Predikasyon i ed nou persevere

¹ Parol Bondye i enplor nou pour persevere dan sa lakours ki devan nou. (Ebre 12:1) Zis parey en atlet i bezwen annan perseverans pour li reisi dan son lakours, demenm nou osi nou bezwen annan perseverans pour resevwar pri lavi eternel. (Ebre 10:36) Ki mannyer predikasyon i kapab ed nou persevere fidelman ziska lafen?—Mat. 24:13.

² Vin pli for spirityelman: Nou prop lespwar i reste briye ler nou anons sa promes merveye dan Labib konsernan en nouvo lemonn. (1 Tesa. 5:8) Ler nou partisip regilyerman dan predikasyon, nou ganny sa loportinite pour fer konnen laverite ki nou’n aprann dan Labib. Nou ganny sa loportinite pour defann nou lafwa, ki an retour i ed nou vin pli for spirityelman.

³ Nou bezwen nou menm konpran byen laverite dan Labib pour nou kapab byen ansenny lezot. Nou bezwen fer resers e reflesir lo sa bann lenformasyon. Sa zefor ki nou fer i ogmant nou konnesans, i fortifye nou lafwa, e i redonn nou lafors spirityel. (Prov. 2:3-5) Alor, ler nou fer zefor pour ed lezot, nou pe fortifye nou menm.—1 Tim. 4:15, 16.

⁴ Partisip dan predikasyon avek devouman i en parti enportan dan sa “lekipman batay ki Bondye i donnen,” ki nou bezwen pour kapab debout ferm kont Dyab ek bann demon. (Efe. 6:10-13, 15) Letan nou byen okipe dan nou servis pour Bondye, sa i ed nou gard nou lespri lo bann bon keksoz e i ed nou evite les lemonn Satan fer nou vin koronpi. (Kol. 3:2) Anmezir ki nou ansenny lezot semen Zeova, nou pe kontinyelman rapel nou lekor nesesite pour mentenir en kondwit sen.—1 Pyer 2:12.

⁵ Sipor Bondye: Finalman, nou partisipasyon dan travay predikasyon i ansenny nou pour depan lo Zeova. (2 Kor. 4:1, 7) Sa i vreman en benediksyon! Devlop sa kalite konfyans i ekip nou pour pa zis akonpli nou predikasyon me osi pour fer fas avek nenport sitiasyon ki nou kapab rankontre dan lavi. (Fili. 4:11-13) Annefe, aprann depan antyerman lo Zeova i lakle pour perseverans. (Ps. 55:22) Dan bokou fason, predikasyon i ed nou persevere.

Dizyenm Parti—Kondwir bann Letid Labib ki progrese

Form Etidyan pour pres port-an-port

¹ Ler bann ansyen i dakor ki en etidyan Labib i kalifye konman en proklanmater ki pa ankor batize, i kapab konmans pres avek kongregasyon. (Vwar Organized to Do Jehovah’s Will, p. 79-81.) Ki mannyer nou kapab ed en etidyan pour reisi pres port-an-port?

² Prepar ansanm: Bon preparasyon i en keksoz tre esansyel. Montre sa etidyan kote i kapab trouv bann prezantasyon dan Nou Minister Rwayonm ek liv Comment raisonner, e ed li swazir en prezantasyon senp ki aplik pour nou teritwar. Depi okonmansman, ankouraz li pour servi Labib dan son predikasyon.—2 Tim. 4:2.

³ Bann sesyon legzersis i tre itil pour en nouvo proklanmater. Ler sa etidyan pe egzers son prezantasyon, montre li ki mannyer pour byen fer fas avek bann reaksyon ki nou souvan rankontre dan teritwar. (Kol 4:6) Asir li ki i pa neseser ki nou konn larepons tou kestyon ki en dimoun i kapab demande. Ler dimoun i demann nou sa bann kalite kestyon, souvannfwa pli bon keksoz pour fer se pour dir sa dimoun ki nou ava fer resers e ki nou pou retournen pour diskit en pe plis lo sa topik.—Prov. 15:28.

⁴ Pres ansanm: Zour ki sa etidyan i partisip pour premye fwa dan predikasyon port-an-port, les li obzerve pandan ki ou prezant sa prezantasyon ki zot ti prepare ansanm. Apre fer li partisipe. Dan serten ka, i kapab pli byen pour fer sa nouvo proklanmater prezant zis en bout sa prezantasyon, par egzanp lir e fer komanter lo en verse Labib. Pran an konsiderasyon personnalite ek abilite sa etidyan. (Fili. 4:5) Pa ezite pour felisit li anmezir ki ou form li ptit-a-pti dan diferan laspe travay predikasyon.

⁵ I enportan pour ed en nouvo proklanmater etablir en progranm regilye pour partisip dan predikasyon, si i posib tou le semenn. (Fili. 3:16) Fer laranzman spesifik pour travay ansanm dan predikasyon, e ankouraz li pour travay avek lezot proklanmater devoue osi. Zot legzanp ek lasosyasyon pou ed li devlop bann skil e i pou kontan pres port-an-port.