En Travay ki demann annan Limilite
1 Parol Bondye i konsey nou pour “viv avek limilite. Pa rann lemal pour lemal . . . Okontrer reponn par benediksyon.” (1 Pyer 3:8, 9) Sa konsey i definitivman aplik avek travay predikasyon. Anfet, minister Kretyen i kapab teste nou limilite.
2 Limilite i en kalite ki ed nou pour andir bann sitiasyon ki pa agreab. Kan nou pe prese, nou apros bann etranze ki pa’n envit nou se zot, e nou konnen ki serten pou mal azir. Alor fodre ki nou annan limilite pour nou kontinyen prese menm si nou ganny trete dan en tel fason. De ser pionye ti pres port an port dan en teritwar tre difisil pour de an san ki personn ti enterese! Kantmenm sa, zot ti persevere, e ozordi i annan de kongregasyon dan sa landrwa.
3 Konman reazir avek bann ki ensilte nou: Limilite pou ed nou imit Zezi kan lezot pa zantiy oubyen pa poli. (1 Pyer 2:21-23) En ser ti ganny ensilte kot en lakour, premyerman par sa madanm e apre par son mari ki ti demann li pour kit zot propriyete. Sa ser ti fer en sourir e dir ki i swete pour koz avek zot en lot fwa. Sa ti telman enpresyonn sa koup ki zot ti ekoute ler en lot Temwen ti pas kot zot. Zot ti menm aksepte en lenvitasyon pour vin asiste en renyon dan Lasal Rwayonm. Sa ser ki zot ti pouse ti la pour akey zot e donn zot plis temwannyaz. Nou osi nou kapab kalme bann ki kont nou mesaz par demontre “labonte ek respe.”—1 Pyer 3:16; Prov. 25:15.
4 Evit larogans: Nou konnesans lo Labib pa donn nou okenn rezon pour get lezot dimoun konman enferyer oubyen pour abes zot par nou parol. (Zan 7:49) Plito, Parol Bondye i konsey nou ‘ki fodre pa ki nou malparl personn.’ (Tit 3:2) Ler nou annan limilite, parey Zezi, nou ankouraz lezot. (Mat. 11:28, 29) Kan nou apros dimoun avek limilite sa i fer nou mesaz pli atiran.
5 Wi, limilite i ed nou pour persevere dan teritwar difisil. I kapab kalme bann ki kont nou mesaz, e i atir lezot ver mesaz Rwayonm. Pli enportan ki tou, i fer plezir Zeova, ki “donn son lagras sa ki annan limilite.”—1 Pyer 5:5.