SAPIT 8
Akoz Bondye i Permet Soufrans?
1, 2. Konman dimoun i souvan reakte anver soufrans limanite?
KAN i ariv bann katastrof ki detrir bann byen e pran lavi imen, bokou pa kapab konpran akoz bann keksoz sitan terib i arive. Lezot i enkyet par bann krim ek vyolans ki vin deplizanpli an abondans, kriyel e san okenn motif. ‘Akoz Bondye pe permet soufrans?’ Petet ou osi ou’n demann ou lekor sa kestyon.
2 Akoz zot pa’n trouv okenn larepons satisfezan pour sa kestyon, bokou in perdi lafwa dan Bondye. Zot panse ki i pa enterese avek bann imen. Pour bann ki aksepte soufrans konman en realite lavi, zot vin anmer e blanm Bondye pour tou bann maler ki ravaz limanite. Si ou’n deza annan bann tel santiman, ou pou probableman byen enterese avek sa ki Labib i dir lo sa size.
SOUFRANS PA SORTI KOT BONDYE
3, 4. Akoz nou kapab asire, ki lemal ek soufrans pa sorti kot Bondye?
3 Labib i asir nou ki pa Zeova Bondye ki koz bann soufrans ki nou vwar otour nou. Par egzanp, disip Zak ti ekrir: “Personn pa devre dir, ler i ganny tante, ‘Mon’n ganny tante par Bondye,’ parski Bondye pa kapab ganny tante par sa ki mal, e limenm i pa tant personn.” (Zak 1:13) Alor i pa posib ki Bondye i responsab pour sa kantite maler ki pe trouble bann imen. I pa teste zot pour prepar zot pour al viv osyel e i pa ni fer zot soufer akoz bann move aksyon ki serten i sipoze zot ti komet dan en lot lavi pase.—Romen 6:7.
4 Deplis, menm si bokou keksoz terib in ganny fer lo non Bondye oubyen Kris, napa nanryen dan Labib ki endike ki zot aprouv sa bann aksyon. Bondye ek Kris napa nanryen pour fer avek bann ki pretann servi zot me ki trise, touye, devaste e fer bokou lezot keksoz ki koz soufrans imen. An realite, “semen sa enn ki mesan i en keksoz detestab pour Zeova.” Bondye “i lwen avek bann mesan.”—Proverb 15:9, 29.
5. Nonm detrwa bon kalite ki Zeova i annan, e eksplike ki mannyer i resanti anver son bann kreatir.
5 Labib i dekrir Zeova konman en Bondye ki “ranpli avek labonte ek konpasyon.” (Zak 5:11) I deklare ki “Zeova i kontan lazistis.” (Psonm 37:28; Izai 61:8) I pa rankinen. Avek konpasyon, i montre konsern pour son bann kreatir e i donn zot tou sa ki meyer pour zot byennet. (Akt 14:16, 17) Zeova in azir koumsa depi lorizin lavi lo later.
EN KONMANSMAN PARFE
6. Ki mannyer serten lezann i dekrir kondisyon lavi okonmansman listwar limanite?
6 Nou tou nou abitye vwar e resanti douler ek soufrans. Alors, petet i difisil pour imazin en lepok kot soufrans pa ti egziste. Pourtan, i ti koumsa okonmansman listwar imen. Menm bann lezann dan serten pei i fer referans avek en konmansman ere. Dapre lezann Grek, premye “Senk Lepok Limanite” ti ganny apele “Lepok An-nor.” Pandan sa letan, bann zonm ti viv ere, dimoun pa ti bezwen rente, soufer e eksperyans lavyeyes. En lezann Sinwan i dir ki pandan renny Lanperer Zonn, Houang-Ti, bann dimoun ti viv anpe e an larmoni, menm avek lanatir ek bann zannimo sovaz. Bann Pers, Ezipsyen, Tibeten, Perouvyen ek Meksiken, zot tou zot annan bann lezann konsernan en letan ere e parfe okonmansman listwar limanite.
7. Akoz Bondye in kree later ek bann imen?
7 Sa bann lezann sorti dan diferan pei, i senpleman en refleksyon sa dokiman pli ansyen lo listwar imen, Labib. I revele ki Bondye ti plas sa premye koup imen, Adan ek Ev, dan en paradi ki ti apel zarden Edenn e i ti konmann zot: “Vin fertil e miltipliye, ranpli later e soumet li.” (Zenez 1:28) Nou premye paran ti rezwir perfeksyon e zot ti annan sa perspektiv pour vwar later antye vin en paradi, kot lafanmiy imen parfe, ti pou viv dan lape ek boner dirab. Sa ti plan Bondye ler i ti kree later ek limanite.—Izai 45:18.
EN PROVOKASYON MALISYE
8. Ki komannman Adan ek Ev ti devret obei, me ki ti pase?
8 Pour gard faver Bondye, Adan ek Ev ti pou bezwen refize manz fri dan “pye konnesans bon e move.” (Zenez 2:16, 17) Si zot ti’n obei lalwa Zeova, ti pou napa okenn soufrans ki ti pou rin lavi imen. An obeisan son komannman zot ti pou’n osi demontre zot lanmour e zot fidelite pour Bondye. (1 Zan 5:3) Me parey nou’n vwar dan SAPIT 6, ti tou lekontrer. Pouse par Satan, Ev ti manz fri sa pye dibwa e plitar, Adan osi ti manze.
9. Ki kestyon Satan ti souleve konsernan Zeova?
9 Eski ou konpran ki degre serye sa lensidan i ete? Satan ti pe atak pozisyon Zeova, konman Tre O. An dizan: “Sirman zot pa pou mor,” Dyab ti kontredir deklarasyon Bondye, “Sirman ou pou mor.” Par son parol ki ti swiv, Satan ti pretann ki Zeova ti pe kasyet posibilite, pour Adan ek Ev vin parey Li, ki ti a fer zot lib pour deside, san Li, sa ki byen ek sa ki mal. Provokasyon Satan ti alor met an kestyon drwa e lezitimite Zeova dan son pozisyon konman Dirizan Siprenm Iniversel.—Zenez 2:17; 3:1-6.
10. Ki Satan ti pretann konsernan bann imen?
10 Satan Dyab ti osi sizere, ki dimoun ti pou reste obeisan avek Zeova selman kan sa ti pou dan zot lavantaz. Setadir, lentegrite imen ti ganny kestyonnen. Satan ti pretann ki personn pa ti pou volonterman reste fidel avek Bondye. Sa move lakizasyon i ganny klerman ekspoze dan resi biblik lo Zob, en fidel serviter Zeova ki ti andir en gran leprev ver lannen 1600 A.N.L. An lizan sa de premye sapit dan liv Zob, ou pou kapab konpran pli byen akoz limanite i soufer e akoz Bondye i permet sa.
11. Ki kalite zonm Zob ti ete, me ki lakizasyon Satan ti fer kont li?
11 Satan ti target Zob, “en zonm san repros e drwat.” Premyerman, Satan ti pretann ki Zob ti annan bann move motif an dizan: “Eski i pour nanryen ki Zob i annan lakrent pour Bondye?” Avek riz, i ti answit kalonmni Zob ek Bondye kan i ti akiz Zeova pour aste fidelite Zob avek son proteksyon ek benediksyon. “Me pour en sanzman,” Satan ti provok Zeova, “avans ou lanmen, silvouple, e tous tou sa ki i annan e vwar si i pa pou modi ou dan ou figir.”—Zob 1:8-11.
12. (a) Ki bann kestyon ki ti pou ganny reponn selman si Bondye ti permet Satan pour teste Zob? (b) Ki ti rezilta leprev Zob?
12 Eski Zob ti pe servi Zeova senpleman akoz bann bon keksoz ki Zeova ti donn li? Eski lentegrite Zob ti pou reziste leprev? De lot kote, eski Zeova ti annan ase konfyans dan son serviter pour permet li ganny teste? Sa bann kestyon ti pou kapab ganny reponn si Zeova ti permet Satan pour anmenn bann leprev vreman sever lo Zob. Parey i ganny raporte dan liv Zob, son fidelite dan sa leprev, ki ti ganny permet par Bondye, ti en laprev konplet, lazistis Zeova ek lentegrite zonm.—Zob 42:1, 2, 12.
13. Konman nou enplike dan sa ki ti arive dan zarden Edenn e avek Zob?
13 Sa ki ti arive dan zarden Edenn e avek sa zonm, Zob, i annan apre tou, en pli gran sinifikasyon. Sa bann kestyon ki Satan ti souleve i konsern tou imen, enkli nou ozordi. Non Bondye ti ganny kalonmni e son drwa pour dirize ti ganny provoke. Fidelite son kreasyon, zonm, ti ganny kestyonnen. Sa bann kestyon ti bezwen ganny regle.
KONMAN POUR REGLE SA BANN KESTYON
14. Kan kelken i fer fas avek en lakizasyon malisye, ki i ti a kapab fer?
14 Pour konpran sa sitiasyon pli byen, imazinen ki ou en bon paran avek plizyer zanfan dan en fanmiy ere. Sipoze enn ou bann vwazen pe propaz mansonz ek lakizasyon ki ou en move paran. Konman ou ti a reazir si i pretann ki ou bann zanfan pa kontan ou, ki zot pe reste avek ou akoz zot pa konn nanryen pli byen e ki zot ti a ale si kelken ti ofer zot sa posibilite. Petet ou ti a dir: ‘Pa posib!’ Wi, me konman ou ti a prouv sa? Serten paran ti pou reazir dan lakoler. Me anplis ki kree plis problenm, en reaksyon vyolan ti a osi kapab konfirm sa bann mansonz. Meyer fason pour tret sa problenm se pour donn ou adverser sa posibilite pour prouv son lakizasyon e pour permet ou bann zanfan prouve ki zot kontan ou senserman.
15. Konman ki Zeova in deside azir anver bann lakizasyon Satan?
15 Nou kapab konpar Zeova avek sa bon paran, Adan ek Ev avek sa bann zanfan e Satan, sa vwazen manter. Avek sazes, Bondye pa ti detrir Satan, Adan ek Ev deswit, me i’n permet sa bann transgreser pour viv pour en serten letan. Sa in permet nou premye paran donn nesans fanmiy imen e Satan in ganny sa posibilite pour prouve si son lakizasyon ti vre, afen ki sa bann kestyon ki ti ganny souleve i ganny regle. Toudmenm, Bondye ti konnen depi okonmansman, ki serten imen ti pou reste fidel avek li e ti pou alor prouve ki Satan i en manter. Konman nou rekonesan ki Zeova in kontinyen beni e ed tou bann ki kontan li!—2 Kronik 16:9; Proverb 15:3.
KI KONKLIZYON NOU TIRE?
16. Konman ki lemonn in tonm anba pouvwar Satan?
16 Diran preske tou listwar imen, Satan in annan laliberte total pour kalkil son bann plan pour domin limanite. Parmi tou lezot keksoz, i’n egzers son lenfliyans lo bann pwisans politik e i’n promot bann larelizyon, ki avek riz, pe tourn ladorasyon ver li olye ver Zeova. Ensi, Dyab in vin ‘bondye sa syek’ e i ganny apele “sef lemonn.” (2 Korentyen 4:4; Zan 12:31) An realite, “lemonn antye i dan pouvwar dyab.” (1 Zan 5:19) Eski sa i vedir ki Satan in nobou prouv son lakizasyon ki i ti pou kapab detourn tou imen kont Zeova Bondye? Definitivman non! Pandan ki i pe permet Satan reste an egzistans, Zeova in konmans egzekit son prop plan. Alor, ki Labib i dir konsernan rezon ki Bondye i permet mesanste?
17. Ki nou pa devret oubliye konsernan lakoz mesanste ek soufrans?
17 Zeova pa lakoz mesanste ek soufrans. Vi ki Satan i sef sa monn e bondye sa sistenm, se li ek bann ki lo son kote, ki responsab pour sitiasyon aktyel limanite ek tou bann maler ki imen pe sibir. Napa personn ki pou annan bon rezon, pour dir ki Bondye i lakoz sa bann difikilte.—Romen 9:14.
18. An toleran mesanste ek soufrans, ki Zeova in demontre konsernan lendepandans avek li?
18 An toleran mesanste ek soufrans, Zeova in demontre ki lefe ki imen in endepandan avek Li, sa pa’n anmenn en monn meyer. Nou bezwen admet ki listwar in ganny marke par katastrof enn apre lot. Rezon pour sa, se ki bann imen in swazir pour swiv zot prop kondwit endepandan e zot pa’n pran kont, parol ek lavolonte Bondye. Dan letan lontan, kan pep Zeova ek zot bann sef enfidel ti swiv “kondwit popiler” e rezet son parol, konsekans ti katastrofik. Par lentermedyer son profet Zeremi, Bondye ti dir zot: “Bann saz in vin onte. Zot in sezi avek en gran lafreyer e zot pou ganny kaptire. Regarde! Zot in rezet parol Zeova, e ki sazes zot annan?” (Zeremi 8:5, 6, 9) Etan donnen ki zot pa’n swiv bann standar Zeova, limanite in vin parey en bato san gouvernay, ki pe balote dan lanmer azite.
19. Ki laprev i annan pour montre ki Satan pa kapab detourn tou imen kont Bondye?
19 An toleran mesanste ek soufrans, Bondye in osi prouve ki Satan pa’n kapab detourn tou limanite kont Li. Listwar i montre ki in touzour annan bann endividi ki’n reste fidel avek Bondye menm si zot in fer fas avek divers tantasyon ek leprev. Diran bann syek, Zeova in manifeste son pwisans an faver son bann serviter e son non in ganny proklanmen partou lo later. (Egzod 9:16; 1 Samyel 12:22) SAPIT 11 dan Ebre, i donn nou en gran lalis bann fidel serviter Bondye ki enkli Abel, Enok, Noe, Abraam ek Moiz. Dan Ebre sapit 12:1, zot ganny apele ‘en gro nyaz temwen.’ Zot lafwa ferm dan Zeova, i egzanpler. Dan nou letan osi, bokou dimoun in ariv ziska donn zot lavi an demontran zot lentegrite solid anver Bondye. Par zot lafwa ek zot lanmour, sa bann endividi in prouve, dan en fason konvenkan, ki Satan pa kapab detourn tou imen kont Bondye.
20. An toleran mesanste ek soufrans, ki Zeova in prouve konsernan bann imen e li menm?
20 Finalman, an toleran mesanste ek soufrans, Zeova in fourni levidans ki selman Li, nou Kreater, ki annan sa kapasite ek drwa pour diriz bann imen, pour zot byenfe ek boner eternel. Depi plizyer syek, bann zonm in esey diferan form gouvernman. Me avek ki rezilta? Bann problenm konplike ek bann kriz ki bann nasyon pe fer fas avek ozordi, i donn tou levidans ki, parey Labib i dir, “zonm in domin zonm ver son ditor.” (Eklezyast 8:9) Selman Zeova ki kapab vin sekour nou e realiz son plan orizinal. Kan e ki mannyer i pou fer sa?
21. Ki pou arive avek Satan, e lekel ki pou ganny servi pour akonpli sa?
21 Deswit apre ki Adan ek Ev ti vin viktim konplo Satan, Bondye ti anons Son plan konsernan en mwayen delivrans. Vwala sa ki Zeova ti deklare konsernan Satan: “Mon pou met en ostilite ant ou ek sa fanm, ant ou semans ek son semans. I pou mertri ou dan latet e ou pou mertri li dan talon.” (Zenez 3:15) Sa deklarasyon ti garanti ki Dyab pa pou ganny tolere pour fer son bann forfe pour touzour. Konman Lerwa sa Rwayonm Mesyanik, sa Semans promiz, Zezi Kri, pou ‘mertri Satan dan son latet.’ Wi, “byento” Zezi pou ekraz Satan, sa rebel!—Romen 16:20.
KI OU POU FER?
22. (a) Ki bann kestyon ki ou bezwen reponn? (b) Menm si Satan i tir son lakoler lo bann ki fidel avek Zeova, ki lasirans zot annan?
22 Aprezan, vi ki ou konn sa bann kestyon ki enplike, ki kote ou pou pran? Eski ou pou demontre par ou aksyon ki ou pe fidelman soutenir Zeova? Vi ki Satan i konnen ki son letan i kourt, i pou fer tou son posib pour tir son lakoler lo bann ki oule gard lentegrite anver Bondye. (Revelasyon 12:12) Me ou kapab resers led avek Bondye parski Zeova “i konnen ki mannyer i pou delivre bann dimoun ki atase avek li dan difikilte.” (2 Pyer 2:9) I pa pou les ou ganny tante anplis ki ou kapab siporte e i pou fer en fason ki ou a kapab andir bann tantasyon.—1 Korentyen 10:13.
23. Ki nou kapab espere avek konfyans?
23 Avek konfyans, annou esper sa letan kot Lerwa, Zezi Kri, pou pran aksyon kont Satan ek tou bann ki pe swiv li. (Revelasyon 20:1-3) Zezi pou elimin tou bann ki’n zwe en rol dan bann maler ek katastrof ki’n fer imen soufer. Ziska sa letan, en lot form soufrans ki sirtou penib, se kan nou perdi en dimoun ki nou kontan dan lanmor. Lir sapit swivan pour vwar ki i arive avek zot.
TESTE OU KONNESANS
Ki mannyer nou konnen ki Zeova pa koz soufrans bann imen?
Ki bann kestyon ki ti ganny souleve par Satan dan zarden Edenn e ki’n ganny klerman detaye dan letan Zob?
An permetan soufrans kwa ki Bondye in prouve?