Bann Izraelit ti kit Montanny Sinai e travers dezer Parann ziska en landrwa ki apel Kades. Laba Zeova ti dir Moiz: ‘Anvoy 12 zonm, enn sorti dan sak tribi, pour espyonn Kanaan, sa pei ki mon pou donn bann Izraelit.’ Alor Moiz ti swazir 12 zonm e dir zot: ‘Al Kanaan e gete si later i bon pour plante. Gete si bann dimoun i for oubyen fay e si zot reste dan latant oubyen dan lavil.’ Alor sa 12 espyon, enkli Zozye ek Kaleb ti al Kanaan.

Apre 40 zour, bann espyon ti retournen. Zot ti anmenn fig, grenad ek rezen. Bann espyon ti dir: ‘I en bon pei, me bann dimoun i for e zot annan lavil antoure avek bann gran miray.’ Kaleb ti dir: ‘Nou kapab pran sa pei. Annou ale deswit!’ Ou konnen akoz Kaleb ti dir sa? Akoz li ek Zozye ti annan konfyans dan Zeova. Me sa dis lezot espyon ti dir: ‘Non! Sa bann dimoun i gran parey zean! Nou nou parey bann kasbol o bor zot.’

Bann Izraelit ti dekouraze. Zot ti konmans konplent e dir kanmarad: ‘Annou rod en lot sef e nou ava retourn Lezip. Akfer nou bezwen al laba pour nou ganny touye?’ Zozye ek Kaleb ti dir: ‘Pa bezwen per e dezobeir Zeova. Zeova pou protez nou.’ Me bann Izraelit pa ti ekoute. Zot ti menm anvi touy Zozye ek Kaleb!

Ki Zeova ti fer? I ti dir Moiz: ‘Apre tou sa ki mon’n fer pour zot, kantmenm sa zot pa oule obeir mwan! Alor, zot pou reste dan dezer pour 40 an e zot pou mor lanmenm. Zis zot zanfan, Zozye ek Kaleb ki pou al reste dan sa pei ki mon’n promet pour donn zot.’

Pli tar, ler bann Izraelit ti dan dezer, Kora, Datann, Abiram ek 250 lezot dimoun ti rebel kont Moiz. Zot ti dir li: ‘Nou’n ganny ase avek zot! Akoz ou ki bezwen diriz nou e ki Aaron i bezwen granpret? Zeova i avek nou tou, pa zis ou ek Aaron.’ Zeova pa ti kontan ditou. Pour li i ti konmsi zot ti pe rebel kont li!

Moiz ti dir Kora ek son bann siporter: ‘Vin kot latant ladorasyon demen e anmenn zot resipyan pour bril lansan. Zeova pou montre nou lekel ki i’n swazir.’

Lannmen, Kora ek sa 250 zonm ti al zwenn Moiz kot latant ladorasyon. Laba zot ti bril lansan konmsi zot ti pret. Zeova ti dir Moiz ek Aaron: ‘Separ zot avek Kora ek son bann zonm.’

Menm si Kora ti’n al zwenn Moiz kot latant ladorasyon, Datann, Abiram ek zot fanmir pa ti ale. Zeova ti demann bann Izraelit pour sorti o bor latant Kora, Datann ek Abiram. Deswit bann Izraelit ti dekoste. Datann, Abiram ek zot fanmir ti debout an deor zot latant. En sel kou, later ti ouver e anval zot! Kot latant ladorasyon, en dife ti sorti dan lesyel e bril Kora ek son 250 zonm.

Zeova ti dir Moiz: ‘Pran baton sak sef tribi e ekri son non lo la. Me lo baton tribi Levi, ekri non Aaron. Apre met sa bann baton dan latant ladorasyon. Baton sa enn ki mon’n swazir konman pret pou pous fler.’

Son lannmen, Moiz ti pran tou sa bann baton e i ti montre bann sef tribi. Fler ti pe pouse lo baton Aaron e i ti annan almonn mir lo la. Se dan sa fason, ki Zeova ti klerman montre ki i ti’n swazir Aaron pour vin granpret.