SAPIT 36
En zofisye larme i demontre en gran lafwa
LESKLAV EN ZOFISYE LARME I GANNY GERI
BANN KI ANNAN LAFWA POU GANNY BENI
Apre ki Zezi in fer son Sermon lo Montanny, i al dan lavil Kapernaoum. Laba, serten ansyen ki Zwif i vin kot li. Zot in ganny anvoye par en zonm sorti dan en lot nasyon. Sa zonm i en zofisye larme Romen ki ansarz 100 solda.
En serviter sa zofisye larme i vreman malad e i pros pour mor. Sa zofisye i byen kontan sa serviter, alor menm si sa zofisye pa en Zwif, i rod led Zezi. Bann Zwif i dir Zezi ki serviter sa zonm “i paralize kot lakour e i pe soufer en kantite.” (Matye 8:6) Bann sef Zwif i eksplik Zezi akoz ki sa zofisye i merit son led. Zot dir: “I kontan nou nasyon e li menm i’n konstri nou sinagog.”—Lik 7:4, 5.
Alor Zezi i al avek sa bann ansyen kot lakaz sa zofisye larme. Ler zot pros pour ariv kot son lakaz, sa zofisye i anvoy bann zanmi pour dir li: “Msye, pa bezwen fatig ou pour vin kot mwan, parski mon pa diny pour ou vin dan mon lakaz, sanmenm rezon ki mon pa’n vin kot ou.” (Lik 7:6, 7) Pour en zofisye ki abitye donn dimoun lord, sa parol i vreman demontre en kantite limilite! I osi montre nou ki kantite sa zonm i diferan avek bann Romen ki tret zot lesklav dan en fason dir.—Matye 8:9.
Sa zofisye i konnen ki bann Zwif pa asosye avek bann ki pa Zwif. (Akt 10:28) Petet sanmenm ki i pe mazinen ler i anvoy son zanmi dir Zezi: “Zis donn lord e mon serviter i ava geri.”—Lik 7:7.
Zezi i etonnen ler i tann sa e i dir: “Mon dir zot, menm dan Izrael mon pa’n vwar personn ki annan en sitan gran lafwa koumsa.” (Lik 7:9) Ler son bann zanmi i retourn kot lakaz sa zofisye, zot vwar ki sa lesklav ki ti vreman malad in byen.
La ki Zezi in geri sa zonm, i servi sa lokazyon pour konfirmen ki bann ki pa Zwif ki annan lafwa pou ganny laprouvasyon ek benediksyon Bondye. I dir: “Bokou dimoun sorti dan les ek was pou vin atab avek Abraam, Izaak ek Zakob dan Rwayonm lesyel.” Ki pou arive avek bann Zwif ki napa lafwa? Zezi i dir ki zot “pou ganny zete deor dan fernwanr. Se laba kot zot pou plere e grens zot ledan akoz dezespwar.”—Matye 8:11, 12.
Bann Zwif in ganny ofer premye, pour form parti Rwayonm ansanm avek Kris. Bann ki pa aksepte sa loportinite pou ganny rezete. Me bann dimoun lezot nasyon pou kapab vin atab avek li, andotmo zot pou kapab ansanm avek li “dan Rwayonm lesyel.”