Our ti en lavil ki pa ti tro lwen avek Babel. Laba, dimoun pa ti ador zis Zeova, me zot ti ador en kantite lezot bondye. Me dan lavil Our, i ti annan en zonm ti ador zis Zeova. I ti apel Abraam.

Zeova ti dir Abraam: ‘Kit ou lakaz ek ou fanmir e al dan sa pei ki mon pou montre ou.’ Apre Bondye ti promet li: ‘Ou pou vin en gran nasyon e mon pou fer bann bon keksoz pour en kantite dimoun partou lo later akoz ou.’

Abraam pa ti konnen kote Zeova ti pe anvoy li, me i ti annan konfyans dan Zeova. Alor Abraam, son madanm Sara, son papa Tera ek son neve Lot ti obeir, anmas zot bann zafer e konmans zot gran vwayaz.

Abraam ti annan 75 an ler li ek son fanmir ti finalman ariv dan sa pei ki Zeova ti oule donn zot. Sa pei ti apel Kanaan. Laba, Bondye ti koz avek Abraam e i ti fer sa promes: ‘Sa pei ki ou vwar, mon pou donn ou bann zanfan.’ Me Abraam ek Sara ti aze e zot ti napa zanfan. Alor, ki mannyer Zeova ti pou akonpli son promes?

Abraam ek Sara in marye pour en kantite lannen. Zot ti’n kit zot lakour konfortab Our e zot ti pe reste anba lantant. Me Sara pa ti konplent akoz i ti annan konfyans dan Zeova.

Sara ti sitan anvi en zanfan ki i ti dir Abraam: ‘Si mon servant Agar i ganny en zanfan, i pou konmsi i pour mwan menm.’ Avek letan, Agar ti ganny en garson. I ti apel li Ismael.

En kantite letan pli tar, trwa viziter ti vin kot zot. Abraam ti annan 99 an e Sara ti annan 89 an. Abraam ti envit zot pour repoz anba en pye dibwa e pour pran en repa avek zot. Ou konnen lekel sa bann viziter? Zot ti bann lanz! Zot ti dir Abraam: ‘Lannen prosenn sa menm letan, ou ek ou madanm pou ganny en garson.’ Sara ti dan latant e i ti pe ekoute. Ler i ti tann sa, i ti riy tousel e dir: ‘Eski i posib pour mwan ganny en zanfan menm si mon sitan vye?’

Son lannen answit, Sara ti ganny en pti garson zis parey lanz Zeova ti’n promet li. Abraam ti apel li Izaak, ki vedir “Riye.”

En zour, ler Izaak ti annan apepre 5 an, Sara ti vwar Ismael pe boufonn Izaak. Sara ti anvi protez son garson, alor i ti al demann Abraam pour pous Agar ek Ismael. Premye kou Abraam pa ti oule fer sa. Me Zeova ti dir Abraam: ‘Ekout Sara. Mon pou pran swen avek Ismael. Me se atraver Izaak ki mon promes pou vin vre.’