Ki mannyer nou kapab ed bann ki asiste Memoryal?

1. Ki sa temwannyaz pwisan ki pou ganny donnen le 22 Mars, 2008?

¹ Le 22 Mars 2008, plizyer milyon dimoun otour lemonn pou kapab ganny en temwannyaz pwisan. Bann ki pou asiste Memoryal pou tann koz lo sa gran lanmour ki Zeova in demontre par fourni en ranson pour limanite. (Zan 3:16) Zot pou aprann konsernan Rwayonm Bondye e ki mannyer Zeova pou servi sa Rwayonm pour akonpli son lavolonte pour later antye. (Mat. 6:9, 10) Zot pou kapab vwar pour zot menm sa lanmour ek linite ki egziste parmi pep Bondye e osi apresye nou lospitalite.—Ps. 133:1.

2. Ki mannyer nou kapab ed bann etidyan Labib ki’n asiste Memoryal?

² Bann etidyan Labib: Serten ki pou dan lasistans i bann ki fek konmans etidye Labib avek nou. Entrodwir zot avek bann frer ek ser. Dir zot konsernan nou bann renyon lasemenn e fer zot fer en pti vizit otour Lasal Rwayonm. Dan sa diskour, sa orater pou ankouraz zot pour kontinyen progrese spirityelman. Ou kapab servi sa bann pwen konman en baz pour ankouraz ou bann etidyan.

3. Ki mannyer nou kapab ankouraz bann proklanmater inaktif ki pou dan lasistans zour Memoryal?

³ Bann inaktif: Serten parmi ki pou asiste i bann proklanmater inaktif. Pran linisyativ pour akey zot. Evite poz bann kestyon personnel oubyen dir bann keksoz ki kapab anbaras zot. Apre Memoryal, pandan bann zour ki swiv, bann ansyen pou vizit bann inaktif ki’n asiste Memoryal pour felisit zot pour zot zefor e envit zot pour prosenn renyon.

4. Ki mannyer sakenn ant nou i kapab ed bann viziter?

⁴ Bann viziter: Serten ki pou la prezan i kapab dimoun ki nou konnen oubyen manm fanmir ki nou’n envite personnelman. I kapab pou annan lezot ki pou’n resevwar en lenvitasyon pandan sa kanpanny spesyal. Si ou vwar bann dimoun ki ou pa konnen, pran linisyativ pour entrodwir ou lekor e akey zot. I kapab ki zot pa’n deza asiste enn nou bann renyon oparavan. Dan en konversasyon ou kapab demann zot ki mannyer ou pou kapab kontakte zot. Detrwa zour apre Memoryal, rann zot en pti vizit ouswa donn zot en koudtelefonn pour esey ankouraz zot pour aprann plis e ofer zot en letid Labib.

5. Ki nou kapab dir pour konmans en letid Labib?

⁵ Sa bann pwen dan diskour Memoryal i kapab ganny servi konman en baz pour prezant sa liv Ki Labib i dir lo en retourn vizit. Par egzanp, zour Memoryal sa orater pou lir Izai 65:21-23. Lo sa retourn vizit, ou kapab mansyonn sa diskour e dir: “Les mwan montre ou lezot benediksyon ki sa sakrifis i fer posib.” Apre konsider paz 4-5 dan sa liv Ki Labib i dir. Oubyen ou kapab dir: “Bokou dimoun i demann zot lekor kan ki nou pou eksperyans lakonplisman profesi Izai.” Apre konsider paragraf 1-3 dan sapit 9. En lot sizesyon se pour senpleman refer avek sa ki sa orater in dir e apre entrodwir sa liv Ki Labib i dir, e fer en demonstrasyon pour montre ki mannyer en letid Labib i deroule.

6. Kan nou obeir komannman Zezi pour komemor son lanmor, ki loportinite sakenn ant nou i gannyen?

⁶ Fotespere ki sakenn ant nou i rod loportinite pour asiste bann etidyan Labib, proklanmater inaktif, ek bann viziter ki pou dan lasistans zour Memoryal. (Lik 22:19) Zeova pou sirman beni tou zefor ki nou fer pour ogmant nou aktivite dan servis Rwayonm.

Ki pour dir lo bann magazin

Awake! Mars

“Eski ou krwar ki siperstisyon i danzere? [Les sa dimoun reponn.] Labib i dir en keksoz enteresan lo sa size. [Lir Izai 65:11.] Sa lartik i koz konsernan si siperstisyon i annakor avek lansennyman Labib.” Montre sa lartik ki konmans lo paz 10.

Watchtower 1 Mars

“Mon ti pou kontan konn ou lopinyon lo sa verse Labib ki bokou i konnen. [Lir Zan 3:16.] Eski ou’n deza mazinen ki mannyer lanmor en sel zonm i kapab fer lezot ganny lavi eternel? [Les sa dimoun reponn.] Sa magazin i donn en leksplikasyon kler e satisfezan konsernan konman nou kapab benefisye avek lanmor Zezi.”

Awake! Mars

“Eski ou krwar tou larelizyon i fer plezir Bondye? [Les sa dimoun reponn.] Remarke ki Labib i dir konsernan ladorasyon ki serten i fer. [Lir Mark 7:7.] Ki mannyer en dimoun pou konnen si son larelizyon i ansenny laverite oubyen ‘komannman ki’n fer par zonm’? Eski i posib pour trouv en larelizyon ki ansenny laverite? Sa magazin i reponn sa bann kestyon.”

Watchtower 1 Mars

“Tou le zour nou tann koz lo soufrans, maladi ek lanmor. Eski ou’n deza panse si en zour nou pou ganny libere avek tousala. [Les sa dimoun reponn.] Sa verse Labib in donn plizyer milyon dimoun lespwar. [Lir Zan 3:16.] ‘Konman ki lanmor Zezi i kapab sov ou.’ Sa i size ki sa magazin i diskite.”