Nou toultan pare pour travay
1. Ki mannyer nou konnen ki bann evanzelizater dan premye syek ti toultan pare pour travay?
1 Bann evanzelizater dan premye syek ti byen devoue, zot ti ‘kontinyen pres’ sa bon nouvel nenport ki landrwa kot zot ti vwar dimoun. (Akt 5:42) Alor, nou krwar pa ki zot ti pou ezite pour pres avek bann dimoun ki zot ti zwenn lo semen kan zot ti pe fer predikasyon portanport. Si zot ti pe al bazar apre ki zot ti’n fini dan teritwar, zot pa ti pou les pase en loportinite pour pres enformelman. Zot ti fer parey Zezi, zot ti toultan pare pour travay.—Mark 6:31-34.
2. Ki i enplike pour port sa non Temwen Zeova?
2 Toultan pare: Temwen Zeova, i pa zis en non ki dekrir sa travay ki nou fer me i osi dekrir sa ki nou ete. (Iza. 43:10-12) Alor nou bezwen toultan pare pour donn en leksplikasyon konsernan nou lespwar, menm si nou pa pe pres portanport. (1 Pyer 3:15) Eski ou mazin lo bann loportinite kot ou ti pou kapab pres enformelman ek sa ki ou ti pou dir sa dimoun? Eski ou toultan annan bann piblikasyon avek ou pour donn avek bann dimoun ki demontre lentere? (Prov. 21:5) Eski ou fer zis predikasyon portanport oubyen, si sityasyon i permet, ou partaz sa bon nouvel avek bann dimoun ki ou zwenn dan bann lezot landrwa?
3. Akoz “lezot form” i pa sa pli meyer fason pour dekrir predikasyon dan semen, parking, zarden piblik, landrwa biznes ek lezot landrwa?
3 “Lezot form” predikasyon: Parfwa dan lepase nou ti servi sa term “lezot form” pour refer avek predikasyon dan semen, zarden piblik, parking, landrwa biznes ek lezot landrwa. Sepandan, sa term “lezot form” i kapab donn lenpresyon ki sa bann form predikasyon i drol, zot pa sa ki nou ti pou fer ordinerman ouswa zot pa obligatwar. Zapot Pol ti dir ki i ti pres “an piblik” e portanport. (Akt 20:20) Alor i pou pli byen pour dir predikasyon “an piblik” dan plas “lezot form” predikasyon. I vre ki predikasyon portanport i toultan sa form prensipal pour koz lo Rwayonm e i sa mwayen pli efikas pour zwenn dimoun. Me an tou ka, bann evanzelizater dan premye syek ti port plis latansyon lo dimoun, pa lakaz. Zot ti sezi tou loportinite ki zot ti gannyen pour koz lo laverite, ki swa an piblik, enformelman ouswa portanport. Annou annan sa menm leta lespri parey zot pour ki nou a kapab akonplir nou minister plennman.—2 Tim. 4:5.