Izaak ti annan 40 an ler i ti marye avek Rebeka. I ti kontan li en kantite. Apre zot ti ganny de garson ansanm.

Sa premye garson ti Ezai e sa dezyenm, Zakob. Ezai ti kontan al dan bwa pour al lasas zannimo. Me Zakob ti kontan reste kot lakour.

Sa letan, premye garson ti ganny plis larzan ek en pli gran bout later ler son papa ti mor. Se sa ki apel en leritaz. Dan fanmir Izaak, leritaz ti osi enkli bann promes ki Zeova ti’n fer avek Abraam. Ezai pa ti tro enterese avek sa bann promes me Zakob ti konnen ki zot ti vreman enportan.

En zour, apre ki Ezai ti’n al lasas, i ti retournen byen fatige. I ti santi loder sa bon manze ki Zakob ti pe kwi e i ti dir: ‘Mon pe mor lafen! Donn mwan en pe ou styou!’ Zakob ti dir: ‘Mon pou donn ou, me promet mwan avan ki mon pou ganny ou leritaz.’ Ezai ti dir: ‘Mon pa enterese avek mon leritaz! Ou kapab pran pour ou. Mon zis anvi manze.’ Ou krwar sa ki Ezai ti fer i byen? Non! Leritaz Ezai ti annan plis valer ki en bol manze.

Ler Izaak ti vreman aze, i ti pare pour li beni son premye garson. Me Rebeka ti ed Zakob, sa enn pli zenn pour ganny sa benediksyon. Ler Ezai ti konnen, i ti vreman ankoler e i ti anvi touy son frer. Izaak ek Rebeka ti anvi protez Zakob, alor zot ti dir li: ‘Al reste kot Labann, frer ou manman, ziska ler ou frer i aret ankoler. Zakob ti ekout konsey son paran e i ti sove.

Zeova ti promet Zakob ki i ti pou protez li zis parey i ti protez Abraam ek Izaak. Zakob ti al reste dan en landrwa ki apel Arann. Laba i ti marye e i ti ganny en gran fanmir. I ti vin vreman ris.

Apre Zeova ti dir Zakob: ‘Retourn dan ou pei.’ Alor Zakob ek son fanmir ti konmans sa gran vwayaz pour retourn dan son pei. Dan semen, dimoun ti vin dir Zakob: ‘Ou frer Ezai pe vin avek 400 zonm!’ Zakob ti per pangar Ezai ti anvi fer li ek son fanmir ditor. I ti priy Zeova: ‘Silvouple sov mwan dan lanmen mon frer.’ Son lannmen, Zakob ti fer kado en kantite mouton, kabri, bef, samo ek bourik son frer Ezai.

Sa zour swar, ler Zakob ti tousel, i ti vwar en lanz! Sa lanz ti konmans lalit avek li. Zot ti lalit ziska granmaten. Menm si Zakob ti ganny dimal, i pa ti bes lebra. Sa lanz ti dir: ‘Les mwan ale.’ Me Zakob ti dir: ‘Fodre ou beni mwan avan.’

Finalman sa lanz ti beni Zakob. Alor Zakob ti konnen ki Zeova pa ti pou les Ezai fer li ditor.

Sa zour bomaten, Zakob ti vwar Ezai ek son 400 zonm pe vini dan lwen. Zakob ti pas par devan son fanmir e i ti tonm azenou devan son frer set fwa. Ezai ti tay kot Zakob e i ti may li. Sa de frer ti konmans plere e zot ti fer lape. Ki mannyer ou krwar Zeova ti santi ler i ti vwar lafason ki Zakob ti fer fas avek sa sityasyon?

Pli tar, Ezai ti retourn kot son lakour e Zakob osi. An tou, Zakob ti annan 12 garson. Zot ti apel Ribenn, Simeon, Levi, Zida, Dann, Naftali, Gad, Aser, Isakar, Zeboulonn, Zozef ek Benzamen. Zeova ti servi Zozef pour sov Son pep. Ou konnen ki mannyer sa ti arive? Annou gete.