BANN zannimo pa kapab lir parey ou pe fer la konmela. En dimoun dan tou le 6 dimoun pa’n aprann lir—souvan i akoz zot pa’n ganny loportinite pour al lekol—parmi sa bann ki’n al lekol, bokou pa lir regilyerman. Pourtan, ou abilite pour lir bann liv i permet ou par sa mwayen pour vwayaze dan lezot pei, rankontre dimoun ki zot lavi i kapab anrisir sa ki pour ou, e ganny konnesans pratik ki pou ed ou fer fas avek bann lenkyetid lavi.

Abilite pour lir i annan en lefe lo lakantite ki en zenn i benefisye pandan son letan lekol. Ler i rod en travay, son abilite pour lir i kapab enfliyans kalite travay ki i kapab gannyen ek lakantite letan ki i bezwen travay pour ganny lavi. Bann madanm ki pa travay e ki lir byen i pli byen kapab pran swen avek zot fanmiy an sa ki konsern nouritir apropriye, lizyenn, ek prevansyon maladi. Bann manman ki lir byen i osi kapab egzers en tre bon lenfliyans lo devlopman entelektyel zot zanfan.

Sirman, pli gran benefis ki lektir i anmennen, se ki i kapab ed ou pour “trouv konnesans Bondye.” (Prov. 2:5) Dan diferan laspe nou servis pour Zeova, nou bezwen lir. Labib ek bann piblikasyon baze lo Labib i ganny lir dan bann renyon kongregasyon. Ou lefikasite dan predikasyon i depan bokou lo lafason ki ou lir. E nou bezwen lir pour prepar pour sa bann aktivite. Se pour sa rezon ki ou progre spirityel i depan bokou lo ou labitid lir.

Itiliz byen sa Loportinite

Serten ki pe aprann semen Zeova in annan en pti gin ledikasyon. Kekfwa zot bezwen aprann konn lir pour zot kapab progrese spirityelman. Oubyen petet zot bezwen lasistans personnel pour amelyor zot abilite pour lir. Kot i annan en bezwen lokal, bann kongregasyon i esey organiz bann laklas pour konn lir e ekrir ki baze lo piblikasyon Appliquez-vous à la lecture et à l’écriture. Plizyer milye in benefisye bokou atraver sa dispozisyon. Vi ki byen konn lir i enportan, serten kongregasyon i organiz bann laklas anmenmtan avek Lekol Minister Teokratik pour amelyor lektir. Menm si sa bann laklas pa disponib, en dimoun i kapab fer bokou progre par pran enpe letan sak zour pour lir aotvwa e par regilyerman asiste e partisip dan lekol.

I malere, ki bann liv kartoun, televizyon ek lezot keksoz, in fer bokou dimoun negliz lektir. Get televizyon e en pti gin letan lektir i kapab retard progre en dimoun dan son abilite pour lir e reflesir e rezonn klerman e pour eksprim son lekor byen.

Bann piblikasyon ki ed nou pour konpran Labib i ganny fourni par “lesklav fidel e pridan.” Sa bann piblikasyon i fer disponib en abondans lenformasyon konsernan bann keksoz spirityel ki esansyel. (Mat. 24:45, NW; 1 Kor. 2:12, 13) Zot osi gard nou azour avek bann deroulman enportan dan lemonn ek zot sinifikasyon, zot ed nou pour konn pli byen lanatir, e montre nou konman pour fer fas avek bann problenm lavi toulezour. Pli enportan, zot konsantre lo konman pour servi Bondye dan en fason akseptab e ganny son laprouvasyon. Sa bann bon lenformasyon pou ed ou devlope konman en dimoun spirityel.

Byensir, benefis pa zis vin akoz nou konn lir byen. Sa abilite pour lir i bezwen ganny servi dan fason apropriye. Parey manze, ou bezwen swazir sa ki ou lir. Eski i fer sans pour manz bann manze ki pa ofer okenn vre valer nourisan oubyen ki menm kapab anpwazonn ou? Pareyman, eski i bon pour ou lir, kantmenm an bref, bann lenformasyon ki kapab annan en move lenfliyans lo ou lespri ek leker? Se bann prensip Labib ki devret ed nou pour determinen ki kalite lenformasyon ki nou swazir pour lir. Avan deside ki ou pou lir, mazin bann tel verse parey Eklezyast 12:12, 13; Efezyen 4:22-24; 5:3, 4; Filipyen 4:8; Kolosyen 2:8; 1 Zan 2:15-17; ek 2 Zan 10.

Lir avek bon Motif

Lenportans pour lir avek bon motif i evidan ler nou egzamin bann resi dan Levanzil. Par egzanp, dan Levanzil Matye, nou trouv Zezi pe demann bann sef relizye ki ti byen konn Lekritir bann kestyon parey “Zanmen zot in deza lir” e “Zot pa’n lir” avan ki i ti donn zot larepons Biblik anver zot bann kestyon rize. (Mat. 12:3, 5; 19:4; 21:16, 42; 22:31) En leson ki nou aprann atraver sa, se ki si ler nou pe lir nou napa en bon motif, nou kapab fer bann konklizyon ki pa korek oubyen mank konpletman sa pwen dan sa lektir. Bann Farizyen ti pe lir Lekritir parski zot ti panse ki par sa mwayen, zot ti pou ganny lavi eternel. Sa rekonpans, parey Zezi ti fer resorti, pa ti pou ganny akorde avek sa bann ki pa kontan Bondye e ki pa aksepte Son mwayen delivrans. (Zan 5:39-43) Lentansyon bann Farizyen ti egois; an rezilta, bokou zot konklizyon ti mal.

Lanmour pour Zeova i motif pli pir ki nou kapab annan pour lir son Parol. En tel lanmour i ankouraz nou pour aprann lavolonte Bondye, akoz lanmour i “rezoui dan laverite.” (1 Kor. 13:6) Menm si dan lepase nou pa ti kontan lir, kontan Zeova ‘avek tou nou lespri’ pou motiv nou pour konsantre bokou pour pran konnesans Bondye. (Mat. 22:37) Lanmour i evey lentere, e lentere i stimil lanvi pour aprann.

Tenir Kont Vites ki ou lir

Lir i al ansanm avek abilite pour rekonnet. Menm la konmela ki ou pe lir, ou pe rekonnet bann mo e rapel zot sinifikasyon. Ou kapab lir pli vit si ou kapab ogmant lakantite lenformasyon ki ou rekonnet. Olye arete pour get sak mo, esey vwar detrwa mo alafwa. Anmezir ki ou devlop sa abilite, ou pou remarke ki ou konpran pli byen sa ki ou pe lir.

Sepandan, ler ou pe lir lenformasyon ki pli oprofon, servi en lot metod i kapab pli prodiktif. Zeova ti konsey Zozye konsernan son lektir lo Lekritir, an dizan: “Sa liv lalwa pa devret elwanny avek ou labous, e ou devret lir li lavwa ba.” (Zoz. 1:8) Koz lavwa ba i souvan ganny fer ler en dimoun pe medite. Alor, sa term Ebre ki ganny tradwir “lir lavwa ba” i osi ganny tradwir “medite.” (Pson. 63:6; 77:12; 143:5) Ler en dimoun pe medite, i reflesir oprofon; i pran son letan. Lir e anmenmtan reflesir oprofon i permet Parol Bondye annan en pli gran lefe lo lespri ek leker. Labib i kontyen profesi, konsey, bann proverb, poenm, bann deklarasyon zizman divin, bann detay konsernan plan Zeova, ek bokou resi lo lavi dimoun pour nou prop legzanp—tousala i annan valer pour sa bann ki anvi mars dan bann fason Zeova. Pa i anmenn benefis pour lir Parol Bondye dan en fason ki permet li fer en lenpresyon profon lo ou lespri ek leker!

Aprann konsantre

Anmezir ki ou lir, met ou lekor dan sak senn ki pe ganny dekrir. Esey vwar sa bann diferan personnaz dan ou lespri, e imazin santiman ki enplike dan sa bann leksperyans ki pe arive dan zot lavi. Sa i ase fasil ler ou pe lir en resi parey sa enn lo David ek Golyat, ki ganny rikorde dan 1 Samyel sapit 17. Me menm bann detay dan Egzod ek Levitik konsernan konstriksyon tabernak oubyen lenstalasyon laranzman bann pret pou vin enteresan e pli reel ler ou imazin bann dimansyon ek bann materyo oubyen imazin loder lansan, lagrenn ki’n ganny roti, ek bann zannimo ki ti pe ganny prezante konman bann lofrann brile. Mazinen konman ki i ti devret enpresyonan pour akonpli bann servis pret! (Lik 1:8-10) Enplik ou bann sans ek ou bann santiman dan sa fason pou ed ou konpran sinifikasyon sa ki ou pe lir e pou ed ou rapel.

Si ou pa lir avek latansyon, ou kapab perdi konsantrasyon. Ou lizye i kapab pe get paz, me ou bann panse i kapab en lot landrwa. Eski lanmizik pe zwe? Eski televizyon i onn? Eski lezot manm fanmiy pe koze? I pli meyer pour lir dan en landrwa trankil, si i posib. Sepandan, distraksyon i kapab sorti dan nou menm. Petet ou’n pas en lazournen ki ti byen sarze. Pa i fasil pour reviv bann aktivite lazournen dan ou lespri! Byensir, i bon pour repas lo bann levennman lazournen—me pa ler ki ou pe lir. Petet ou’n konmans avek en lespri konsantre, oubyen ou kapab konmans ou lektir avek en lapriyer. Me anmezir ki ou lir ou lespri i konmans perdi konsantrasyon. Esey ankor. Disiplin ou lekor pour gard ou lespri fikse lo lenformasyon ki ou pe lir. Gradyelman, ou pou vwar amelyorasyon.

Ki ou pou fer ler ou ariv lo en mo ki ou pa konpran? Serten mo ki pa familye i kapab ganny eksplike oubyen diskite dan sa lartik. Oubyen ou kapab detekte son sinifikasyon dapre son konteks. Si i pa leka, pran letan pour get sa mo dan en diksyonner si i disponib, oubyen not sa mo afen ki ou kapab demann en dimoun son sinifikasyon plitar. Sa pou agrandi ou vokabiler e kontribye anver ou konpreansyon lekritir.

Lektir an Piblik

Ler zapot Pol ti dir Timote pour pas son letan dan lektir, Pol ti pe spesifikman refer avek lektir ki lezot ti pou benefisye avek. (1 Tim. 4:13) Pour en lektir piblik atenn son bi i demann plis ki senpleman lir bann mo aotvwa lo en papye. Sa lekter i bezwen konpran sinifikasyon bann mo e ganny sa bann panse ki zot fer resorti. Se selman ler i fer sa ki i kapab transmet bann lide korekteman e reprodwir bann santiman egzakteman. Sa, byensir, i demann preparasyon profon e repetisyon. Se pour sa rezon ki, Pol ti enplore: “Pas ou letan dan lektir an piblik.” Ou pou resevwar formasyon presye dan sa abilite dan Lekol Minister Teokratik.

Fer Letan pour lir

“Bann plan sa enn ki devoue i sertennman diriz ver lavantaz, me tou dimoun ki presipite i sertennman tonm dan bezwen.” (Prov. 21:5) Pa sa i vre an relasyon avek nou dezir pour lir! Pour ganny sa “lavantaz,” nou bezwen fer bokou zefor pour organiz nou letan afen ki lezot aktivite pa etouf nou letan pour lir.

Kan ki ou lir? Eski ou benefisye par lir granmaten? Oubyen eski ou pli atantif plitar dan lazournen? Si ou kapab met dekote menm 15 ou 20 minit pour enpe lektir sak zour, ou pou etonnen lakantite ki ou kapab akonpli. Lakle se regilarite.

Akoz ki Zeova in swazir pour fer son gran plan ganny ekrir dan en liv? Afen ki dimoun i kapab konsilte son Parol. Sa i permet zot pour egzamin bann travay merveye Zeova, pour rakont sa avek zot zanfan, e pour met an memwar bann aktivite Bondye. (Pson. 78:5-7) Nou lapresyasyon pour zenerozite Zeova dan sa domenn i pli byen ganny demontre par lafason ki nou travay dir pour lir son Parol ki donn lavi.

ESKI ou’n deza get dimoun kot pe swazir fri? Laplipar i obzerv son kouler ek groser pour konnen si sa fri i mir. Serten dimoun i santi sa fri. Lezot i touse, menm pez li. I annan lezot ki tat son pwa, par met en fri dan sak kote lanmen pour kalkile lekel ki annan plis zi. Ki sa bann dimoun pe mazinen? Zot pe analiz bann detay, evalye bann diferans, reflesir lo lezot moman dan lepase kot zot ti pe swazir bann fri, e konpar sa ki zot pe gete avek sa ki zot deza konnen. En bon rekonpans pe esper zot akoz zot pe donn bokou latansyon lo sa size.

Byensir, bann rekonpans pour etidye Parol Bondye i bokou pli siperyer. Ler letid Parol Bondye i okip en plas enportan dan nou lavi, nou lafwa i vin pli for, nou lanmour i vin pli profon, nou minister i vin pli prodiktif, e bann desizyon ki nou fer i donn pli gran levidans disernman ek lasazes divin. Konsernan bann tel rekonpans, Proverb 3:15 i dir: “Tou ou lezot plezir pa kapab vin egal avek.” Eski ou pe eksperyans en tel rekonpans? Lafason ki ou etidye i kapab zwe en rol.—Kol. 1:9, 10.

Ki savedir etidye? I plis ki zis lir anler anler. I enplik servi ou fakilte mantal pour egzamin en topik oprofon oubyen avek bokou latansyon. I enkli analiz sa ki ou lir, konpar li avek sa ki ou deza konnen, e pran not lo bann rezon akoz tel ou tel deklarasyon i’n ganny fer. Ler ou pe etidye, reflesir oprofon lo nenport lide ki kapab nouvo pour ou. Konsider, osi, konman ki ou kapab aplik pli plennman sa bann konsey Biblik. Konman en Temwen Zeova, ou pou osi anvi reflesir lo bann loportinite pour servi sa lenformasyon pour ed lezot. Evidaman, etidye i enkli meditasyon.

Antre dan sa bon Leta Lespri

Ler ou pe prepare pour etidye, ou pran bann keksoz tel parey ou Labib, nenport piblikasyon ki ou deside servi, en kreyon oubyen en bolpenn, petet en kaye. Me eski ou prepar osi ou leker? Labib i dir nou ki Ezra “ti’n prepar son leker pour konsilte lalwa Zeova e pour fer [li] e pour ansenny regilasyon ek lazistis an Izrael.” (Ezra 7:10) Prepar leker i enplik kwa?

Lapriyer i permet nou pour apros letid Parol Bondye avek en latitid apropriye. Nou anvi nou leker, sa ki nou ete anndan, aksepte lenstriksyon ki Zeova i donn nou. Okonmansman sak sesyon letid, sipliy Zeova pour led son lespri. (Lik 11:13) Demann li pour ed ou konpran sinifikasyon sa ki ou pou etidye, konman i relye avek son plan, konman ki i kapab ed ou pour disteng sa ki bon ek sa ki move, e konman sa lenformasyon i afekte ou relasyon avek li. (Prov. 9:10) Anmezir ki ou etidye, kontinyen “demann Bondye” lasazes. (Zak 1:5) Onnetman egzamin ou lekor atraver sa ki ou aprann pandan ki ou rod led Zeova pour debaras ou avek bann panse ki mal oubyen bann move dezir. Toultan “reazir anver Zeova avek aksyon remersiman” pour bann keksoz ki i revele. (Pson. 147:7) Fer lapriyer avan fer letid i anmenn en relasyon pli entim avek Zeova, vi ki i permet nou reazir kan Zeova i koz avek nou atraver son Parol.—Pson. 145:18.

En tel tandans pour pare pour aksepte i disteng pep Zeova avek lezot etidyan. Parmi bann ki napa latasman avek Bondye, i annan en latitid popiler pour zot doute e met odefi sa ki’n ganny ekrir. Me sa i pa nou latitid. Nou met konfyans dan Zeova. (Prov. 3:5-7) Si nou pa konpran en serten keksoz, nou pa fer konklizyon avan ler ki sa keksoz i bezwen en fot. Pandan ki nou pe rode e fouye pour trouv larepons, nou esper Zeova. (Mik. 7:7) Parey Ezra, nou lobzektif se pour aplik e ansenny sa ki nou aprann. Avek sa dispozisyon leker, nou dan en pozisyon pour rekolte bokou rekonpans valab atraver nou letid.

Konman pour etidye

Olye senpleman konmans depi paragraf 1 e kontinyen toudilon ziska lafen, premyerman pran letan pour ganny en apersi lo sa lartik oubyen sapit antye. Konmans par egzamin byen bann mo dan sa tit. Sa i tenm ki ou pou etidye. Apre avek latansyon remarke konman ki bann soutit i relye avek tenm. Egzamin tou portre, latab, oubyen bwat revizyon ki akonpanny sa lartik. Demann ou lekor: ‘Dapre sa apersi, ki mon ekspekte aprann? Ki mannyer sa lartik pou kapab afekte mwan?’ Sa i donn direksyon dan ou letid.

Prezan al rod sa bann lenformasyon. Latour Veyer ek serten liv i enkli bann kestyon. Anmezir ki ou lir sak paragraf, i bon mark bann larepons. Menm si napa kestyon pour letid, ou kapab not bann pwen enportan ki ou anvi rapel. Si en panse i nouvo pour ou, pas en pti pe plis letan lo la pour fer sir ki ou konpran li byen. Vey bann ilistrasyon oubyen bann fason rezonnman ki pou itil pour ou dan predikasyon oubyen ki kapab ganny enkli dan en ekspoze ki ou pou fer byento. Mazin bann dimoun spesifik ki zot lafwa i kapab ganny ranforsi si ou partaz avek zot sa ki ou pe aprann. Not sa bann pwen ki ou anvi servi, e repas lo zot ler ou konplet ou letid.

Anmezir ki ou konsider sa lenformasyon, get bann verse ki’n ganny mansyonnen. Analiz konman ki sak verse i relye avek lide prensipal sa paragraf.

Ou kapab rankontre serten pwen ki ou pa fasilman konpran oubyen ki ou ti a anvi egzamin pli oprofon. Olye les sa resers anmenn ou lo en lot topik, fer en not pour egzamin zot plitar. Souvan-d-fwa bann pwen i ganny klarifye en pti pe pli lwen kan ou kontinyen lir larestan sa lenformasyon. Si i pa leka, ou kapab fer resers adisyonnel. Ki kalite keksoz ki nou kapab fer resers lo la? Petet ou pa klerman konpran en verse Labib ki’n ganny site. Oubyen i kapab ki ou pa fasilman vwar konman ki sa verse i aplik avek sa topik ki pe ganny diskite. Petet ou santi ki ou konpran en serten lide dan sa lenformasyon me pa ase byen pour eksplik li avek lezot dimoun. Olye ki ou senpleman les pase sa bann pwen, i kapab en bon keksoz pour fer resers lo la apre ki ou’n fini etidye sa ki ou’n konmanse.

Ler zapot Pol ti ekrir son let byen detaye pour bann Kretyen Ebre, i ti fer en poz dan milye son let pour li dir: “Aprezan la pwen pli enportan.” (Ebr. 8:1) Eski ou donn ou lekor en rapel parey detanzaot? Egzamin akoz Pol ti fer sa. Dan sapit presedan dan son let enspire, i ti’n deza montre ki Kris konman Gran Pret Bondye in antre dan lesyel. (Ebr. 4:14–5:10; 6:20) Toudmenm, par atir latansyon lo la e aksantye sa pwen prensipal okonmansman sapit 8, Pol ti prepar lespri son bann lekter pour reflesir oprofon lo konman ki sa pwen ti relye avek zot lavi. I ti fer resorti ki Kris ti’n antre devan Bondye pour zot lentere e ti’n ouver semen pour zot prop larantre dan sa “landrwa sen” dan lesyel. (Ebr. 9:24; 10:19-22) Lasirans zot lesperans ti pou ede pour pous zot pour aplik lezot konsey ki sa let ti kontyen konsernan lafwa, perseverans, ek kondwit Kretyen. Pareyman, ler nou etidye, konsantre lo bann pwen prensipal pou ed nou rekonnet devlopman sa tenm e pou ed nou vwar sa bann bon rezon pour azir an armoni avek konsey.

Eski ou letid personnel i pous ou pour azir? Sa i en kestyon enportan. Ler ou aprann en serten keksoz, demann ou lekor: ‘Konman ki sa i devret afekte mon latitid ek mon bann lobzektif dan lavi? Ki mannyer mon kapab aplik sa lenformasyon pour rezourd en problenm, pour fer en desizyon, oubyen pour atenn en lobzektif? Konman ki mon kapab servi sa lenformasyon avek mon fanmiy, dan predikasyon, dan kongregasyon?’ Konsider sa bann kestyon dan lapriyer, konsider bann vre sitiasyon dan ki ou kapab met ou konnesans an pratik.

Apre ki ou’n konplet en sapit oubyen en lartik, pran letan pour fer en revizyon an bref. Gete si ou kapab rapel bann pwen prensipal ek bann largiman ki siport sa bann pwen. Sa revizyon pou ed ou retenir sa lenformasyon pour servi plitar.

Ki pour etidye

Konman pep Zeova, nou annan bokou pour etidye. Me kote nou devret konmanse? Sak zour, i byen pour nou etidye verse ek komanter dan Examinons les Écritures chaque jour. Sak semenn, nou asiste bann renyon kongregasyon, e letid ki nou’n fer pour prepar sa bann renyon pou ed nou tir pli gran benefis. Anplis ki sa, serten in sazman envesti letan pour etidye serten nou bann piblikasyon Kretyen ki’n ganny enprimen avan ki zot ti konn laverite. Lezot i swazir serten porsyon dan zot lektir Labib lasemenn e fer letid profon lo sa bann verse.

Ki ou pou fer si ou sirkonstans pa permet ou pour etidye atantivman tou lenformasyon ki pou ganny diskite dan bann renyon kongregasyon? Evit sa bann pyez pour vitman pas lo sa bann lenformasyon zis pour dir ki ou’n fer li oubyen, pli pir ankor, pa etidye ditou sa bann lenformasyon parski ou pa kapab fini li. Plito, konnen ki kantite ou kapab etidye, e fer sa porsyon byen. Fer li sak semenn. Avek letan, esey enkli lezot renyon.

“Batir ou Lakour”

Zeova i rekonnet ki bann sef fanmiy i devret travay dir pour okip sa bann ki zot kontan. Proverb 24:27 i dir “Prepar ou travay an deor, e organiz li pour ou dan plantasyon.” Kantmenm sa, bezwen spirityel ou fanmiy pa devret ganny neglize. Pour sa rezon, sa verse i kontinyen: “Apre ou devret osi batir ou lakour.” Konman ki bann sef lakour i kapab fer sa? Proverb 24:3 i dir: “Par disernman [en lakour] pou ganny byen etablir.”

Konman ki disernman i benefisye ou fwaye? Disernman i sa abilite mantal pour get par deryer sa ki evidan. I ti a byen pour dir ki en letid fanmiy ki efektiv i konmans avek en egzaminasyon oprofon lo ou prop fanmiy li menm. Konman ki ou bann manm fanmiy pe progrese spirityelman? Pandan ou konversasyon avek zot ekout avek bokou latansyon. Eski i annan en leta lespri konplent oubyen mekontantman? Eski rod bann keksoz materyel i keksoz pli enportan? Ler ou dan predikasyon avek ou zanfan, eski zot santi alez ler zot idantifye zot lekor konman bann Temwen Zeova devan zot kanmarad? Eski zot apresye ou progranm lektir ek letid Labib an fanmiy? Eski servi Zeova i vreman zot fason viv? En bon egzaminasyon pou revel ou, konman sef lafanmiy, ki ou bezwen fer pour kapab etablir e batir bann kalite spirityel dan sak manm fanmiy.

Rod bann lartik dan Latour Veyer ek Réveillez-vous! ki annan pou fer avek bann bezwen spesifik. Apre dir lafanmiy davans sa ki pou ganny etidye afen ki zot kapab reflesir lo sa lenformasyon. Mentenir en bon latmosfer pandan letid. San reprimann severman oubyen anbaras okenn manm fanmiy, fer resorti valer sa lenformasyon ki pe ganny egzaminen, an fezan laplikasyon spesifik dapre bann bezwen ou fanmiy. Fer ki sak manm i enplike. Ed sakenn pour vwar konman ki Parol Zeova i “parfe” pour donn zis sa ki neseser dan lavi.—Pson. 19:7.

Rekolte bann Rekonpans

Bann dimoun ki obzerve, san en konpreansyon spirityel, i kapab etidye liniver, bann levennman mondyal, e menm zot lekor san konpran vre sinifikasyon sa ki zot pe vwar. Lo lot kote, avek led lespri Bondye, dimoun ki regilyerman etidye Parol Bondye i kapab detekte travay lanmen Bondye dan kreasyon, lakonplisman profesi Labib, ek realizasyon plan Bondye pour beni bann imen obeisan.—Mark 13:4-29; Rom. 1:20; Rev. 12:12.

Kantmenm sa i merveye, i pa devret fer nou vin arogan. Plito, egzamin Parol Bondye toulezour i ed nou pour reste senp. (Det. 17:18-20) I osi protez nou pour pa les nou ganny “tronpe par pese” parski ler Parol Bondye i vivan dan nou leker, i mwen probab ki latraksyon pese pou pli for ki nou determinasyon pour reziste li. (Ebr. 2:1; 3:13; Kol. 3:5-10) An konsekans, nou pou ‘viv en lavi ki Bondye i aprouve e ki fer li plezir dan tou sa ki nou fer.’ (Kol. 1:10) Sa i nou lobzektif kan nou etidye Parol Bondye, e akonpli li i pli gran rekonpans.

LERWA SALOMON “i’n kalkile e i’n fer en resers oprofon, afen ki i kapab aranz bokou proverb annord.” Akoz? Parski i ti enterese pour ekrir “bann parol laverite ki egzakt.” (Ekle. 12:9, 10) Lik ti “egzamin byen tou sa ki’n arive depi okonmansman” afen pour rakont annord bann levennman dan lavi Kris. (Lik 1:3) Tou le de serviter Bondye ti pe fer resers.

Ki savedir resers? Resers se rod lenformasyon avek bokou latansyon lo en topik partikilye. I enkli lir, e osi aplik bann konsey konsernan byen etidye. I kapab osi enkli entervyou dimoun.

Ki bann sirkonstans ki demann fer resers? La detrwa legzanp. I kapab ki dan ou letid personnel oubyen lektir Labib bann kestyon ki enportan pour ou i ganny souleve. En dimoun ki ou’n rann en temwannyaz avek, i kapab soulev en kestyon ki ou ti pou anvi donn li en larepons spesifik. Petet ou’n ganny dezinyen pour prezant en ekspoze.

Annou konsider ler ou’n ganny dezinyen pour prezant en ekspoze. Bann lenformasyon ki ou’n ganny demande pour kouver i kapab paret enpe zeneral. Konman ki ou kapab aplik li avek ou kongregasyon lokal? Anrisir li par fer resers. Ler sa bann lenformasyon i ganny siporte avek detrwa statistik oubyen en legzanp ki adapte avek ou lenformasyon e ki konsern lavi sa bann ki dan ou lodyans, en pwen ki ti kapab paret evidan i vin enformatif, menm motiv lezot. Sa lenformasyon dan sa lartik ki ou pe travay avek in kapab ganny prepare pour bann lekter dan lemonn antye, me ou bezwen elarzi, ilistre, e aplik sa bann pwen avek en kongregasyon oubyen avek en dimoun. Ki mannyer ou devret fer?

Avan ki ou rod lenformasyon, konsider ou lodyans. Kwa ki zot deza konnen? Kwa ki zot bezwen konnen? Apre idantifye ou lobzektif. Eski se pour eksplike? pour konvenk? pour prouve ki en keksoz i fo? oubyen pour motive? Pour eksplike i demann fourni lenformasyon adisyonnel pour fasilit konprenezon lo en topik. Kantmenm lezot i konpran bann fe debaz, petet ou bezwen elarzi lo kan oubyen konman pour fer sa ki’n ganny dir. Pour konvenk i enplik donn bann rezon ki dekrir akoz en keksoz i konmsa, ki enkli prezant levidans. Pour prouve ki en keksoz i fo i demann en konnesans oprofon lo tou le de kote en topik ansanm avek en bon analiz lo bann levidans ki ganny servi. Byensir, nou pa senpleman rod bann largiman solid me bann fason pour prezant bann fe avek labonte. Pour motive i enplik tous leker. Savedir fourni motivasyon e batir dezir ou lodyans pour azir lo sa ki’n ganny diskite. Bann leksperyans bann frer ek ser ki’n pran tel aksyon, menm dan difikilte, i kapab ede pour tous leker.

Eski aprezan ou pare pour konmanse? Pa ankor. Konsider ki kantite lenformasyon ki ou bezwen. Letan i kapab en fakter enportan. Si ou pe al prezant lenformasyon avek lezot, ki kantite letan ki pou disponib pour ou fer sa? Senk minit? Karannsenk minit? Eski sa letan i fiks, tel parey dan renyon kongregasyon oubyen eski i fleksib, tel parey dan en letid Labib ouswa dan en vizit pastoral?

Finalman, ki bann zouti resers ki disponib pour ou? Avek sa ki ou annan kot ou, eski i annan lezot dan libreri kot ou Lasal Rwayonm? Eski bann frer ki pe servi Zeova pour bokou lannen i pare pour les ou konsilte zot zouti resers? Eski i annan en libreri piblik kot ou reste ki annan bann liv referans ki kapab ganny servi si zot neseser?

Servi nou Zouti Resers pli enportan—Labib

Si ou proze resers i enplik eksplik en verse, konmans avek Labib li menm.

Egzamin son Konteks. Demann ou lekor: ‘Sa verse ti ganny adrese avek lekel? Ki bann verse avan e apre sa verse i endike konsernan bann sirkonstans ki’n anmenn sa deklarasyon oubyen latitid bann dimoun ki ti enplike?’ Bann tel detay i souvan-d-fwa ed nou pour konpran en verse, e zot osi kapab anim en diskour dan ki ou kapab servi zot.

Par egzanp, Ebre 4:12 i souvan ganny site pour montre pwisans Parol Bondye pour tous leker e enfliyans lavi en dimoun. Son konteks i ogmant nou lapresyasyon lo konman ki sa i kapab leka. I diskit lo bann leksperyans ki Izrael ti pas atraver pandan sa 40 an dan dezer avan antre dan pei ki Zeova ti promet Abraam. (Ebr. 3:7–4:13) “Parol Bondye,” son promes pour anmenn zot dan en landrwa repo an armoni avek son lalyans avek Abraam, pa ti mor; i ti vivan e i ti pe mars ver son lakonplisman. Bann Izraelit ti annan tou rezon pour demontre lafwa ladan. Sepandan, anmezir ki Zeova ti diriz zot depi Lezip ziska Montanny Sinai e plitar ziska Later Promiz, zot ti plizyer fwa demontre ki zot ti mank lafwa. Alor, sa ki ti annan dan zot leker ti ganny devwale, par zot reaksyon anver lafason ki Bondye ti akonpli son parol. Ozordi i en pe parey, bann promes ki dan Parol Bondye i revel sa ki annan dan leker bann zonm.

Get bann Referans. Serten Labib i annan referans ki anvoy ou ver lezot verse. Eski pour ou i annan sa? Si wi, sa i kapab ede. Not en legzanp dan Les Saintes Écritures Traduction du monde nouveau. Dan premye Pyer 3:6 i montre Sara konman en legzanp ki merit ganny imite par bann madanm Kretyen. En referans ki refer ou avek Zenez 18:12 i ranforsi sa par devwale ki Sara ti koz lo Abraam konman Senyer “dan li menm.” Vreman son soumisyon ti senser. Anplis ki bann tel eklersisman, bann referans i kapab refer avek bann verse ki montre lakonplisman en profesi Labib oubyen avek en keksoz ki lalyans Lalwa ti anonse. Me, pa tou referans ki la pour donn bann tel leksplikasyon. Zot kapab senpleman fer referans avek en lot panse en pe parey oubyen avek lezot lenformasyon lo bann dimoun oubyen rezyon ki enplike.

Resers avek en Konkordans Labib. En konkordans Labib i en lalis bann mo ki’n ganny klase depi A ziska Z. I kapab ed ou pour trouv bann verse ki relye avek sa topik ki ou pe fer resers lo la. Anmezir ki ou eksplor zot, ou pou aprann lezot detay itil. Ou pou trouv levidans “model” laverite dan Parol Bondye. (2 Tim. 1:13) Traduction du monde nouveau i kontyen en lalis debaz “Index des mots bibliques.” Concordance complète des Saintes Écritures an angle oubyen an Franse i pli detaye. I pou fer ou vwar tou bann verse ki kontyen tou mo prensipal dan Labib.

Aprann servi lezot Zouti Resers

Sa bwat lo paz 33 i annan en lalis lezot zouti resers ki’n ganny fourni par “lesklav fidel e pridan.” (Mat. 24:45-47, NW) Bokou sa bann piblikasyon i annan en paz avek konteni sa liv, e bokou i annan en lendeks par deryer setadir en lalis bann diferan topik ki’n ganny prepare pour ed ou trouv lenformasyon spesifik. Alafen sak lannen, en lalis bann topik ki’n ganny diskite avek dat sa nimero pandan lannen i ganny pibliye dan Latour Veyer ek Réveillez-vous!

Konn byen bann diferan kalite lenformasyon ki ganny ofer dan bann piblikasyon letid lo Labib i kapab akseler ou resers. Par egzanp, si ou anvi konn lo profesi, doktrin, kondwit Kretyen, oubyen laplikasyon bann prensip Labib. I tre probab ki ou pou trouv bann tel keksoz dan Latour Veyer. Réveillez-vous! i koz lo bann levennman resan, bann problenm dan lavi toulezour, relizyon, lasyans, e lo dimoun sorti dan diferan pei. Komanter lo sak resi dan bann Levanzil dan lord ki ti arive i aparet dan liv Le plus grand homme de tous les temps. Diskisyon verse par verse i ganny trouve dan bann tel piblikasyon parey La Révélation: le grand dénouement est proche!, Prêtons attention à la prophétie de Daniel, ek sa de volim La prophétie d’Isaïe, lumière pour tous les humains. Dan liv Comment raisonner à partir des Écritures, ou pou trouv bann larepons satisfezan pour plizyer santenn kestyon lo Labib ki souvan ganny souleve dan predikasyon. Pour en konpreansyon pli kler lo lezot larelizyon, zot lansennyman, ek zot listwar, vwar L’humanité à la recherche de Dieu. En resi detaye lo listwar modern bann Temwen Zeova i trouve dan liv Les Témoins de Jéhovah: Prédicateurs du Royaume de Dieu. Pour en rapor lo bann devlopman resan dan predikasyon mondyal sa bon nouvel, vwar dernyen Annuaire des Témoins de Jéhovah. Étude perspicace des Écritures i en diksyonner tre detaye ki enkli osi bann map Biblik ek en atlas. I en sours ekselan si ou bezwen bann detay lo bann dimoun, landrwa, lobze, langaz, oubyen bann levennman istorik ki asosye avek Labib.

“Index des publications de la Société Watch Tower.” Index ki ganny pibliye dan plis ki 20 langaz, pou ed ou trouv lenformasyon dan en gran varyete piblikasyon. I ganny divize an de, enn i lalis bann diferan topik e lot bann verse. Pour servi sa Index bann topik, rod en mo ki pe reprezant sa topik ki ou anvi egzaminen. Pour servi sa Index bann verse, rod dan lalis bann verse sa enn ki ou anvi egzaminen. Si serten keksoz in ganny pibliye dan ou langaz lo sa topik oubyen verse dan bann lannen ki sa Index i kouver, ou pou trouv en lalis referans pour konsilte. Servi latab lendikasyon devan dan sa Index pour desifre bann abrevyasyon pour bann non piblikasyon ki ganny site. (Avek sa led, par egzanp, ou pou aprann ki w99 3/1 15 i refer avek Latour Veyer pour nimero le 1 Mars, 1999, paz 15.) Bann tenm enportan, tel parey “Ministère du champ, Rapports” [“Field Ministry Experiences”] ek “Biographie de Témoins de Jéhovah” [“Life Stories of Jehovah’s Witnesses”] i kapab itil pour prepar bann prezantasyon ki motiv kongregasyon.

Vi ki fer resers i kapab vin vreman enteresan, fer atansyon ki ou pa ganny distrer avek lezot topik. Reste konsantre lo ou lobzektif pour rod sa lenformasyon ki ou bezwen. Si sa Index i fer referans avek en serten sours, vir lo sa paz ki’n ganny mansyonnen, apre servi bann soutit ek bann premye fraz dan bann paragraf pour gid ou ver lenformasyon ki adapte avek sa ki ou pe rode. Si ou pe rod sinifikasyon en serten verse Labib, premyerman rode kote lo sa paz ki sa verse i ganny site. Apre egzamin lenformasyon dan paragraf ki ganny trouve avan oubyen apre sa verse.

“Watchtower Library” lo CD-ROM. Si ou annan akse avek en konpiter, ou kapab benefisye par servi Watchtower Library lo CD-ROM, ki kontyen en gran koleksyon nou bann piblikasyon. I fasil pour servi sa progranm resers pour permet ou pour rod en mo, plizyer mo ansanm, oubyen sitasyon en verse dan nenport piblikasyon dan Watchtower Library. Menm si sa zouti resers i pa disponib dan ou langaz, ou kapab benefisye avek li dan en langaz enternasyonal ki ou familye avek.

Lezot Libreri teokratik

Dan son dezyenm let enspire pour Timote, Pol ti demann sa zennonm pour anmenn “bann liv sirtou bann an roulo” pour li an Ronm. (2 Tim. 4:13) Pol ti apresye serten travay ekrir e ti gard zot. Ou osi ou kapab fer parey. Eski ou anmas ou kopi personnel Latour Veyer, Réveillez-vous! ek Nou Minister Rwayonm menm apre ki zot in fini ganny egzaminen dan bann renyon kongregasyon? Si wi, zot pou disponib pour ou servi zot konman bann zouti resers, ansanm avek lezot piblikasyon Kretyen ki ou’n gannyen. Laplipar kongregasyon i gard en koleksyon piblikasyon dan en libreri dan Lasal Rwayonm. Sa i pour benefis tou dimoun dan kongregasyon, pour zot servi ler zot kot Lasal Rwayonm.

Fer en Koleksyon personnel

Vey bann keksoz enteresan ki ou kapab servi ler ou pe koze e ansennyen. Si ou trouv en nouvel enteresan, statistik, oubyen legzanp ki ou kapab servi dan ou minister dan en zournal oubyen dan en magazin, dekoup zot oubyen kopi sa lenformasyon. Enkli dat, tit sa zournal, e petet non sa loter oubyen sa enn ki’n pibliy li. Dan bann renyon kongregasyon, ekrir bann pwen rezonnman ek ilistrasyon ki kapab ed ou pour eksplik laverite avek lezot. Eski ou’n deza arive mazin en bon ilistrasyon me ou pa’n annan en loportinite pour servi li toudswit? Ekrir li, e met li dan en fayl. Apre ki ou’n dan lekol pour enpe letan, ou pou’n prepar plizyer prezantasyon. Olye zet ou not lo sa bann ekspoze, anmas zot. Sa resers ki ou’n fer i kapab vin itil.

Koz avek Dimoun

Mazinen ki ou kapab aprann en kantite lenformasyon avek lezot dimoun. Ler Lik ti pe asanble son Levanzil, i ti evidaman ramas bokou lenformasyon par entervyou bann temwen. (Lik 1:1-4) Petet en konpanyon Kretyen i kapab eklersi sa topik ki ou pe deside fer resers lo la. Dapre Efezyen 4:8, 11-16, Kris i servi ‘don an zonm’ pour ed nou grandi dan “konnesans Garson Bondye.” Ou kapab ganny bann bon lide par entervyou sa bann ki annan leksperyans dan servi Bondye. Fer konversasyon avek dimoun i kapab osi fer ou konnen ki zot pe panse, e sa i kapab ed ou pour prepar lenformasyon ki vreman pratik.

Evalye ou Rezilta

Apre ki dible in ganny rekolte, lagrenn i bezwen ganny retire dan sa lakok ki anvlop li. I parey avek rezilta ou resers. Avan ki i pare pour ou servi, ou bezwen separ sa ki annan valer avek sa ki pa neseser.

Si ou pe al servi sa lenformasyon dan en ekspoze, demann ou lekor: ‘Eski sa pwen ki mon deside servi i vreman kontribye serten keksoz ki vo lapenn dan prezantasyon sa topik? Oubyen, kantmenm i bann lenformasyon enteresan, eski i retir latansyon lo sa topik ki mon devret pe koz lo la?’ Si ou pe konsider servi bann levennman resan oubyen lenformasyon dan domenn lasyans oubyen medikal ki pe toultan sanze, fer sir ki sa lenformasyon i azour. Realize, osi ki serten pwen dan nou bann vye piblikasyon i kapab in ganny met azour, alor konsider sa bann pli resan ki’n ganny pibliye lo sa topik.

I annan en bezwen spesyal pour fer atansyon si ou deside rasanble lenformasyon avek bann sours profann. Pa zanmen oubliye ki Parol Bondye ki laverite. (Zan 17:17) Zezi i okip pozisyon kle dan lakonplisman plan Bondye. Se pour sa rezon ki Kolosyen 2:3 i dir: “Dan li in kasyet tou bann trezor lasazes ek konnesans Bondye.” Evalye rezilta ou resers dan sa laliny. Konsernan resers profann, demann ou lekor: ‘Eski sa lenformasyon i egzazere, i pa tro asire, oubyen i mank disernman? Eski i’n ganny ekrir avek en motif egois oubyen komersyal? Eski lezot sours lotorite i dakor avek sa lenformasyon? Pli enportan, eski i armoniz avek laverite Labib?’

Proverb 2:1-5 i ankouraz nou pour kontinyen rod konnesans, konpreansyon, ek disernman “konmsi larzan, e konman en trezor kasyet.” Tou le de i enplik fer zefor entans e prodwir gran rekonpans. Resers i demann zefor, me fer resers pou ed ou trouv panse Bondye lo bann keksoz, pour koriz bann lide ki mal, e pour sezi byen for laverite. I pou azout valer e fer ou prezantasyon vivan, fer zot en plezir pour prezante e en plezir pour ekoute.