers, lanmour agape i en lanmour ki pa baze lo sa ki nou resanti me i montre nou determinasyon pour azir dapre en prensip. Vi ki nou’n erit sa tandans pour mazin zis nou lekor, nou bezwen bann rapel pour montre lanmour pour kanmarad. Nou bezwen fer li dapre bann prensip Bondye.—Zenez 8:21; Romen 5:12.

⁴ Sa pa vedir ki nou bezwen kontan kanmarad zis akoz nou oblize. Nou santiman, nou lafeksyon osi i enplike dan lanmour a·gaʹpe. Pyer ti dir ki nou devret “annan en gran lanmour [literalman vedir “deplizanpli vin gran,” Kingdom Interlinear] pour kanmarad.”a Toudmenm, en tel lanmour i demann zefor. Konsernan sa mo Grek ki ganny tradwir “gran,” en profeser i dir ki sa mo i donn lide bann gran zefor ki en atlet i fer lo laliny finisyon.

⁵ Alor nou lanmour, pa devret pous nou pour fer zis sa ki fasil pour nou oubyen demontre li zis anver detrwa dimoun. Lanmour Kretyen i demande ki nou “ouver” nou leker, ofer nou lanmour menm ler i kapab pa fasil pour fer li. (2 Korentyen 6:11-13) I kler ki sa kalite lanmour i en keksoz ki nou devret devlope e fer zefor pour demontre, zis parey en atlet i bezwen antrennen e fer zefor pour amelyor son abilite. I tre enportan ki nou annan sa kalite lanmour pour kanmarad. Akoz? Pour omwen trwa rezon.

Akoz nou devret kontan Kanmarad?

⁶ Premyerman, “parski lanmour i sorti kot Bondye.” (1 Zan 4:7) Zeova, li ki Sours sa zoli kalite, i’n kontan nou premye. Zapot Zan i dir: “La ki mannyer Bondye in montre son lanmour pour nou: in anvoy son sel Garson dan lemonn pour ki par li nou ganny lavi.” (1 Zan 4:9) Garson Bondye ti ganny ‘anvoye’ lo later konman en zonm, akonpli son minister, e mor lo en poto siplis. Tousala ti arive pour ki “nou ganny lavi.” Ki nou devret fer an retour pour tou sa lanmour ki Bondye in demontre anver nou? Zan i dir: “Si Bondye in kontan nou avek en tel lanmour, nou osi nou bezwen kontan kanmarad.” (1 Zan 4:11) Remark byen sa ki Zan i ekrir, “si Bondye in kontan nou”—pa zis ou me nou. Sa pwen i kler: Si Bondye i kontan nou bann frer ek ser, alor nou osi nou devret kontan zot.

⁷ Dezyenmman, ozordi i tre tre enportan ki nou kontan kanmarad ankor plis pour kapab ofer led nou bann frer ek ser ki dan bezwen akoz “lafen tou keksoz i pros.” (1 Pyer 4:7) Nou pe viv dan “letan difisil.” (2 Timote 3:1) Bann kondisyon lemonn, dezas natirel, ek lopozisyon i fer nou lavi difisil. Ler nou pas atraver bann sitiasyon koumsa, nou bezwen vin pli pre avek kanmarad. Si nou annan en gran lanmour, sa pou ini nou for ansanm e motiv nou pour pran “swen” avek kanmarad.—1 Korentyen 12:25, 26.

⁸ Trwazyenmman, nou bezwen kontan kanmarad akoz nou pa anvi “les dyab pran lavantaz” lo nou. (Efezyen 4:27) Satan i pare pour servi lenperfeksyon nou frer ek ser Kretyen—zot febles, defo, ek fot—konman bann lobstak pour nou. Eski nou pou les en remark san reflesir oubyen en keksoz ki nou bann frer ek ser in fer ki mank konsiderasyon elwanny nou avek kongregasyon? (Proverb 12:18) Nou pa pou fer sa si nou annan en gran lanmour pour kanmarad! En tel lanmour i ed nou gard lape e reste ini pour servi Bondye “zepol kont zepol.”—Tsefanya 3:9.

Konman demontre ki ou kontan lezot

⁹ Demontre lanmour i bezwen konmans dan lakour. Zezi ti dir ki son bann vre disip pou ganny idantifye par lanmour ki zot annan pour kanmarad. (Zan 13:34, 35) Lanmour i bezwen evidan pa zis dan kongregasyon me osi dan fanmiy—ant msye ek madanm e ant paran ek zanfan. Nou pa devret zis santi lanmour pour nou fanmiy, me nou bezwen eksprim li dan bann bon fason.

¹⁰ Ki mannyer msye ek madanm i kapab montre lanmour pour kanmarad? En msye ki senserman kontan son madanm i fer li konnen par son parol ek aksyon—an piblik ou an prive—ki i seri li. I respekte dinite son madanm e pran an konsiderasyon son panse, pwennvi, ek santiman. (1 Pyer 3:7) I met son lentere avan pour li, e i fer tou sa ki i kapab pour pran swen avek son bezwen materyel, spirityel, e emosyonnel. (Efezyen 5:25, 28) En madanm ki vreman kontan son msye i “respekte” li, menm si parler son msye pa fer sa ki i ekspekte li fer. (Efezyen 5:22, 33) I siport son msye e soumet avek li. I pa fer bann demann ki pa rezonnab, me i korpere avek li pour zot kontinyen konsantre lo bann keksoz spirityel.—Zenez 2:18; Matye 6:33.

¹¹ Paran, ki mannyer ou kapab montre lanmour pour ou zanfan? Lefe ki ou devoue pour travay dir pour fourni zot bezwen materyel, i montre ki ou kontan zot. (1 Timote 5:8) Me zanfan i bezwen plis ki manze, lenz, ek en twa lo zot latet. Pour zot grandi e vin en dimoun ki kontan e servi Zeova, zot bezwen ledikasyon spirityel. (Proverb 22:6) Pour arive fer sa, fodre met letan dekote konman en fanmiy pour etidye Labib, pour partisip dan predikasyon, e asiste renyon. (Deterononm 6:4-7) Pour kapab kontinyen fer sa bann aktivite, fodre fer bokou sakrifis sirtou dan sa letan difisil. Ou lentere ek zefor ki ou fer pour pran swen avek spirityalite ou zanfan i demontre ki ou kontan zot, akoz ou montre ki ou pran zot byennet eternel aker.—Zan 17:3.

¹² I tre enportan ki paran i osi montre lanmour par pran swen avek bezwen emosyonnel zot zanfan. Zanfan i frazil. Zot bezwen santi e asire ki ou kontan zot. Ou bezwen dir zot ou kontan zot, e donn zot bokou lafeksyon, akoz ler zot vwar sa zot asire ki ou kontan zot e ki zot annan valer. Felisit zot senserman akoz sa i fer zot konnen ki ou rekonnet e apresye zot zefor. Disiplin zot avek lanmour, akoz sa bann koreksyon i dir zot ki ou enterese avek kalite dimoun ki zot pe vini. (Efezyen 6:4) Tou sa bann bon fason pour montre lanmour i ede batir en fanmiy ere e solid, ki pli byen ekipe pour reziste presyon sa bann dernyen zour.

¹³ Lanmour i motiv nou pour inyor defo lezot. Ler i ti konsey son bann lekter pour “annan en gran lanmour pour kanmarad,” Pyer ti dir akoz sa ti sitan enportan: “Parski lanmour i kouver en kantite pese.” (1 Pyer 4:8) “Kouver” pese pa vedir kasyet bann pese grav. Bann pese grav i bezwen ganny raporte e bezwen ganny konsidere par bann frer responsab dan kongregasyon. (Levitik 5:1; Proverb 29:24) I pa byen e pa an armoni avek Labib pour les bann dimoun ki pe fer pese grav kontinyen fer ditor oubyen viktimiz bann ki inosan.—1 Korentyen 5:9-13.

¹⁴ Dan laplipar ka, bann fot ek lerer nou bann frer ek ser i pa grav. Nou tou nou fer fot an parol oubyen par aksyon parler. Nou dezapwent oubyen menm ofans kanmarad. (Zak 3:2) Eski nou devret fer tou dimoun konn defo lezot? Si nou azir koumsa, sa pou zis kree divizyon dan kongregasyon. (Efezyen 4:1-3) Si nou les lanmour gid nou, nou pa pou “devwal en defo” en konpanyon Kretyen. (Psonm 50:20) Zis parey krepi ek lapentir i kouver bann defo dan en miray, pareyman lanmour i kouver defo lezot.—Proverb 17:9.

¹⁵ Lanmour pou pous nou ed sa bann ki bezwen led. Anmezir ki kondisyon dan bann dernyen zour i kontinyen deteryore, i kapab arive ki nou frer ek ser i bezwen led materyel oubyen fizik. (1 Zan 3:17, 18) Par egzanp, eski en manm nou kongregasyon i annan en gro problenm larzan oubyen i’n perdi son travay? Alor petet nou kapab ofer serten lasistans materyel, dapre nou sitiasyon. (Proverb 3:27, 28; Zak 2:14-17) Eski lakaz en vev alaz i bezwen reparasyon? Petet nou kapab pran linisyativ pour fer serten sa bann louvraz.—Zak 1:27.

¹⁶ Nou pa zis montre lanmour anver dimoun ki reste pre avek nou. Parler nou kapab antann rapor konsernan bann serviter Bondye dan lezot pei ki’n viktim bann gro tanpet, tranbleman-d-ter, oubyen lager sivil. Petet zot byen bezwen manze, lenz, ek lezot keksoz. I pa fer okenn diferans si zot sorti dan en lot ras oubyen group etnik. Nou ‘kontan tou nou bann frer dan lafwa.’ (1 Pyer 2:17) Alors, parey bann kongregasyon dan premye syek, nou anvi siport bann led sekour ki’n ganny organize pour fourni led. (Akt 11:27-30; Romen 15:26) Ler nou montre lanmour dan tou sa bann fason, nou fer sa lanmour ki ini nou dan sa bann dernyen zour vin pli for.—Kolosyen 3:14.

¹⁷ Lanmour i pous nou pour partaz sa bon nouvel Rwayonm Bondye avek lezot. Konsider legzanp Zezi. Akoz i ti prese e ansennyen? I ti “pran pitye” pour lafoul akoz zot move kondisyon spirityel. (Mark 6:34) Bann fo berze relizye ki ti sipoze ansenny zot laverite e donn zot lespwar, ti negliz zot e anbet zot. Alor, motive par en profon lanmour ek konpasyon, Zezi ti rekonfort zot avek sa “Bonn Nouvel konsernan Rwayonm Bondye.”—Lik 4:16-21, 43.

¹⁸ Ozordi osi, bokou dimoun in ganny neglize lo plan spirityel e ganny anbete. Zot napa okenn lespwar. Si parey Zezi, nou vin pli konsyan bezwen spirityel sa bann ki pa ankor konn sa vre Bondye, dan sa ka lanmour ek konpasyon pou pous nou pour partaz avek zot sa bon nouvel Rwayonm Bondye. (Matye 6:9, 10; 24:14) Vi ki i reste en pti gin letan, ozordi i pli irzan ki zanmen avan pour pres sa mesaz ki sov lavi.—1 Timote 4:16.

“Lafen tou Keksoz i pros”

¹⁹ Rapel ki avan Pyer ti konsey nou pour annan lanmour pour kanmarad, i ti dir: “Lafen tou keksoz i pros.” (1 Pyer 4:7) Byento, sa lemonn mesan pou ganny ranplase par nouvo lemonn drwat Bondye. (2 Pyer 3:13) Alors, la pa lemoman pour nou pran tou keksoz fasil. Zezi ti averti nou: “Fer byen atansyon zotmenm, pangar zot vizilans i ganny detournen avek festen, labwason ek traka lavi. Fer atansyon sa zour i sirprann zot parey en pyez.”—Lik 21:34, 35.

²⁰ Alors, par tou mwayen posib, annou ‘kontinyen veye,’ reste konsyan dan ki letan nou pe viv. (Matye 24:42) Annou reste vizilan kont okenn tantasyon Satan ki kapab detourn nou. Annou pa zanmen les sa lemonn ki napa lanmour anpes nou demontre nou lanmour pour lezot. Deplis, annou apros pli pros avek sa vre Bondye, Zeova, ki pou byento akonpli son plan merveye pour sa later gras a Rwayonm son Garson.—Revelasyon 21:4, 5.

[Not anba lo paz]

KESTYON LETID

• Ki konsey Zezi ti donn son disip ler i ti kit zot, e kwa ki montre ki Pyer ti konpran lenportans sa konsey? (Paragraf 1-2)

• Ki sa lekspresyon “en gran lanmour” i vedir? (Paragraf 3-5)

• Akoz nou devret kontan kanmarad? (Paragraf 6-8)

• Ki mannyer ou kapab demontre ki ou kontan lezot? (Paragraf 9-18)

• Akoz la pa lemoman pour nou pran tou keksoz fasil, e ki nou devret determinen pour fer? (Paragraf 19-20)

[Portre lo paz 29]

En fanmiy ki ini i pli byen ekipe pour reziste presyon sa bann dernyen zour

[Portre lo paz 30]

Lanmour i motiv nou pour ed sa bann ki dan vre bezwen

[Portre lo paz 31]

Partaz sa bon nouvel Rwayonm Bondye avek lezot i en zes lanmour