Sizyenm Parti—Kondwir bann Letid Labib ki progrese

Ler en Etidyan i demann Kestyon

¹ Enn fwa ki en letid Labib in ganny byen etablir, i pli byen pour egzamin bann lansennyman Labib dan lord olye zis swazir en nenport size. Sa i ed sa etidyan batir en fondasyon pour konnesans egzakt e pour progrese spirityelman. (Kol. 1:9, 10) Me souvannfwa, bann etidyan i demann bann kestyon lo plizyer size pandan letid. Ki nou devret fer?

² Bon Zizman: Bann kestyon ki relye avek lenformasyon ki pe ganny egzaminen i kapab ganny reponn toudswit. Si en kestyon pou ganny diskite plitar dan sa piblikasyon, i sifi pour dir ki plitar i pou ganny diskite. Me si en kestyon pa relye avek lenformasyon ki pe ganny etidye oubyen i demann fer resers pour donn bon larepons, i pou pli byen konsider sa apre letid ouswa en lot ler. Serten proklanmater in vwar ki ler zot ekrir sa kestyon, sa i asir sa etidyan ki son kestyon pe ganny pran oserye e anmenmtan i anpes sorti lo topik letid.

³ Bokou lansennyman Labib i ganny konsidere selman an bref dan nou bann piblikasyon. Me si en etidyan i vwar li difisil pour aksepte serten lansennyman ouswa i atase avek en fo krwayans? I itil pour egzamin lezot lenformasyon ki diskit oprofon sa ki Labib i dir lo sa size. Si sa etidyan pa konvenki, les sa size pour en lot ler e kontinyen avek son letid. (Zan 16:12) Anmezir ki i ganny plis konnesans lo Labib e i progrese spirityelman, i pou kapab konpran sa lansennyman Labib.

⁴ Konn ou Limit: Si ou pa asire ki larepons ou pou donnen pour en kestyon, evit sa risk pour donn en lopinyon personnel. (2 Tim. 2:15; 1 Pyer 4:11) Eksplike ki ou pou fer resers lo sa kestyon e retourn avek larepons. Ou kapab profit sa loportinite pour montre sa etidyan konman pour fer resers. Montre li ptit-a-pti konman pour servi plizyer zouti resers ki lorganizasyon Zeova in fourni. Dan sa fason i pou finalman kapab reponn son prop kestyon.—Akt 17:11.

Ed zot ganny plis Temwannyaz

¹ Ler nou pe pres sa bon nouvel, nou souvannfwa rankontre bann dimoun ki pa reste dan nou teritwar oubyen ki koz en lot langaz, tel parey langaz siny. Lezot avek ki nou’n fer bann bon diskisyon lo Labib in kapab al reste dan en lot landrwa. Ki mannyer nou kapab fer laranzman ki sa bann dimoun i ganny plis temwannyaz? Par servi sa form Please Follow Up (S-43).

² Souvannfwa dimoun i ekout pli atantivman sa bon nouvel ler i ganny prezante dan zot lalang maternel. (Akt 22:1, 2) Alor dan plizyer ka, ler nou rankontre en dimoun ki koz en lot langaz, nou devret ranpli sa form menm si sa dimoun pa montre lentere dan sa mesaz Rwayonm. Me kot i annan en gran popilasyon dimoun ki koz en lot langaz ki pe ganny temwannyaz regilyerman dan zot prop langaz, i pa neseser pour ranpli sa form eksepte ler i annan lentere.

³ Ranpli sa Form: Servi bon zizman pour esey demann sa dimoun son non, ladres, ek nimero telefonn. Endik degre lentere ki sa dimoun ti demontre, kan nou kapab rankontre sa dimoun, piblikasyon ki ti ganny plase oubyen demande, e langaz ki sa dimoun i pli byen konpran. Apre ki sa form in ganny ranpli, donn li vitman avek sekreter kongregasyon ki pou anvoy li kot en kongregasyon oubyen en group apropriye, si i egziste.

⁴ Anvoy sa Form: Si sekreter pa konnen ki kongregasyon oubyen group ki devret resevwar sa form oubyen i napa ladres, i kapab telefonn servis ki okip teritwar dan biro brans pour ganny lenformasyon neseser. I nepli neseser pour enform sirveyan lavil ler pe anvoy sa form.

⁵ Dek ki en kongregasyon oubyen en group i resevwar en form Please Follow Up ki’n ganny ranpli, bann laranzman i devret ganny fer pour kontakte sa dimoun toudswit. Vi ki nou’n fer bokou zefor pour zwe nou rol, nou kapab annan konfyans ki Zeova pou ouver leker bann ki annan sa bon latitid pour ganny lavi eternel.—Akt 13:48.