Zeova ti dir Moiz: ‘Mont kot mwan lo montanny. Mon pou ekri mon bann lalwa lo bann plak ros e donn ou.’ Moiz ti mont lo montanny e i ti reste laba pour 40 zour ek 40 lannwit. Ler i ti laba, Zeova ti ekri Dis Komannman lo de plak ros e i ti donn Moiz sa de plak ros.

Apre en pe letan, bann Izraelit ti krwar ki Moiz ti’n abandonn zot. Zot ti dir Aaron: ‘Nou bezwen en dimoun pour gid nou. Fer en bondye pour nou!’ Aaron ti dir: ‘Donn mwan zot lor.’ I ti fer fonn sa lor e i ti fer en pti bef annor. Bann dimoun ti dir: ‘Sa pti bef i nou Bondye ki’n tir nou Lezip!’ Zot ti konmans ador sa pti bef annor e zot ti fete. Eski i ti mal pour zot fer sa? Wi, parski zot ti’n promet pour ador zis Zeova. Me la zot ti pe kas sa promes.

Zeova ti vwar ki ti pe arive e i ti dir Moiz: ‘Desann e retourn kot sa pep. Zot pe dezobeir mwan e ador en fo bondye.’ Moiz ti desann lo montanny avek sa de plak ros.

Ler i ti pros pour ariv kot kan, Moiz ti tann bann dimoun pe sante. Apre i ti vwar zot pe danse e tonm azenou devan sa pti bef. Moiz ti vreman ankoler. I ti zet sa de plak ros ater e zot ti kas an morso. Deswit i ti kraz sa stati. Apre i ti demann Aaron: ‘Ki mannyer bann dimoun in fer ou fer en keksoz sitan mal koumsa?’ Aaron ti dir: ‘Pa bezwen ankoler. Ou konn byen ki mannyer sa bann dimoun i ete. Zot ti anvi en bondye, alor mon ti zet zot lor dan dife e sa pti bef ti sorti!’ Aaron pa ti’n devret fer sa. Moiz ti remont lo montanny e sipliy Zeova pour pardonn bann dimoun.

Zeova ti pardonn bann ki ti pare pour obeir li. Eski ou konpran akoz i ti enportan pour bann Izraelit les Moiz gid zot?

Ler Moiz ti lo Montanny Sinai, Zeova ti demann li pour fer en latant spesyal ki apel en tabernak, kot bann Izraelit ti pou kapab ador Li. Zot ti kapab anmenn sa latant avek zot kot zot ti ale.

Zeova ti dir: ‘Demann lepep pour donn sa ki zot kapab pour fer sa latant.’ Bann Izraelit ti donn lor, larzan, kwiv, bann pyer presye ek bizou. Zot ti osi donn lalenn, linenn, lapo zannimo ek lezot keksoz ankor. Zot ti donn sitan en kantite keksoz ki Moiz ti dir zot: ‘Nou’n ganny ase materyo! Pa bezwen anmenn ankor.’

En kantite zonm ek fanm kalifye ti ede konstri latant. Zeova ti ed zot pour vin byen malen pour fer sa travay. Serten dimoun ti fer difil, latwal oubyen brode. Lezot ankor ti prepar bann ros, lor oubyen dibwa.

Bann dimoun ti fer sa latant zis parey Zeova ti’n dir zot. Zot ti fer en zoli rido pour separ sa latant an de. En kote ti apel Sen e sa lot kote Tre Sen. Dan landrwa Tre Sen, i ti annan lars lalyans, ki ti ganny fer avek dibwa akasya ek lor. Dan landrwa Sen, i ti annan en lalanp annor, en latab e osi en lotel pour bril lansan. Dan lakour toultour sa latant, i ti annan en basen an kwiv ek en gran lotel. Sa lars lalyans ti fer bann Izraelit rapel ki zot ti promet pour obeir Zeova. Eski ou konnen kisisa en lalyans? En lalyans i en promes spesyal.

Zeova ti swazir Aaron ek son bann garson pour travay dan sa latant konman bann pret. Zot ti bezwen pran byen swen avek sa landrwa e ofer bann sakrifis pour Zeova. Zis granpret Aaron ki ti annan drwa antre dan Tre Sen. I ti fer sa en fwa par lannen pour ofer sakrifis pour son pese, pese son fanmir ek pese nasyon Izrael.

Bann Izraelit ti fini konstri sa latant oubyen tabernak enn an apre ki zot ti’n kit Lezip. Aprezan zot ti annan en landrwa pour ador Zeova.

Zeova ti ranpli sa latant avek son laglwar e i ti fer en nyaz aparet par lao sa latant. Tan ki sa nyaz ti reste par lao latant, bann Izraelit ti reste lanmenm. Me ler sa nyaz ti bouze, zot ti konnen ki i ti’n ariv ler pour zot deplase. Zot ti demont sa latant e swiv sa nyaz.