Moiz ti reste Madyann pour 40 an. I ti marye e annan zanfan. En zour, ler Moiz ti pe pran swen avek son bann mouton o bor Montanny Sinai, i ti vwar en keksoz ekstraordiner. I ti vwar dife dan en brousay me sa brousay pa ti pe brile! Ler Moiz ti koste pli pre pour vwar akoz, i ti tann en lavwa sorti dan brousay dir: ‘Moiz! Pa bezwen vin pli pros. Tir ou sandalet, akoz ou pe debout lo en later sen.’ Zeova ki ti pe koze atraver en lanz.

Moiz ti per, alor i ti kouver son figir. Sa lavwa ti dir: ‘Mon’n vwar soufrans bann Izraelit. Mon pou delivre zot e anmenn zot dan en bon pei. Ou ki pou gid mon pep pour kit Lezip.’ Ou krwar ki Moiz ti sirprann?

Moiz ti demande: ‘Ki mon pou dir ler dimoun i demann mwan lekel ki’n anvoy mwan?’ Bondye ti reponn: ‘Dir zot ki Zeova, Bondye Abraam, Bondye Izaak e Bondye Zakob ki’n anvoy ou.’ Apre Moiz ti dir: ‘Me si bann dimoun pa ekout mwan?’ Zeova ti donn Moiz laprev pour montre ki I ti pou ed li. I ti demann Moiz pour zet son baton ater e sa baton ti vin en serpan! Ler Moiz ti atrap lake sa serpan, i ti revin en baton. Zeova ti dir: ‘Ler ou fer sa mirak, i pou montre ki se mwan ki’n anvoy ou.’

Moiz ti dir: ‘Mon pa tro konn koze.’ Me Zeova ti promet li: ‘Mon pou dir ou ki pour dir.’ Vi ki i ti konnen ki Zeova i avek li, Moiz ti retourn Lezip avek son madanm ek son bann garson.

Bann Izraelit ti ganny forse pour travay dir konman lesklav. Zeova ti anvoy Moiz ek Aaron pour dir Faraon: ‘Les mon pep ale pour ki zot kapab ador mwan dan dezer.’ Byen arogan, Faraon ti dir: ‘Mon pa enterese avek sa ki Zeova i dir e mon pa pou les bann Izraelit ale.’ Apre sa, Faraon ti fer zot travay pli dir ankor. Zeova ti donn Faraon en leson. Ou konnen ki mannyer i ti fer sa? I ti anmenn Dis Fleo lo Lezip. Zeova ti dir Moiz: ‘Faraon pa oule ekout mwan. Bomaten i pou kot Larivyer Nil. Al kot li e dir li ki tou sa delo dan Larivyer Nil pou vin disan akoz i pa pe les mon pep ale.’ Moiz ti obeir e i ti al kot Faraon. Faraon ti pe gete ler Aaron ti tap delo dan Larivyer Nil avek son baton e sa delo ti vin disan. Larivyer ti konmans pi, pwason ti mor e i ti nepli annan delo pour bwar. Kantmenm sa, Faraon pa ti les bann Izraelit ale.

Set zour pli tar, Zeova ti anvoy Moiz kot Faraon ankor en fwa pour dir li: ‘Si ou pa les mon pep ale, Lezip pou ranpli avek grenwir.’ Faraon pa ti anvi les bann Izraelit ale, alor Aaron ti lev son baton anler e i ti konmans annan grenwir partou dan pei. Grenwir ti partou kote dan lakaz, lo lili e dan zot bol. I ti annan grenwir partou! Faraon ti demann Moiz pour sipliy Zeova pour aret sa fleo. Faraon ti promet pour les bann Izraelit ale. Alor Zeova ti aret sa fleo e bann Ezipsyen ti anmas bann grenwir mor e met zot an ta. Sa pei ti konmans pi. Me kantmenm sa, Faraon pa ti les bann Izraelit ale.

Alor, Zeova ti dir Moiz: ‘Aaron i devret tap son baton ater e lapousyer pou vin moustik.’ Deswit i ti annan moustik partou. Serten Ezipsyen ti dir Faraon: ‘Sa fleo i sorti kot Bondye.’ Me kantmenm sa, Faraon pa ti les bann Izraelit ale.