PWEN 11

Lantouzyazm

Romen 12:11

KI OU BEZWEN FER: Fer en prezantasyon ki vivan e ki motiv lodyans par koz avek konviksyon.

Apresye sa ki ou pe al koz lo la. Ler ou pe met ou pare pour fer ou prezantasyon, reflesir lo lenportans ou mesaz. Konn byen ou lenformasyon pour ki ou kapab koz avek konviksyon.
Mazin ou lodyans. Reflesir lo ki mannyer sa lenformasyon ki ou pou lir oubyen ansennyen pour benefisye lezot. Reflesir lo diferan fason ki ou kapab prezant sa lenformasyon pour ki ou lodyans i vreman apresye li.
Fer ou diskour vivan. Koz avek konviksyon. Ou santiman i devret evidan lo ou figir e atraver bann zes natirel.

Fer atansyon pour pa fer menm kalite zes plizyer fwa akoz i kapab vin en manni. Fer bann zes ki fer sans. Demontre lantouzyazm sirtou ler ou pe koz lo bann pwen enportan e ou anvi motiv ou lodyans pour azir. Si ou demontre tro bokou lantouzyazm tou dilon ou prezantasyon, sa pou fatig ou lodyans.