Eski ou ti a kontan servi dan Betel?

¹ Akoz ou devret konsider pran servis Betel? Psonm 110:3 i endike ki leta lespri volonter pou enn bann kalite remarkab ki pep Bondye pou posede pandan bann dernyen zour. Temwen Zeova pe depans en kantite letan, resours ek lenerzi dan sa travay predikasyon pour anons sa bon nouvel lo Rwayonm partou lo later. Serten i fer sa par pran servis Betel. Nou ti pou kontan donn ou bann lenformasyon siplemanter ki pou ogmant ou lapresyasyon pour sa privilez vreman spesyal e pour met ou okouran bezwen nou biro brans.

² I annan diferan kalite travay: Travay ki bann manm lafanmir Betel i ganny konfye avek i varye. Kot biro prensipal Brooklyn, Leta-z-ni e osi dan plizyer lezot biro brans dan lemonn, bann frer i travay bokou dan prodiksyon ek transportasyon Labib, liv, magazin, brosir ek trak. Serten frer i responsab bann lekipman ek batiman. Bokou travay i osi al dan preparasyon repa, okip lenz e lezot travay pour lafanmir Betel. Deplis, bann frer ek ser i gard en standar o nivo dan lapropte e zot fer plizyer lezot travay enportan.

³ Kalifikasyon ek kondisyon: Vi ki laplipar travay kot Betel i demann bokou lafors ek landirans, i annan en pli gran bezwen pour bann zenn frer selibater ki an bonn sante. En frer oubyen en ser ki ti a kontan ranpli en form laplikasyon pour antre dan Betel i devret annan omwen enn an batenm. I devret en dimoun ki spirityel e pare pour fer bann travay dir. Denozour, dimoun i evite fer bann travay ki demann bokou lenerzi. Pour sa rezon alor, sa ki anvi antre dan servis Betel i bezwen met sa nouvo personnalite pour li kapab devlop sa dezir pour anvi fer bann travay dir. (Konpar Efezyen 4:28.) I pa devret en dimoun ki pe toultan mazin lo divertisman, rekreasyon ek fer son lekor plezir.​—Konpar 1 Korentyen 13:11.

⁴ Eski ou ant 19 an ek 35 an? Eski ou lasante i bon fizikman e emosyonnelman? Eski ou kapab ekrir e koz Angle ek Kreol byen? Eski ou en dimoun ki spirityel? Si ou ganny demande pour antre dan Betel, eski ou pou reste fidel dan sa servis pour omwen enn an e aksepte nenport ki travay ki ou ganny demande pour fer? Si ou’n reponn wi pour tou sa bann kestyon, i pou byen pour ou konsider pran servis Betel ki i en privilez inik.

⁵ Benediksyon dan servis Betel: Latour Veyer le 15 Zen 1994 an Angle i dir: “En Betelit i annan sa privilez pour servi Zeova ansanm avek son bann frer ek ser tou le zour! (Psonm 26:12) Pa sa i en bon loportinite pour vin pli matir spirityelman!” Wi, sa i en benediksyon ki nou kapab gannyen zis dan servis Betel. Bann Betelit i viv avek bann frer ek ser ki’n fidel pour plizyer lannen. Detanzaot zot ganny vizite par en manm Konsey Direkter. Nenport ki travay ki ou ganny demande pour fer, i vreman en gran privilez pour travay dan linite avek sa bann frer ek ser fidel.

⁶ Progranm bann Betelit: Lazournen bann Betelit i ranpli avek bann aktivite ki relye avek travay Rwayonm. Tou le 6:45 bomaten, Lendi ziska Vandredi, zot zwenn ansanm dan lasal a manze pour en progranm spirityel. Manm lafanmir Betel i fer en komanter lo teks pour lazournen. Answit, en frer pli eksperyanse i fer en pti rezimen baze lo teks swivi par en lapriyer. Sa progranm i fortifye lafanmir Betel spirityelman avan ki zot konmans zot lazournen. Apre en brekfas byen nourisan, sak betelit i konmans son travay avek lantouzyasm. Zot fer sa tou le zour depi Lendi ziska Vandredi ant 7:30 bomaten ziska 4:30 apremidi e zot ganny enn er-d-tan pour dezennen. Zot servi sa letan apre ler travay, Sanmdi ek Dimans pour al renyon, partisip dan predikasyon, etidye e desarz zot prop responsabilite. Zot kapab servi bann fasilite Betel pour fer zot letid personnel oubyen pour prepar zot renyon e byensir, zot osi pran letan pour repoze e detann zot lekor. (Mark 6:31, 34) Servis Betel i permet en dimoun pour servi laplipar son letan dan servis pour Zeova.

⁷ Aktivite kongregasyon: Bann manm lafanmir Betel Moris ek Sesel i asosye avek set diferan kongregasyon dan larezyon. Zot realize ki zot devret reste aktif dan kongregasyon pour zot reste for spirityelman. Alor, zot asiste bann renyon dan zot kongregasyon e partisip dan predikasyon avek zot bann frer ek ser. An plis ki sa, zot benefisye avek letid Latour Veyer avek lafanmir Betel dan Lendi swar. Vi ki progranm dan Betel i met lanfaz lo bann aktivite spirityel, sa i anmenn bokou lazwa dan zot servis pour Zeova.​—1 Kor. 15:58.

⁸ Preparasyon pour antre dan sa servis: Si ou anvi vin en bon led pour Betel, batir ou spirityalite e devlop en relasyon pros avek Zeova. Kan pe swazir en nouvo manm dan lafanmir Betel, souvandfwa se bann pionye ki ganny swazir. Me sa servis pa ganny rezerve zis pour bann pionye. Tou bann ki ranpli bann kondisyon neseser i kapab ranpli en form pour antre dan Betel. Menm si en dimoun napa okenn skil spesifik, i devret toudmenm kapab travay byen dan en lekip. Alor, en leta lespri endepandan oubyen konpetitif i bezwen ganny ranplase avek enn ki pare pour korpere avek lanmour e pare pour swiv direksyon teokratik.​—Konpar Efezyen 4:16.

⁹ Bann zenn parmi pep Zeova i annan sa loportinite pour travay e devlop sa bann abilite ki’n ganny mansyonnen anler. Si zot ganny envite pour servi dan Betel, zot pou menm kapab ganny formen pour desarz lezot responsabilite. Nou ankouraz bann paran ek ansyen pour koz lo Betel souvan avek bann zenn. I annan paran ki souvan anmenn zot zanfan vizit betel, sa i fer zot vin familye avek sa ki ganny fer laba e in ankouraz bokou pour antre dan Betel letan zot fini lekol.

¹⁰ I osi annan en bezwen pour bann frer ek ser ki annan leksperyans dan elektronik oubyen kree bann progranm pour konpiter. Lorganizasyon i fer sir ki bann lekipman tel ki masin ki enprimen, masin fotokopi ek bann konpiter i ganny byen mentenir. Nou osi bezwen bann plonber ek bann ki kapab fer lezot travay mentenans. Bann frer oubyen ser ki zot langaz maternel i Kreol me ki konpran byen Angle pou ganny byen servi dan servis tradiksyon.

¹¹ Me nou pli gran bezwen se bann frer selibater. Me si en frer marye i annan en skil partikilye, li osi i kapab ganny servi. Sirveyan rezyonal i kapab donn ou en form laplikasyon, si non ou kapab ganny enn dan lasanble distrik oubyen ekrir biro brans. Si ou en msye marye, gard an tet ki ou madanm pou osi bezwen posed sa bann menm kalite spirityel e an bonn sante fizikman e emosyonnelman. Si ou’n ganny formasyon oubyen annan leksperyans dan enn sa bann domenn ki’n ganny mansyonnen anler, silvouple atas ou CV avek ou laplikasyon.

¹² Eski ou kapab pran servis Betel? Betel i toultan bezwen bann volonter. Si ou ranpli sa bann kondisyon pour fer sa servis, nou vreman ankouraz ou pour ranpli en form laplikasyon. Pa bezwen dekouraze si ou pa ganny aksepte deswit. Ou kapab ranpli en form tou le lannen e sa pou donn lenformasyon azour lo kan ki ou disponib. I annan en renyon ki ganny fer sak lasanble distrik kot bann lankourazman ek konsey apropriye i ganny donnen avek bann ki enterese avek sa servis presye. Akoz ou pa asiste sa enn ki pou ganny fer dan sa prosenn lasanble distrik? Ou ganny kordyalman envite!

¹³ Kan profet Izai ti tann Zeova demande: “Lekel ki mon pou anvoye?,” i ti reponn san ezite: “La mon la! Anvoy mwan.” I annan bokou benediksyon ki pe esper ou si ou reponn sa lapel pour vin servi dan “lakaz Bondye” setadir Betel.​—Iza. 6:8.