Zezi ek son bann disip in pas trwa lannwit Betani depi ki zot in arive sorti Zeriko. La aprezan, granmaten Lendi le 10 Nizan, zot al Zerizalenm. Zezi i lafen, alor ler i vwar en pye fig, i al gete si i annan fig dan pye.

I ver lafen mwan Mars, me sezon fig i apepre Zen. Toudmenm, sa pye i annan fey, alor Zezi i krwar ki i kapab ki sa pye in raport fri boner. Me ler Zezi i ariv kot sa pye, i vwar ki napa fri. Bann fey in donn en fo lenpresyon. Apre sa, Zezi i dir: “Personn pa pou zanmen manz ou fri ankor.” (Mark 11:14) Deswit sa pye fig i sek. Son lannmen bomaten, bann disip pou konpran ki sa i vedir.

Finalman, Zezi ek son bann disip i ariv Zerizalenm. Zezi i al kot tanp ki i ti’n enspekte son lavey dan apremidi. Ozordi i pa zis enspekte tanp, i fer preski menm keksoz ki i ti fer trwa-z-an pase pandan Lapak lannen 30. (Zan 2:14-16) Safwasi Zezi i pous ‘bann ki pe aste e vann dan tanp.’ I osi savir latab ‘bann ki pe sanz larzan ek ban bann ki pe vann bann kolonm.’ (Mark 11:15) I pa ni menm les personn pas dan lakour tanp pour anmenn keksoz lot kote lavil.

Akoz Zezi i fer en keksoz koumsa kont bann ki pe sanz larzan e vann zannimo dan tanp? I dir: “Pa i’n ganny ekrir, ‘Mon lakaz pou ganny apele en lakaz lapriyer pour tou nasyon’? Me zot, zot in fer li vin en lakaz voler.” (Mark 11:17) Rezon ki Zezi i dir sa bann dimoun ki zot voler, i akoz zot sarz tro bokou larzan bann dimoun ki’n vin aste zannimo pour fer bann sakrifis. Pour Zezi i konmsi zot pe vole.

Byensir, ler bann sef pret, profeser lalwa ek bann sef lepep i tande ki Zezi in fer, zot rod fason pour touy li. Par kont, i annan en problenm. Zot pa konnen ki mannyer pour touy li parski en kantite dimoun i vin ekout li.

I pa zis bann Zwif ki’n vin asiste Lapak, me osi bann ki’n konverti dan larelizyon Zwif. Parmi zot i annan bann Grek ki’n vin ador Bondye pandan sa lafet. Zot vin kot Filip, petet akoz i annan en non Grek e demande pour vwar Zezi. I paret ki Filip pa tro asire si sa i apropriye, alor i koz avek Andre. Prezan, zot de zot al koz avek Zezi ki aparaman i ankor kot tanp.

Zezi i konnen ki i pou mor dan detrwa zour, alor la i pa letan pour fer plezir bann ki kirye oubyen pour li esey vin popiler. I servi en legzanp pour reponn sa de zapot. I dir: “Ler in arive pour Garson zonm ganny glorifye. Vreman mon dir zot laverite, tan ki en lagrenn dible pa tonm dan later e mor, i pou reste zis en lagrenn. Me si i mor, apre sa i pou raport bokou fri.”​—Zan 12:23, 24.

I kapab paret ki en lagrenn dible napa bokou valer. Par kont, si sa lagrenn i ganny met dan later e “mor,” i kapab zermen e avek letan pouse e vin en tiz avek bokou lagrenn lo la. Pareyman, Zezi i en zonm parfe. Kantmenm sa, lefet ki Zezi pou reste fidel avek Bondye ziska son lanmor, sa pou fer li posib pour bann ki annan sa menm leta lespri sakrifis ganny lavi eternel. Alor Zezi i dir: “Sa ki kontan son lavi pou perdi li, me sa ki ay son lavi dan sa lemonn pou ganny lavi eternel.”​—Zan 12:25.

Zezi pa zis pe mazin son lekor parski i dir: “Si en dimoun i oule vin mon serviter, fodre i swiv mwan e kot mon ete mon serviter pou la osi. Si en dimoun i oule vin mon serviter, mon Papa pou beni li.” (Zan 12:26) Pa sa i en gran rekonpans! Bann ki ganny onore par son Papa pou diriz ansanm avek Kris dan Rwayonm.

Ler Zezi i mazin kantite ki i pe al soufer e sa lanmor fermal ki i pe al pas atraver, i dir: “La mon lespri i fatige, ki mon pou dir? Papa tir mwan dan sa leprev.” Me Zezi i anvi fer lavolonte Bondye. Alor i dir: “Pourtan, se pour fer fas avek sa leprev ki mon’n vin lo later.” (Zan 12:27) Zezi i dakor avek tou sa ki Bondye i anvi fer, enkli sakrifye son lavi pour limanite.

I Lendi le 10 Nizan e Zezi i kot tanp pe koz lo son lanmor ki pe aprose. Zezi i enkyet ki Bondye pou ganny en move repitasyon alor i dir: “Papa glorifye ou non.” En lavwa for sorti dan lesyel i dir: “Mon’n glorifye li e mon pou glorifye li ankor.”​—Zan 12:27, 28.

Bann dimoun ki la pa konpran ki pe arive. Serten i krwar ki zot in tann loraz. Lezot i dir: “En lanz in koz avek li.” (Zan 12:29) Par kont, se lavwa Zeova ki zot fek tande! Sa i pa premye fwa ki bann dimoun i tann lavwa Bondye depi ki Zezi in konmans son minister lo later.

Trwa-z-an edmi pase, ler Zezi ti batize, Zan ki batize ti tann Bondye dir sa parol lo Zezi: “Sa i mon Garson ki mon kontan ki mon’n aprouve.” Pli tar, apre Lapak lannen 32, laparans Zezi ti sanze devan Zak, Zan ek Pyer. Sa trwa zonm ti tann Bondye dir: “Sa i mon garson ki mon kontan, sa enn ki mon’n aprouve. Ekout li.” (Matye 3:17; 17:5) Me la sa trwazyenm fwa, Zeova pe koz dan en fason kot bokou dimoun i kapab tande!

Zezi i dir: “Sa lavwa in koze pa pour mwan, me pour zot.” (Zan 12:30) Sa i laprev ki i vreman Garson Bondye, sa Mesi ki’n ganny predir.

Deplis, lavi fidel Zezi i en legzanp pou nou swiv. I osi montre ki Satan, sef sa lemonn i devret ganny detrir. Zezi i dir: “La lemonn pe ganny zize, sef sa lemonn pou ganny zet deor.” Lanmor Zezi ki pe aprose pa pou en defet, me en laviktwar. Dan ki sans? Zezi i eksplike: “Pourtan mwan, ler mon ganny met anpandan lo poto, tou sort kalite dimoun pou swiv mwan.” (Zan 12:31, 32) Ler Zezi i mor lo en poto, i pou atir lezot ver li e fer li posib pour zot ganny lavi eternel.

Ler Zezi i dir ki i pou “ganny met anpandan,” lafoul i dir: “Nou’n tande dapre Lalwa ki Kris pou viv pour touzour. Ki mannyer ou kapab dir ki Garson zonm i devret ganny met anpandan lo poto? Lekel li sa Garson zonm?” (Zan 12:34) Malgre tou levidans, enkli tann lavwa Bondye li menm, laplipar zot pa aksepte Zezi konman sa vre Garson zonm, sa Mesi ki’n ganny promet.

Parey i’n deza fer, Zezi i koz lo son lekor konman en “lalimyer.” (Zan 8:12; 9:5) I donn lafoul sa lankourazman: “Lalimyer pou parmi zot pour ankor en pti pe letan. Marse tan ki i ankor annan lalimyer pour ki fernwanr pa domin zot, . . . Tan ki zot annan lalimyer, demontre lafwa dan sa lalimyer pour ki zot a kapab vin bann zanfan lalimyer.” (Zan 12:35, 36) Apre Zezi i ale akoz le 10 Nizan pa sa zour ki i merit mor. I sipoze “ganny met anpandan,” setadir kloute lo poto, le 14 Nizan, zour Lapak.​—Galat 3:13.

Ler nou egzamin minister Zezi e nou vwar ki bann Zwif pa ti annan lafwa dan li, i evidan ki bann profesi ti pe ganny akonplir. Izai ti predir ki bann dimoun ti pou aveg e zot leker ti pou dir. Zot pa ti pou repantir e ganny geri. (Izai 6:10; Zan 12:40) Parey nou’n vwar, laplipar bann Zwif i antete e zot rezet levidans ki Zezi i sa Enn ki’n ganny promet pour delivre zot e donn zot lavi.

Nikodenm, Zozef sorti Arimate ek plizyer lezot sef i “konmans annan lafwa” dan Zezi. Me eski zot pou demontre zot lafwa oubyen kasyet zot lafwa, swa akoz zot per ki zot pou ganny pouse dan sinagog oubyen akoz zot “kontan laglwar zonm”?​—Zan 12:42, 43.

Zezi li menm i eksplike ki savedir met lafwa dan li, i dir: “Sa ki annan lafwa dan mwan, i annan lafwa pa zis dan mwan, me osi dan sa enn ki’n anvoy mwan. Sa ki vwar mwan, i osi vwar sa Enn ki’n anvoy mwan.” Sa laverite ki Bondye in demann Zezi pour ansennyen e ki Zezi i ankor pe anonse, i sitan enportan ki Zezi i kapab dir: “Sa ki rezet mwan e ki pa aksepte mon parol, i annan enn ki pou ziz li. Se mon parol ki pou ziz li dernyen zour.”​—Zan 12:44, 45, 48.

Zezi i fini par dir: “Mon pa’n koz lo mwan menm, me mon Papa ki’n anvoy mwan ki’n donn mwan lord lo ki pour dir e koz lo la. Mon konnen ki son lord i donn lavi eternel.” (Zan 12:49, 50) Zezi i konnen ki byento i pou vers son prop disan konman en sakrifis pour bann imen ki demontre lafwa dan li.​—Romen 5:8, 9.