Bann referans pour Kaye renyon Nou minister ek lavi Kretyen
4-10 MARS
BANN TREZOR DAN PAROL BONDYE | ROMEN 12-14
“Ki savedir demontre lanmour Kretyen?”
it-1-E 55
Lafeksyon
Tou dimoun dan kongregasyon i devret kontan kanmarad parey bann frer ek ser (Grek, phi·la·del·phiʹa) (Ro 12:10; Ebr 13:1; vwar osi 1Pyr 3:8). Alor, bann frer ek ser dan kongregasyon i devret pros avek kanmarad, annan en lanmitye solid e ranpli avek lanmour pour kanmarad parey en fanmir. Menm si bann frer ek ser dan kongregasyon pe deza demontre lanmour pour kanmarad, zot ganny ankouraze pour fer li plis ankor.—1Te 4:9, 10.
Sa mo Grek phi·loʹstor·gos, ki vedir “tandres ek lafeksyon,” i ganny servi pour montre sa lanmitye ki annan ant de dimoun ki vreman pros. Sa term i sorti dan sa mo sterʹgo, ki souvan ganny servi pour demontre lafeksyon natirel ant bann manm fanmir. Zapot Pol ti ankouraz bann Kretyen pour devlop sa kalite. (Ro 12:10) Pol ti osi montre ki dan bann dernyen zour dimoun pou “napa lanmour [oubyen lafeksyon] pour kanmarad” (Grek, aʹstor·goi) e ki sa bann dimoun i merit lanmor.—2Ti 3:3; Ro 1:31, 32.
11-17 MARS
Rod bann perl spirityel
w89-E 1/12 24 ¶3
“Teste senserite zot lanmour”
San dout bann frer ki ti sorti dan lezot nasyon ti’n devret anvi ed bann Kretyen Zerizalenm. Apre tou zot ti “dwa” sa bann Kretyen. Pa bann dimoun sorti dan lezot nasyon ti tann sa bon nouvel ler zot ti Zerizalenm? Pol ti mazinen: “Si bann dimoun lezot nasyon osi in benefisye avek bann keksoz spirityel bann sen, zot osi zot merit pe kontribye pour bann sen avek zot bann keksoz materyel.”—Romen 15:27.
it-1-E 858 ¶5
Konnen ki pou arive, deside davans
Mesi oubyen Kris ti sa Desandans ki ti’n ganny promet atraver ki tou dimoun drwat pou ganny beni. (Ga 3:8, 14) Premye fwa ki sa “desandans” i ganny mansyonnen ti apre rebelyon dan zarden Edenn me avan ki Abel ti ne. (Ze 3:15) Sa ti apepre 4,000 an avan “sa sen sekre” i ganny revele e montre lekel sa “desandans” setadir Mesi. Alor sa sen sekre “ti’n ganny kasyet pour en kantite letan.”—Ro 16:25-27; Efe 1:8-10; 3:4-11.
18-24 MARS
Rod bann perl spirityel
it-2-E 1193 ¶1
Lasazes
Alor bann dimoun dan lemonn ti vwar sa laranzman ki Bondye ti’n fer atraver Zezi konman en keksoz bet e menm si bann dirizan ti bann bon ziz, zot ti “met amor nou Senyer ki glorye.” (1Ko 1:18; 2:7, 8) Me Bondye ti pe prouve ki lasazes sa lemonn i bet. I ti pe fer zot bann zonm saz kanmi par servi bann keksoz “ki sorti kot Bondye, ki paret bet” e bann dimoun ki zot ti konsider ‘bet, fay e enferyer’ pour akonplir Son plan. (1Ko 1:19-28) Pol pa ti pe koz lo lasazes sa lemonn me i ti pe fer bann Kretyen Korent rapel ki “lasazes sa lemonn [ek] lasazes bann dirizan sa lemonn” pou disparet. (1Ko 2:6, 13) I ti averti bann Kretyen Kolos pour zot pa ganny anbete avek bann “filozofi [phi·lo·so·phiʹas, literalman, kontan lasazes] ek fo rezonnman ki pa baze lo Kris me [ki baze] lo bann tradisyon zonm.”—Kol 2:8, konpar verse 20-23.
25-31 MARS
BANN TREZOR DAN PAROL BONDYE | 1 KORENTYEN 4-6
“En ptigin lelven i fer monte lapat antye”
it-2-E 230
Lelven
Zapot Pol ti fer sa menm konparezon ler i ti donn lord kongregasyon Kretyen Korent pour retir en zonm imoral dan kongregasyon par dir: “Eski zot pa konnen ki en ptigin lelven i fer monte tou sa lapat? Retir sa vye lelven pour ki zot vin en nouvo lapat ki napa lelven ladan, parski Kris, nou pti mouton Lapak, in ganny sakrifye.” Apre i ti eksplike ki savedir “lelven” ler i ti dir: “Alor, annou selebre sa lafet, pa avek vye lelven, ni avek lelven lemal ek pese, me avek dipen san lelven setadir dipen senserite ek laverite.” (1Ko 5:6-8) Pol ti pe koz lo Lafet Dipen san Lelven ki ti ganny selebre zis apre lafet Lapak. Zis parey lelven i fer monte lapat antye, alor kongregasyon antye ti pou vin enpir dan lizye Zeova si zot pa ti retir sa zonm imoral dan kongregasyon. Zot ti bezwen retir sa “lelven” parmi zot zis parey bann Izraelit ti napa lelven dan zot lakour pandan Lafet Dipen san Lelven.
it-2-E 869-870
Satan
Ki i vedir “livre en zonm koumsa avek Satan pour detri lenfliyans laser?”
Ler zapot Pol ti pe dir kongregasyon Kretyen Korent ki zot bezwen fer avek en dimoun dan kongregasyon ki’n komet imoralite seksyel avek madanm son papa, i ti dir: “Livre en zonm koumsa avek Satan pour ki move lenfliyans sa zonm i ganny detrir.” (1Ko 5:5) Sa ti en lord pour retir sa zonm dan kongregasyon e pour pa asosye avek li. (1Ko 5:13) Livre sa dimoun avek Satan ti pou met li an deor kongregasyon e dan lemonn kot Satan i dirizan. Parey en “ptigin lelven” dan “sa lapat,” sa zonm ti en “move lenfliyans” e par retir sa zonm ki ti pe komet imoralite dan kongregasyon, zot ti pou detri son “move lenfliyans” parmi zot. (1Ko 5:6, 7) Pareyman, Pol ti livre Imene ek Aleksann avek Satan akoz zot ti napa en bon konsyans e zot lafwa ti’n pran fon parey en bato ki’n fer nofraz.—1Ti 1:20.
Rod bann perl spirityel
it-2-E 211
Lalwa
Lalwa pour bann lanz. Menm si bann lanz i pli o ki bann imen, zot osi zot bezwen soumet avek lalwa ek bann komannman Bondye. (Ebr 1:7, 14; Ps 104:4) Zeova ti menm donn lord ek restriksyon son adverser Satan. (Zob 1:12; 2:6) Mikael, ki sef lanz, ti montre ki i rekonnet e respekte drwa Zeova konman sa pli gran Ziz, ler i ti dir: “Ki Zeova i reprimann ou!” (Zid 9; konpar Zek 3:2.) Zezi, ki’n ganny tou laglwar dan lesyel, in ganny donnen lotorite lo tou bann lanz par Zeova. (Ebr 1:6; 1Pyr 3:22; Mt 13:41; 25:31; Fil 2:9-11) Alor, Zezi ti anvoy en lanz kot Zan. (Re 1:1) Par kont, dan 1 Korentyen 6:3 zapot Pol i dir ki bann frer spirityel Zezi pou ziz bann lanz. I tre probab ki sa i akoz zot pou donn lanmen pas zizman lo bann demon.