Dan pei Ouz, i ti annan en zonm ki ti ador Zeova. I ti apel Zob. I ti vreman ris e i ti annan en gran fanmir. I ti en bon dimoun e i ti kontan ed bann pov, bann madanm ki zot msye in mor e bann zanfan ki napa paran. Me vi ki Zob ti fer sa ki byen, eski savedir i pa ti pou zanmen ganny okenn problenm?

Zob pa ti konnen, me Satan ti pe vey li. Zeova ti dir Satan: ‘Eski ou vwar mon serviter Zob? Napa personn parey li lo later. I ekout mwan e i fer sa ki byen.’ Satan ti reponn: ‘Byensir Zob i obeir ou. Ou protez li e beni li. Ou’n donn li later ek zannimo. Pran tousala avek li e i pou aret ador ou.’ Zeova ti dir: ‘Ou kapab teste Zob. Me ou napa drwa touy li.’ Akoz Zeova ti les Satan teste Zob? Parski i ti asire ki Zob ti pou reste fidel.

Satan ti servi diferan maler pour teste Zob. Premyerman, Satan ti fer bann dimoun Sabeen vol bef ek bourik Zob. Apre dife ti touy tou bann mouton Zob. Dimoun Kaldeen ti vol son bann samo. Son bann serviter ki ti pe vey sa bann zannimo ti ganny touye. Apre sa, pli gran maler ti arive. Tou bann zanfan Zob ti mor ler sa lakaz kot zot ti pe fete ti tonm lo zot. Zob ti vreman tris, me i pa ti aret ador Zeova.

Satan ti anvi fer Zob soufer plis ankor. Alor, i ti fer li ganny en ta gro klou partou lo son lekor. Zob ti dan en kantite douler. I pa ti pe konpran akoz tou sa bann keksoz ti pe ariv li. Kantmenm sa, Zob pa ti aret ador Zeova. Bondye ti vwar tousala e i ti vreman kontan ki Zob ti reste fidel.

Apre, Satan ti anvoy trwa zonm pour teste Zob. Zot ti dir li: ‘Manke ou’n fer pese e ou pe esey kasyet. Prezan Bondye pe pini ou.’ Zob ti dir: ‘Mon pa’n fer nanryen mal.’ Me apre sa, Zob ti konmans krwar ki Zeova ki ti pe fer li ganny tou sa bann problenm. I ti dir ki Bondye ti pe azir dan en fason enzis anver li.

En zenn onm ki apel Eliou ti pe ekout sa ki zot ti pe dir. Apre i ti dir: ‘Tou sa ki zot in dir i mal. Zeova i pli gran ki sa ki nou kapab konpran. I pa pou zanmen fer okenn keksoz mal. I vwar tou keksoz e i ed dimoun ki dan problenm.’

Apre, Zeova ti koz avek Zob. I ti dir li: ‘Kot ou ti ete ler mon ti fer lesyel ek later? Akoz ou dir mon enzis? Ou koze, me ou pa konnen ki’n arive.’ Zob ti aksepte ki i ti mal e i ti dir: ‘Mon’n fer en fot. Mon ti’n tann koz lo ou me la mon vreman konn ou. Napa nanryen ki enposib pour ou. Pardonn mwan pour sa ki mon’n dir.’

Apre sa, Zeova ti fer Zob revin byen e i ti donn li bokou plis keksoz ki avan. Zob ti viv lontan e ere. Zeova ti beni Zob akoz i ti obeir li menm si i pa ti fasil. Eski ou parey Zob? Eski ou pou kontinyen ador Zeova menm si i difisil?

Laba Lezip, dimoun ti konn fanmir Zakob konman bann Izraelit. Apre lanmor Zakob ek Zozef, en nouvo Faraon ti konmans dirize. I ti per pangar bann Izraelit ti vin pli for ki bann Ezipsyen. Alor, i ti fer bann Izraelit vin lesklav. I ti fors zot pour fer bann blok e pour travay dir dan plantasyon. Me pli bann Ezipsyen ti fors zot pour travay, pli lakantite zot ti ogmante. Vi ki Faraon pa ti kontan sa, i ti donn lord pour ki tou bann pti garson Izraelit i ganny touye ler zot ne. Ou kapab mazinen ki mannyer bann Izraelit ti bezwen per?

En madanm Izraelit ki ti apel Zokebed ti ganny en zoli pti garson. Pour protez li, i ti met li dan en pannyen e kasyet li dan bann gran zerb dan Larivyer Nil. Miriyam, ser sa pti baba ti reste o bor pour vwar ki ti pou arive.

Ler fiy Faraon ti vin bennyen dan larivyer, i ti vwar sa pannyen. I ti vwar en pti baba pe plere dan sa pannyen e sa pti baba ti fer lapenn. Son ser Miriyam ti demande: ‘Ou ti a kontan mon al rod en madanm ki kapab pran swen avek sa pti baba pour ou?’ Ler fiy Faraon ti dir wi, Miriyam ti anmenn son manman Zokebed. Fiy Faraon ti dir: ‘Pran sa pti baba, pran swen avek li pour mwan e mon ava pey ou.’

Ler sa zanfan ti vin pli gran, Zokebed ti anmenn li kot fiy Faraon. Fiy Faraon ti apel li Moiz e i ti elve li konmsi i ti son prop garson. Moiz ti grandi parey en prens e i ti ganny tou sa ki i ti anvi. Me Moiz pa ti zanmen oubliy Zeova. I ti konnen ki i pa ti en Ezipsyen me i ti en Izraelit. I ti swazir pour servi Zeova.

A laz 40 an, Moiz ti deside pour ed son pep. Ler i ti vwar en Ezipsyen pe bat en lesklav Izraelit, Moiz ti tap sa Ezipsyen sitan for ki i ti touy li. Moiz ti kasyet lekor sa zonm dan disab. Ler Faraon ti tann sa, i ti esey touy Moiz. Me Moiz ti sove e kit Lezip. I ti al reste dan pei Madyann e Zeova ti pran swen avek li laba.