Moiz ek Aaron ti al dir Faraon sa ki Bondye ti dir: ‘Si ou pa les mon pep ale, mon pou anvoy bann gro mous dan pei.’ Bann gro mous ti partou kote dan lakaz bann Ezipsyen, ris konman pov. Pei antye ti ranpli avek mous. Me i ti napa mous dan rezyon Gosenn kot bann Izraelit ti reste. Konmansman sa katriyenm fleo, bann fleo ti afekte zis bann Ezipsyen. Faraon ti dir: ‘Sipliy Zeova pour tir sa bann mous. Ou pep i kapab ale.’ Me ler Zeova ti tir bann mous, Faraon ti sanz son nide. Eski Faraon pou aprann son leson en zour?

Zeova ti dir: ‘Si Faraon pa les mon pep ale, zannimo bann Ezipsyen pou malad e mor.’ Son lannmen, bann zannimo ti konmans mor. Me zannimo bann Izraelit pa ti mor. Kantmenm sa, Faraon ti antete e i pa ti les bann Izraelit ale.

Apre, Zeova ti demann Moiz pour retourn kot Faraon e anvoy lasann anler. Sa lasann ti vin lapousyer dan ler e i ti tonm lo tou bann Ezipsyen. Sa lapousyer ti fer tou bann Ezipsyen ek zot zannimo ganny bann gro klou partou lo zot. Kantmenm sa, Faraon pa ti les bann Izraelit ale.

Zeova ti demann Moiz pour retourn kot Faraon avek sa mesaz: ‘Ou ankor pe refize les mon pep ale? Demen lagrel pou tonm lo Lezip.’ Son lannmen, Zeova ti anvoy lagrel, loraz ek dife. I ti sa pli movetan ki Lezip ti’n deza gannyen. Tou bann pye dibwa ek plantasyon ti ganny afekte apard ki rezyon Gosenn. Faraon ti dir: ‘Sipliy Zeova pour fer sa arete! Apre sa, zot kapab ale.’ Me de ki sa lagrel ek lapli ti arete, Faraon ti sanz son nide.

Alor Moiz ti dir: ‘La, bann sotrel pou manz tou bann plant ki lagrel pa’n detrir.’ En kantite sotrel ti manz tou sa ki ti reste dan plantasyon e lo pye dibwa. Faraon ti dir: ‘Sipliy Zeova pour fer sa bann sotrel ale.’ Me apre ki Zeova ti’n fer bann sotrel ale, Faraon ti antete menm.

Zeova ti dir Moiz: ‘Lev ou lanmen anler.’ Deswit i ti fernwanr. Pour trwa zour, bann Ezipsyen pa ti kapab vwar nanryen ni okenn dimoun. Zis kot bann Izraelit ti reste ki i ti annan lalimyer.

Faraon ti dir Moiz: ‘Ou ek ou pep i kapab ale. Zis kit zot bann zannimo isi.’ Moiz ti dir: ‘Nou bezwen nou bann zannimo, pour ki nou kapab ofer zot avek nou Bondye.’ Faraon ti vreman ankoler. I ti kriye: ‘Sorti la devan mwan! Si mon vwar ou ankor, mon pou touy ou.’

Moiz ti dir Faraon ki i pa pou vin vwar li ankor. Me avan i ti ale, i ti dir Faraon: ‘Minwi, tou bann premye ne Lezip, ki swa garson Faraon oubyen garson lesklav pou mor.’

Zeova ti demann bann Izraelit pour fer en repa spesyal. I ti dir: ‘Touy en mal mouton oubyen kabri ki annan enn an e met en pe son disan lo lankadreman laport. Roti sa lavyann e manz li ansanm avek dipen san lelven. Sanze e met zot sandalet, met zot pare pour ale. Tanto mon pou liber zot.’ Bann Izraelit ti bezwen vreman eksite, pa i vre?

Dan milye lannwit, lanz Zeova ti pas kot tou lakaz Lezip. Bann premye ne ti mor kot bann lakaz ki ti napa disan lo lankadreman laport. Me lanz ti sot bann lakaz kot i ti annan disan lo lankadreman laport. Tou fanmir Ezipsyen, ki swa ris oubyen pov ti perdi en garson. Me napa ni en zanfan Izraelit ki ti mor.

Menm garson Faraon ti mor. Faraon ti’n ganny ase. Deswit i ti dir Moiz ek Aaron: ‘Leve! Sorti la. Al ador zot Bondye. Al avek zot zannimo!’

Sa zour swar, i ti plennlin e bann Izraelit ti kit Lezip dan lord, dapre fanmir ek tribi. I ti annan apepre 600,000 zonm Izraelit ek en kantite madanm ek zanfan. I ti annan dimoun lezot nasyon osi ki ti al avek zot pour ador Bondye. Alafendefen bann Izraelit ti lib!

Pour zot rapel ki mannyer Zeova ti sov zot, zot ti bezwen pran sa menm repa spesyal tou le lannen. I ti ganny apele Lapak ki vedir pas par lao.