Ed lezot pour glorifye Zeova

¹ En mesaz enportan pe ganny proklanmen avek bann dimoun partou lo later: “Donn Bondye loner e rann li glwar, parski ler son zizman in arive. Ador sa Enn ki’n fer lesyel, later, lanmer ek bann sours delo!” (Rev. 14:6, 7) I nou privilez pour partisip dan proklanmasyon sa mesaz. Ki bann dimoun i devret konnen lo Zeova pour kapab annan lakrent pour li e ador li?

² Son Non: Parmi sa kantite bondye ki ganny adore ozordi, bann dimoun i bezwen kapab disteng sa sel vre Bondye par son non. (Det. 4:35; 1 Kor. 8:5, 6) Annefe, bann ekriven Labib i servi son gran non plis ki 7,000 fwa. I vre ki nou devret servi bon zizman kan nou pe entrodwir non Bondye, me nou pa devret zanmen kasyet li oubyen refize pour servi li. Lavolonte Bondye i ki tou imen i arive konn son non.—Ps. 83:18.

³ Son Personnalite: Pour glorifye Zeova, dimoun i bezwen konnen ki kalite Bondye i ete. Nou bezwen fer zot konn son gran lanmour, lasazes remarkab, lazistis parfe, ek pwisans enpresyonan, osi son mizerikord, labonte leker, ek lezot kalite merveye. (Egz. 34:6, 7) Zot bezwen osi aprann pour annan en lakrent ki pou benefisye zot, osi en gran respe pour Bondye, e rekonnet ki zot lavi i depan lo laprouvasyon Zeova.—Ps. 89:7.

⁴ Apros avek Bondye: Pour kapab ganny sove zour zizman Bondye ki pe aprose, bann dimoun i bezwen envok Zeova avek lafwa. (Rom. 10:13, 14; 2 Tesa. 1:8) Sa i enkli plis ki zis ganny en konnesans lo son non ek son bann kalite. Nou bezwen ed bann dimoun devlop en relasyon personnel avek Zeova, e met zot konfyans dan li avek tou zot leker. (Prov. 3:5, 6) Anmezir ki zot aplik sa ki zot in aprann, tourn ver Bondye senserman dan lapriyer, e eksperyans son led dan zot lavi, alor zot lafwa pou agrandir, e sa pou ed zot pour apros avek Bondye.—Ps. 34:8.

⁵ Fotespere ki nou deklar non Bondye avek devouman, e ed lezot pour met zot konfyans total dan li e pour annan lakrent pour li. Nou ava kapab alor ed bokou plis lezot pour konn Zeova e glorifye li konman zot “Bondye delivrans.”—Ps. 25:5.

Montre Lapresyasyon pour nou bann Piblikasyon

¹ Kan Lerwa Yosiya ti pe fer bann laranzman pour repar tanp i ti ordonn bann travayer: “Selman pa bezwen fer en kont pour sa larzan ki’n ganny donnen avek sa bann travayer, akoz zot pe travay avek fidelite.” (2 Rwa. 22:3-7) Sa lapresyasyon ki sa bann zonm ti annan pour bann keksoz sakre ti evidan dan lafason ki zot ti servi bann resours ki ti’n ganny konfye avek zot. Pareyman nou osi ozordi, kan nou angaz nou dan sa “servis sakre pour anons Bonn Nouvel Bondye,” nou bezwen montre fidelite dan lafason ki nou servi bann resours ki nou resevwar.

² Dan Predikasyon: Si nou apresye sa mesaz enportan ki dan nou bann piblikasyon e nou konsyan konbyen i koute pour prodwir zot, alor nou pou atas en gran valer avek zot. Nou pa devret ofer nou bann piblikasyon an bonnavini avek bann ki pa montre vre lapresyasyon pour sa mesaz ki dan Labib. Si en dimoun i montre en pti gin lentere dan sa bon nouvel, nou kapab ofer li en trak olye en lot piblikasyon.

³ Distribye bann piblikasyon dan en fason ki nou demontre respe pour son valer. Pa les zot dan bann landrwa piblik kot zot pou senpleman ganny eparpiye partou. Pour evit gaspiyaz, fer en lenvanter bann ki ou deza annan dan lakour avan ki ou rod plis piblikasyon. Si toultan ou annan en sirplis sak nimero bann magazin, redwir lo lakantite ki ou rekomande.

⁴ Piblikasyon pour servi personnelman: Nou devret rekomann selman bann piblikasyon ki nou vreman bezwen. Nou bezwen sirtou fer atansyon ki nou evite fer gaspiyaz letan nou rekomann Labib deliks, Bible à Réference, ek lezot gro liv, parey Concordance, Index, volim Étude Perspicace, ek liv Prédicateurs, akoz i kout bokou pour prodwir sa bann liv.

⁵ Eski ou fer sir ki ou ekrir ou non ek ladres dan ou kopi personnel? Sa i ava ed ou pour pa demann en lot liv si ou pa trouv sa ki pour ou. Si ou perdi en liv kantik, Labib, oubyen en piblikasyon pour etidye, petet ou pou vwar li parmi bann lobze perdi ki’n ganny anmase dan Lasal Rwayonm oubyen landrwa lasanble.—Lik 15:8, 9.

⁶ Annou esey fer zefor pour servi byen nou bann piblikasyon. Sa i en fason ki nou montre fidelite letan nou servi byen tou bann resours ki Zeova in donn nou.—Lik 16:10.