EN KONVERSASYON AVEK EN VWAZEN

Kan ki Rwayonm Bondye ti konmans dirize?​—Premye parti

Sa konversasyon ki swiv i enn ki Temwen Zeova i kapab gannyen avek en vwazen. Meton en Temwen ki apel Cameron in vin kot lakour en msye ki apel Jon.

“KONTINYEN ROD” KONPRENEZON

Cameron: Jon, mon vreman apresye nou pti diskisyon ki nou fer tanzantan lo Labib.a Dernyen fwa ki nou ti koze, ou ti demann en kestyon lo Rwayonm Bondye. Ou ti demande akoz Temwen Zeova i krwar ki Rwayonm Bondye ti konmans dirize an 1914.

Jon: Wi, mon ti pe lir enn zot bann piblikasyon e i dir ki Rwayonm Bondye in konmans dirize an 1914. Mon’n vwar sa drol akoz ou dir ki tou zot krwayans i baze lo Labib.

Cameron: Sanmenm.

Jon: Mon’n lir Labib me mon pa rapel en pasaz ki mansyonn lannen 1914. Alor, mon’n al fer resers lo lannen “1914” dan Labib lo Enternet, me ti napa okenn leksplikasyon.

Cameron: Jon, mon bezwen felisit ou pour de keksoz. Dabor, ou’n lir Labib an antye. Ou vreman bezwen kontan Parol Bondye.

Jon: Wi. Napa okenn liv ki parey Labib.

Cameron: Mon dakor avek ou. En lot keksoz ki mon ti a kontan felisit ou lo la, se ki ou’n al rod larepons ou kestyon dan Labib. Ou’n fer egzakteman sa ki Labib i ankouraz nou pour fer: “Kontinyen rod” konprenezon.b I byen ki ou pe fer bokou zefor.

Jon: Mersi. Mon vreman anvi aprann. Anfet, mon’n al fer en pe plis resers e mon’n trouv serten lenformasyon konsernan lannen 1914 dan sa liv ki nou pe etidye. Si mon pa tronpe, i mansyonn en rev ki en lerwa ti fer, kot en gro pye dibwa in ganny koupe e apre repouse.

Cameron: Ou annan rezon. Sa ti’n ganny rikorde dan Danyel sapit 4. I en rev ki Neboukadnetsar lerwa Babilonn ti fer.

Jon: Wi, sanmenm. Mon’n lir sa profesi plizyer fwa. Me fransman, mon pa vwar ki sa i annan pour fer avek Rwayonm Bondye oubyen lannen 1914.

Cameron: Anfet, Jon, menm profet Danyel pa ti konpran tou sa ki i ti’n ganny enspire pour ekri.

Jon: Vreman?

Cameron: Wi. La dan Danyel 12:8 i dir: “Me mwan, mon ti tande, me mon pa ti kapab konpran.”

Jon: Anr. Savedir pa zis mwan ki pa konpran.

Cameron: Pour dir ou laverite, Danyel pa ti konpran akoz i pa ti lemoman pour Bondye fer imen vreman konpran sinifikasyon bann profesi dan liv Danyel. Me aprezan, dan nou letan, nou kapab byen konpran sa bann profesi.

Jon: Akoz ou dir sa?

Cameron: Remarke sa ki ganny dir dan sa lot verse dan Danyel 12:9: “Sa bann parol i sekre e in ganny sele ziska letan lafen.” Alor sa bann profesi ti pou pli kler bokou letan pli tar, setadir pandan “letan lafen.” Parey nou pou vwar byento dan nou letid, tou levidans i montre ki nou pe aktyelman viv dan sa letan.c

Jon: Alor, eski ou kapab eksplik mwan profesi Danyel?

Cameron: Mon ava fer mon mye.

REV LERWA NEBOUKADNETSAR

Cameron: Pour konmanse, mon pou donn ou en pti apersi lo kwa ki Lerwa Neboukadnetsar ti vwar dan son rev. Apre nou ava koz lo son sinifikasyon.

Jon: Oke.

Cameron: Dan son rev, Lerwa Neboukadnetsar ti vwar en gro pye dibwa ki ti’n ariv ziska dan lesyel. Apre sa i ti tann mesaze Bondye pe donn lord pour koup sa pye dibwa. Par kont, Bondye ti dir ki son rasin i reste dan later. Apre en peryod “set letan,” sa pye dibwa pou repous ankor.d O konmansman, sa profesi ti aplik pour Lerwa Neboukadnetsar. Menm si i ti en lerwa enportan, parey sa pye dibwa ki ariv ziska dan lesyel, i ti pou ganny zet ater pour “set letan.” Eski ou rapel ki ti arive?

Jon: Non, mon pa rapel.

Cameron: I oke. Labib i montre ki Lerwa Neboukadnetsar ti perdi son lespri pour set an. Pandan sa letan, i pa ti kapab dirize konman lerwa. Me apre sa set letan, Neboukadnetsar ti reganny son lespri e i ti konmans dirize ankor.e

Jon: Oke, ziska prezan mon konpran. Me ki tousala i annan pour fer avek Rwayonm Bondye ek lannen 1914?

Cameron: An bref, sa profesi i annan de lakonplisman. Premye ti ler renny Lerwa Neboukadnetsar ti ganny enteronpe. Dezyenm ti ler dominasyon Bondye ti ganny enteronpe. Alor sa dezyenm lakonplisman ki relye avek Rwayonm Bondye.

Jon: Ki mannyer ou konnen sa profesi i annan en dezyenm lakonplisman ki relye avek Rwayonm Bondye?

Cameron: Premyerman, nou vwar en lendikasyon dan sa profesi li menm. Dapre Danyel 4:17, sa profesi in ganny donnen “pour ki dimoun i kapab konnen ki sa enn Tre O i Sef dan rwayonm bann imen e i donn drwa pour dirize avek nenport ki, ki i anvi.” Eski ou’n remark sa lekspresyon “rwayonm bann imen”?

Jon: Wi, i dir “ki sa enn Tre O i Sef dan rwayonm bann imen.”

Cameron: Egzakteman. Dapre ou lekel ki ou krwar i “sa enn Tre O”?

Jon: Mon mazinen i pe koz lo Bondye non!

Cameron: Sanmenm. Alor sa i montre nou ki sa profesi pa ti zis selman lo Neboukadnetsar. I osi enkli “rwayonm bann imen” setadir dominasyon Bondye lo limanite. Sa i fer sans ler nou get konteks sa profesi.

Jon: Ki oule dir par sa?

TENM PRESIPAL SA LIV

Cameron: Plizyer fwa liv Danyel dan Labib i koz lo menm topik. I kontinyen met lanfaz lo ler Rwayonm Bondye i ganny etablir anba dominasyon son garson Zezi Kri. Par egzanp, annou retourn dan detrwa sapit avan. Eski ou kapab lir Danyel 2:44 silvouple?

Jon: Oke. I dir: “Dan bann zour sa bann lerwa, Bondye lesyel pou etabli en rwayonm ki pa pou zanmen ganny detrir. Sa rwayonm li menm pa pou pas avek okenn lezot pep. I pou kraz e met en lafen avek tou sa bann rwayonm e li menm i pou dire pour touzour.”

Cameron: Mersi. Eski ou krwar ki sa bann verse pe refer avek Rwayonm Bondye?

Jon: Mmm. Mon pa asire.

Cameron: Bon, remarke ki i dir ki sa Rwayonm “pour dire pour touzour.” Sa i leka pour Rwayonm Bondye, me eski nou kapab dir menm keksoz lo okenn gouvernman imen?

Jon: Non, mon krwar pa.

Cameron: La en lot profesi dan liv Danyel ki met lanfaz lo Rwayonm Bondye. I dan Danyel 7:13, 14. Konsernan en fitir dirizan, sa profesi i dir: “I ti ganny dominasyon, dinyite ek Rwayonm, pour ki bann pep, kominote nasyonal ek bann langaz, zot tou zot devret servi li. Son dominasyon i en dominasyon ki pou dire, ki pa pou fini e son Rwayonm i enn ki pa pou ganny detri.” Eski i annan en keksoz dan sa profesi ki familye?

Jon: I mansyonn en Rwayonm.

Cameron: Wi. Me i pa nenport ki Rwayonm. Remarke ki i dir ki sa Rwayonm ti pou annan dominasyon lo “bann pep, kominote nasyonal e bann langaz.” Andotmo, sa Rwayonm pou domin lo lemonn antye.

Jon: Mon pa’n realize, me ou annan rezon. Sanmenm ki i dir.

Cameron: Gete ki sa profesi i osi dir: “Son dominasyon i en dominasyon ki pou dire, ki pa pou fini e son rwayonm i enn ki pa pou ganny detrir.” Sa i parey sa profesi ki nou fek lir dan Danyel 2:44, non?

Jon: Wi.

Cameron: Annou revwar en pti kou sa ki nou’n diskite ziska prezan. Sa profesi dan Danyel sapit 4 in ganny donnen pour ki dimoun i konnen ki sa “enn Tre O i Sef dan rwayonm bann imen.” Sa i endike ki sa profesi i annan en pli gran lakonplisman ki sa enn ki enplik Neboukadnetsar. Plizyer fwa dan liv Danyel, nou vwar bann profesi konsernan ler Rwayonm Bondye ti ganny etablir anba dominasyon son garson. Eski ou krwar ki i rezonnab pour konklir ki sa profesi dan Danyel sapit 4 i osi annan keksoz pour fer avek Rwayonm Bondye?

Jon: Mon krwar wi. Me mon pa ankor vwar ki konneksyon sa i annan avek 1914.

“LES LI KOUMSA POUR SET LETAN”

Cameron: Annou retourn lo Lerwa Neboukadnetsar. I ti ganny reprezante par sa pye dibwa dan premye lakonplisman sa profesi. Son dominasyon ti ganny enteronpe kan sa pye dibwa ti ganny koupe e ganny lese koumsa pour set letan, sa i kan Neboukadnetsar ti perdi lespri pour en pe letan. Sa peryod set letan ti fini kan Neboukadnetsar ti reganny son lespri e rekonmans dirize. Dan dezyenm lakonplisman sa profesi, dominasyon Bondye ti pou ganny enteronpe pour en peryod letan me pa akoz lafot Bondye.

Jon: Mon pa pe konpran ki ou pe dir la.

Cameron: Dan letan Labib, bann lerwa Izraelit ki ti dirize Zerizalenm ti konmsi zot ti pe asiz lo “tronn Zeova.”f Zot ti reprezant Bondye konman dirizan son pep. Alor kan sa bann lerwa ti dirize i ti konmsi Bondye ki ti pe dirize. Me avek letan, laplipar sa bann lerwa ti vin dezobeisan anver Bondye e laplipar dimoun ti fer parey. Akoz dezobeisans bann Izraelit, Bondye ti les bann Babilonnyen atak zot an 607 A.N.L. Apre sa ti napa okenn lerwa ki ti reprezant Zeova Zerizalenm. Alor dan sa fason, dominasyon Bondye ti ganny enteronpe. I kler pour ou?

Jon: Wi.

Cameron: Alor lannen 607 A.N.L. ti konmansman sa set letan, ouswa sa peryod letan kan dominasyon Bondye ti ganny enteronpe. A lafen sa set letan, Bondye ti pou apwent en nouvo dirizan pour reprezant Li, safwasi enn dan lesyel. Se la ki lezot profesi ki nou’n lir dan liv Danyel ti pou akonpli. Alor kestyon ki nou kapab demande se: Kan ki sa set letan ti fini? Si nou kapab reponn sa kestyon, nou pou konnen kan Rwayonm Bondye ti konmans dirize.

Jon: Mon konpran. Alors sa set letan ti fini an 1914?

Cameron: Egzakteman! Ou’n ganny li.

Jon: Be ki mannyer nou konn sa?

Cameron: Ler Zezi ti lo later, i ti endike ki sa set letan pa ti ankor fini.g Savedir sa ti bezwen en gran peryod letan. Sa set letan ti konmans plizyer santenn lannen avan ki Zezi ti vin lo later e i ti kontinyen ziska en pe letan apre ki Zezi ti retourn dan lesyel. Pa bliye, ki sinifikasyon bann profesi Danyel pa ti pou kler ziska “letan lafen.”h A lafen bann lannen 1800, bann etidyan Labib senser ti ganny motive pour byen egzamin sa profesi ek lezot ankor. Zot ti konmans konpran ki sa set letan ti pou fini an 1914. Deplis bann levennman enportan dan lemonn antye i konfirmen ki Rwayonm Bondye ti vreman konmans dirize dan lesyel an 1914. Sanmenm sa lannen ki nou ti antre dan bann dernyen zour oubyen letan lafen. Mon konnen ki sa i kapab bokou pour dizere . . .

Jon: Wi. Definitivman mon pou bezwen repas lo tousala pour konpran li byen.

Cameron: Pa trakase ou pou ganny li ou. Mwan osi i ti pran mon en pe letan pour konpran tou keksoz. Me, fotespere sa diskisyon in ed ou vwar ki krwayans Temwen Zeova konsernan Rwayonm i baze lo Labib.

Jon: Byensir. Mon’n toultan enpresyonnen par lafason ki zot krwayans i baze lo Labib.

Cameron: Mon remarke ki ou annan sa menm lentere. Parey mon’n dir sa i en kantite lenformasyon pour dizere. Petet ou ankor annan serten kestyon. Par egzanp, nou’n vwar ki mannyer sa set letan i relye avek Rwayonm Bondye e ki sa set letan ti konmans 607 A.N.L. Me ki mannyer nou asire ki sa set letan ti fini an 1914?i

Jon: Wi, mon ti pe mazin sanmenm.

Cameron: Labib li menm i ed nou pour konpran sa letan egzakt ki sa set letan ti pou dire. Eski ou ti pou kontan si nou egzamin sa topik la prosenn fwa ki mon pase?

Jon: Oke, mon ti pou kontan.

Eski ou annan bann kestyon lo serten topik lo Labib. Eski i annan keksoz ki ou ti a kontan konnen lo krwayans oubyen aktivite bann Temwen Zeova. Si i le ka pa ezite pour demann en Temwen Zeova. I pou kontan pour donn ou plis lenformasyon.

[Not anba lo paz]

Sa prosen lartik dan sa seri pou egzamin bann verse Labib ki pou ed nou konpran ki kantite letan sa pou dire.

EN KONVERSASYON AVEK EN VWAZEN

Kan ki Rwayonm Bondye ti konmans dirize?​—Dezyenm parti

Sa konversasyon ki swiv i enn ki Temwen Zeova i kapab gannyen avek en vwazen. Meton en Temwen ki apel Cameron in vin kot lakour en msye ki apel Jon.

EN PTI REZIMEN LO REV NEBOUKADNETSAR

Cameron: Mon byen kontan mon’n zwenn ou ankor, Jon. Mon apresye nou bann diskisyon lo Labib ki nou fer tou le semenn.a Konman ou sava?

Jon: Mon byen mersi.

Cameron: Me sa i byen. Dernyen fwa ki mon ti la, nou ti koz lo akoz Temwen Zeova i dir ki Rwayonm Bondye ti konmans dirize an 1914.b Anmezir ki nou ti diskite, nou ti trouv en levidans enportan dan sapit 4 liv profesi Danyel. Eski ou rapel ki ti’n ganny ekrir ladan?

Jon: I ti rev Lerwa Neboukadnetsar konsernan en gran pye dibwa.

Cameron: Wi, egzakteman. Dan son rev, Neboukadnetsar ti vwar en gran pye dibwa ki ti ariv ziska dan lesyel. I ti tann en mesaze Bondye donn lord ki sa pye dibwa i ganny koupe, me son siko e rasin ti pou ganny lese dan later. Apre en peryod “set letan,” sa pye dibwa ti pou repouse.c Nou ti osi diskite lo akoz sa profesi i annan de lakonplisman. Eski ou rapel son premye lakonplisman?

Jon: Sa i en keksoz ki ti ariv avek Neboukadnetsar li menm, non? I ti perdi lespri pour set an?

Cameron: Egzakteman. Pour en pe letan Neboukadnetsar ti perdi son lespri, alor son dominasyon ti ganny enteronpe. Me dan pli gran lakonplisman sa profesi, dan en fason, dominasyon Bondye ti pou ganny enteronpe pour en peryod set letan. Parey nou’n vwar, sa set letan ti konmanse ler Zerizalenm ti ganny detri en 607 A.N.L. Depi sa letan, i ti napa okenn lerwa lo later ki ti pe reprezant Zeova konman dirizan son pep. Par kont, apre sa set letan, Bondye ti pou apwent en nouvo dirizan pour son pep, safwasi enn dan lesyel. Andotmo, lafen sa set letan ti pou konmansman sa dominasyon Rwayonm Bondye dan lesyel. Bon, nou’n deza diskite kan sa set letan ti konmanse. Alor si nou kapab kalkil konbyen letan sa ti dire, nou pou konnen kan Rwayonm Bondye ti konmans dirize. Ou pe ganny mwan?

Jon: Wi wi, sa pti rezimen in vreman ed mwan pour rapel.

Cameron: Tre byen. Oke annou konmans nou diskisyon lo longer sa set letan. Mon’n fek fini lir en pe lo sa size pour ed mwan rapel sa bann pwen prensipal. Mon pou esey fer mon mye posib pour eksplik zot.

Jon: Oke.

SET LETAN I TERMINEN​—BANN DERNYEN ZOUR I KONMANSE

Cameron: Premye lakonplisman sa profesi konsernan Neboukadnetsar, sa set letan ti bezwen literalman vedir set lannen. Me dan sa pli gran lakonplisman konsernan Rwayonm Bondye, sa set letan i bezwen bokou plis ki set lannen literal.

Jon: Akoz ou dir sa?

Cameron: En rezon, mazinen ki sa set letan ti konmanse ler Zerizalenm ti ganny detri an 607 A.N.L. Si nou konmans konte depi sa lannen, set lannen literal ti pou anmenn nou ver lannen 600 A.N.L. Me okenn keksoz enportan konsernan dominasyon Bondye pa ti arive dan sa lannen. An plis, parey nou’n vwar avan, plizyer syek pli tar ler Zezi ti lo later, i ti montre ki sa set letan pa ti ankor fini.

Jon: Anrr. Mon rapel tousala prezan.

Cameron: Alor olye bann lannen literal, sa set letan i bezwen enplik en peryod letan ki pli long.

Jon: Ki grander peryod letan?

Cameron: Liv Revelasyon ki annan en lyen direk avek liv Danyel, i ed nou pour vwar egzakteman grander sa set letan. I montre ki en peryod trwa letan edmi i 1,260 zour.d Alor set letan, setadir de fwa trwa letan edmi, i egal 2,520 zour. Ou pe swiv?

Jon: Wi mon pe swiv ou mwan. Me mon pa konpran ki mannyer sa i montre ki Rwayonm Bondye ti konmans dirize an 1914.

Cameron: Oke, annou vwar ki mannyer nou kapab konpran sa. Parfwa dan bann profesi Labib, en zour i vedir en lannen.e Si nou aplik sa prensip en zour pour en lannen, sa set letan an tou i vin 2,520 lannen. Si nou konmans konte depi lannen 607 A.N.L. 2,520 lannen pour anmenn nou ver lannen 1914.f Sanmenm sa ki nou dir ki 1914 i lafen sa set lannen e konmansman dominasyon Zezi konman Lerwa dan Rwayonm Bondye. I enteresan pour note ki depi 1914 plizyer bann gran levennman in arive zis parey Labib ti predir pou arive pandan bann dernyen zour.

Jon: Ki bann kalite levennman?

Cameron: Get sa ki Zezi ti dir ki’n ganny rikorde dan Matye 24:7. Konsernan sa letan kan i ti pou konmans dirize dan lesyel Zezi ti dir, “Nasyon pou lager kont nasyon, rwayonm kont rwayonm e pou annan lafamin ek tranblemandeter dan plizyer landrwa.” Remarke ki Zezi ti predir ki pou annan lafamin ek tranblemandter pandan sa peryod letan. Nou lemonn in sertennman fer fas avek en kantite sa bann kalite problenm, pa vre?

Jon: Me wi.

Cameron: Dan sa verse, Zezi ti osi predir ki pou annan lager pandan son prezans konman Lerwa dan Rwayonm Bondye. Liv Revelasyon pa ti zis predir bann pti lager dan en sel pei, me bann lager ki pou afekte later antye pandan letan lafen.g Eski ou rapel kan Premye Lager Mondyal ti konmanse?

Jon: Sa ti arive an 1914, sa menm lannen ki ou pe dir Zezi ti konmans dirize. Mon pa ti’n zanmen remark sa avan mon!

Cameron: Kan nou met tou sa bann bout ansanm, setadir sa profesi lo sa set letan e osi bann lezot profesi Labib konsernan letan lafen, i vreman fer sans. Temwen Zeova i konvenki ki Zezi ti konmans dirize konman Lerwa dan Rwayonm Bondye an 1914 e ki bann dernyen zour ti konmans sa menm lannen.h

Jon: Mon ankor pe esey konpran tousala.

Cameron: Sa i normal. Parey mon deza dir ou, i ti osi pran mwan en bon pti pe letan pour byen konpran sa. Me omwen, mon espere ki sa ki nou’n diskite in ed ou pou vwar ki menm si lannen 1914 pa’n ganny mansyonnen direkteman dan Labib, Temwen Zeova i baz zot krwayans konsernan sa lannen lo Labib.

Jon: Wi, sa in toultan enpresyonn mwan. Sak pwen ki ou fer resorti, ou siport li avek en verse Labib. Ou pa zanmen zis donn ou prop lopinyon. Selman, mon ti pe zis mazinen, akoz i sitan konplike? Akoz Bondye pa ti zis dir nou dan Labib ki 1914 ti pou sa lannen kan Zezi ti pou konmans dirize dan lesyel?

Cameron: Sa i en bon kestyon, Jon. Anfet, i annan en kantite keksoz ki pa’n ganny klerman eksplike dan Labib. Alor akoz Bondye in fer Labib ganny ekrir dan en fason ki dimoun i bezwen fer bokou zefor pour konpran? Petet nou kapab koz lo sa pandan en lot vizit.

Jon: Mon ti pou byen kontan.

Eski ou annan okenn kestyon konsernan en size dan Labib? Eski ou ti a kontan konn lo okenn krwayans oubyen pratik relizye Temwen Zeova? Si wi, pa ezite pour demann en Temwen Zeova. I pou kontan pour diskit lo sa size avek ou.

[Not anba lo paz]

[Ekstre lo paz 9]

Konsernan sa letan kan i ti pou konmans dirize dan lesyel, Zezi ti dir: “Nasyon pou lager kont nasyon, rwayonm kont rwayonm e pou annan lafamin ek tranblemandeter dan plizyer landrwa”

[Portre lo paz 10]

[Latab lo paz 11]

REV NEBOUKADNETSAR KONSERNAN SA PYE DIBWA—KI MANNYER I RELYE AVEK RWAYONM BONDYE?

SA PROFESI

En pye dibwa enorm (Danyel 4:10, 11)

“Koup sa pye dibwa” (Danyel 4:14)

“Les li koumsa pour set letan” (Danyel 4:16)

“Ou pou reganny ou Rwayonm” (Danyel 4:26)

Dominasyon

Dominasyon ti ganny enteronpe

Enterval

Dominasyon i ganny reetabli

PREMYE LAKONPLISMAN

Neboukadnetsar, Lerwa Babilonn

En pe letan apre 606 A.N.L., Neboukadnetsar i perdi son lespri e i nepli kapab dirize

7 lannen literal

Neboukadnetsar i reganny son lespri e i konmans dirize ankor

SA PLI GRAN LAKONPLISMAN

Bann lerwa Izraelit ki reprezant dominasyon Bondye

Zerizalenm i ganny detri e sa laliny desandans bann lerwa Izraelit i ganny enteronpe

Oktob

607 A.N.L.

2,520 lannen

A.N.L.

606 lannen ek trwa mwan

N.L.

1,913 lannen ek nef mwan

“Zerizalenm pou ganny kraz anba lipye bann nasyon etranze, ziska ki letan bann nasyon etranze i ava’n fini.” (Lik 21:24)

Zezi i konmans dirize dan lesyel konman Lerwa dan Rwayonm Bondye

Oktob

1914 N.L.