Parey Zezi in demande, Pyer ek Zak in fini al Zerizalenm pour fer bann preparasyon pour Lapak. Pli tar, Zezi ek sa dis lezot zapot i al Zerizalenm. I lo tar apremidi e soley pe konmans kouse dan was anmezir ki Zezi ek son bann disip i desann lo Montanny Pye Zoliv. Sa i dernyen fwa ki Zezi i pas la pandan lazournen ziska son rezireksyon.

I pa pran bokou letan pour Zezi ek son bann disip ariv dan lavil e al kot sa lakaz kot zot pour pran repa Lapak. Zot mont peron e al dan en gran lasanm anler. Tou keksoz in pare pour Zezi pran sa repa avek son bann zapot. Zezi i vreman kontan pour zwenn avek son bann disip akoz i dir: “Mon’n telman anvi manz sa repa Lapak avek zot avan mon soufer.”​—Lik 22:15.

Plizyer lannen pase, sa koutim pour pas plizyer lakoup diven pandan repa Lapak ti ganny entrodwir. Apre, Zezi i pran lakoup ki zot in donn li, i remersye Bondye e dir: “Pran sa e pas avek kanmarad, parski mon dir zot ki depi konmela menm, mon pa pou bwar ankor diven ziska ki Rwayonm Bondye i vini.” (Lik 22:17, 18) I devret evidan pour bann zapot ki Zezi i pros pour mor.

Pandan repa Lapak, en keksoz drol i arive. Zezi i leve, tir son manto e pran en servyet. Apre sa, i met delo dan en kivet ki la. Normalman, i sa enn ki’n envit bann dimoun ki fer sir ki lipye son bann envite i ganny lave. Petet en serviter ki fer sa. (Lik 7:44) Me la personn pa’n envit zot, alor Zezi i rann zot sa servis. Enn son bann zapot ti’n kapab fer sa, me ni enn ant zot pa’n fer li. Eski sa i akoz zot ankor pe rode lekel ki pli enportan? An tou ka, zot anbarase ki Zezi pe lav zot lipye.

Ler Zezi i ariv kot Pyer, Pyer i dir: “Mon pa pou zanmen les ou lav mon lipye.” Zezi i dir: “Si mon pa lav ou lipye, ou napa nanryen pour fer avek mwan.” Avek bokou santiman, Pyer i reponn: “Senyer, pa lav zis mon lipye, me lav mon lanmen ek mon latet osi.” I bezwen ki i sirprann ki Zezi i dir: “Sa ki’n fini bennyen, son lekor i prop, i zis bezwen lav son lipye. Zot prop zot, me pa zot tou.”​—Zan 13:8-10.

Zezi i lav lipye son douz zapot, enkli lipye Zida Iskaryot. Apre ki i’n remet son manto e revin atab, Zezi i demande: “Eski zot konpran sa ki mon fek fer? Zot apel mwan ‘Ansenyan’ ek ‘Senyer’ e zot annan rezon parski sanmenm ki mon ete. Alor, si mwan, zot Senyer ek Ansenyan, mon lav zot lipye, zot osi zot devret lav lipye kanmarad. Mon’n kit en legzanp pour zot, pour ki parey mon’n fer avek zot, zot osi zot devret fer parey. Vreman mon dir zot laverite, en lesklav pa pli gran ki son met, ni sa enn ki’n ganny anvoye pli gran ki sa enn ki’n anvoy li. Si zot konn sa bann keksoz, ere si zot fer li.”​—Zan 13:12-17.

Pa sa i en zoli leson pour ankouraz nou pour servi lezot avek limilite! Bann disip Zezi pa devret rod premye plas, an krwayan ki zot enportan e ki zot devret ganny servi. O kontrer, zot devret swiv legzanp Zezi. Sa pa vedir ki zot devret partisip dan bann seremoni lav lipye, me ki zot devret pare pour servi lezot avek limilite e san fer lapreferans.

Pli boner sa zour swar, Zezi ti lav lipye son bann zapot pour montre zot lenportans limilite. La aprezan, aparaman apre repa Lapak, i sit sa parol profetik ki David ti dir: “Sa zonm ki ti anpe avek mwan, ki mon ti annan konfyans dan li, ki ti pe manz mon dipen in vir kont mwan.” Apre sa, i eksplike: “Enn parmi zot pou trai mwan.”​—Psonm 41:9, NWT; Zan 13:18, 21.

Bann zapot i get kanmarad e enn par enn zot demande: “Pa mwan sa, non?” Menm Zida Iskaryot i demann sa. Pyer i demann Zan ki atab o bor Zezi pour rode lekel ki pou trai li. Alor Zan i kabann deryer e demann Zezi: “Senyer lekel?”​—Matye 26:22; Zan 13:25.

Zezi i reponn: “I sa enn ki mon pou donn sa morso dipen ki mon’n tranpe.” Zezi i tranp sa dipen dan en bol lo latab, apre i donn Zida e i dir: “Garson zonm pe kit zot, zis parey i’n ganny ekrir konsernan li, me maler pour sa enn ki pou trai Garson zonm! I ti pou’n pli bon si sa zonm pa ti’n ne.” (Zan 13:26; Matye 26:24) Apre sa, Satan i antre dan li. Zida ti deza pe fer sa ki mal, me la i les Dyab pran kontrol lo li pour fer son lavolonte e i vin “sa enn ki pou ganny detrir.”​—Zan 6:64, 70; 12:4; 17:12.

Zezi i dir Zida: “Sa ki ou annan pour fer, fer li deswit.” Bann zapot i krwar ki vi ki bwat larzan i avek Zida, Zezi pe dir li: “‘Aste sa ki nou bezwen pour lafet’ ouswa ki i ti devret donn en keksoz bann pov.” (Zan 13:27-30) Me Zida i kit sa landrwa pour al trai Zezi.

Sa menm zour swar apre repa Lapak, Zezi i entrodwir en lot repa konpletman diferan. I pran en dipen, fer lapriyer, kas li e donn son bann zapot pour manze. I dir: “Sa i reprezant mon lekor ki pou ganny donnen pour zot. Kontinyen fer sa pour montre ki zot pe mazin mwan.” (Lik 22:19) Bann zapot i pas sa bout dipen avek kanmarad e zot manze.

Aprezan, Zezi i pran en lakoup diven, fer lapriyer e pas avek son bann zapot. Zot tou zot bwar dan sa lakoup. Zezi i dir: “Sa lakoup i reprezant sa nouvo lalyans gras a mon disan ki pou ganny verse pour zot.”​—Lik 22:20.

Alor Zezi i fer laranzman pour ki son bann disip i selebre memoryal son lanmor tou le-z-an le 14 Nizan. Sa pou fer zot rapel sa ki Zezi ek son Papa in fer pour dimoun ki annan lafwa ganny libere anba kondannasyon pese ek lanmor. Sa selebrasyon i pli enportan ki Lapak ki bann Zwif ti selebre parski i montre ki Zezi in mor pour liber pour touzour bann imen ki krwar dan li.

Zezi i dir ki son disan “pou ganny verse pour ki pese bokou dimoun i ganny pardonnen.” Bokou dimoun pou ganny pardonnen zot pese, sa i enkli bann zapot fidel ek lezot disip. Zot sa bann ki pou avek li dan Rwayonm son Papa.​—Matye 26:28, 29.

Pandan son dernyen repa avek son bann zapot, Zezi in donn zot en leson konsernan limilite ler i ti lav zot lipye. Akoz sa i apropriye? Parski sa i en febles ki bann zapot i annan. Zot devoue anver Bondye, me i ankor enportan pour zot konnen lekel ki pli gran parmi zot. (Mark 9:33, 34; 10:35-37) Sa zour swar, zot montre ki zot annan sa febles ankor enn fwa.

‘En gro dispit i leve antre [bann zapot] konsernan lekel parmi zot ki pli gran.’ (Lik 22:24) Nou kapab zis mazinen ki kantite Zezi ti tris pour vwar zot pe dispit ankor enn fwa. Ki Zezi i fer?

Olye dispit avek son bann zapot akoz zot latitid ek konportman, Zezi i demontre pasyans e rezonn avek zot: “Lerwa i annan lotorite lo bann nasyon e dimoun i apel Onorab bann ki domin lepep. Me zot, zot pa devret koumsa. . . . Parski lekel ki pli gran, sa enn ki pe asiz atab ouswa sa enn ki pe servi?” Apre, Zezi i rapel zot ki i’n toultan en bon legzanp pour zot. I dir: “Me mwan mon parmi zot konman sa enn ki pe servi.”​—Lik 22:25-27.

Malgre zot lenperfeksyon bann zapot in toultan la avek Zezi dan bokou sityasyon difisil. Alor i dir: “Mon fer en lalyans avek zot pour donn zot en rwayonm, zis parey mon Papa in fer en lalyans avek mwan pour donn mwan en rwayonm.” (Lik 22:29) Sa bann zonm i bann disip fidel Zezi. Alor Zezi i fer en lalyans avek son bann zapot pour asir zot ki zot pou diriz ansanm avek li dan Rwayonm.

Menm si sa bann zapot i annan sa zoli lespwar, zot ankor bann imen enparfe. Zezi i dir zot: “Satan in demande pour li triy zot parey fermye i triy dible,” ki fann fannen anmezir ki i ganny triye. (Lik 22:31) I osi donn zot sa lavertisman: “Zot tou zot pou abandonn mwan ozordi swar, parski i’n ganny ekrir: ‘Mon pou touy berze e mouton dan troupo pou disperse.’”​—Matye 26:31; Zekarya 13:7.

Me Pyer i dir avek lasirans: “Kantmenm tou lezot pou abandonn ou, mwan mon pa pou zanmen abandonn ou!” (Matye 26:33) Zezi i dir Pyer ki avan en kok i sant de fwa sa zour swar, Pyer pou dir ki i pa konn li. Par kont, Zezi i osi dir: “Mon’n sipliy Bondye pour ou pour ki ou lafwa pa afebli konpletman. Enn fwa ki ou’n retournen, fortifye ou bann frer.” (Lik 22:32) Kantmenm sa, Pyer i ensiste: “Mon pa pou zanmen dir ki mon pa konn ou, menm si fodre mon mor avek ou.” (Matye 26:35) Lezot zapot osi i dir menm zafer.

Zezi i dir son bann disip: “Mon pou avek zot pour en pti pe letan ankor. Zot pou rod mwan e zis parey mon’n dir bann Zwif, mon pe dir zot osi, ‘Kot mon pe ale zot pa kapab vini.’” Apre i azoute: “Mon pe donn zot en nouvo komannman, kontan kanmarad. Parey mwan mon’n kontan zot, zot osi kontan kanmarad. Par sa, tou dimoun pou konnen ki zot mon disip, si zot annan lanmour antre zot.”​—Zan 13:33-35.

Ler Pyer i tann Zezi dir ki i pou avek zot pour en pti pe letan ankor, i demande: “Senyer, kote ou pe ale?” Zezi i reponn: “Kot mon pe ale, ou pa kapab swiv mwan la konmela, me pli tar ou pou swiv mwan.” Pyer i en pe konfize, alor i dir: “Senyer, akoz ki mon pa kapab swiv ou la konmela? Mon pare pour donn mon lavi pour ou.”​—Zan 13:36, 37.

Aprezan Zezi i koz lo sa letan ler i ti anvoy son bann zapot dan en kanpanny predikasyon Galile san portmonnen ek sak manze. (Matye 10:5, 9, 10) I demann zot: “Zot pa ti mank nanryen, non?” Zot dir: “Non.” Me ki zot devret fer dan sa bann zour ki vini? Zezi i dir zot: “Sa ki annan en portmonnen, anmenn li, anmenn osi en sak manze e ki sa enn ki napa en lepe i vann son lenz pour aste enn. Parski mon dir zot, sa ki’n ganny ekrir i devret ganny akonplir lo mwan, setadir, ‘I ti ganny kondannen parey en kriminel.’ Parski sa pe ganny akonplir lo mwan.”​—Lik 22:35-37.

Zezi pe koz lo sa letan kot i pou ganny kloute lo poto o bor bann malfeter oubyen bann kriminel. Apre sa, son bann disip pou fer fas avek bann gro persekisyon. Zot santi ki zot in deza pare, alor zot dir: “Senyer gete! i annan de lepe la.” I reponn zot: “I ase.” (Lik 22:38) Lefet ki zot annan de lepe avek zot pou donn Zezi en loportinite pour ansenny zot en lot leson enportan.

Zezi i ankor dan sa lansanm anler avek son bann zapot apre repa memoryal. Zezi i ankouraz zot: “Pa bezwen enkyet. Demontre lafwa dan Bondye e osi dan mwan.”​—Zan 13:36; 14:1.

Zezi i eksplik son bann zapot fidel akoz zot pa devret enkyet ler i ale: “Dan lakaz mon Papa, i annan en kantite landrwa reste. . . . Si mon ale e prepar en plas pour zot, mon pou retournen e mon pou resevwar zot kot mwan, pour ki la kot mon ete zot osi zot pou lanmenm.” Me bann zapot pa konpran ki i pe koz lo al dan lesyel. Toma i demande: “Senyer, nou pa konnen kote ou pe ale. Ki mannyer nou kapab konn semen?”​—Zan 14:2-5.

Zezi i reponn: “Mwan menm semen, laverite ek lavi.” Sel fason ki en dimoun i kapab antre dan lakaz son Papa dan lesyel se pour aksepte Zezi e son bann lansennyman e imit son fason viv. Zezi i dir: “Napa personn ki ariv kot mon Papa san pas par mwan.”​—Zan 14:6.

Filip pe ekout byen e i demande: “Senyer, montre nou ou Papa e sa pou ase pour nou.” I paret ki Filip i anvi vwar Bondye dan en vizyon parey Moiz, Eliya ek Izai ti vwar. Par kont, bann zapot i annan en keksoz ki pli bon ki sa bann vizyon. Zezi i dir: “Tou sa letan mon avek zot, Filip, ou pa ankor konn mwan? Sa ki’n vwar mwan, i’n vwar mon Papa osi.” Zezi i imit personnalite son Papa parfetman, alor ler zot in viv avek Zezi e obzerv li, sa i konmsi zot ti pe vwar son Papa. Byensir, Papa i pli siperyer ki son Garson, parski Zezi i dir: “Sa ki mon dir zot mon pa pe dir lo mwan menm.” (Zan 14:8-10) Bann zapot i kapab vwar ki Zezi i rekonnet ki tou sa bann lansennyman i sorti kot son Papa.

Bann zapot in vwar bann keksoz ekstraordiner ki Zezi in fer e zot in tann li anons sa bon nouvel lo Rwayonm Bondye. Aprezan i dir zot: “Sa ki demontre lafwa dan mwan pou osi fer sa ki mon fer e i pou fer plis ki sa.” (Zan 14:12) Zezi pa pe dir ki zot pou fer bann mirak pli ekstraordiner ki li. Par kont, zot minister pou dire pour pli lontan, kouver en pli gran teritwar e zot pou pres avek bokou plis dimoun.

Zot pa pou tousel ler Zezi i ale, parski i promet zot: “Mon pou fer nenport kwa ki zot demande an mon non.” Deplis, i dir: “Mon pou demann mon Papa e i pou donn zot en lot led ki pou reste avek zot pour touzour, sa i lespri sen laverite.” (Zan 14:14, 16, 17) Sa led i lespri sen ki Zezi in promet. Sa i arive zour Lapannkot.

Zezi i dir: “Dan en pti pe letan, lemonn pa pou vwar mwan ankor, me zot zot pou vwar mwan akoz mon pe viv e zot pou viv.” (Zan 14:19) Apre ki i’n resisite, Zezi pou aparet parey en imen avek son bann disip, me pli tar i pou resisit zot avek en lekor spirityel e zot pou al dan lesyel kot Zezi i ete.

Aprezan, Zezi i dir en laverite senp: “Sa ki kontan mwan i aksepte mon bann komannman e obei zot. Pareyman, sa ki kontan mwan, mon Papa pou kontan li, mon pou kontan li e mon pou fer li konn mwan byen.” Ler i dir sa, zapot Zida, ki osi apel Tade, i demande: “Senyer, pour ki rezon ou oule fer nou konn ou byen me pa lemonn?” Zezi i reponn: “Si en dimoun i kontan mwan, i pou obei mon parol e mon papa pou kontan li. . . . Sa ki pa kontan mwan pa obei mon parol.” (Zan 14:21-24) Kontrerman avek son bann disip, lemonn pa konsider Zezi konman semen, laverite ek lavi.

Zezi pe ale, alor ki mannyer son bann disip pou kapab rapel tou sa ki i’n ansenny zot? Zezi i eksplike: “Sa led, lespri sen ki mon Papa pou anvoye an mon non, sa enn pou ansenny zot tou bann keksoz e fer zot rapel tou bann keksoz ki mon’n dir zot.” Bann zapot in vwar bann mirak ki Zezi in fer gras a lespri sen, alor sa lasirans i rekonfortan. Zezi i azoute: “Mon kit lape avek zot, mon donn zot mon lape. . . . Pa bezwen enkyet oubyen per.” (Zan 14:26, 27) Alor bann disip i annan rezon pour pa enkyet akoz Papa Zezi pou gid e protez zot.

Byento, zot pou vwar levidans proteksyon Bondye. Zezi i dir: “Sef sa lemonn pe vini e i napa kontrol lo mwan.” (Zan 14:30) Dyab ti antre dan Zida e kontrol li. Me Zezi napa okenn febles ki Satan i kapab servi pour fer li vir kont Bondye e fer pese. Deplis, Dyab napa pouvwar pour anpes Zezi ganny resisite. Akoz non? Zezi i dir: “Mon pe fer sa ki mon Papa in donn mwan lord pour fer.” I asire ki son Papa pou resisit li.​—Zan 14:31.

Apre sa repa, Zezi in koz avek son bann zapot fidel dan en fason vreman ankourazan. I tar, petet minwi in fini sonnen. Aprezan Zezi i donn zot en zoli legzanp:

I konmans par dir: “Mwan menm vre pye rezen e mon Papa i sa fermye.” (Zan 15:1) Son legzanp i en pe parey sa ki ti’n ganny dir plizyer santenn lannen avan konsernan nasyon Izrael ki ti ganny apele plantasyon pye rezen Zeova. (Zeremi 2:21; Osea 10:1, 2) Me la Zeova pe rezet nasyon Izrael. (Matye 23:37, 38) Alor Zezi pe entrodwi en nouvo lansennyman. Zezi i sa pye rezen ki son Papa pe kiltive depi ki i ti swazir li avek lespri sen lannen 29. Me Zezi i montre ki sa pye rezen pa reprezant zis li tousel akoz i dir:

“Tou brans lo mwan ki pa raport fri, [mon Papa] i koupe, tou brans ki raport fri, i taye pour ki zot raport plis fri ankor. . . . Zis parey en brans pa kapab raport fri lo li menm amwen ki i lo pye rezen, zot osi zot pa pou kapab raport fri amwen ki zot reste ini avek mwan. Mwan menm pye rezen e zot zot bann brans.”​—Zan 15:2-5.

Zezi in promet son bann disip fidel ki apre ki i ale, i pou anvoy lespri sen konman en led. Senkanteen zour pli tar, ler bann zapot ek lezot i ganny lespri sen, zot vin bann brans sa pye rezen. Tou sa bann “brans” pou bezwen reste ini avek Zezi. Pour ki rezon?

I eksplike: “Sa ki reste ini avek mwan e mwan mon reste ini avek li pou raport bokou fri, akoz san mwan zot pa pou kapab fer nanryen.” Sa bann “brans,” setadir son bann disip fidel, ti pou raport bokou fri ler zot imit bann kalite Zezi, koz lo Rwayonm Bondye avek devouman e fer plis disip. Ki pou arive si en dimoun pa reste ini avek Zezi e pa raport fri? Zezi i eksplike: “Si en dimoun pa reste ini avek mwan, i pou parey en brans ki ganny zete.” Par kont, “si zot reste ini avek mwan e mon parol i reste dan zot leker, tou sa ki zot demande zot pou gannyen.”​—Zan 15:5-7.

La aprezan, Zezi i rekoz lo en keksoz ki i’n deza mansyonnen de fwa. Sa i konsernan gard son bann komannman. (Zan 14:15, 21) I koz lo en fason vreman enportan ki bann disip i kapab montre ki zot pe fer sa: “Si zot obei mon bann komannman, zot pou reste dan mon lanmour, zis parey mon’n obei komannman mon Papa e mon reste dan son lanmour.” Par kont, zot bezwen fer plis ki kontan Zeova ek son Garson. Zezi i dir: “La mon komannman, ki zot kontan kanmarad parey mwan mon’n kontan zot. Personn napa en pli gran lanmour ki sa, ki en dimoun i pare pour donn son lavi pour son bann zanmi. Zot mon zanmi si zot obei mon komannman.”​—Zan 15:10-14.

Dan detrwa erdtan, Zezi pou demontre son lanmour par donn son lavi pour tou bann ki demontre lafwa dan li. Son legzanp i devret pous son bann disip pour fer sakrifis pour demontre lanmour anver kanmarad. Parey Zezi ti dir pli boner, sa lanmour pou montre ki son bann disip i diferan. I ti dir: “Par sa, tou dimoun pou konnen ki zot mon disip, si zot annan lanmour antre zot.”​—Zan 13:35.

Zezi i apel son bann zapot son “zanmi” e i dir zot akoz: “Mon apel zot zanmi akoz mon’n fer zot konn tou keksoz ki mon’n tande avek mon Papa.” Son bann zapot i kapab vin son zanmi pros e konnen ki son Papa in dir Zezi, pa sa i en relasyon vreman presye! Me pour zot kapab gard sa relasyon avek Zezi, zot bezwen “kontinyen raport fri.” Si zot fer sa, Zezi i dir, “nenport kwa ki zot demann mon Papa an mon non, i pou donn zot.”​—Zan 15:15, 16.

Sa lanmour ant sa bann “brans,” setadir son bann disip, pou ed zot andir sa ki pou arive. I averti zot ki lemonn pou ay zot, me i rekonfort zot ler i dir: “Si lemonn i ay zot, zot konnen ki i’n ay mwan avan ki i’n ay zot. Si zot ti form parti sa lemonn, sa lemonn ti pou kontan sa ki pour li. Me lefet ki zot pa form parti sa lemonn, . . . pour sa rezon lemonn i ay zot.”​—Zan 15:18, 19.

Zezi i kontinyen eksplik zot akoz lemonn pou ay zot. I dir: “Bann dimoun pou fer tou sa bann keksoz kont zot akoz zot port mon non, parski sa bann dimoun pa konn sa Enn ki’n anvoy mwan.” Zezi i dir ki dan en sans, son bann mirak i kondann bann ki ay li: “Si mon pa ti’n fer sa bann mirak ki personn pa’n deza fer devan zot, zot pa ti pou’n fer pese, me aprezan zot in vwar mwan e zot in ay mwan e osi mon Papa.” Anfet, lefet ki zot ay Zezi, sa i akonpli bann profesi.​—Zan 15:21, 24, 25; Psonm 35:19; 69:4.

Ankor enn fwa, Zezi i promet pour anvoy lespri sen konman en led. Tou son bann disip i kapab ganny sa lafors pwisan e i kapab ed zot raport fri, setadir “rann temwannyaz.”​—Zan 15:27.

Zezi ek son bann zapot i pros pour kit sa lasanm anler kot zot in pran repa Lapak. Zezi in donn zot bokou konsey e la i dir: “Mon’n dir zot sa bann keksoz pour ki zot pa tonbe.” Akoz sa lavertisman i apropriye? I dir zot: “Dimoun pou pous zot dan sinagog. Anfet, letan pe vini kot sa bann ki touy zot pou krwar ki zot pe servi Bondye.”​—Zan 16:1, 2.

Sa i kapab trakas bann zapot. Menm si pli boner Zezi ti’n dir zot ki lemonn pou ay zot, i pa ti’n dir zot direkteman ki zot ti pou ganny touye. Akoz? Zezi i dir: “Mon pa’n dir zot sa bann keksoz o konmansman parski mon ti avek zot.” (Zan 16:4) Me la i pe averti zot avan i ale. Sa i kapab ed zot pou pa dekouraze pli tar.

Zezi i osi dir: “Mon pe al kot sa Enn ki’n anvoy mwan, me pourtan, ni enn ant zot pa demann mwan, ‘Kote ou pe ale?’” Pli boner sa zour swar, zot ti demann Zezi kote i pe ale. (Zan 13:36; 14:5; 16:5) Me la zot per akoz sa ki Zezi fek dir zot lo persekisyon e zot byen sagren. Alor zot pa demann li okenn kestyon konsernan laglwar ki i pou gannyen dan lesyel e ki benediksyon sa pou anmennen pour bann vre adorater. Zezi i fer sa remark: “Aprezan zot vreman sagren parski mon’n dir zot sa bann keksoz.”​—Zan 16:6.

Apre Zezi i eksplike: “I dan zot lavantaz ki mon ale. Parski si mon pa ale, zot pa pou ganny sa led, me si mon ale, mon pou anvoy li pour zot.” (Zan 16:7) Zezi i bezwen mor e al dan lesyel pour ki son bann disip i ganny lespri sen ki pou en led pour son pep nenport landrwa ki zot ete lo later.

Lespri sen “pou donn levidans konkret lo pese lemonn, lo ladrwatir ek zizman Bondye.” (Zan 16:8) I pou vin evidan ki lemonn pa’n demontre lafwa dan Garson Bondye. Ler Zezi i al dan lesyel, sa pou donn levidans konkret ki sa ki i ti fer ti byen e sa pou montre akoz ki Satan, “sef sa lemonn” i devret ganny zize.​—Zan 16:11.

Zezi i osi dir: “I annan ankor en kantite keksoz pour mwan dir zot, me zot pa pou kapab konpran tousala la konmela.” Ler Zezi i donn zot lespri sen, sa pou ed zot konpran “tou sa ki vre” e zot pou kapab viv an armoni avek laverite.​—Zan 16:12, 13.

Bann zapot pa arive konpran sa ki Zezi i dir apre: “Dan en pti pe letan, zot pa pou vwar mwan ankor e apre sa, dan en pti pe letan, zot pou vwar mwan ankor.” Zot demann kanmarad ki sa i vedir. Zezi i realize ki zot anvi demann li kestyon lo sa size, alor i eksplike: “Vreman mon dir zot laverite, zot pou plere e fer leokri, me lemonn pou dan lazwa, zot zot pou tris, me zot latristes pou vin lazwa.” (Zan 16:16, 20) Ler Zezi i ganny touye son lannmen apremidi, bann sef relizye pou dan lazwa, me bann disip pou tris. Apre sa, zot latristes pou vin lazwa ler Zezi pou ganny resisite. Zot kontinyen dan lazwa ler zot ganny lespri sen Bondye.

Zezi i konpar sityasyon bann zapot avek sityasyon en madanm ansent ki pe ganny douler lakousman. I dir: “Letan en madanm pe al ganny pti baba, i dan douler akoz son ler in arive, me apre ki i’n fini ganny pti baba, i pa rapel sa douler akoz i dan lazwa parski en zanfan in ne dan lemonn.” Zezi i ankouraz son bann disip par dir: “La zot osi zot tris, me mon pou revwar zot, zot pou dan lazwa e personn pa pou kapab anpes zot zwaye.”​—Zan 16:21, 22.

Ziska aprezan, bann zapot pa’n zanmen demann Bondye okenn keksoz o non Zezi. La aprezan i dir: “Sa zour zot pou demann keksoz avek mon Papa an mon non.” Akoz zot devret fer sa? Pa akoz son Papa pa tro anvi reponn. Anfet, Zezi i dir: “Mon Papa li menm i kontan zot parski zot kontan mwan . . . konman reprezantan Bondye.”​—Zan 16:26, 27.

Bann parol Zezi in bezwen ankouraz son bann zapot, sanmenm zot dir: “Pour sa rezon, nou krwar ki ou sorti kot Bondye.” Zot konviksyon pou ganny teste byento. Anfet, Zezi i dekrir sa ki pou arive: “Ekoute! Sa ler pe vini e i’n fini arive kot zot pou disperse sakenn kot son lakaz e zot pou kit mwan tousel.” Par kont, i asir zot: “Mon’n dir zot sa bann keksoz pour ki atraver mwan zot kapab ganny lape. Zot pou bezwen soufer dan sa lemonn, me pran kouraz! Mon’n ranport laviktwar lo lemonn!” (Zan 16:30-33) Non, Zezi pa pe abandonn zot. I asire ki zot osi zot kapab ranport laviktwar lo lemonn si zot fidelman fer lavolonte Bondye malgre tou sa ki Satan ek son lemonn i fer pour esey kas zot lentegrite.

Zezi i vreman kontan son bann zapot, se pour sa ki i pe prepar zot akoz i pros pour li ale. Aprezan i get anler dan lesyel e priy son Papa: “Glorifye ou garson pour ki ou garson i kapab glorifye ou, zis parey ou’n donn li lotorite lo tou dimoun pour kapab donn lavi eternel tou sa bann ki ou’n donn li.”​—Zan 17:1, 2.

I kler ki Zezi i rekonnet ki sa ki pli enportan se pour donn Bondye laglwar. Me pa i ankourazan pour mazin sa lespwar lavi eternel ki Zezi in koz lo la! Vi ki Bondye in donn Zezi “lotorite lo tou dimoun,” i kapab fer tou limanite benefisye avek sa ranson. Par kont, pa tou dimoun ki pou ganny sa bann byenfe. Akoz? Akoz sa bann byenfe i zis pour bann ki azir an armoni avek sa ki Zezi i mansyonnen apre. I dir: “Pour ganny lavi eternel, zot bezwen aprann konn ou, sa sel vre Bondye e sa enn ki ou’n anvoye Zezi Kri.”​—Zan 17:3.

En dimoun i bezwen aprann konn byen tou le de Papa ek Garson e annan en bon relasyon avek zot. I bezwen annan menm pwennvi ki zot. I osi bezwen fer zefor pour imit zot bann kalite dan lafason ki i tret lezot. Deplis, i bezwen rekonnet ki sa ki pli enportan se pa ganny lavi eternel, me ki Bondye i ganny glorifye. Apre sa, Zezi i rekonmans koz lo sa size enportan e i dir:

“Mon’n fini sa travay ki ou’n donn mwan pour fer e mon’n glorifye ou lo later. Alor, Papa, glorifye mwan akote ou pour ki mon a reganny sa laglwar ki mon ti annan akote ou avan ki lemonn ti egziste.” (Zan 17:4, 5) Zezi i demann Bondye pour ganny resisite pour li reganny laglwar ki i ti annan dan lesyel.

Par kont, Zezi pa’n oubliy sa ki i’n akonpli pandan son minister. I priye: “Mon’n fer konn ou non avek bann ki ou’n donn mwan dan lemonn. Zot ti pour ou e ou’n donn zot avek mwan e zot in obei ou parol.” (Zan 17:6) Pandan son minister, Zezi pa’n zis servi non Bondye, setadir Zeova. Me i’n ed son bann zapot pour konn Zeova ek son bann kalite e lafason ki i pran swen avek bann imen.

Bann zapot in aprann konn Zeova, rol son Garson ek bann keksoz ki Zezi in ansennyen. Avek limilite, Zezi i dir: “Mon’n dir zot bann keksoz ki ou’n dir mwan. Zot in aksepte sa bann keksoz, zot in arive konnen ki mon’n vin konman ou reprezantan e zot in krwar ki ou’n anvoy mwan.”​—Zan 17:8.

Apre sa, Zezi i fer resorti diferans ki i annan ant son bann disip ek lezot dimoun dan lemonn: “Mon priy pour zot, mon pa priy pour lemonn, me pour sa bann ki ou’n donn mwan, parski zot pour ou e tou sa ki pour mwan i pour ou. . . . Papa sen, vey lo zot akoz sa non ki ou’n donn mwan, pour ki zot kapab en sel, parey nou nou en sel. . . . Mon’n protez zot e ni enn parmi zot pa’n perdi eksepte sa enn ki pou ganny detrir.” Zezi ti pe koz lo Zida Iskaryot ki ti pe al trai li.​—Zan 17:9-12.

Zezi i kontinyen priye: “Lemonn in ay zot. . . . Mon pa pe demann ou pour tir zot dan lemonn, me plito ki ou vey lo zot akoz sa enn move. Zot pa form parti lemonn, parey mwan mon pa form parti lemonn.” (Zan 17:14-16) Bann zapot ek lezot disip i viv dan sa lemonn, setadir parmi bann imen dirize par Satan, me zot bezwen reste separe avek sa lemonn e tou sa ki move dan sa lemonn. Ki mannyer zot kapab fer sa?

Zot bezwen reste sen, setadir separe pour servi Bondye. Zot bezwen met an pratik sa ki dan Lekritir Ebre ek bann laverite ki Zezi li menm in ansennyen. Zezi i priye: “Fer zot vin sen gras a laverite, ou parol i laverite.” (Zan 17:17) Pli tar, serten bann zapot pou ganny enspire pour ekri bann liv ki pou dan Labib ki pou form parti sa “laverite” ki kapab ed en dimoun pour vin sen.

Me pli tar, i pou osi annan lezot dimoun ki pou aksepte “laverite.” Alor Zezi “pa priy zis pour zot [sa 11 zapot], me osi pour bann ki pou annan lafwa dan [li] apre ki zot in ekout zot parol.” Ki Zezi i demann son Papa pour fer pour sa bann dimoun? I dir: “Mon priye pour ki zot tou zot kapab vin en sel, parey ou, Papa, ou ini avek mwan e mwan mon ini avek ou, pour ki zot osi zot kapab ini avek nou.” (Zan 17:20, 21) Zezi ek son Papa pa en sel bondye. Zot en sel dan sa sans ki zot tonm dakor lo tou keksoz. Zezi i priye ki son bann disip osi i kapab vin en sel dan sa menm sans.

Pa bokou letan avan sa, Zezi ti’n dir Pyer ek lezot ki i ti pe al prepar en plas pour zot, setadir en plas dan lesyel. (Zan 14:2, 3) Aprezan Zezi i rekoz lo sa pwen dan son lapriyer: “Papa, mon anvi ki sa bann ki ou’n donn mwan i avek mwan kot mon ete, pour ki zot kapab vwar sa laglwar ki ou’n donn mwan, parski ou’n kontan mwan depi o konmansman lemonn.” (Zan 17:24) Zezi i konfirmen ki bokou letan pase, avan menm ki Adan ek Ev ti fer zanfan, Bondye ti kontan son sel Garson, Zezi Kri, ki pli tar ti vin lo later.

Pour fini son lapriyer, Zezi i remet lanfaz lo non son Papa e lo lanmour ki Bondye i annan pour bann zapot ek lezot ki pou aksepte “laverite.” I dir: “Mon’n fer zot konn ou non e mon pou kontinyen fer li, pour ki zot kapab kontan lezot parey ou’n kontan mwan e mwan mon ava ini avek zot.”​—Zan 17:26.

Zezi in fini priye avek son bann zapot fidel. Apre ‘ki zot in sant louanz, zot al lo Montanny Pye Zoliv.’ (Mark 14:26) Zot al dan direksyon les ver en zarden ki apel Zetsemane, kot Zezi i abitye ale.

Zot ariv dan sa zoli landrwa parmi bann pye zoliv. Wit son zapot i reste o bor larantre sa zarden akoz Zezi i dir zot: “Asiz la pandan ki mon al priye laba.” I pran trwa son zapot, Pyer, Zak ek Zan e zot al en pti pe pli lwen dan zarden. Son lespri i fatige e i dir sa trwa zapot: “Mon sitan dan en gran latristes konmsi mon pe mor. Reste la e kontinyen veye avek mwan.”​—Matye 26:36-38.

Zezi i al en pti pe pli lwen e i ‘tonm azenou lafas anba e konmans priye.’ Dan sa moman vreman difisil, lo kwa i pe priy Bondye? I priye: “Papa, tou keksoz i posib pour ou, pa les mwan bwar sa lakoup. Pourtan, pa sa ki mon oule, me sa ki ou oule.” (Mark 14:35, 36) Ki sa i vedir? Eski Zezi nepli pare pour mor e donn son lavi konman en ranson? Non, pa sa ki i vedir.

Ler Zezi ti dan lesyel, i ti vwar sa kantite douler ki lezot ti pas ladan ler bann Romen ti met zot amor. Konman en imen, Zezi i kapab per oubyen enkyet e i osi kapab santi douler, alor i konnen ki sa ki i pe al pas atraver pa pou fasil. Me Zezi i vreman angwase akoz i santi ki i pe al mor konman en kriminel e sa i kapab sali non son Papa. Dan detrwa erdtan, i pou ganny akize ki i’n koz an mal lo Bondye e ganny kloute lo poto.

Apre ki Zezi in priy pour en bon pe letan, i retourn kot son trwa zapot e i vwar zot pe dormi. I dir avek Pyer: “Zot pa’n kapab kontinyen veye ni menm pour enn erdtan avek mwan? Kontinyen veye e kontinyen priye pour ki zot pa tonm dan tantasyon.” Zezi i realize ki bann zapot osi i anba bokou presyon e i tar dan lannwit. I azoute: “Lespri i anvi fer sa ki byen, me lekor enparfe i feb.”​—Matye 26:40, 41.

Apre Zezi i al priye ankor en dezyenm fwa e demann Bondye pour pran “sa lakoup” avek li. Ler i retournen, ankor enn fwa i vwar sa trwa zapot pe dormi olye priye pour pa ganny tante. Ler Zezi i koz avek zot, zot pa “konnen ki pour dir li.” (Mark 14:40) Zezi i tonm azenou e pour en trwazyenm fwa i priye.

Zezi i vreman trakase akoz i pou mor konman en kriminel e sa pou sali non son Papa. Me Zeova pe ekout lapriyer son Garson e i anvoy en lanz pour ankouraz li. Kantmenm sa, Zezi pa aret sipliy son Papa, i kontinyen “priy avek plis lentansite ankor.” I anba en kantite presyon. Zezi i santi sa gro responsabilite ki lo li. I realize ki son prop lavi eternel i enplike e ki lavi bann imen ki krwar dan li i depan lo li. Anfet, ‘son transpirasyon i vin parey gout disan ki pe tonm ater.’​—Lik 22:44.

Ler Zezi i retourn kot son bann zapot pour trwazyenm fwa i vwar zot pe dormi. I dir: “Dan en letan koumsa, zot pe dormi e pe repoze! La ler in arive pour Garson zonm ganny livre dan lanmen bann ki annan en move lavi. Leve, annou ale. Gete! Sa enn ki pou trai mwan in arive.”​—Matye 26:45, 46.

Lontan minwi in sonnen. Bann pret in dakor pour pey Zida 30 pyes larzan pour trai Zezi. Alor Zida i anmenn en lafoul bann Farizyen ek sef pret e zot al rod Zezi. I osi annan en group solda Romen arme ek en komandan militer avek zot.

I paret ki ler Zezi ti fer Zida ale apre repa Lapak, i’n al direkteman kot bann sef pret. (Zan 13:27) Zot in rasanble zot prop zofisye e osi en group solda. I posib ki avan sa, Zida ti’n anmenn zot dan sa lasanm kot Zezi ek son bann zapot ti selebre Lapak. Me la sa lafoul in travers Vale Kidronn pour zot al kot sa zarden. Zot in anmenn bann zarm, flanbo ek lalanp akoz zot determinen pour aret Zezi.

Anmezir ki Zida i gid sa lafoul lo Montanny Pye Zoliv, i asire ki i konnen kote Zezi i ete. Pandan sa dernyen semenn, Zezi ek son bann zapot ti ale vini ant Betani ek Zerizalenm, zot ti souvandfwa pas dan zarden Zetsemane. Me la i aswar e i posib ki bann pye zoliv dan sa zarden i fer li difisil pour zot vwar Zezi. Alor ki mannyer sa bann solda, ki petet pa’n zanmen vwar Zezi avan, pou kapab rekonnet li? Zida i donn zot en siny. I dir zot: “Sa enn ki mon anbrase, li menm li sa enn, aret li e fer gard anmenn li.”​—Mark 14:44.

Ler Zida i anmenn sa lafoul dan zarden, i vwar Zezi ek son bann zapot e i al direk kot li. Zida i dir: “Bonzour Ansenyan!” e i anbras li avek tandres. Zezi i demann li: “Akoz ou la ou?” (Matye 26:49, 50) Zezi i reponn son prop kestyon e dir: “Zida, eski ou pe trai Garson zonm par anbras li?” (Lik 22:48) Me Zezi nepli trakas li avek Zida ki’n trai li.

Aprezan Zezi i avans devan dan lalimyer bann flanbo ek lalanp e i demande: “Lekel ki zot pe rode?” En dimoun dan lafoul i reponn: “Zezi sa Nazareen.” Avek kouraz Zezi i dir: “Mwan menm sa.” (Zan 18:4, 5) Zot sirprann e zot tonm ater.

Olye profite pour sov dan fernwanr, ankor enn fwa Zezi i demande lekel zot pe rode? Ankor enn fwa zot dir, “Zezi sa Nazareen” e Zezi i dir dan en fason kalm: “Mon’n dir zot ki se mwan menm sa. Alor si zot pe rod mwan, les sa bann zonm ale.” Menm pandan sa moman vreman difisil, Zezi i rapel sa ki i’n dir avan, ki i pa pou perdi ni menm enn. (Zan 6:39; 17:12) Zezi in protez son bann zapot fidel e ni enn parmi zot pa’n perdi “eksepte sa enn ki pou ganny detrir” setadir Zida. (Zan 18:7-9) Sanmenm sa ki aprezan Zezi i dir zot les son bann disip fidel ale.

Ler bann zapot i vwar bann solda leve e al ver Zezi, zot realize ki pe arive. Zot demande: “Senyer, eski nou devret servi lepe?” (Lik 22:49) Avan ki Zezi i ganny sans reponn, Pyer i pran enn dan sa de lepe ki avek bann zapot. I atak Malkis, en lesklav granpret e sot son zorey kote drwat.

Zezi i tous zorey Malkis e geri sa blesir. Apre sa, i ansenny en leson enportan ler i donn Pyer sa lord: “Remet ou lepe dan son plas, parski tou sa ki servi lepe pou mor par lepe.” Zezi i pare pour ganny tyonbo parski i eksplike: ‘Ki mannyer sa Lekritir ki dir i devret ariv koumsa pou akonpli?’ (Matye 26:52, 54) Zezi i osi dir: “Ou pa krwar ki mon devret bwar sa lakoup ki mon Papa in donn mwan?” (Zan 18:11) Zezi i dakor pour fer sa ki Bondye i oule menm si i bezwen mor.

Zezi i demann lafoul: “Eski zot in vin aret mwan avek lepe ek mayos konmsi mon en voler? Zour apre zour, mon ti abitye asize e ansennyen dan tanp, pourtan zot pa ti vin aret mwan. Me tousala in arive pour ki sa ki bann profet in ekri i ganny akonplir.”​—Matye 26:55, 56.

Sa group solda, sa komandan militer ek bann zofisye Zwif i tyonbo Zezi e anmar li. Ler bann zapot i vwar sa, zot taye. Par kont, “en serten zenn onm,” petet disip Mark, i reste parmi lafoul pour li kapab swiv Zezi. (Mark 14:51) Bann dimoun dan lafoul i rekonnet li e zot esey tyonbo li, alor i taye e kit son lenz linenn deryer.

Zot in anmar Zezi parey en kriminel e anmenn li kot Anas. Anas ti granpret ler Zezi ti fer bann ansenyan dan tanp etonnen a laz 12 an. (Lik 2:42, 47) Pli tar, serten bann garson Anas ti servi konman granpret e la aprezan son zann Kaif ki pe servi konman granpret.

Ler Anas pe kestyonn Zezi, Kaif i annan ase letan pour rasanble Sannedren. Dan sa lakour Sannedren, i annan 71 manm enkli granpret ek lezot ki ti servi konman granpret avan.

Anas i kestyonn Zezi “konsernan son bann disip ek son lansennyman.” Zezi i reponn senpleman par dir: “Mon’n koz devan tou dimoun an piblik. Mon’n toultan ansenny dan sinagog e dan tanp kot tou bann Zwif i rasanble, mon pa’n zanmen dir nanryen an sekre. Akoz ou kestyonn mwan? Kestyonn sa bann ki’n tann sa ki mon’n dir.”​—Zan 18:19-21.

En zofisye ki pe debout la i donn Zezi en kalot dan son figir e i dir: “Koumsa ki ou reponn sef pret?” Me Zezi i konnen ki i pa’n fer nanryen mal, alor i dir: “Si mon’n dir en keksoz mal, dir mwan kwa ki mal, me si mon’n dir sa ki byen, akoz ou tap mwan?” (Zan 18:22, 23) Apre sa, Anas i fer laranzman pour Zezi ganny anmennen kot son zann Kaif.

Aprezan, Sannedren antye in rasanble. Sa i enkli granpret sa lannen, bann ansyen ek bann profeser lalwa. Zot zwenn kot lakaz Kaif. I ilegal pour ziz en dimoun zour Lapak, me sa pa anpes zot pour fer li akoz zot move lentansyon.

I evidan ki sa lakour pa anvi ziz Zezi dan en fason zis. Apre ki Zezi ti resisit Lazar, Sannedren ti deside ki Zezi ti devret mor. (Zan 11:47-53) Deplis, zis detrwa zour pase, bann sef relizye ti fer konplo pour tyonbo Zezi e touy li. (Matye 26:3, 4) Alor menm avan Zezi i konmans ganny zize, i konmsi i’n fini ganny kondannen amor!

Bann sef pret ek lezot manm Sannedren pa’n zis zwenn ilegalman, me zot osi pe esey rod bann temwen ki pou fer bann fo lakizasyon kont Zezi. Zot ganny bokou dimoun, me zot bann temwannyaz pa annakor avek kanmarad. Finalman, de temwen i vin dir: “Nou ti tann li dir, ‘Mon pou detri sa tanp ki’n ganny fer avek lanmen e dan trwa zour mon pou rekonstri en lot ki pa’n ganny fer avek lanmen.’” (Mark 14:58) Par kont, menm sa bann zonm pa tonm dakor konpletman.

Kaif i demann Zezi: “Ou napa nanryen pour dir? Eski ou tande ki sa bann zonm pe dir kont ou?” (Mark 14:60) Zezi pa dir nanryen menm si sa bann temwen pe rakont bann fo zistwar ki pa an armoni avek kanmarad. Alor Granpret Kaif i esey en lot taktik.

Kaif i konnen ki bann Zwif i fasilman ankoler ler en dimoun i dir ki i Garson Bondye. Avan sa, ler Zezi ti dir ki Bondye i son Papa, bann Zwif ti anvi touy li akoz zot ti krwar ki i ti pe esey fer “konmsi i egal avek Bondye.” (Zan 5:17, 18; 10:31-39) Kaif i konnen ki mannyer zot santi, alor i esey trik Zezi par demann li: “Fer serman par Bondye vivan pour dir laverite e dir nou si ou menm Kris, Garson Bondye!” (Matye 26:63) Byensir, Zezi in deza dir ki i Garson Bondye. (Zan 3:18; 5:25; 11:4) Si i pa reponn sa kestyon, zot kapab pran sa konman levidans ki i pa Garson Bondye ek Kris. Sanmenm sa Zezi i dir: “Mwan menm e zot pou vwar Garson zonm pe asize lo kote drwat sa Enn Pwisan e pe vin lo nyaz dan lesyel.”​—Mark 14:62.

Ler Kaif i tann sa, i desir son lenz e dir: “Sa zonm pe koz kont Bondye! Eski nou vreman bezwen lezot temwen ankor? Zot vwar! Zot menm zot in tann li pe koz kont Bondye! Ki zot dir?” Sannedren i pas zot zizman enzis e dir: “I merit lanmor.”​—Matye 26:65, 66.

Zot konmans monk Zezi e donn li koudpwen. Lezot i kalot li dan son figir e kras lo li. Apre ki zot in kouver son figir, zot kalot li e boufonn li: “Profetize! Lekel ki’n tap ou?” (Lik 22:64) La Garson Bondye pe ganny maltrete pli ba ki later apre ki i’n ganny zize ilegalman pandan lannwit!

Ler Zezi i ganny tyonbo dan zarden Zetsemane, bann zapot i per e zot abandonn li. Par kont, de parmi zot i aret taye e zot swiv Zezi. Sa i Pyer “ensi ki en lot disip,” aparaman zapot Zan. (Zan 18:15; 19:35; 21:24) Petet zot swiv Zezi anmezir ki i pe ganny anmennen kot Anas. Ler Anas i anvoy Zezi kot Granpret Kaif, Pyer ek Zan i swiv li dan lwen. Petet zot per pour zot prop lavi e an menm tan zot enkyet pour sa ki kapab arive avek zot Met.

Granpret i konn Zan, alor i ganny permisyon pour antre dan lakour lakaz granpret. Pyer i reste deor kot baro ziska ki Zan i retournen e koz avek en servant ki vey baro. Apre sa, Pyer i ganny permisyon pour antre.

I fer fre sa zour swar, alor bann dimoun ki dan lakour in alim en dife. Pyer i asiz avek zot pour sof li anmezir ki i espere ‘pour vwar ki arive’ apre ki Zezi in ganny zize. (Matye 26:58) La aprezan dan laklerte dife, sa servant ki’n donn Pyer permisyon antre i ganny sans get li pli byen. I demande: “Pa ou osi ou en disip sa zonm ou?” (Zan 18:17) Pa zis sa servant ki rekonnet Pyer e dir li ki i ti ansanm avek Zezi.​—Matye 26:69, 71-73; Mark 14:70.

Pyer pa kontan sa ditou. I dir ki i pa ti avek Zezi. I dir: “Mon pa ni konn li, ni konpran ki ou pe dir.” (Mark 14:67, 68) I pe esey fer sir ki personn pa rekonnet li e i menm al deor kot larantre. I osi fer serman e dir “ki i devret ganny modi si i pe koz manti.”​—Matye 26:74.

Antretan, Zezi pe ganny zize aparaman dan en landrwa kot lakaz Kaif ki par lao lakour. I posib ki Pyer ek lezot ki pe espere anba i kapab vwar bann diferan temwen ki pe ale vini pour donn zot temwannyaz.

Zot konnen ki Pyer pa’n dir laverite lo Zezi e anfet i koz avek en aksan en dimoun ki sorti Galile. An plis, i annan en dimoun dan sa group ki trouv fanmir avek Malkis, sa zonm ki Pyer ti sot son zorey. Alor zot akiz Pyer: “Pa mon ti vwar ou dan zarden avek li mwan?” Ler Pyer i demanti pour en trwazyenm fwa, en kok i sante parey i ti’n ganny predir.​—Zan 13:38; 18:26, 27.

I paret ki ler sa i arive, Zezi i lo sa balkon par lao sa lakour. Senyer i vire e get Pyer anba, sa in bezwen kas leker Pyer. I rapel sa ki Zezi ti dir li pli boner ler zot ti dan sa lasanm anler. Zis mazinen ki mannyer Pyer i santi ler i realize sa ki i’n fer! Pyer i al deor e i plere asodlarm.​—Lik 22:61, 62.

Ki mannyer sa in kapab arive? Ki mannyer Pyer, ki ti sitan asire ki i for spirityelman e fidel anver son Met, in kapab dir ki i pa konn Zezi? I paret ki tou sa ki’n arive in sirprann Pyer. Sa bann dimoun i devir parol Zezi e fer li pas pour en kriminel. Ler Pyer i kapab defann en zonm inosan, i vir son ledo avek sa Enn ki annan “parol lavi eternel.”​—Zan 6:68.

Move leksperyans Pyer i montre ki menm en dimoun ki annan lafwa ek devosyon i kapab perdi son lekilib si i pa byen prepare pour bann tantasyon ek bann difikilte ki i pa ekspekte. Sa ki’n ariv avek Pyer i devret en lavertisman pour tou serviter Bondye!