Latour Babel

Apre Deliz, bann garson Noe ek zot madanm ti ganny en kantite zanfan. Zot fanmir ti vin pli gran e zot ti konmans al reste dan diferan landrwa lo later, zis parey Zeova ti’n demann zot.

Me serten fanmir pa ti obeir Zeova. Zot ti dir: ‘Annou konstri en lavil e reste lanmenm. Nou pou fer en latour ki sitan gran ki son bout anler pou ariv dan lesyel. Koumsa tou dimoun pou konn nou.’

Zeova pa ti kontan sa ki sa bann dimoun ti pe mazin fer, alor i ti deside anpes zot. Ou konnen ki mannyer i ti fer sa? I ti fer zot konmans koz diferan langaz en sel kou. Vi ki zot ti nepli konpran kanmarad, zot ti aret sa travay konstriksyon. Sa lavil ki zot ti pe konstri ti ganny apele Babel, ki vedir “Konfizyon.” Dimoun ti konmans kit sa landrwa e al reste dan lezot landrwa lo later. Me zot ti kontinyen fer bann move keksoz partou kot zot ti ale. Eski i ti ankor annan dimoun ki kontan Zeova? Nou pou vwar sa dan lot sapit.