Zeova i “sa Enn ki revel bann sekre”

“Zot Bondye i vreman Bondye bann bondye, Senyer bann lerwa e sa Enn ki revel bann sekre.”​—DAN. 2:47.

KI OU POU REPONN?

Ki bann detay konsernan lavenir ki Zeova in revele avek nou?

Ki sa sis premye latet sa bebet i reprezante?

Ki mannyer sa bebet i relye avek sa gran stati ki Neboukadnetsar ti vwar dan son rev?

1, 2. Ki Zeova in revel avek nou e akoz i’n fer sa?

KI BANN gouvernman ki pou pli dominan kan Rwayonm Bondye pou detrir tou dominasyon imen? Nou nou konn larepons, Zeova sa Enn ki revel bann sekre in dir nou. I fer nou konnen lekel sa bann gouvernman atraver sa ki profet Danyel ek zapot Zan ti ekrir.

² Zeova ti fer sa bann zonm vwar en seri vizyon ki ti annan plizyer bebet ki ti aparet enn apre lot. I ti osi eksplik Danyel sinifikasyon sa gran stati an metal ki Lerwa Neboukadnetsar ti vwar dan en vizyon. Zeova in prezerv sa bann lenformasyon dan Labib pour nou prop dibyen. (Rom. 15:4) I’n fer sa pour ki nou lespwar i vin pli for dan son promes ki son Rwayonm pou detrir tou gouvernman imen tre byento.​—Dan. 2:44.

3. Ki nou bezwen konpran avan ki nou konpran bann profesi dan Labib e akoz?

³ Letan nou egzamin sa ki Danyel ek Zan ti ekrir, nou pa zis ganny lenformasyon lo wit lerwa oubyen gouvernman imen, me osi dan ki lord zot ti pou aparet. Me pour nou kapab byen konpran sa bann profesi, nou bezwen konpran sa premye profesi ki dan Labib. Akoz? Parski Labib antye enkli tou bann profesi ki ladan i konekte avek sa premye profesi.

SA BEBET EK DESANDANS SA SERPAN

4. Lekel desandans sa madanm e ki i pou fer?

⁴ Zis apre sa rebelyon Edenn, Zeova ti promet ki en “madanm” ti pou annan en “desandans.”a (Lir Zenez 3:15.b) Sa desandans ti pou kraz latet sa serpan setadir Satan. Pli tar, Zeova ti revele ki sa desandans ti pou vin atraver Abraam. I ti pou sorti dan nasyon Izrael dan tribi Zida e i ti pou en desandans Lerwa David. (Zen. 22:15-18; 49:10; Ps. 89:3, 4; Lik 1:30-33) Parti prensipal sa desandans i Kris Zezi. (Gal. 3:16) Dezyenm parti sa desandans i bann Kretyen swazir dan kongregasyon. (Gal. 3:26-29) Zezi ek sa bann Kretyen swazir i zwenn ansanm e form Rwayonm Bondye, sa mwayen ki Zeova pou servi pour kraz Satan.​—Lik 12:32; Rom. 16:20.

5, 6. (a) Konbyen pouvwar pwisan Danyel ek Zan i dekrir? (b) Ki bann latet sa bebet dan liv Revelasyon i reprezante?

⁵ Sa premye profesi ki ti ganny anonse an Edenn ti osi dir ki Satan ti pou annan en “desandans.” Son desandans ti pou ay desandans sa madanm. Lekel ki form parti desandans sa serpan? Tou bann ki ay Bondye e ki opoz son pep parey Satan i fer. Tou dilon listwar, Satan in organiz son desandans dan bann diferan form gouvernman oubyen rwayonm. (Lik 4:5, 6) Me zis en ptigin sa bann rwayonm imen ki’n annan en lenpak direk lo pep Bondye, ki swa nasyon Izrael oubyen kongregasyon bann Kretyen swazir. Akoz sa lenformasyon i enportan? Akoz i eksplike akoz bann vizyon Danyel ek Zan i dekrir zis wit pouvwar mondyal.

⁶ Ver lafen premye syek N.L., Zezi ti fer zapot Zan vwar plizyer vizyon enpresyonan. (Rev. 1:1) Dan enn sa bann vizyon, Zan ti vwar Dyab ki ganny reprezante par en dragon pe debout lo bor en gran lanmer. (Lir Revelasyon 12:18–13:2.) Zan ti osi vwar en bebet drol ki ti sorti dan sa lanmer e Dyab ti donn li en gran pouvwar. Pli tar, Zan ti vwar en bebet rouz ki ti annan set latet ki ti zimaz sa bebet ki ganny mansyonnen dan Revelasyon 13:1. Lanz ti eksplik Zan ki sa set latet sa bebet i reprezant “set lerwa” oubyen gouvernman. (Rev. 13:14, 15; 17:3, 9, 10) Pandan sa peryod letan ki Zan ti pe ekrir liv Revelasyon, senk sa bann gouvernman ti’n sorti o pouvwar, enn ti pe dirize e lot “pa [ti] ankor vini.” Lekel zot sa bann rwayonm oubyen pouvwar mondyal? Annou egzamin sak latet sa bebet ki ganny dekrir dan Revelasyon. Nou pou osi vwar bann lenformasyon detaye ki Danyel ti ekrir lo sa bann rwayonm detrwa syek avan ki zot ti vin an egzistans.

LEZIP EK LASIRI, SA DE PREMYE LATET

7. Ki sa premye latet i reprezante e akoz?

⁷ Premye latet sa bebet i reprezant Lezip. Akoz? Be akoz Lezip ti sa premye pouvwar mondyal ki ti annan laenn pour pep Bondye. Bann desandans Abraam ti al reste Lezip e bann Ezipsyen ti abiz zot lefet ki zot ti’n vin en gran pep. Satan ti esey ekstermin pep Bondye avan ki desandans sa madanm ti pou arive. Dan ki fason? Par motiv Faraon pour touy tou pti garson Izraelit. Zeova pa ti les sa arive, i ti liber son pep dan lesklavaz Lezip. (Egz. 1:15-20; 14:13) Pli tar, i ti donn zot Later Promiz.

8. Ki sa dezyenm latet i reprezante e ki i ti esey fer?

⁸ Dezyenm latet sa bebet i reprezant Lasiri. Sa rwayonm pwisan ti osi esey detrir pep Bondye. I vre ki Zeova ti servi Lasiri pour pini sa dis tribi dan rwayonm nor akoz zot ti pe komet idolatri e rebel kont li. Me, Lasiri ti atak Zerizalenm pli tar. I posib ki Satan ti esey fer sa akoz i ti anvi detrir sa fanmir rwayal ki Zezi ti pou sorti ladan. Sa pa ti dan plan Zeova. Par en mirak, i ti delivre son pep ki ti reste fidel e detrir sa bann Asiryen.​—2 Rwa. 19:32-35; Iza. 10:5, 6, 12-15.

BABILON, SA TRWAZYENM LATET

9, 10. (a) Ki Zeova ti les bann Babilonnyen fer? (b) Pour ki profesi i ganny akonplir, ki ti devret arive?

⁹ Trwazyenm latet sa bebet ki Zan ti vwar i reprezant sa rwayonm ki son kapital ti apel Babilonn. Zeova ti les bann Babilonnyen ranvers Zerizalenm e anmenn son pep an egzil. Me Zeova ti averti bann Izraelit avan ki i ti les zot pas dan sa sityasyon imilyan. (2 Rwa. 20:16-18) I ti predir ki i ti pou nepli annan okenn lerwa ki ti pou asiz lo “tronn Zeova” Zerizalenm. (1 Kron. 29:23) Par kont, Zeova ti osi promet ki en desandans Lerwa David, enn ki ti pou annan “drwa legal,” ti pou repran pozisyon konman Lerwa.​—Ezek. 21:25-27.

¹⁰ En lot profesi i montre ki bann Zwif ti pou ankor pe ador Zeova kot tanp Zerizalenm kan Mesi oubyen sa Enn ki ti’n ganny swazir ti pou arive. (Dan. 9:24-27) En profesi ki ti ganny ekrir avan bann Izraelit ti ganny anmennen an egzil Babilonn i dir ki Mesi ti pou ne an Betleenm. (Mik. 5:2) Pour sa bann profesi ganny akonplir, bann Zwif ti pou bezwen ganny libere e rekonstri tanp dan zot pei natal. Me, bann Babilonnyen pa ti abitye liber bann prizonnyen. Ki mannyer pep Bondye ti pou retourn dan zot pei? Zeova ti revel larepons atraver son bann profet.​—Amos 3:7.

11. Ki diferan fason Lanpir Babilonnyen i ganny reprezante? (Vwar not anba lo paz 12.)

¹¹ Profet Danyel ti parmi bann ki ti ganny anmennen an egzil Babilonn. (Dan. 1:1-6) Zeova ti servi li pour revele ki bann rwayonm ki ti pou vin pouvwar mondyal apre Babilonn. Zeova ti revel sa bann sekre par servi plizyer senbol. Par egzanp, i ti fer Neboukadnetsar, Lerwa Babilonnyen rev en gran stati ki ti an diferan metal. (Lir Danyel 2:1, 19, 31-38.c) Atraver Danyel, Zeova ti revele ki latet annor sa stati ti reprezant Lanpir Babilonnyen.d Pwatrin ek lebra annarzan i reprezant sa lot pouvwar mondyal ki ti pou vin apre Babilonn. Ki rwayonm ki ti pou vin sa lot pouvwar mondyal e ki mannyer i ti pou tret pep Bondye?

MED EK PERS, SA KATRIYENM LATET

12, 13. (a) Ki Zeova ti revele konsernan defet Babilonn? (b) Akoz Lanpir Med ek Pers i reprezant byen katriyenm latet sa bebet?

¹² Zeova ti revel bann detay lo sa pouvwar mondyal ki ti pou pran plas Babilonn atraver profet Izai plis ki en syek avan letan Danyel. Zeova ti donn detay lo lafason ki Babilonn ti pou ganny defet ek non sef sa larme ki ti pou defet li. I ti apel Siris e i ti sorti Pers. (Iza. 44:28–45:2) Danyel ti ganny de lezot vizyon konsernan Pouvwar Mondyal Med ek Pers. Dan enn sa bann vizyon, sa lanpir ti ganny reprezante par en lours. Sa lours ti ganny demande pour “manz bokou laser.” (Dan. 7:5) Dan en lot vizyon ki Danyel ti gannyen, sa lanpir ti ganny reprezante par en mal mouton ki ti annan de korn.​—Dan. 8:3, 20.

¹³ Zeova ti servi Lanpir Med ek Pers pour akonplir profesi par tir Babilonn o pouvwar e fer bann Izraelit retourn dan zot pei. (2 Kron. 36:22, 23) Par kont, plizyer lannen pli tar sa menm lanpir ti esey fer disparet pep Bondye. Liv Ester i rakont en konplo ki premye minis Pers, Amann ti fer kont bann Izraelit. Amann ti fer laranzman pour ki tou bann Zwif dan sa gran Lanpir Pers i ganny met amor e i ti menm donn en dat kan sa zenosid ti pou arive. Ankor enn fwa Zeova ti entervenir e protez son pep kont laenn desandans Satan. (Ester 1:1-3; 3:8, 9; 8:3, 9-14) I pour sa rezon ki Lanpir Med ek Pers i reprezant byen katriyenm latet sa bebet ki ganny dekrir dan liv Revelasyon.

LAGRES, SA SENKYENM LATET

14, 15. Ki bann detay ki Zeova i revele lo ansyen Lanpir Grek?

¹⁴ Senkyenm latet sa bebet ki dan liv Revelasyon i reprezant Lagres. Parey Danyel ti revele pli boner kan i ti pe enterpret rev Neboukadnetsar, sa pouvwar i ganny reprezante par vant ek kwis an kwiv sa stati. Danyel ti osi ganny de lezot vizyon ki donn bann detay enportan konsernan karakteristik sa lanpir ek son dirizan pli enportan.

¹⁵ Dan enn sa de vizyon, Danyel ti vwar Lagres ganny reprezante par en leopar ki ti annan kat lezel ki endike ki Lagres ti pou ganny laviktwar vitman. (Dan. 7:6) Dan sa lot vizyon, Danyel i dekrir lafason ki en bouk ki ti annan en gran korn ti touy sa mal mouton ki ti annan de korn, setadir Med ek Pers. Zeova ti dir Danyel ki sa bouk ti reprezant Lagres e ki sa korn i reprezant enn son lerwa. Resi Danyel i dir ki sa gran korn ti pou kase e ki i ti pou ganny ranplase par kat pti korn. Menm si sa profesi ti ganny ekrir plizyer santenn lannen avan ki Lagres ti vin pouvwar mondyal, sak pti detay sa profesi ti vin vre. I ti Aleksann Legran, lerwa pli pwisan dan listwar Lagres ki ti defet Lanpir Med ek Pers. Zis en pti pe letan apre sa korn ti kase. Lerwa Aleksann ti mor byen zenn a laz 32 an e kan i ti annan plis pouvwar. Apre sa, son rwayonm ti ganny divize avek kat son bann zeneral.​—Lir Danyel 8:20-22.e

16. Ki Antyokis 4 ti fer?

¹⁶ Apre defet Lanpir Pers, pep Bondye ti vin anba dominasyon Lanpir Grek. A sa moman, bann Zwif ti’n fini retourn dan Later Promiz e tanp ti’n fini ganny rekonstri Zerizalenm. Zot ti ankor pep swazir Bondye e tanp ti touzour sa landrwa kot vre ladorasyon ti ganny fer. Me pandan dezyenm syek A.N.L., senkyenm latet sa bebet setadir Lagres ti atak pep Bondye. Antyokis 4, enn parmi sa bann zeneral ki ti erit lanpir Aleksann ti met en lotel pour ador bann fo bondye dan lakour tanp Zerizalenm e i ti pas en lalwa ki tou sa ki ti pratik larelizyon Zwif ti pou ganny kondannen amor. Pa sa i en aksyon ki vreman demontre laenn de lapar sa parti desandans Satan! Pa tro bokou letan apre, Lagres ti ganny retire konman pouvwar mondyal. Me ki rwayonm ki ti pou vin sa lot pouvwar mondyal e reprezant sizyenm latet sa bebet?

RONM, SIZYENM LATET, I “FER PER E TERIB”

17. Ki rol sa sizyenm latet ti zwe dan lakonplisman Zenez 3:15?

¹⁷ Ronm ti sa pouvwar ki ti pli dominan kan Zan ti ganny sa vizyon lo sa bebet. (Rev. 17:10) Sa sizyenm latet ti zwe en gran rol dan lakonplisman sa profesi ki ganny rikorde dan Zenez 3:15. Satan ti servi zofisye Romen pour bles desandans sa madanm par “kraz son talon,” me son domaz ti pou tanporer. Dan ki fason? Zot ti ziz Zezi lo en fo sarz ki i ti pe revolte kont gouvernman e zot ti touy li. (Mat. 27:26) Me blesir Zezi ti geri vitman akoz Zeova ti resisit li.

18. (a) Lekel sa nouvo nasyon ki Zeova ti swazir e akoz? (b) Ki mannyer desandans sa serpan ti kontinyen demontre laenn anver desandans sa madanm?

¹⁸ Bann sef relizye dan Izrael ti fer en konplo avek Ronm pour touy Zezi e laplipar bann Izraelit osi ti dakor avek sa. I pour sa rezon alor ki Zeova ti abandonn Izrael konman son pep. (Mat. 23:38; Akt 2:22, 23) I ti swazir en nouvo nasyon, “Izrael Bondye.” (Gal. 3:26-29; 6:16, NW) Sa nasyon ti kongregasyon bann Kretyen swazir ki ti annan bann Zwif ek non Zwif. (Efe. 2:11-18) Apre lanmor Zezi ek son rezireksyon, desandans sa serpan ti kontinyen demontre laenn anver desandans sa madanm. Ronm ti esey fer disparet kongregasyon bann Kretyen, dezyenm parti desandans sa madanm, dan plizyer lokazyon.f

19. (a) Ki mannyer Danyel i dekrir sa sizyenm pouvwar mondyal? (b) Ki nou pou egzaminen dan en lot lartik?

¹⁹ Dan sa rev ki Danyel ti enterprete pour Neboukadnetsar, Ronm ti reprezant lazanm an fer. (Dan. 2:33) Danyel ti osi ganny en lot vizyon ki pa ti zis montre ki sa ti Lanpir Romen me i ti montre lekel sa lot pouvwar mondyal ki ti pou sorti dan sa Lanpir. (Lir Danyel 7:7, 8.g) Pour plizyer syek lennmi bann Romen ti vwar Ronm konman en pouvwar ki ti “fer per e terib e avek en pwisans ekstraordiner.” Par kont, sa profesi ti predir ki “dis korn” ti pou sorti dan sa lanpir e ki enn parmi ti pou vin pli for ki lezot. Ki sa dis korn e ki sa pti korn i reprezante? Dan ki fason sa pti korn i koresponn avek sa gran stati ki Neboukadnetsar ti vwar? Nou pou egzamin larepons sa de kestyon dan sa lartik lo paz 16.

[Not anba lo paz]

Zeova i revel sa ki “devre arive byento”

“Revelasyon Zezi-Kri, ki Bondye ti donn li pour montre son bann serviter sa ki devre arive byento.”​—REV. 1:1.

KI OU POU REPONN?

Ki parti avek sa gran stati ki reprezant Pouvwar Mondyal Anglo-Ameriken?

Ki mannyer Zan i dekrir relasyon ki Pouvwar Mondyal Anglo-Ameriken ek Nasyon-z-ini i annan?

Ki mannyer Danyel ek Zan i eksplik lafason ki gouvernman imen pou fini?

1, 2. (a) Ki nou konpran kan nou konpar profesi Danyel ek Zan? (b) Ki sa sis premye latet sa bebet i reprezante?

KAN nou konpar profesi Danyel ek Zan, nou konpran sinifikasyon bann levennman ki pe arive dan lemonn ensi ki sa bann ki pou arive. Ki nou kapab aprann kan nou konpar sa bebet ki Zan ti vwar ek sa bebet fer per ki ti annan dis korn ki Danyel ti vwar ek son leksplikasyon lo sa gran stati? Letan ki nou byen konpran sa bann profesi, ki sa i devret pous nou pour fer?

² Annou revwar vizyon Zan konsernan sa bebet set latet. (Rev., sapit 13) Parey nou ti vwar dan lartik presedan, premye sis latet sa bebet i reprezant Lezip, Lasiri, Babilonn, Med ek Pers, Lagres ek Ronm. Zot tou zot in demontre laenn anver desandans sa madanm. (Zen. 3:15) Ronm, sizyenm latet sa bebet ti reste konman pouvwar mondyal pour plizyer syek apre ki Zan ti ekrir son vizyon. Me ki rwayonm ki ganny reprezante par sa setyenm latet ki ti pou ranplas Ronm? Ki mannyer i ti pou tret desandans sa madanm?

GRANNBRETANNY EK LETA-Z-INI I VIN VREMAN PWISAN

3. Ki sa bebet ki fer per i reprezante e kwa ki son dis korn i vedir?

³ Nou kapab konnen ki setyenm latet sa bebet ki dan Revelasyon sapit 13 i reprezante par konpar vizyon Zan avek sa vizyon kot Danyel ti vwar sa bebet ki fer per e ki ti annan dis korn.a (Lir Danyel 7:7, 8, 23, 24.b) Sa bebet ki Danyel ti vwar i reprezant pouvwar mondyal Ronm. (Vwar latab lo paz 14-15.) Lanpir Romen ti konmans degrengole pandan senkyenm syek N.L. Sa dis korn ki ti sorti dan latet sa bebet ki fer per i reprezant bann rwayonm ki sorti dan sa lanpir.

4, 5. (a) Ki sa pti korn ti fer? (b) Ki rwayonm setyenm latet sa bebet i reprezante?

⁴ Kat parmi sa bann korn oubyen rwayonm ki ti sorti dan sa latet i ganny plis latansyon. Trwa korn i ganny kase par sa lot korn, “enn ptipti.” Sa ti ganny akonplir kan Grannbretanny ki ti en koloni Lanpir Romen ti agrandi son pouvwar e vin vreman enportan pandan disetyenm syek. Avan sa, Grannbretanny ti napa bokou pouvwar konpare avek lezot pei. Lespanny, Pei Ba ek Lafrans ti trwa pei ki ti osi sorti dan Lanpir Romen e zot ti annan plis lotorite ki Grannbretanny. Grannbretanny ti retir sa trwa pei enn par enn dan zot pozisyon. Ver milye dizwityenm syek, Grannbretanny ti pe vin sa pouvwar pli dominan dan lemonn. Me i pa ti ankor vin setyenm latet sa bebet.

⁵ Menm si Grannbretanny ti’n vin pli for, son bann koloni ki ti dan Nor Lanmerik ti pran zot lendepandans. Me kantmenm sa, Leta-z-ini ti vin en nasyon for akoz i ti ganny proteksyon lafors naval Grannbretanny. Kan zour Senyer ti konmanse an 1914, Grannbretanny ti’n vin sa pli gran lanpir dan listwar imen e Leta-z-ini ti’n vin sa pei pli endistriyalize dan lemonn.c Pandan Premye Lager Mondyal, Leta-z-ini ti form en relasyon solid avek Grannbretanny e zot ti vin pouvwar mondyal koni konman Pouvwar Mondyal Anglo-Ameriken. Sa pouvwar mondyal i reprezant setyenm latet sa bebet. Ki mannyer sa latet ti tret desandans sa madanm?

6. Ki mannyer sa setyenm latet ti tret pep Bondye?

⁶ Zis en pti pe letan apre zour Senyer, setyenm latet sa bebet ti lans en latak lo pep Bondye, setadir bann frer Kris ki ti ankor lo later. (Mat. 25:40) Zezi ti endike ki pandan son prezans dezyenm parti desandans sa madanm ti pou ankor aktif lo later. (Mat. 24:45-47; Gal. 3:26-29) Pouvwar Mondyal Anglo-Ameriken ti fer lager kont sa bann sen. (Rev. 13:3, 7) Pandan Dezyenm Lager Mondyal, Pouvwar Mondyal Anglo-Ameriken ti persekit pep Bondye, anpes serten zot piblikasyon ganny enprimen e met bann reprezantan lesklav fidel dan prizon. I ti konmsi setyenm latet sa bebet ti’n fer aret net oubyen touy sa travay predikasyon pour en pe letan. Zeova ti konnen ki sa ti pou arive e i ti revel sa lenformasyon avek Zan. Bondye ti dir Zan ki dezyenm parti sa desandans ti pou releve e rekonmans zot bann aktivite spirityel. (Rev. 11:3, 7-11) Listwar bann serviter Zeova dan nou letan i konfirmen ki sa ti arive.

POUVWAR MONDYAL ANGLO-AMERIKEN EK LIPYE AN FER E LARZIL

7. Ki mannyer setyenm latet sa bebet i relye avek sa gran stati?

⁷ Ki mannyer setyenm latet sa bebet i relye avek sa gran stati? Lefet ki Leta-z-ini i sorti dan Grannbretanny, nou kapab dir ki zot tou le de zot sorti dan Lanpir Romen. Alor lipye i ganny dekrir konman en melanz fer ansanm avek larzil. (Lir Danyel 2:41-43.d) Sa deskripsyon i koensid avek menm letan ki setyenm latet sa bebet, setadir Anglo-Ameriken, ti pou vin pouvwar mondyal. En batiman an fer ek larzil i pli fay ki enn ki’n ganny konstri zis avek fer. Pareyman, Pouvwar Mondyal Anglo-Ameriken i annan mwens pouvwar ki sa lanpir ki i ti sorti ladan. Kwa ki’n fer li pli fay?

8, 9. (a) Ki mannyer sa setyenm pouvwar mondyal ti demontre en lafors parey fer? (b) Ki larzil dan lipye sa stati i reprezante?

⁸ Defwa, setyenm latet sa bebet ti montre ki i ti for parey fer. Par egzanp, i ti demontre son lafors par ranport laviktwar dan Premye Lager Mondyal. Son lafors ti touzour evidan pandan Dezyenm Lager Mondyal.e Apre sa lager, i ti kontinyen demontre ki i ti ankor for parey fer dan plizyer lokazyon. Par kont, depi o konmansman Pouvwar Mondyal Anglo-Ameriken fer ti’n melanze avek larzil.

⁹ Depi byen lontan, bann serviter Zeova ti anvi konn sinifikasyon lipye sa stati. Danyel 2:41 i dekrir sa melanz fer ek larzil konman zis en “rwayonm” pa plizyer. Danyel 2:43 i refer avek larzil konman “bann desandans imen” oubyen bann dimoun ordiner. Alor, larzil i reprezant bann dimoun dan bann pei ki anba dominasyon Pouvwar Mondyal Anglo-Ameriken. Zot fer sa pouvwar pli fay ki Lanpir Romen ki ti zis an fer. Sa bann dimoun i diminyen son pouvwar pour azir avek en lafors parey fer par kre linyon bann travayer, fer bann kanpanny pour drwa imen e rod lendepandans zot pei. Zot osi annan diferan krwayans politik e lefet ki bann rezilta eleksyon i telman pros avek kanmarad, sa i diminyen lotorite sa dirizan ki ranport eleksyon pour enplimant son polisi. Danyel ti predir: “Sa rwayonm pou en parti for e en parti frazil.”​—Dan. 2:42; 2 Tim. 3:1-3.

10, 11. (a) Ki lavenir “lipye” sa stati? (b) Ki nou kapab dir konsernan lakantite ledwa lipye sa stati?

¹⁰ Dan venteentyenm syek, Grannbretanny ek Leta-z-ini i kontinyen annan en relasyon solid par travay ansanm pour esey rezourd bann problenm ki afekte lemonn. Bann profesi konsernan sa gran stati ek sa bebet i konfirmen ki Anglo-Ameriken pa pou ganny ranplase par en lot pouvwar mondyal. I vre ki sa dernyen pouvwar mondyal i pli fay ki sa pouvwar ki ganny reprezante par lazanm an fer sa stati, me i pa pou degrengole par li menm.

¹¹ Eski lakantite ledwa lipye i annan okenn sinifikasyon profetik? Annou vwar: Dan lezot vizyon ki Danyel ti gannyen, i ti mansyonn bann sif spesifik parey lakantite korn ki diferan bebet ti annan lo zot latet. Sa bann sif i enportan. Par kont, Danyel pa ti mansyonn lakantite ledwa lipye kan i ti pe dekrir sa stati. Alor i pa paret ki sa sif i annan en gran lenportans zis parey avek lakantite lebra, lanmen ek ledwa lanmen, lazanm oubyen lipye. Me kantmenm sa, Danyel ti dir spesifikman ki i annan fer ek larzil dan ledwa lipye. Dapre sa deskripsyon, nou kapab tir sa konklizyon ki Pouvwar Mondyal Anglo-Ameriken pou sa pouvwar pli dominan kan sa “ros,” setadir Rwayonm Bondye i tap sa stati lo son lipye.​—Dan. 2:45.

POUVWAR MONDYAL ANGLO-AMERIKEN EK SA BEBET DE KORN

12, 13. Ki sa bebet de korn i reprezante e ki i fer?

¹² Menm si Pouvwar Mondyal Anglo-Ameriken i en melanz fer ek larzil, bann vizyon ki Zezi ti fer Zan vwar i montre ki sa pouvwar ti pou kontinyen zwe en gran rol pandan bann dernyen zour. Ki mannyer? Dan en vizyon, Zan ti vwar en bebet de korn ki ti koz konman en dragon. Ki sa bebet drol i reprezante? I annan de korn, alor i reprezant de rwayonm ki pe travay ansanm. La ankor, Zan pe vwar Pouvwar Mondyal Anglo-Ameriken me dan en rol spesyal.​—Lir Revelasyon 13:11-15.

¹³ Sa bebet i demann bann zabitan later pour fer en zimaz sa bebet ki dan Revelasyon 13:1. Zan ti ekrir ki zimaz sa bebet ti pou aparet, disparet e reaparet. Sa ti egzakteman sa ki ti arive avek Lasosyete bann Nasyon, en lorganizasyon ki Grannbretanny ek Leta-z-ini ti promote.f Bi sa lorganizasyon sete pour inifye e reprezant tou bann pei lo later. I ti aparet apre Premye Lager Mondyal me ti nepli la kan Dezyenm Lager Mondyal ti konmanse. Pandan sa lager, pep Bondye ti anonse ki zimaz sa bebet ti pou remonte zis parey sa profesi dan Revelasyon i dir. Zimaz sa bebet ti remonte me safwasi i ti apel Nasyon-z-ini.​—Rev. 17:8.

14. Dan ki sans zimaz sa bebet set latet i “en ywityenm lerwa”?

¹⁴ Zan i dekrir zimaz sa bebet set latet konman “en ywityenm lerwa.” Dan ki sans i en lerwa? I pa pe refer avek en wityenm latet sa bebet dan Revelasyon 13:1, i zis en zimaz sa bebet. Okenn pouvwar ki i annan pour azir konman en lerwa i sorti kot bann pei ki form parti son lorganizasyon espesyalman son siporter nimero enn, Pouvwar Mondyal Anglo-Ameriken. (Rev. 17:10, 11) I servi sa pouvwar pour akonplir en latas spesifik ki pou deklans en seri levennman ki pou sanz lemonn.

ZIMAZ SA BEBET I DEVOR SA FANM PROSTITYE

15, 16. Ki sa fanm prostitye i reprezante e ki’n arive avek sipor ki i ti pe gannyen?

¹⁵ Zan i dir ki i annan en prostitye senbolik ki pe mont e domin en bebet rouz ki zimaz sa bebet set latet. I apel “Gran Babilonn.” (Rev. 17:1-6) Sa fanm prostitye i reprezant byen tou fo larelizyon espesyalman bann larelizyon Kretyen. Bann lorganizasyon relizye in donn zot benediksyon zimaz sa bebet e zot in esey enfliyans li.

¹⁶ Par kont, sa gran delo ki Gran Babilonn pe asiz lo la, setadir bann dimoun ki siport li, in diminyen en kantite pandan zour Senyer. (Rev. 16:12; 17:15) Par egzanp, premye fwa ki sa zimaz ti aparet, legliz bann larelizyon Kretyen ti pe domin bann pei Was. Ozordi, dimoun an zeneral in aret siport e respe bann legliz ek zot pret. Anfet, bokou i krwar ki larelizyon i kontribye oubyen kre bann konfli. Pli ale i annan plis dimoun ki piblikman dir ki en lafen i devret ganny mete avek larelizyon.

17. Ki pou arive tre byento avek fo larelizyon e akoz?

¹⁷ Fo larelizyon an tou ka pa pou disparet zis koumsa menm. Sa prostitye pou kontinyen egzers son lenfliyans e esey fer bann lerwa fer sa ki li i anvi ziska ki Bondye i motiv zot pour pran aksyon. (Lir Revelasyon 17:16, 17.) Tre byento Zeova pou fer bann gouvernman ki ganny reprezante par Nasyon-z-ini atak fo larelizyon. Zot pou fer li perdi tou son larises e i pou nepli annan okenn lenfliyans. Sa ti pou paret enposib detrwa dizenn lannen pase, me ozordi nou vwar ki sa fanm prostitye pe nepli kapab tenir lo ledo sa bebet rouz. Malgre sa, i pa pou zis glise gradyelman ziska ki i tonm ater. I pou tonm en sel kou dan en fason vyolan.​—Rev. 18:7, 8, 15-19.

LAFEN SA BANN BEBET

18. (a) Ki sa bebet pou fer e ki pou arive? (b) Ki rwayonm ki Danyel 2:44 i dir Rwayonm Bondye pou detrir? (Vwar bwat lo paz 19.)

¹⁸ Apre ki fo larelizyon i ganny detrir, sa bebet, setadir sistenm politik Satan lo later, pou lans en latak lo Rwayonm Bondye. Vi ki i pa pou kapab ariv ziska dan lesyel, i pou tir son lakoler lo bann dimoun lo later ki pe siport Rwayonm Bondye. (Rev. 16:13-16; 17:12-14) Me ki rezilta sa pou anmennen? Danyel i dekrir zis en laspe sa dernyen konba. (Lir Danyel 2:44.g) Sa bebet ki ganny mansyonnen dan Revelasyon 13:1, son zimaz ek sa bebet de korn pou ganny detrir.

19. Ki lasirans nou kapab annan e la i lemoman pour fer kwa?

¹⁹ Nou pe viv dan menm letan avek sa setyenm latet. I pou napa en lot latet ki pou aparet lo sa bebet avan ki i ganny detrir. Pouvwar Mondyal Anglo-Ameriken pou sa pouvwar pli dominan kan fo larelizyon pou ganny detrir. Tou pti detay dan profesi Danyel ek Zan pe ganny akonplir. Nou kapab asire ki tre byento tou fo larelizyon pou ganny detrir e ki Armagedon pou vini. Bondye in revel tou sa bann detay davans. Eski nou pou port latansyon lo sa bann lavertisman ki dan sa bann profesi? (2 Pyer 1:19) La i lemoman pour pran kote avek Zeova e siport son Rwayonm.​—Rev. 14:6, 7.

[Not anba lo paz]

[Bwat lo paz 19]

LEKEL “TOU SA BANN RWAYONM”?

Sa profesi dan Danyel 2:44 i dir ki Rwayonm Bondye “pou kraz e met en lafen avek tou sa bann rwayonm.” Sa profesi i refer zis avek bann rwayonm ki diferan parti sa stati i reprezante.

Me ki pou arive avek larestan gouvernman imen? Sa profesi dan Revelasyon ki koz lo menm levennman i donn plis lenformasyon. I montre ki “bann lerwa lo later an antye” pou rasanble kont Zeova “sa gran zour Bondye Toupisan.” (Rev. 16:14; 19:19-21) Sa i montre ki pa zis bann rwayonm ki sa stati i reprezante ki pou ganny detrir zour Armagedon, me tou gouvernman imen.

Wit lerwa i ganny revele

Letan nou egzamin liv Danyel ek Revelasyon, nou pa zis ganny lenformasyon lo wit lerwa oubyen gouvernman imen, me osi dan lord ki zot ti pou aparet. Nou kapab byen konpran sa bann profesi anmezir ki nou konpran sa premye profesi ki dan Labib.

Tou dilon listwar Satan in organiz son desandans dan bann diferan form gouvernman oubyen rwayonm. (Lik 4:5, 6) Me zis en ptigin sa bann rwayonm imen ki’n annan en lenpak direk lo pep Bondye, ki swa nasyon Izrael oubyen kongregasyon bann Kretyen swazir. Sa vizyon ki Danyel ek Zan ti vwar i dekrir zis wit sa bann pouvwar mondyal.

[Portre lo paz 14]

(For fully formatted text, see publication)

1. Lezip

2. Lasiri

3. Babilonn

5. Lagres

6. Ronm

PEP BONDYE

2000 A.N.L.

Abraam

1500

Nasyon Izrael

1000

Danyel 500

A.N.L./N.L.

Zan

Izrael Bondye 500

1000

1500

2000 N.L.

[Not]

[Portre]

Sa gran stati (Dan. 2:31-45)

Kat bebet ki sorti dan lanmer (Dan. 7:3-8, 17, 25)

Sa mal mouton ek sa bouk (Dan., sapit 8)

Sa bebet set latet (Rev. 13:1-10, 16-18)

Sa bebet de korn i ankouraz zabitan later pour fer en zimaz sa bebet (Rev. 13:11-15)

[Sorti kot]

Portre Lezip ek Ronm in ganny tire avek permisyon British Museum; Portre Med ek Pers: Musée du Louvre, Paris