“Ler son Zizman” in aprose

DERNYEN liv dan Labib apele Revelasyon, i fer nou konnen ki en lanz dan lesyel i annan ‘en levanzil eternel pour anonse.’ I dir dan en lavwa for: “[Annan lakrent pour Bondye, NW] e rann li glwar, parski ler son zizman in arive.” (Revelasyon 14:6, 7) Sa ‘ler zizman’ i enkli deklarasyon ek egzekisyon zizman Bondye. I ariv konman moman for “bann dernyen zour.” Ozordi nou pe viv dan bann dernyen zour.—2 Timote 3:1.

Larive ‘ler zizman’ i en bon nouvel pour bann ki kontan sa ki drwat. I en letan kot Bondye pou soulaz son bann serviter ki’n soufer dan sa sistenm kot napa lanmour e ki ranpli avek vyolans.

Avan ki ‘ler zizman’ i fini avek destriksyon sa move sistenm, Labib pe ankouraz nou: “[Annan lakrent pour Bondye, NW] e rann li glwar.” Eski ou pe fer sa? Sa pa vedir zis dir, “mon krwar dan Bondye.” (Matye 7:21-23; Zak 2:19, 20) Annan lakrent pour Bondye i devret fer nou annan en profon respe ek ladmirasyon pour li. I devret pous nou pour elwanny nou avek sa ki mal. (Proverb 8:13) I devret ed nou pour kontan sa ki byen e ay sa ki mal. (Amos 5:14, 15) Si nou onor Bondye, nou pou ekout li avek bokou respe. Nou pa pou zanmen les okenn lezot aktivite anpes nou lir son Parol, Labib, regilyerman. Avek tou nou leker nou pou toultan met konfyans dan li. (Psonm 62:8; Proverb 3:5, 6) Bann ki vreman onor Bondye, i rekonnet ki akoz i Kreater lesyel ek later, alors i Sef Siprenm dan liniver. Zot volonterman soumet avek li konman sa enn ki annan drwa pour diriz zot lavi. Si nou realize ki nou devret donn plis latansyon sa bann size, annou pa tarde pour fer li.

Ler egzekisyon zizman Bondye ki sa lanz ti mansyonnen i osi ganny apele “zour Zeova.” An 607 avan nou lepok, ansyen lavil Zerizalenm ti eksperyans en “zour” koumsa, akoz son zabitan pa ti ekout lavertisman Zeova atraver son bann profet. Zot ti met zot lavi pli an danze, akoz zot ti krwar ki zour Zeova pa ti pou ariv konmela. Zeova ti averti zot: “I pros, e i pe depes bokou.” (Tsefanya 1:14) En lot “zour Zeova” ti ariv lo ansyen lavil Babilonn an 539 avan nou lepok. (Izai 13:1, 6) Vi ki zot ti annan konfyans dan zot defans e dan zot bann bondye, bann Babilonnyen ti inyor lavertisman ki bann profet Zeova ti donn zot. Me dan zis en lannwit, Babilonn ti ganny atake e anvair par bann Med ek Pers.

Kwa ki devan nou ozordi? En lot “zour Zeova” ki pou annan bokou plis lefe. (2 Pyer 3:11-14) Bondye in anons son zizman lo “Gran Babilonn.” Dan Revelasyon 14:8, en lanz i anonse: “I’n tonbe, i’n tonbe, Gran Babilonn.” Sa in deza fini arive. Gran Babilonn nepli annan kontrol lo bann adorater Zeova. Son koripsyon ek son partisipasyon dan lager in ganny devwale. Aprezan destriksyon final i pros. Pour sa rezon ki Labib i ankouraz tou dimoun: “Sorti dan sa lavil [Gran Babilonn], . . . pour ou pa partisip dan son bann pese e ki ou pa resevwar en par son bann fleo. Parski son bann pese in akimile ziska oter lesyel, e Bondye in mazin son bann move laksyon.”—Revelasyon 18:4, 5.

Lekel Gran Babilonn? I tou sa bann larelizyon dan lemonn antye ki dan en fason ou en lot i parey ansyen Babilonn. (Revelasyon, sapit 17, 18) Annou vwar detrwa sa bann similarite:

• Bann pret dan ansyen Babilonn ti enplike en kantite dan zafer politik zot pei. Sa i vre pour laplipar larelizyon ozordi.

• Bann pret Babilonn ti souvan ankouraz zot pei pour lager. Bann larelizyon ozordi in souvan premye pour beni bann solda ler zot pei i al lager.

• Nivo moralite ti degrad en kantite akoz bann lansennyman ek pratik ki ti egziste dan ansyen Babilonn. Ozordi, imoralite i egziste parmi bann sef relizye ek bann fidel akoz bann sef relizye in inyor standar moral dan Labib. I enteresan pour dir, vi ki Gran Babilonn i annan en relasyon imoral avek lemonn ek son sistenm politik, Revelasyon i dekrir li konman en fanm prostitye.

• Labib i osi dir ki Gran Babilonn i viv dan “liks.” Dan ansyen Babilonn, bann dimoun dan bann tanp ti annan bokou propriyete, bann pret ti bann gran biznesmenn. Ozordi apard ki bann landrwa ladorasyon, Gran Babilonn i annan en kantite propriyete ek biznes. Son bann lansennyman ek lafet i fer li ek lezot dan lemonn biznes ganny en kantite larises.

• Servi zimaz, mazik, grigri ti bann keksoz popiler dan ansyen Babilonn, parey i leka ozordi dan bokou pei. Lanmor ti ganny konsidere konman konmansman en lot kalite lavi. Babilonn ti ranpli avek tanp ek lasapel pour onor zot bann bondye, me bann Babilonnyen ti opoz bann adorater Zeova. Gran Babilonn i krwar e pe pratik preski menm zafer.

Dan letan ansyen, Zeova ti servi bann nasyon pwisan pour pini bann ki ti kontinyen inyor li ek son lavolonte. Par egzanp, Samari ti ganny detrir par bann Asiryen an 740 A.N.L. Zerizalenm ti ganny anvair par bann Babilonnyen an 607 A.N.L. e par bann Romen an 70 N.L. An retour, Babilonn ti ganny konkerir par bann Med ek Pers an 539 A.N.L. Pour nou letan, Labib i predir ki bann gouvernman, zis parey en bebet feros, pou atak “sa prostitye” e depouy li avek tou sa ki i posede e kit li touni. Savedir i pou devwal sa ki i vreman ete. Zot pou konpletman detrir li.—Revelasyon 17:16.

Eski bann gouvernman sa lemonn pou vreman fer en keksoz parey? Labib i dir ki ‘Bondye pou plas dan zot leker lavolonte pour akonpli son plan.’ (Revelasyon 17:17) I pou ariv en sel kou, par sirpriz. I pou sokan, en keksoz ki dimoun pa’n ekspekte.

Ki fodre ou fer? Demann ou lekor: ‘Eski mon ankor atase avek en larelizyon ki kontaminen avek lansennyman ek pratik ki idantifye li avek Gran Babilonn?’ Menm si ou pa dan enn sa bann larelizyon, ou kapab demann ou lekor: ‘Eski mon’n les son leta lespri enfliyans mwan?’ Ki kalite leta lespri? En leta lespri ki toler imoralite, lanmour pour keksoz materyel ek plezir olye annan lanmour pour Bondye, oubyen volonterman rezet Parol Zeova (menm dan bann keksoz ki paret pa enportan). Reflesir byen lo ou larepons.

Pour nou ganny faver Zeova, i tre enportan ki nou demontre par nou aksyon ek dezir dan nou leker ki nou vreman pa form parti Gran Babilonn. Napa letan pour perdi. Labib i averti nou ki lafen pou vin en sel kou: “Sa gran lavil Babilonn pou ganny zete avek vyolans, e personn pa pou trouv li ankor.”—Revelasyon 18:21.

Me sa pa tou. Zeova pou osi ziz bann pouvwar politik, son bann dirizan, ek tou bann ki inyor drwa Bondye pour dirize atraver Rwayonm Zezi Kri. (Revelasyon 13:1, 2; 19:19-21) Sa vizyon ki ganny rikorde dan Danyel 2:20-45 i dekrir bann dirizan politik depi letan ansyen Babilonn ziska ozordi konman en gro stati an lor, larzan, kwiv, feray, ek later. Konsernan nou letan, sa profesi ti predir: “Bondye lesyel pou etabli en rwayonm ki pa pou zanmen ganny detrir.” Konsernan sa ki sa Rwayonm pou fer pandan ‘ler zizman’ Zeova, Labib i anonse: “I pou kraz e met en lafen avek tou sa bann rwayonm e li menm i pou dire pour en letan endefini.”—Danyel 2:44.

Labib i averti bann vre adorater konsernan kontan “bann keksoz ki dan lemonn.” Sa i vedir kontan fason viv sa lemonn ki elwannyen avek sa vre Bondye. (1 Zan 2:15-17) Eski ou desizyon ek ou aksyon i montre ki ou tou pour Rwayonm Bondye? Eski ou vreman met li premye dan ou lavi?—Matye 6:33; Zan 17:16, 17.

[Bwat lo paz 14]

Kan Lafen pou arive?

“Fis-de-Lonm pou vini ler ki zot pa pe ekspekte li.”—Matye 24:44.

Kontinyen “veye alor, akoz zot pa konn ni zour ni ler.”—Matye 25:13.

“I pa pou an retar.”—Abakouk 2:3.

[Bwat lo paz 14]

Si ou ti konnen, eski i ti pou fer en Diferans?

Si ou ti asire ki zizman Bondye pa ti pou vin dan ankor ennde lannen, eski sa ti pou sanz fason ki ou pe viv ou lavi? Si lafen sa sistenm pa’n ariv sa letan ki ou ti pe ekspekte, eski sa in enfliyans ou pour fer mwens dan servis Zeova?—Ebre 10:36-38.

Vi ki nou pa konn egzakteman kan lafen pou vini, sa i donn nou loportinite pour montre ki nou servi Bondye avek bann bon lentansyon. Bann ki konn Zeova i realize ki en devouman lo dernyen minit pa pou enpresyonn li, li ki vwar sa ki dan nou leker.—Zeremi 17:10; Ebre 4:13.

Pour bann ki vreman kontan Zeova, i toultan vin premye dan zot lavi. Parey lezot dimoun, bann vre Kretyen osi i travay. Me zot pa travay avek lobzektif pour vin ris, plito pour zot ganny ase keksoz pour viv e en pe pour partaz avek lezot. (Efezyen 4:28; 1 Timote 6:7-12) Zot osi apresye bann bon moman detant e en pti sanzman detanzaot, me zot dezir se pour reganny lafors, pa senpleman pour imit sa ki tou lezot dimoun pe fer. (Mark 6:31; Romen 12:2) Parey Zezi Kri, zot pran plezir pour fer lavolonte Bondye.—Psonm 37:4; 40:8.

Bann vre Kretyen i anvi viv e servi Zeova pour touzour. Sa lespwar i kontinyen reste presye pour zot, menm si zot bezwen esper serten benediksyon en pe pli lontan ki zot ti ekspekte.

[Bwat/Portre lo paz 15]

Problenm konsernan Souvrennte

Pour konpran akoz Bondye i permet sitan en kantite soufrans, nou bezwen konpran sa problenm ki’n leve konsernan souvrennte Bondye. Kisisa souvrennte? I lotorite pli o ki egziste.

Vi ki Zeova i Kreater, i annan sa drwa pour diriz later ek tou sa ki reste lo la. Me Labib i eksplike ki byen boner dan listwar imen, serten ti rezet souvrennte Zeova. Satan ti dir ki Zeova ti tro limit liberte imen. I ti osi dir ki Zeova ti’n manti avek nou premye paran konsernan sa ki pou arive si zot inyor lalwa Bondye e fer keksoz dan zot prop fason. I ti dir ki zot ti pou pli byen si zot ti diriz zot lavi zot menm san depan lo Bondye.—Zenez, sapit 2, 3.

Si Bondye ti’n detrir sa bann rebel deswit, sa ti pou demontre son lafors, me sa pa ti pou rezourd sa bann problenm ki Satan ti’n leve. Olye detrir sa bann rebel deswit, Zeova in les tou bann lanz ek imen vwar rezilta sa rebelyon. Menm si sa in anmenn soufrans, i’n osi donn nou loportinite pour vin dan lemonn.

Deplis, kantmenm i’n kout li bokou, Zeova in fer laranzman pour imen ganny libere avek pese ek son bann konsekans e viv dan Paradi, si zot obeir li e demontre lafwa dan sakrifis son Garson. Si i neseser, sa i kapab arive par mwayen en rezireksyon.

Les letan pase pour rezourd sa problenm in osi donn bann serviter Bondye loportinite pour demontre ki zot kapab apresye lanmour Bondye e prouv zot fidelite avek Zeova dan tou sitiasyon. Pour annan sa respe apropriye anver bann lalwa dan liniver, i tre enportan ki drwa Bondye pour dirize i ganny aksepte e osi ki bann imen i montre ki zot kapab reste fidel. Si sa kalite respe pa egziste, vre lape pa pou zanmen posib.a

[Not anba lo paz]

[Portre]

Sa sistenm politik dan lemonn antye pou trouv son lafen