Adan ek Ev ti ganny en kantite zanfan apre ki zot ti’n kit zarden Edenn. Zot premye garson Kaen ti vin en fermye e zot dezyenm garson ti sonny mouton.

En zour, Kaen ek Abel ti ofer en sakrifis Zeova. Eski ou konnen kisisa en sakrifis? En sakrifis i en kado spesyal. Zeova ti kontan sakrifis Abel me i pa ti kontan sa enn pour Kaen. Sa ti fer Kaen vreman ankoler. Zeova ti dir Kaen fer atansyon, akoz son lakoler ti kapab fer li fer en move keksoz. Me Kaen pa ti ekoute.

Kaen ti dir Abel: “Annou al dan lakanpanny.” Ler zot ti tousel dan lakanpanny, Kaen ti sot lo son frer e touy li. Ki Zeova ti fer? Zeova ti pini Kaen. I ti pous li e fer li al reste lwen avek son fanmir. Kaen ti napa drwa retournen.

Eski nou kapab aprann en leson atraver sa? Nou kapab konmans ankoler si keksoz pa pe mars parey nou ti a kontan. Si nou santi ki nou pe konmans ankoler oubyen si lezot dimoun i dir nou fer atansyon akoz zot remarke ki nou ankoler, nou devret vitman sanz nou latitid e kontrol nou lakoler avan ler i kontrol nou.

Vi ki Abel ti kontan Zeova e i ti fer sa ki byen, Zeova pa pou zanmen bliy li. Bondye pou resisit Abel ler I fer later vin en paradi.

Avek letan, i ti annan en kantite dimoun lo later. Laplipar zot ti bann move dimoun. Menm serten lanz dan lesyel ti vin move. Zot ti kit zot landrwa reste dan lesyel e vin lo later. Ou konnen akoz zot ti fer sa? Zot ti vin bann imen pour ki zot kapab marye avek bann madanm lo later.

Sa bann move lanz ek sa bann madanm ti fer zanfan. Sa bann garson ti grandi e zot ti vin vreman for. Zot ti sifok e bat bann dimoun. Zeova pa ti kapab les sa bann keksoz kontinyen arive. Alor, i ti deside detrir bann move dimoun dan en deliz. En deliz i ler delo i monte apre ki en gro lapli in tonbe.

Me i ti annan en zonm ki ti diferan. I ti kontan Zeova. I ti apel Noe. I ti annan en madanm ek trwa garson. Son trwa garson ti apel Senm, Kam ek Zafet e zot tou le trwa ti annan zot madanm. Zeova ti demann Noe pour fer en gran lars pour ki li ek son fanmir i sirviv pandan Deliz. En lars i parey en gro kof an bwa ki kapab flote lo delo. Zeova ti osi demann Noe pour anmenn en kantite zannimo dan lars, pour ki zot osi zot pa ganny detrir.

Deswit Noe ti konmans konstri lars. I ti pran apepre 50 an pour Noe ek son fanmir konstri sa lars. Zot ti konstri sa lars egzakteman parey Zeova ti’n demann zot pour fer. Pandan sa letan, Noe ti osi dir bann dimoun ki i ti pou annan en deliz. Me personn pa ti ekout li.

Finalman, i ti’n ariv ler pour antre dan lars. Annou vwar ki ti arive apre.