Leson 9

Bann Serviter Bondye i bezwen pir

Akoz nou bezwen pir dan tou keksoz? (1)

Ki fodre nou fer pour vin pir spirityelman? (2) moralman? (3) mantalman? (4) e fizikman? (5)

Ki kalite parol sal ki fodre nou rezete? (6)

1. Zeova Bondye i pir e sen. I oule ki son bann serviter i reste pir spirityelman, moralman, mantalman e fizikman. (1 Pyer 1:16) I demann en gran zefor pour reste pir dan lizye Bondye. Nou viv dan en lemonn kot valer moral pe degrade. Nou osi bezwen lit kont nou tandans pour fer sa ki mal. Me fodre pa ki nou abandonn sa lalit.

2. Pir spirityelman: Si nou oule servi Zeova, nou pa pou kapab kontinyen swiv lansennyman ek koutim fo larelizyon. Nou devret sorti dan larelizyon ki fo e pa soutenir li dan okenn fason. (2 Korentyen 6:14-18; Revelasyon 18:4) Enn fwa ki nou’n aprann laverite lo Bondye, nou bezwen fer atansyon pour pa les nou ganny anbete par bann dimoun ki ansenny bann mansonz.—2 Zan 10, 11.

3. Pir moralman: Zeova i oule ki son bann adorater i toultan kondwir zot konman bann vre Kretyen. (1 Pyer 2:12) I vwar tou sa ki nou fer, menm an sekre. (Ebre 4:13) Nou devret rezet imoralite seksyel ek lezot pratik degradan dan sa lemonn.—1 Korentyen 6:9-11.

4. Pir mantalman: Si nou nouri nou lespri avek bann bon keksoz, nou kondwit osi pou bon. (Filipyen 4:8) Me si nou kontinyen mazin bann keksoz sal, nou aksyon pou move. (Matye 15:18-20) Nou devret rezet bann divertisman ki kapab sali nou lespri. Nou kapab nouri nou lespri avek bann bon panse ler nou etidye Parol Bondye.

5. Lapropte fizik: Parske zot reprezant Bondye, bann Kretyen i devret gard zot lekor ek zot lenz prop. Nou devret lav nou lanmen kan nou sorti dan kabinen, e osi avan manze oubyen avan tous nouritir. Si ou lakaz napa en kabinen, lasel i devret ganny antere. (Deterononm 23:12, 13) Lapropte fizik i favoriz en bon lasante. Lakaz en Kretyen i devret prop e annord anndan osi byen ki deor. Zot lakour i devret en bon legzanp dan zot zalantour.

6. En langaz pir: Serviter Bondye i devret touzour koz laverite. Bann ki koz manti pa pou antre dan Rwayonm Bondye. (Efezyen 4:25; Revelasyon 21:8) Bann Kretyen pa servi move parol. Zot pa ekout, ni rakont bann fars obsenn ek zistwar sal. Dan travay, kot lekol, oubyen dan lezot landrwa, zot ganny rekonnet konman bann dimoun ki servi en langaz pir.—Efezyen 4:29, 31; 5:3.

[Portre lo paz 18, 19]

Bann serviter Bondye i bezwen pir dan tou laspe