Zour Zeova i pros

¹ Bann Kretyen i vreman anvi vwar zour Zeova arive, kot i pou detrir sa sistenm e anmenn en nouvo lemonn kot pou annan ladrwatir. (2 Pyer 3:12, 13) Vi ki nou pa konnen egzakteman kan sa zour pou arive, nou devret gard nou vizilans e ed lezot pour fer parey. (Ezek. 33:7-9; Mat. 24:42-44) Refleksyon lo bann profesi dan Parol Bondye pou fortifye nou konviksyon ki “gran zour Zeova i pros.”—Tsef. 1:14.

² Bann Pouvwar mondyal ki pou vini: Parey i’n ganny rikorde dan Revelasyon 17:9-11, zapot Zan i mansyonn “set lerwa,” ki reprezant set pouvwar mondyal ki vin enn apre lot. Zan i osi koz lo “en ywityenm lerwa,” ki konmela i reprezant Nasyon Ini. Eski nou ekspekte vwar lezot pouvwar mondyal aparet? Non. Sa profesi i dir ki sa wityenm lerwa “pou ganny detri.” Apre sa, napa lezot lerwa later ki ganny mansyonnen. Eski sa profesi i ed ou vwar dan ki letan nou pe viv ladan?

³ Danyel 2:31-45 i ed nou konpran larive zour Zeova. Dan sa profesi, sa gran stati ki Neboukadnetsar ti vwar dan en rev i reprezant bann pouvwar mondyal ki vin enn apre lot. Tou sa bann pouvwar in deza fini aparet. Kote nou ete aprezan? Nou dan sa letan ki ganny reprezante par lipye sa stati. Sa profesi i dekrir klerman sa ki pou arive apre. Dominasyon imen pou ganny detri konpletman, e “en rwayonm ki pa pou zanmen ganny detrir” pou pran son plas. Eski ou kapab vwar konman sa i montre ki zour Zeova i pros?

⁴ Plis Levidans: Nou pe vwar plis levidans ki zour Zeova i pros. Nou vwar lakonplisman sa ki zapot Pol ti predir konsernan mantalite bann dimoun “dan bann dernyen zour.” (2 Tim. 3:1-5) Deplis nou pe partisip dan sa temwannyaz mondyal ki devret ganny donnen avan lafen i arive. (Mat. 24:14) Fotespere nou predikasyon i kontinyen montre ki sa ki sa lanz ti dir i irzan: “Donn Bondye loner e rann li glwar, parski ler son zizman in arive.”—Rev. 14:6, 7.

Nevyenm Parti—Kondwir bann Letid Labib ki progrese

Prepar Etidyan pour donn Temwannyaz enformel

¹ Ler Andre ek Filip ti realize ki Zezi ti Mesi, zot pa ti kapab pa dir lezot sa nouvel eksitan. (Zan 1:40-45) Pareyman ozordi, ler bann etidyan Labib i konmans demontre lafwa dan sa ki zot pe aprann, zot santi zot motive pour koz lo la. (2 Kor. 4:13) Ki mannyer nou kapab ankouraz zot pour donn temwannyaz enformel e prepar zot pour fer li avek efikasite?

² Ou kapab demann sa etidyan si i’n koz avek lezot lo sa ki i’n aprann dan Labib. Petet i annan bann zanmi ek fanmiy ki i ti pou kapab envite pour asiste letid. Demann li si son bann koleg travay, kanmarad lekol, oubyen lezot dimoun ki i konnen in demontre lentere dan sa bon nouvel. Dan sa fason i kapab konmans donn en temwannyaz. Ed li konpran nesesite pour demontre bon zizman, respe e zantiy ler i pe koz avek lezot lo Zeova ek son plan.—Kol. 4:6; 2 Tim. 2:24, 25.

³ Partaz zot Krwayans: I tre enportan pour form bann etidyan Labib pour servi Parol Bondye ler zot pe partaz zot krwayans. En serten moman pandan letid demann sa etidyan: “Ki mannyer ou pou servi Labib pour eksplik sa laverite avek ou fanmiy?” oubyen “Ki verse Labib ou pou servi pour prouv sa avek en zanmi? Ekout byen ki mannyer i reponn, e montre li konman i pou baz son lansennyman lo bann verse Labib. (2 Tim. 2:15) Ler ou fer sa, ou pe prepar sa etidyan pour donn temwannyaz enformel, e osi ler i kalifye i pou kapab partisip dan travay predikasyon ki kongregasyon i organize.

⁴ I byen pour prepar bann etidyan Labib pour fer fas avek lopozisyon. (Mat. 10:36; Lik 8:13; 2 Tim. 3:12) Ler lezot i demann kestyon oubyen fer komanter lo Temwen Zeova, sa i kapab donn zot sa loportinite pour donn en temwannyaz. Brosir Les Témoins de Jéhovah: Qui sont-ils? Quelles sont leurs croyances? i kapab ekip zot pour “pare pour donn en repons.” (1 Pyer 3:15) Dan sa brosir i annan lenformasyon egzakt ki bann nouvo i kapab servi pour ed bann zanmi ek fanmiy ki annan bon lentansyon pour konpran nou krwayans ki baze lo Labib e osi sa ki nou fer.