LESON 58
Reste fidel avek Zeova
Bann vre Kretyen i determinen pour pa les okenn keksoz oubyen dimoun anpes zot servi Zeova. Sirman ou santi koumsa ou osi. Ou fidelite i annan en gran valer pour Zeova. (Lir 1 Kronik 28:9.) Ki bann sityasyon ki kapab teste ou fidelite anver li e kwa ki kapab ed ou fer fas avek sa bann sityasyon?
1. Ki mannyer lezot i kapab teste nou fidelite anver Zeova?
I annan serten dimoun ki anvi fer nou aret servi Zeova. Lekel sa bann dimoun? Serten dimoun ki’n kit laverite i koz manti lo lorganizasyon Bondye pour detri nou lafwa. Zot ganny apele bann aposta. Osi i annan serten sef relizye ki kontan fann fo lenformasyon lo nou pour fer enn de parmi nou kit laverite. I danzere pour sey argimant avek bann ki opoz nou ouswa lir bann keksoz ki zot in ekri, al lo zot sit Enternet oubyen get zot bann video. Zezi ti dir sa konsernan bann dimoun ki sey dekouraz bann ki pe servi Zeova fidelman: “Les zot, zot bann gid aveg. Alor, si en aveg i gid en lot aveg, tou le de pou tonm dan trou.”—Matye 15:14.
2. Ki desizyon personnel ki kapab teste nou fidelite avek Zeova?
Si nou kontan Zeova nou pa pou fer okenn keksoz ki annan pour fer avek fo larelizyon. Ni nou travay, ni sa lorganizasyon ki nou ladan ni okenn aktivite ki nou fer pa devret annan nanryen pour fer avek fo larelizyon. Zeova i averti nou: “Mon pep, sorti [dan Gran Babilonn].”—Revelasyon 18:2, 4.
AL PLI O PROFON
Aprann ki mannyer ou kapab anpes okenn dimoun afebli ou fidelite anver Zeova. Vwar osi ki mannyer ou kapab demontre ou fidelite par sorti dan Gran Babilonn.
3. Vey bann fo ansenyan
Ki nou devret fer ler nou tann bann keksoz negatif konsernan lorganizasyon Zeova? Lir Proverb 14:15 e apre reponn sa kestyon:
Akoz nou bezwen fer atansyon pour pa krwar tou sa ki nou tande?
Lir 2 Zan 9-11 e apre reponn sa bann kestyon:
Ki mannyer nou devret tret bann aposta?
Menm si nou pa enterakte direkteman avek bann aposta, ki mannyer nou kapab ganny kontak avek zot lansennyman?
Ki mannyer ou krwar Zeova ti pou santi si nou ekout bann keksoz negatif lo li oubyen lo son lorganizasyon?
4. Reste fidel avek Bondye ler en frer oubyen en ser i fer pese
Ler nou aprann ki en dimoun dan kongregasyon in fer en pese grav, ki nou oblize fer? Annou vwar en prensip ki sorti dan Lalwa ki Bondye ti donn avek nasyon Izrael. Lir Levitik 5:1.
Parey in ganny dir dan sa verse, si nou aprann ki en dimoun in fer en pese grav, nou devret dir bann ansyen sa ki nou konnen. Me avan nou fer sa, i ti a byen si nou ankouraz sa dimoun ki’n fer sa fot pour al vwar li menm bann ansyen e konfes son pese. Si i pa fer li, nou fidelite anver Zeova pou pous nou pour al dir bann ansyen sa ki nou konnen. Ki mannyer sa lapros i demontre lanmour fidel pour . . .
Zeova?
sa dimoun ki’n fer pese?
lezot dan kongregasyon?
Si en frer oubyen en ser i dan problenm, ed li!
5. Reste lwen avek Gran Babilonn
Lir Lik 4:8 ek Revelasyon 18:4, 5 e apre reponn sa bann kestyon:
Eski mon non i ankor lo lalis bann manm en fo larelizyon?
Eski mon dan en lorganizasyon ki afilye avek en lot larelizyon?
Eski mon travay i siport fo larelizyon dan okenn fason?
Eski i annan okenn lezot laspe dan mon lavi kot mon bezwen separe avek fo larelizyon?
Ki sanzman mon bezwen fer si mon’n reponn wi pour nenport sa bann kestyon?
An tou ka, fer en desizyon ki fer ou annan en konsyans kler e ki montre ou fidelite anver Zeova.
Ki ou ti pou fer si ou ganny demande pour kontribye anver en lorganizasyon saritab relizye?
SERTEN DIMOUN I DIR: “Mon bezwen konnen ki bann aposta pe dir lo Temwen Zeova pour mwan defann laverite.”
Eski i saz pour fer sa? Akoz?
REZIMEN
Pour reste fidel avek Zeova, nou bezwen evite frekant bann ki esey anbet nou.
Revizyon
Akoz nou pa devret ekout sa ki bann aposta pe dir?
Ki nou devret fer si nou konnen ki en frer in fer en pese grav?
Ki mannyer nou kapab obeir sa lavertisman pour reste lwen avek fo larelizyon?
FER PLIS RESERS
Aprann ki mannyer pour reazir ler lezot i fann bann fo lenformasyon lo Temwen Zeova.
“Eski ou annan lenformasyon egzakt?” (Latour Veyer Out 2018)
Ki mannyer ou kapab idantifye bann lorganizasyon oubyen aktivite ki siport Gran Babilonn?
“Reste okipe pandan dernyen zour ‘bann dernyen zour’” (Latour Veyer Oktob 2019 paragraf 16-18)
Ki serten dimoun ki opoz nou in sey fer pour afebli nou lafwa?
Dan sa zistwar “I Had Been Looking for God Since Childhood,” lir ki mannyer en pret Shinto ti debaras li avek fo larelizyon.
“The Bible Changes Lives” (Latour Veyer 1 Zilyet 2011 an Angle)