Bann madanm pa oule krwar ki latonm i vid! Mari Magdalenn i tay kot ‘Simon Pyer ek sa disip ki Zezi i kontan,’ setadir zapot Zan. (Zan 20:2) Par kont, lezot madanm ki’n reste kot latonm i vwar en lanz. I osi annan en lot lanz dan latonm dan “lenz blan.”​—Mark 16:5.

Enn sa bann lanz i dir zot: “Pa bezwen per, parski mon konnen zot pe rod Zezi ki ti ganny met amor lo poto. I pa la, akoz i’n ganny resisite zis parey i ti dir. Vini, vin get landrwa kot i ti ete. Apre sa, depese e al dir son bann disip ki i’n ganny resisite parski la i pe al esper zot Galile.” (Matye 28:5-7) Sa bann madanm pa oule krwar e zot tranble, alor zot taye pour al rakont bann disip.​—Mark 16:8.

Pandan sa letan, Mari in zwenn Pyer ek Zan. I dir: “Zot in tir Senyer dan latonm e nou pa konnen kote zot in met li.” (Zan 20:2) Pyer ek Zan i taye. Zan i tay pli vit e i ariv kot latonm premye. I get dan latonm e vwar bann latwal, me i reste deor.

Ler Pyer i arive, i al direk anndan. I vwar bann latwal linenn ek sa latwal ki zot ti met lo latet Zezi. Zan li, i antre dan latonm e i krwar sa ki Mari in dir. Malgre sa ki Zezi ti dir avan, ni enn parmi zot pa konpran ki i’n ganny resisite. (Matye 16:21) Zot tou le de zot pa konpran sa ki’n arive e zot retourn dan lakour. Me Mari, ki’n retourn kot latonm i reste lanmenm.

Antretan, lezot madanm i lo semen pe al kot bann disip pour dir zot ki Zezi in resisite. Ler zot pe taye pour al dir zot, Zezi i zwenn zot e dir: “Bonzour!” Zot “tonm azenou devan li.” Apre sa, Zezi i dir: “Pa bezwen per! Al dir mon bann frer pour ki zot al Galile e zot a vwar mwan laba.”​—Matye 28:9, 10.

Pli boner, ler i ti annan sa tranblemandter e bann lanz ti aparet, bann solda kot latonm “ti tranble e vin parey bann zonm mor.” Ler zot ti’n reganny zot lafors, zot ti antre dan lavil e “raport avek bann sef pret tou sa ki ti’n arive.” Apre sa, bann pret i diskit avek bann ansyen ki Zwif. Zot deside donn bann solda gous pour kasyet sa ki’n arive e pour dir: “Son bann disip ti vini pandan lannwit e vol son lekor ler nou ti pe dormi.”​—Matye 28:4, 11, 13.

Bann solda Romen i kapab ganny touye si zot tonm dormi ler zot pe veye, alor bann pret i promet: “Si sa [mansonz ki zot ti’n tonm dormi] i tonm dan zorey gouverner, nou pou eksplik li, me zot, pa bezwen trakase.” (Matye 28:14) Bann solda i aksepte sa gous e fer sa ki bann pret in demann zot. Alor sa fo zistwar konmkwa lekor Zezi in ganny vole i fannen partou parmi bann Zwif.

Mari Magdalenn i ankor dan latristes kot latonm Zezi. Ler i get dan latonm, i vwar de lanz dan lenz blan! Enn i asiz kot latet Zezi ti ete e sa lot kot son lipye ti ete. Zot demande: “Madanm, akoz ou pe plere?” Mari i reponn: “Zot in pran mon Senyer e mon pa konnen kote zot in met li.” Ler Mari i vire i vwar en lot dimoun. Li osi i demann menm kestyon ki sa lanz in demande e i dir: “Madanm, akoz ou pe plere? Lekel ki ou pe rode?” Mari i krwar ki sa zonm i zardinyen, i dir: “Msye, si ou’n tir son lekor la, dir mwan kote ou’n met li e mon ava pran li.”​—Zan 20:13-15.

Me an realite, Mari pe koz avek Zezi ki’n resisite, me i pa rekonnet li. Par kont, ler i dir, “Mari!” Mari i rekonnet ki sa i Zezi akoz i koumsa ki Zezi i abitye koz avek li. Avek lazwa, Mari i dir: “Rabouni!” (ki vedir “Ansenyan!”) Me vi ki Mari i per ki Zezi pe al dan lesyel, i tyonbo li. Alor Zezi i dir li: “Larg mwan parski mon pa ankor mont kot mon Papa. Me al kot mon bann frer e dir zot, ‘Mon pe al kot mon Papa e zot Papa, kot mon Bondye e zot Bondye.’”​—Zan 20:16, 17.

Mari i tay kot bann zapot ek lezot disip ki’n zwenn ansanm. Zot in ekout bann madanm pe rakonte sa ki zot in vwar. Mari i dir: “Mon’n vwar Senyer!” e i rakont zot sa ki i’n vwar. (Zan 20:18) Par kont, sa ki sa bann madanm i dir ‘pa paret fer sans pour’ bann disip.​—Lik 24:11.

Dimans le 16 Nizan, bann disip i vreman dekouraze. Zot pa konpran akoz latonm i vid. (Matye 28:9, 10; Lik 24:11) Pli tar dan lazournen, Kleopas ek en lot disip i kit Zerizalenm pour al Emais, ki en zistans apepre 11 kilomet.

Anmezir ki zot marse, zot diskit lo sa ki’n arive. Apre sa, en dimoun ki zot pa konnen i konmans mars avek zot. I demande: “Ki zot ti pe diskit lo la pandan ki zot ti pe marse?” Kleopas i reponn: “Eski ou en etranze ki pe reste tousel Zerizalenm e ki pa konn bann keksoz ki’n pase laba sa detrwa zour?” Sa dimoun i demande: “Ki keksoz?”​—Lik 24:17-19.

Zot dir: “Bann keksoz konsernan Zezi sa Nazareen. . . . Nou ti swete ki i ti sa enn ki ti pou delivre Izrael.”​—Lik 24:19-21.

Kleopas ek sa lot disip ki avek li i rakont bann keksoz ki’n arive pandan lazournen. Zot dir ki serten madanm ti al kot sa latonm kot lekor Zezi ti’n ganny mete, zot ti vwar li vid e sa bann madanm ti vwar de lanz ki ti dir ki Zezi i vivan. Zot dir ki lezot dimoun ti al kot latonm e “tou keksoz ti parey sa ki sa bann madanm ti’n dir.”​—Lik 24:24.

I kler ki sa de disip pa konpran tou sa ki’n arive. Sa dimoun ki pe mars avek zot i koriz zot move fason panse ki pe anpes zot krwar ki Zezi in resisite. I dir zot: “Zot pa konpran! Zot leker i tarde pour krwar tou bann keksoz ki bann profet in dir! Pa i ti neseser ki Kris i soufer e ganny glorifye?” (Lik 24:25, 26) Apre sa, i eksplik zot en kantite pasaz Labib ki koz lo Kris.

Finalman, zot ariv pros Emais. Sa de disip i anvi tann plis, alor zot demann sa dimoun: “Reste avek nou, parski tar pe fer e sa lazournen i preski fini.” I dakor pour reste e zot pran en repa. Ler sa dimoun i fer lapriyer, kas dipen e donn zot, zot rekonnet li me apre sa, i disparet. (Lik 24:29-31) La aprezan zot asire ki Zezi i vivan!

Sa de disip i byen eksite e zot koz lo sa ki’n pase. Zot dir: “Pa nou leker ti pe brile ler i ti pe koz avek nou dan semen, ler i ti pe eksplik nou Lekritir?” (Lik 24:32) Zot depese e retourn Zerizalenm kot zot al vwar bann zapot ek lezot disip. Avan ki Kleopas ek sa disip ki avek li i kapab rakont sa ki’n arive, zot tann lezot dir: “I vre ki Senyer in resisite e i’n aparet avek Simon!” (Lik 24:34) Apre, sa de disip i rakonte ki zot osi zot in vwar Zezi.

La aprezan tou dimoun i sirprann akoz Zezi i aparet dan sa lasanm kot zot ete! Sa i enkrwayab parski zot in tak laport akoz zot per bann Zwif. Me kantmenm sa, Zezi pe debout la parmi zot. Byen kalm, Zezi i dir: “Ki lape i avek zot.” Me zot per. Parey avan, zot krwar ki zot “pe vwar en vizyon.”​—Lik 24:36, 37; Matye 14:25-27.

Pour prouve ki i pa en vizyon oubyen zis en keksoz ki zot pe imazinen, me ki Zezi i vreman annan en lekor fizik, Zezi i montre zot son lanmen ek lipye e dir: “Akoz zot per e annan dout dan zot leker? Get mon lanmen ek mon lipye, mwan menm sa, tous mwan e gete, parski si mon ti en vizyon, mon pa ti pou annan laser ek lezo parey zot vwar mwan la.” (Lik 24:36-39) Zot vreman etonnen e dan lazwa menm si zot vwar li difisil pour zot krwar.

Pour ed zot vwar ki i vreman reel, i demande: “Eski zot annan en keksoz la pour manze?” I aksepte en bout pwason griye e i manze. Apre sa i dir: “Sanmenm ki mon ti dir zot ler mon ti ankor avek zot, ki tou sa ki’n ganny ekrir lo mwan dan Lalwa Moiz, liv bann Profet ek bann Psonm i devret ganny akonplir.”​—Lik 24:41-44.

Zezi ti ed Kleopas ek sa lot disip ki ti avek li pour konpran Lekritir e la i osi ed tou bann ki’n rasanble. I dir: “Se sa ki’n ganny ekrir: ki Kris ti pou soufer e ganny resisite trwazyenm zour e ki gras a son non, mesaz lo repantans pour ki pese i ganny pardonnen pou ganny anonse dan tou nasyon e sa pou konmans Zerizalenm. Zot bezwen rann temwannyaz lo sa bann keksoz.”​—Lik 24:46-48.

Zapot Toma pa la sa zour. Me pli tar, lezot i kontan pour dir li: “Nou’n vwar Senyer!” Toma i reponn: “Tan ki mon pa vwar mark sa bann klou dan son lanmen, tous mark sa bann klou avek mon ledwa e tous son kote, mon pa pou zanmen krwar.”​—Zan 20:25.

Wit zour pli tar, bann disip i zwenn ansanm ankor e zot tak laport. Safwasi Toma osi i la. Zezi i aparet avek zot dan en lekor imen e i dir: “Ki lape i avek zot.” Zezi i vire e get Toma e dir: “Get mon lanmen e met ou ledwa la. Tous mon kote avek ou lanmen e aret doute me zis krwar.” Toma i dir: “Mon Senyer, mon Bondye!” (Zan 20:26-28) Aprezan i napa okenn dout ki Zezi i vivan konman en lespri pwisan e ki i en reprezantan Zeova.

Zezi i dir: “Eski ou krwar parski ou’n vwar mwan? Ere bann ki krwar menm si zot pa’n vwar.”​—Zan 20:29.