Ler sa de espyon ti al dan lavil Zeriko, zot ti reste kot lakaz en madanm ki apel Raab. Lerwa Zeriko ti tann sa nouvel e i ti anvoy bann solda kot lakaz Raab. Raab ti kasyet sa de espyon lo twa lakaz e anvoy bann solda dan en lot direksyon. I ti dir sa de espyon: ‘Mon pou ed zot akoz mon konnen ki Zeova i lo zot kote e zot pou pran sa pei. Silvouple promet mwan ki zot pou sov mon fanmir.’

Sa de espyon ti dir Raab: ‘Nou promet ki napa personn dan ou lakaz ki pou ganny dimal.’ Zot ti dir li: ‘Anmar en lakord rouz avek ou lafnet e ou fanmir pou ganny sove.’

Raab ti fer sa de espyon pas par lafnet e desann anba lo en lakord. Zot ti al dan montanny e kasyet pour trwa zour avan retourn kot Zozye. Apre, bann Izraelit ti travers Larivyer Zourden e met zot pare pour pran pei. Zot ti atak lavil Zeriko premye. Zeova ti demann zot pour fer letour lavil en fwa sak zour pour sis zour. Setyenm zour, zot ti fer letour set fwa. Apre bann pret ti soufle tronpet e bann solda ti kriye. Miray sa lavil ti grennen! Me lakaz Raab ki ti lo miray pa ti ganny kraze. Raab ek son fanmir ti ganny sove akoz zot ti annan konfyans dan Zeova.

Lezot nasyon Kanaan ti tann sa ki ti’n arive avek Zeriko. Zot lerwa ti deside pour zwenn ansanm pour lager kont bann Izraelit. Me bann Gibeonnit ti annan en lot plan. Zot ti met bann vye lenz lo zot e al kot Zozye. Zot ti dir: ‘Nou sorti dan en pei tre lwen. Nou’n tande konsernan Zeova e tou sa ki i’n fer pour zot Lezip ek Moab. Promet ki zot pa pou lager kont nou e nou pou vin zot serviter.’

Zozye ti krwar zot e i ti dakor pour pa lager avek zot. Trwa zour pli tar, Zozye ti tande ki zot pa ti sorti dan en pei tre lwen. Zot ti sorti Kanaan. Zozye ti demann bann Gibeonnit: ‘Akoz zot in koz manti avek nou?’ Zot ti reponn: ‘Nou ti per! Nou konnen ki Zeova zot Bondye pe lager pour zot. Silvouple pa bezwen touy nou.’ Zozye ti gard son promes e i pa ti touy zot.

Pa lontan apre, senk lerwa Kananeen ek zot larme ti anvi touy bann Gibeonnit. Zozye ek son larme ti marse tou lannwit pour vin sov zot. Son lannmen granmaten, bann Izraelit ti konmans lager avek bann Kananeen. Bann Kananeen ti konmans tay partou partou. Zeova ti anvoy bann gro lagrel lo zot partou kot zot ti ale. Apre Zozye ti demann Zeova pour fer soley pa bouze. Akoz Zozye ti demann Zeova pour fer soley pa bouze, en keksoz ki pa’n zanmen arive? Parski Zozye ti annan konfyans dan Zeova. Soley pa ti kouse ziska ler bann Izraelit ti ranport laviktwar lo bann lerwa Kananeen ek zot larme.