Bann laviktwar sa Rwayonm​—Etabli sa bon nouvel devan bann lotorite

LETAN ki ou pe pres portanport, dan lwen ou tann son lasirenn. Sa tapaz i ptitapti vin pli for. Anmezir ou konmans koz avek sa lot met lakour, ou konpanyon predikasyon i ganny distrer ler en loto lapolis i aprose. En gard i sorti, vin kot zot e demande: “Zot menm zot ki pe pas portanport pe koz lo Labib? Nou’n resevwar konplent avek manm piblik!” Avek respe ou reponn sa gard e dir li ki zot Temwen Zeova. Ki arive apre?

I pou tou depan lo sa ki’n arive dan lepase. Diran bann lannen ki’n pase, ki mannyer gouvernman sa pei in tret Temwen Zeova? Eski i annan en serten liberte relizye? Si wi, petet i pou tou depan lo lafason ki ou bann frer ek ser oparavan in azir pour defann e etabli sa bon nouvel devan lotorite. (Fili. 1:7) Nenport kote ou reste, ou lafwa i kapab ganny ranforsi ler ou egzamin sa kantite laviktwar ankour ki Temwen Zeova in gannyen. Dan sa seksyon, nou pou egzamin serten sa bann laviktwar remarkab. Sa bann laviktwar ki i’n annan i donn laprev konkret ki sa Rwayonm i reel akoz fransman nou pa ti pou’n kapab akonpli sa kantite lo nou menm!