Leson 7

Apros Bondye dan Lapriyer

Akoz i enportan pour priye regilyerman? (1)

Avek ki sennla nou bezwen priye e konman? (2, 3)

Pour ki kalite keksoz nou kapab priye? (4)

Kan eski ou kapab fer lapriyer? (5, 6)

Eski Bondye i ekout tou lapriyer? (7)

1. Lapriyer, se koz avek respe avek Bondye. Ou devret priy Bondye regilyerman. Alors I pou kapab vin ou zanmi tre pros. Zeova i tre gran e tre pwisan, pourtan i ekout nou lapriyer. Eski ou priy Bondye regilyerman?—Psonm 65:2; 1 Tesalonisyen 5:17.

2. Lapriyer i form parti nou ladorasyon. Donk nou bezwen priy selman Bondye, Zeova. Kan Zezi ti lo later, i ti touzour priy son Papa e pa personn ankor. Nou devret fer parey. (Matye 4:10; 6:9) Me tou nou lapriyer i devret ganny fer onon Zezi. Dan sa fason nou montre ki nou respekte pozisyon Zezi e ki nou annan lafwa dan son sakrifis.—Zan 14:6; 1 Zan 2:1, 2.

3. Kan nou fer lapriyer, nou bezwen koz avek Bondye ofon nou leker. Fodre pa ki nou lapriyer i ganny resite oubyen lir dan en liv lapriyer. (Matye 6:7, 8) Nou kapab priy dan nenport ki landrwa, nenport ki ler e dan nenport ki pozisyon respektab. Bondye i menm kapab antann lapriyer ki ganny fer an silans dan nou leker. (1 Samyel 1:12, 13) I byen si nou kapab trouv en landrwa trankil, lwen avek lezot dimoun, pour fer nou lapriyer personnel.—Mark 1:35.

4. Pour ki kalite keksoz ou kapab priy Bondye? Pour tou sa ki konsern ou lanmitye avek li. (Filipyen 4:6, 7) Model lapriyer ki Zezi in donn nou i montre nou ki nou bezwen priy pour non ek lavolonte Zeova. Nou osi kapab priy pour nou bann bezwen materyel, pour nou pese ganny pardonnen e pour ganny led pour nou kapab reziste tantasyon. (Matye 6:9-13) Fodre pa ki nou lapriyer i egois. Nou devret priy selman pour bann keksoz ki an akor avek lavolonte Bondye.—1 Zan 5:14.

5. Ou kapab priy Bondye sak fwa ki ou leker i pous ou pour dir li mersi oubyen glorifye li. (1 Kronik 29:10-13) Ou devret priye kan ou annan bann problenm e kan ou lafwa i ganny teste. (Psonm 55:22; 120:1) I byen ki ou priye avan ki ou pran ou repa. (Matye 14:19) Zeova i ankouraz nou pour priye “dan tou sirkonstans.”—Efezyen 6:18.

6. Si nou’n fer en pese grav, nou absoliman bezwen priye. Nou devret alors demann Zeova pour donn nou son mizerikord ek son pardon. Si nou konfes nou bann pese avek Bondye e si nou fer nou mye pour pa repete, Bondye i “pare pour pardonnen.”—Psonm 86:5; Proverb 28:13.

7. Zeova i ekout selman lapriyer bann dimoun ki fer sa ki byen. Pour ki Bondye i ekout ou lapriyer, ou bezwen fer ou mye pour viv selon son bann lalwa. (Proverb 15:29; 28:9) Kan ou fer lapriyer, fodre ou montre limilite. (Lik 18:9-14) Fodre ki ou azir an akor avek ou lapriyer. Ou pou montre alors ki ou annan lafwa e ki ou senser dan sa ki ou pe dir. Se selman dan sa kondisyon ki Zeova pou reponn ou bann lapriyer.—Ebre 11:6.