1. Ki bann profesi Labib i ed nou konnen?

ESKI ou konnen ki pou arive avek pep Zeova byento? Nou kapab konn larepons. Labib i dir nou konsernan bann levennman enportan ki pou arive byento. I annan en profesi ki montre nou ki bann gouvernman pli pwisan lo later pou fer. Sa profesi i dan liv Danyel sapit 11 e i koz lo de lerwa. Sa de lerwa i lager avek kanmarad e zot ganny apele lerwa nor ek lerwa sid. Vi ki laplipar sa profesi in fini ganny akonplir, nou kapab asire ki larestan sa profesi pou osi vin vre.

2. Dapre Zenez 3:15 ek Revelasyon 11:7; 12:17, ki keksoz enportan nou bezwen gard antet ler nou pe etidye profesi Danyel?

² Pour nou kapab konpran sa profesi dan Danyel sapit 11, nou bezwen gard antet ki sa profesi i refer avek zis bann dirizan ek gouvernman ki’n annan en gran lenfliyans lo pep Bondye.b Ler nou get lakantite dimoun ki i annan dan lemonn, pa bokou ki form parti pep Bondye. Me akoz sa bann gouvernman i persekit pep Bondye? Parski lobzektif prensipal Satan ek bann ki swiv li, i pour detri tou bann ki servi Zeova ek Zezi. (Lir Zenez 3:15 ek Revelasyon 11:7; 12:17.) Osi, sa profesi dan liv Danyel i devret annakor avek lezot profesi ki dan Parol Bondye. Anfet, pour nou kapab konpran byen profesi Danyel, nou bezwen konpar li avek lezot verse Labib.

3. Ki nou pou diskite dan sa lartik e dan sa enn ki swiv?

³ Dan sa lartik, nou pou diskit lo Danyel 11:25-39. Nou pou vwar lekel ki ti lerwa nor ek lerwa sid depi 1870 ziska 1991. Nou pou osi vwar akoz nou annan bann bon rezon pour aziste nou konprenezon lo sa profesi. Dan sa lartik ki swiv, nou pou diskit lo Danyel 11:40–12:1 e nou pou fer en azisteman dan nou konprenezon konsernan sa ki sa profesi i dir lo sa peryod letan depi 1991 ziska Armagedon. Anmezir ki ou etidye sa de lartik, i ti pou byen si ou ti vwar sa bwat ki annan pour tit “De lerwa ki opoz kanmarad dan letan lafen.” Me avan sa, nou bezwen konnen lekel sa de lerwa ki ganny mansyonnen dan sa profesi.

KI MANNYER NOU KAPAB KONNEN LEKEL LERWA NOR EK LERWA SID?

4. Ki trwa keksoz ki pou ed nou konnen lekel lerwa nor e lekel lerwa sid?

⁴ Dan letan Labib, sa tit “lerwa nor” ek “lerwa sid” ti refer avek bann nasyon ki ti dan nor ek sid nasyon Izrael. Akoz nou dir sa? Remark sa ki sa lanz ki ti koz avek Danyel ti dir: “Mon’n vin ed ou konpran sa ki pou arive avek ou pep dan bann dernyen zour.” (Dan. 10:14, NWT) Nasyon Izrael ti pep Bondye ziska Lapannkot lannen 33. Par kont, depi Lapannkot lannen 33, Zeova in montre klerman ki bann disip Kris ki son pep. Alor, laplipar sa profesi dan Danyel sapit 11 i annan pour fer avek bann disip Kris e non pa avek nasyon Izrael. (Akt 2:1-4; Rom. 9:6-8; Gal. 6:15, 16) Osi, avek letan, i ti annan diferan dirizan oubyen gouvernman ki ti reprezant lerwa nor ek lerwa sid. Me kantmenm sa, tou sa bann dirizan ti annan en keksoz an komen. Premyerman, sa bann lerwa ti diriz bann pei ki’n annan en gran lenfliyans lo pep Bondye. Dezyenmman, sa bann lerwa in montre ki zot ay Zeova par lafason ki zot ti tret son pep. Trwazyenmman, sa de lerwa in lager avek kanmarad pour zot kapab ganny plis pouvwar.

5. Eski i ti annan en lerwa nor ek en lerwa sid ant lannen 100 ek 1870? Eksplike.

⁵ En pe letan apre lannen 100, i ti annan plis fo Kretyen ki ti vin dan kongregasyon Kretyen. Zot ti ansenny bann fo lansennyman relizye e kasyet bann laverite ki dan Parol Bondye. Depi sa letan ziska ver 1870, Bondye ti napa en lorganizasyon lo later. Pandan sa letan, bann fo Kretyen ti pouse parey move zerb dan plantasyon e sa ti fer li difisil pour konnen lekel bann vre Kretyen. (Mat. 13:36-43) Akoz i enportan pour nou konn sa? Parski sa bann lenformasyon i montre ki sa ki nou lir konsernan lerwa nor ek lerwa sid, pa kapab aplik pour bann dirizan oubyen gouvernman ki ti o pouvwar ant lannen 100 ziska 1870. Bondye ti napa okenn lorganizasyon lo later pour zot persekite.c Par kont, pa tro bokou letan apre 1870, i ti evidan ki i ti annan en lerwa nor ek en lerwa sid ankor. Ki mannyer nou konn sa?

6. Kan ki pep Bondye ti ganny organize konman en group ankor? Eksplike.

⁶ Depi 1870, pep Bondye ti konmans ganny organize konman en group. An 1870, Charles T. Russell ek son bann zanmi ti form en group pour etidye Labib. Frer Russell ek son bann zanmi ti sa mesaze ki Labib ti’n predir e zot ti “prepar semen” pour ki Rwayonm dirize par Kris i ganny etablir. (Mal. 3:1) Ankor enn fwa, i ti annan en group ki ti pe ador Zeova dan sa bon fason! Eski i ti annan okenn gouvernman sa letan ki ti pou annan en gran lenfliyans lo bann serviter Bondye? Annou vwar serten levidans.

LEKEL LERWA SID?

7. Depi 1870 ziska pandan Premye Lager Mondyal, lekel ki ti lerwa sid?

⁷ Dan profesi Danyel, i dir ki i annan en pti korn ki ganny laviktwar lo trwa lezot korn. Sa pti korn i reprezant Langleter e sa trwa lezot korn i reprezant Lafrans, Lespanny ek Pei Ba. (Dan. 7:7, 8) Apartir 1870, Langleter ti diriz lo plis landrwa ki okenn lezot pei e i ti annan sa larme pli pwisan lo later. Depi sa letan ziska pandan Premye Lager Mondyal, Langleter ti lerwa sid. Pandan sa menm letan, Lanmerik ti’n vin sa pei pli ris dan lemonn e i ti vin tre pros avek Langleter.

8. Lekel lerwa sid pandan bann dernyen zour?

⁸ Pandan Premye Lager Mondyal, Lanmerik ek Langleter ti zwenn ansanm e zot ti form en lalyans militer vreman pwisan. Ansanm zot ti vin Pouvwar Mondyal Angle e Ameriken. Zis parey Danyel ti’n predir, sa lerwa ti annan “en larme vreman gran e pwisan.” (Dan. 11:25, NWT) Pandan bann dernyen zour, lerwa sid in toultan Pouvwar Mondyal Angle e Ameriken.d Alor, lekel lerwa nor?

LEKEL LERWA NOR?

9. Kan ki i ti annan en nouvo lerwa nor e ki mannyer Danyel 11:25 ti ganny akonplir?

⁹ An 1871, enn an apre ki Frer Russell ek son bann zanmi ti’n form en group pour etidye Labib, i ti annan en nouvo lerwa nor. An 1871, Otto von Bismarck ti ede pour inifye plizyer rezyon Lerop e zot ti vin en lanpir pwisan ki apel Lalmanny. Lerwa Wilhelm 1 ti vin premye lanperer sa nasyon e i ti swazir Bismarck pour vin sef sa gouvernman.e Avek letan, Lalmanny ti konmans kontrol serten pei Lafrik e dan Losean Pasifik. I ti osi esey vin pli for ki Langleter. (Lir Danyel 11:25, NWT.)f Lalmanny ti annan en gran larme e dezyenm pli gran lafors naval dan lemonn. Dan Premye Lager Mondyal, Lalmanny ti servi son larme pour lager kont son bann lennmi.

10. Ki mannyer Danyel 11:25b, 26 ti ganny akonplir?

¹⁰ Danyel ti osi predir sa ki pou arive avek Lalmanny ek son larme. Sa profesi i dir ki lerwa nor “pa pou kapab tenir parski zot pou fer bann konplo kont li. Sa bann ki manz son bann bon manze pou fer li tonbe.” (Dan. 11:25b, 26a, NWT) Dan letan Danyel, bann dimoun ki ti “ganny bann bon manze ek diven ki lerwa i manze e bwar,” ti enkli bann o zofisye dan lakour rwayal ki ti “servi lerwa.” (Dan. 1:5, NWT) Sa profesi pe refer avek lekel? I pe refer avek bann dimoun ki ti annan o pozisyon dan gouvernman Alman, tel parey bann zeneral ek zofisye militer ki ti travay tre pros avek lerwa. Sa ki sa bann zofisye ti fer, ti fer lerwa perdi son pouvwar e Lalmanny ti ganny en nouvo kalite gouvernman.g Sa profesi ti osi predir ki pou arive ler lerwa nor ti lager avek lerwa sid. I ti predir konsernan lerwa nor: “Son larme pou ganny balye e bokou pou ganny touye.” (Dan. 11:26b, NWT) Parey i ti’n ganny predir, dan Premye Lager Mondyal, larme Alman ti “ganny balye” e bokou dimoun ti “ganny touye.” Plis dimoun ti mor dan sa lager ki dan okenn lager ki ti’n deza arive oparavan.

11. Ki lerwa nor ek lerwa sid ti fer?

¹¹ Danyel 11:27, 28 i dekri sa ki ti arive avan Premye Lager Mondyal. I dir ki lerwa nor ek lerwa sid ti ‘asiz atab ansanm e zot ti koz lalang avek kanmarad.’ I ti osi dir ki lerwa nor ti pou annan “en kantite keksoz.” Sanmenm sa ki ti arive. Lalmanny ek Langleter ti dir kanmarad ki zot ti anvi lape me zot ti konmans lager avek kanmarad an 1914. Sa ti montre ki sa ki zot ti’n dir pa ti vre. Osi, dan bann lannen avan 1914, Lalmanny ti’n vin sa dezyenm pei pli ris dan lemonn. Apre, parey i ti’n ganny predir dan Danyel 11:29 e premye parti verse 30, Lalmanny ti lager avek lerwa sid e i ti perdi.

SA DE LERWA I PERSEKIT PEP BONDYE

12. Ki lerwa nor ek lerwa sid ti fer dan Premye Lager Mondyal?

¹² Depi 1914, sa de lerwa in kontinyen lager avek kanmarad e avek pep Bondye. Par egzanp, dan Premye Lager Mondyal, gouvernman Alman ek gouvernman Angle ti persekit bann serviter Bondye ki ti refize partisip dan lager. Gouvernman Ameriken ti met bann ki ti pe diriz sa travay predikasyon dan prizon. Sa bann keksoz ti akonpli sa profesi ki dan Revelasyon 11:7-10.

13. Ki lerwa nor ti fer apre 1930 e pandan Dezyenm Lager Mondyal?

¹³ Dan bann lannen 1930 e espesyalman pandan Dezyenm Lager Mondyal, lerwa nor ti atak pep Bondye san okenn pitye. Ler bann Nazi ti pran kontrol Lalmanny, Hitler ek bann ki ti siport li, ti enterdi travay pep Bondye. Lerwa nor ti touy preski 1,500 serviter Bondye e i ti anvoy plizyer milye dan bann kan konsantrasyon. Sa bann levennman ti ganny predir dan liv Danyel. Ler Lerwa nor ti enterdi sa travay predikasyon, i ti “sali landrwa sen” e “aret sa sakrifis regilye.” (Dan. 11:30b, 31a, NWT) Hitler, ki ti dirizan Lalmanny, ti menm promet ki i ti pou touy tou bann serviter Bondye Lalmanny.

I ANNAN EN NOUVO LERWA NOR

14. Lekel ki ti vin lerwa nor apre Dezyenm Lager Mondyal? Eksplike.

¹⁴ Apre Dezyenm Lager Mondyal, Linyon Sovyetik ti vin lerwa nor. I ti konmans diriz lo bann landrwa ki ti pour Lalmanny. Zis parey bann Nazi, Linyon Sovyetik ti persekit tou bann ki ti ador sa vre Bondye premye.

15. Ki lerwa nor ti fer apre ki Dezyenm Lager Mondyal ti’n fini?

¹⁵ Pa bokou letan apre Dezyenm Lager Mondyal, Linyon Sovyetik ek son bann alye ti konmans persekit pep Bondye. Parey i ti’n ganny predir dan Revelasyon 12:15-17, sa lerwa ti enterdi nou travay predikasyon e anvoy plizyer milye serviter Zeova an egzil. Anfet, tou dilon bann dernyen zour, lerwa nor in kontinyen persekit pep Bondye. Sa persekisyon ti parey en “larivyer.” Kantmenm sa, i pa’n zanmen kapab aret nou travay predikasyon.h

16. Ki mannyer Linyon Sovyetik ti akonpli Danyel 11:37-39?

¹⁶ Lir Danyel 11:37-39, NWT.i Zis parey i ti ganny predir dan sa profesi, lerwa nor pa ti demontre okenn “respe pour Bondye son bann zanset.” Ki mannyer i ti fer sa? Linyon Sovyetik ti anvi detri tou larelizyon. I ti esey fer ki zot nepli annan okenn pouvwar lo dimoun. Alor, apartir 1918, Linyon Sovyetik ti donn en lord ki ti fer bann lekol konmans ansennyen ki Bondye pa egziste. Ki mannyer sa lerwa nor ti “donn laglwar avek bondye bann lavil fortifye”? Gouvernman Linyon Sovyetik ti depans en kantite larzan lo zot larme e zot ti konstri plizyer milye zarm nikleer pour zot kapab vin pli for. Avek letan, lerwa nor ek lerwa sid ti annan ase zarm pwisan pour touy plizyer bilyon dimoun!

SA DE LENNMI I TRAVAY ANSANM

17. Kisisa “sa keksoz degoutan ki anmenn destriksyon”?

¹⁷ Lerwa nor in travay ansanm avek lerwa sid pour fer en keksoz enportan. Zot ti “met an plas sa keksoz degoutan ki anmenn destriksyon.” (Dan. 11:31, NWT) Sa “keksoz degoutan” ki zot ti met an plas i Nasyon-z-ini.

18. Akoz Nasyon-z-ini i ganny dekri konman en “keksoz degoutan”?

¹⁸ Nasyon-z-ini i ganny dekrir konman en “keksoz degoutan” parski i pretann ki i kapab anmenn lape partou dan lemonn, kan zis Rwayonm Bondye ki kapab fer sa. Deplis, sa profesi i dir ki sa keksoz degoutan i “anmenn destriksyon” parski Nasyon-z-ini pou atak e detri tou fo larelizyon.​—Vwar sa bwat “De lerwa ki opoz kanmarad dan letan lafen.”

AKOZ NOU BEZWEN KONN SA BANN LENFORMASYON?

19-20. (a) Akoz nou bezwen konn sa bann lenformasyon konsernan lerwa nor ek lerwa sid? (b) Ki kestyon nou pou vwar dan sa lartik ki swiv?

¹⁹ Nou bezwen konn sa bann lenformasyon konsernan lerwa nor ek lerwa sid parski i donn nou laprev ki depi 1870 ziska 1991, profesi Danyel konsernan lerwa nor ek lerwa sid in ganny akonplir. Alor, nou kapab annan konfyans ki larestan profesi Danyel pou vin vre.

²⁰ An 1991, Linyon Sovyetik ti aret egziste. Alor, lekel lerwa nor ozordi? Nou pou vwar larepons sa kestyon dan sa lartik ki swiv.

1-2. Ki nou pou diskite dan sa lartik?

OZORDI nou annan plis levidans ki montre ki nou pe viv dan bann dernyen zour, bann dernyen zour sa lemonn. Byento, Zeova ek Zezi pou detri tou bann gouvernman ki opoz Rwayonm Bondye. Avan sa i arive, lerwa nor ek lerwa sid pou kontinyen opoz kanmarad e osi opoz pep Bondye.

² Dan sa lartik, nou pou diskit lo sa profesi ki dan Danyel 11:40–12:1. Nou pou konnen lekel ki lerwa nor ozordi e nou pou vwar akoz nou kapab reste kalm e annan konfyans ki Zeova pou sov nou malgre nenport kwa ki arive.

EN NOUVO LERWA NOR

3-4. Lekel lerwa nor ozordi? Eksplike.

³ Apre ki Linyon Sovyetik ti aret egziste an 1991, pep Bondye ki ti anba son dominasyon ti ganny laliberte pour en serten letan. Danyel ti dir ki sa letan laliberte ti konmsi zot in ganny “en pe led.” (Dan. 11:34, NWT) Sa i fer ki zot ti lib pour anons sa bon nouvel e i pa ti tarde pour annan plizyer santenn milye proklanmater dan bann pei ki ti form parti Linyon Sovyetik. Me avek letan, Larisi avek son bann alye ti vin lerwa nor. Parey nou’n diskite dan sa lartik avan, pour ki en gouvernman i vin lerwa nor oubyen lerwa sid, i bezwen fer trwa keksoz: (1) annan en gran lenfliyans lo pep Bondye, (2) montre par son aksyon ki i lennmi Zeova ek son pep e (3) zot fer konpetisyon avek kanmarad.

⁴ Annou vwar bann rezon nou kapab dir ki ozordi lerwa nor i Larisi ek son bann alye. (1) Zot in atak pep Bondye par restrikte sa travay predikasyon e persekit plizyer santenn milye frer ek ser ki reste dan bann landrwa ki anba zot kontrol. (2) Zot bann aksyon i montre ki zot ay Zeova ek son pep. (3) Zot esey vin pli pwisan ki lerwa sid, Pouvwar Mondyal Angle e Ameriken. Annou vwar ki Larisi ek son bann alye in fer e akoz sa i montre ki zot lerwa nor.

LERWA NOR EK LERWA SID I KONTINYEN OPOZ KANMARAD

5. Ki Danyel 11:40-43 pe koz lo la e ki arive pandan sa letan?

⁵ Lir Danyel 11:40-43, NWTb. Sa parti dan sa profesi i koz lo letan lafen. Sa bann verse i montre ki mannyer lerwa nor ek lerwa sid i opoz kanmarad. Danyel ti predir ki dan letan lafen, lerwa sid pou “atak” lerwa nor.​—Dan. 11:40, NWT.

6. Ki mannyer sa de lerwa pe atak kanmarad?

⁶ Lerwa nor ek lerwa sid i fer konpetisyon avek kanmarad akoz zot tou le de zot anvi vin sa gouvernman pli pwisan dan lemonn. Par egzanp, apre Dezyenm Lager Mondyal, Linyon Sovyetik ti konmans kontrol en gran parti Lerop. Alor, lerwa sid ti dakor pour zwenn ansanm avek lezot pei pour opoz lerwa nor. Sa lorganizasyon i apel NATO. Lerwa nor ek lerwa sid i depans en kantite larzan pour fer zot larme vin pli for ki pour kanmarad. Zot osi opoz kanmarad par siport lennmi kanmarad dan bann lager tel parey dan Lafrik, Lazi ek Lanmerik Laten. Pandan sa bann dernyen lannen, Larisi avek son bann alye in vin vreman pwisan partou dan lemonn. Zot pe osi opoz lerwa sid atraver Enternet. Sa bann lerwa in akiz kanmarad konmkwa zot servi bann progranm konpiter pour fer zot perdi larzan e andomaz zot sistenm ekonomik e politik. Osi, parey Danyel ti predir, lerwa nor i kontinyen son latak lo pep Bondye.​—Dan. 11:41, NWT.

LERWA NOR I ANTRE DAN “SA ZOLI PEI”

7. Ki “sa zoli pei” ki lerwa nor pou antre ladan?

⁷ Danyel 11:41 i dir ki lerwa nor pou antre dan “sa zoli pei.” Ki sa pei ki zot pou antre ladan? Dan letan Labib, Izrael ti ganny konsidere konman “sa pei pli merveye.” (Ezek. 20:6) Me sa ki ti fer li vreman spesyal, i ki laba dimoun ti ador Zeova. Depi Lapannkot lannen 33, sa “pei” nepli en landrwa spesifik lo later. Sa i fer sans parski ozordi pep Zeova i partou lo later. O kontrer, ozordi “sa zoli pei” i bann aktivite ki pep Zeova i fer ki enkli ler nou ador Zeova dan bann renyon e dan predikasyon.

8. Ki mannyer lerwa nor ti antre dan “sa zoli pei”?

⁸ Pandan bann dernyen zour, plizyer fwa lerwa nor in antre dan “sa zoli pei.” Par egzanp, ler Lalmanny ti lerwa nor, i ti antre dan “sa zoli pei,” ler i ti persekit e touy pep Bondye sirtou pandan Dezyenm Lager Mondyal. Apre Dezyenm Lager Mondyal ler Linyon Sovyetik ti vin lerwa nor, sa lerwa ti antre dan “sa zoli pei” par persekit pep Bondye e fors zot pour sov lwen avek zot lakour.

9. Dan sa bann dernyen lannen, ki mannyer Larisi ek son bann alye in antre dan “sa zoli pei”?

⁹ Pandan sa bann dernyen lannen, Larisi ek son bann alye in osi antre dan “sa zoli pei.” Ki mannyer zot in fer sa? An 2017, Larisi ti enterdi travay pep Bondye e met serten nou bann frer ek ser dan prizon. I ti osi enterdi nou bann piblikasyon, enkli Tradiksyon Nouvo Lemonn. Apre, i ti sezi nou biro brans Larisi, bann Lasal Rwayonm ek Lasal Lasanble. An 2018, apre tou sa bann keksoz, Konsey Direkter ti idantifye Larisi ek son bann alye konman lerwa nor. Par kont, menm si pep Zeova i ganny persekite, zot refize lager avek oubyen fer okenn keksoz pour esey sanz okenn gouvernman. O kontrer, zot swiv sa konsey Labib ki ankouraz nou pour fer lapriyer pour “tou bann ki annan en o pozisyon,” sirtou ler sa bann zofisye pe fer bann desizyon pour deside si nou pou kapab ador Bondye dan liberte.​—1 Tim. 2:1, 2.

ESKI LERWA NOR POU DETRI LERWA SID?

10. Eski lerwa nor pou detri lerwa sid? Eksplike.

¹⁰ Sa profesi dan Danyel 11:40-45 i koz plis lo sa ki lerwa nor pe fer. Eski sa i vedir ki i pou detri lerwa sid? Non. Lerwa sid pou ankor “vivan” ler Zeova ek Zezi i detri tou bann gouvernman pandan lager Armagedon. (Rev. 19:20) Akoz nou kapab asire? Annou vwar sa ki profesi Danyel ek Revelasyon i dir.

11. Ki Danyel 2:43-45 i montre? (Vwar portre lo kouvertir.)

¹¹ Lir Danyel 2:43-45. Profet Danyel i dekri en gran stati ki bann parti son lekor i ganny fer avek diferan metal. Sak parti i reprezant bann diferan gouvernman imen ki’n diriz en pei kot en kantite serviter Bondye ti reste. Sa bann gouvernman ti diriz dan diferan letan. Lipye sa stati ki en melanz feray ek larzil, i reprezant Pouvwar Mondyal Angle e Ameriken. Sa profesi i montre ki Pouvwar Mondyal Angle e Ameriken pou ankor pe dirize ler Rwayonm Bondye pou detri tou gouvernman imen.

12. Setyenm latet sa bebet i reprezant kwa e akoz sa i enportan?

¹² Zapot Zan ti osi koz lo diferan gouvernman ki’n annan en gran lenfliyans lo pep Zeova. Dan profesi Zan, sa bann gouvernman i ganny reprezante par en bebet sovaz ki annan set latet. Setyenm latet sa bebet i reprezant Pouvwar Mondyal Angle e Ameriken. Sa i enportan akoz sa profesi pa dir ki sa bebet i ganny ankor en lot latet apre sa. Setyenm latet sa bebet pou ankor pe dirize ler Kris ek son larme dan lesyel i detri li ansanm avek larestan sa bebet.c​—Rev. 13:1, 2; 17:13, 14.

KI LERWA NOR POU FER BYENTO?

13-14. Lekel “Gog, dan pei Magog” e kwa ki kapab fer li atak pep Bondye?

¹³ Ezekyel ti ekri en profesi ki dir nou ki i kapab arive avan ki lerwa nor ek lerwa sid i ganny detrir. I paret ki sa profesi dan Ezekyel 38:10-23; Danyel 2:43-45; 11:44–12:1 ek Revelasyon 16:13-16, 21 pe dekri menm keksoz. Si sa i leka, nou kapab ekspekte sa bann keksoz swivan pou arive.

¹⁴ En pe letan apre ki gran ladetres i konmanse, “bann lerwa partou lo later” pou zwenn ansanm pour form en group. (Rev. 16:13, 14; 19:19) Labib i apel sa group “Gog, dan pei Magog.” (Ezek. 38:2) Sa group nasyon pou atak pep Bondye e esey detri zot konpletman. Kwa ki pou fer zot atak pep Bondye? Dan en profesi konsernan sa letan, zapot Zan ti vwar en gro lagrel sorti dan lesyel ki ti tonm lo bann lennmi Bondye. Sa tanpet lagrel i kapab reprezant en mesaz zizman ki pep Bondye pou anonse. I kapab ki sa mesaz i fer Gog ki sorti Magog atak pep Bondye pour esey detri zot konpletman.​—Rev. 16:21.

15-16. (a) I kapab ki Danyel 11:44, 45 pe refer avek ki levennman? (b) Ki pou arive avek lerwa nor ek lezot ki form parti Gog ki sorti Magog?

¹⁵ I kapab ki sa mesaz zizman ek sa dernyen latak par bann lennmi Bondye i sa menm levennman ki dan Danyel 11:44, 45, NWT.d (Lir.) Danyel i dir ki “bann nouvel sorti dan les e dan nor” pou fatig lerwa nor ki pou pran “en gran lakoler.” Lerwa nor i pare pour “ekstermin e detri bokou.” I paret ki sa pe refer avek pep Zeova.e I kapab ki Danyel pe dekri sa dernyen latak lo pep Bondye.

¹⁶ Ler lerwa nor ek lezot gouvernman pou atak pep Bondye, sa pou fer Bondye Tou Pwisan ankoler e lager Armagedon pou konmanse. (Rev. 16:14, 16) Sa letan lerwa nor ansanm avek lezot nasyon ki form parti Gog ki sorti Magog, pou ganny detrir e i “pou napa personn pour ed li.”​—Dan. 11:45, NWT.

17. Lekel Mikael “sa gran sef” ki ganny mansyonnen dan Danyel 12:1 e ki i fer?

¹⁷ Sa lot verse ki swiv dan Danyel i donn nou plis lenformasyon konsernan lafason ki lerwa nor ek son bann alye pou ganny detrir e ki mannyer nou pou ganny sove. (Lir Danyel 12:1.) Ki sa verse i vedir? Mikael i en lot non pour nou lerwa Zezi Kri. I’n “defann” pep Bondye depi 1914 ler i ti vin Lerwa dan Rwayonm Bondye dan lesyel. Byento, i “pou leve” oubyen detri son bann lennmi pandan lager Armagedon. Danyel i dir ki sa lager pou sa dernyen levennman e i pou en “letan langwas” ki pou pli pir ki’n deza arive. Dan liv Revelasyon, Zan i apel sa letan zis avan Armagedon “gran ladetres.”​—Rev. 6:2; 7:14.

ESKI OU NON POU’N “GANNY EKRI DAN LIV”?

18. Akoz nou kapab reste kalm malgre nenport kwa ki arive dan lavenir?

¹⁸ Danyel ek Zan ti dir ki Zeova ek Zezi pou sov zot bann serviter pandan gran ladetres. Alor nou kapab reste kalm malgre nenport kwa ki arive. Danyel i dir ki non bann ki pou sirviv pou “ganny ekri dan liv.” (Dan. 12:1) Ki nou kapab fer pour nou non ganny ekrir dan sa liv? Nou bezwen montre ki nou annan lafwa dan Zezi, sa Pti Mouton Bondye. (Zan 1:29). Nou bezwen dedye nou lavi avek Bondye e batize. (1 Pyer 3:21) Osi, nou bezwen montre ki nou siport Rwayonm Bondye par ed lezot aprann konn Zeova.

19. Ki nou devret fer la konmela e akoz?

¹⁹ La i sa letan pour ranforsi nou konfyans dan Zeova e dan nou bann frer ek ser ki form parti son lorganizasyon. La i sa moman pour nou siport Rwayonm Bondye. Si nou fer sa, nou pou ganny sove ler lerwa nor ek lerwa sid i ganny detrir par Rwayonm Bondye.

Serten profesi ki ganny mansyonnen dan sa latab i dekri bann levennman ki ariv an menm tan. Tou sa bann profesi i montre ki nou pe viv dan “letan lafen.”​—Dan. 12:4.

• 

  

  Verse Rev. 11:7; 12:13, 17; 13:1-8, 12

  Profesi “Sa bebet sovaz” i diriz bann pep lo later pour plizyer milye lannen. Dan letan lafen, setyenm latet sa bebet i ganny blese. Pli tar, sa latet i geri e “later antye” i swiv sa bebet sovaz. Satan i servi sa bebet pour ‘lager avek larestan sa desandans.’

  Lakonplisman Apre Deliz, bann gouvernman ki ti lennmi Zeova ti diriz bann pep. Plis ki 3,000 an pli tar, pandan Premye Lager Mondyal, Langleter ki ti enn parmi sa bann gouvernman, ti perdi en kantite son pouvwar. I ti revin for ler i ti form en lalyans avek Lanmerik. Pandan letan lafen, Satan in servi tou bann gouvernman lo later pour persekit pep Bondye.

• 

  Verse Dan. 11:25-45, (NWT)

  Profesi Pandan letan lafen, lerwa nor ek lerwa sid i lager avek kanmarad pour ganny pouvwar.

  Lakonplisman Lalmanny i lager avek Langleter ek Lanmerik. An 1945, Linyon Sovyetik ek son bann alye i vin lerwa nor. An 1991, Linyon Sovyetik i aret egziste e pli tar, Larisi ek son bann alye i vin lerwa nor.

• 

  Verse Iza. 61:1, (NWT); Mal. 3:1; Lik 4:18

  Profesi Zeova i anvoy son “mesaze” pour “prepar semen” pour ki Rwayonm dirize par Kris i ganny etablir. Sa “mesaze” i konmans “anons bon nouvel” avek bann ki annan limilite.

  Lakonplisman Depi 1870, Charles T. Russell ansanm avek son bann zanmi i konmans etidye Labib pli o profon pour zot kapab konnen ki Labib i vreman dir. An 1881, zot ti realize ki i ti vreman enportan pour bann serviter Bondye anons sa bon nouvel. Zot ti pibliy bann lartik parey “Wanted 1,000 Preachers” (Nou bezwen 1,000 Proklanmater) ek “Anointed to Preach” (Nou’n ganny swazir pour prese).

• 

  Verse Mat. 13:24-30, 36-43

  Profesi En zonm i plant dible dan son plantasyon me apre sa, en lennmi i senm lagrenn move zerb dan sa menm plantasyon. Move zerb i pouse e kasyet dible. Pandan letan rekolt, move zerb i ganny separe avek dible.

  Lakonplisman Depi 1870, i pli fasil pour konnen lekel bann vre Kretyen e lekel bann fo Kretyen. Pandan letan lafen, bann vre Kretyen i ganny rasanble dan kongregasyon e separe avek bann fo Kretyen.

• 

  Verse Dan. 2:31-33, 41-43, (NWT)

  Profesi En stati ki ganny fer avek diferan metal e son lipye i an feray e larzil.

  Lakonplisman Larzil i reprezant bann dimoun ordiner ki reste Langleter ek Lanmerik ki rebel kont sa bann gouvernman. Sa bann dimoun i fer ki sa bann gouvernman pa kapab servi tou zot pouvwar.

• 

  

  Verse Mat. 13:30; 24:14, 45; 28:19, 20

  Profesi “Dible” i ganny anmase e met dan “stor.” “Lesklav fidel e pridan” i ganny met ansarz “bann serviter.” “Sa bon nouvel Rwayonm” i konmans ganny anonse “partou lo later.”

  Lakonplisman An 1919, lesklav fidel i ganny apwente pour diriz pep Bondye. Depi sa letan, bann Etidyan Labib i konmans anons sa bon nouvel plis ankor. Ozordi, Temwen Zeova i anons sa bon nouvel dan plis ki 200 pei e pibliy bann piblikasyon baze lo Labib dan plis ki 1,000 langaz.

• 

  Verse Dan. 12:11, (NWT); Rev. 13:11, 14, 15

  Profesi En bebet sovaz ki annan de korn i dir bann dimoun lo later fer “en stati sa bebet sovaz” e i “donn lavi [sa] stati.”

  Lakonplisman Pouvwar Mondyal Angle e Ameriken i konmans en lorganizasyon ki apel Lasosyete bann Nasyon. Lezot nasyon i zwenn sa lorganizasyon. Avek letan lerwa nor i zwenn sa lorganizasyon e i ti en manm depi 1926 ziska 1933. Dimoun ti krwar ki Lasosyete bann Nasyon ti kapab anmenn lape partou lo later, me sa i en keksoz ki zis Rwayonm Bondye ki kapab fer. Dimoun i osi krwar ki Nasyon-z-ini i kapab fer parey.

• 

  

  Verse Dan. 8:23, 24, (NWT)

  Profesi En lerwa ki paret vreman pa bon pou anmenn “destriksyon dan en fason enkrwayab.”

  Lakonplisman Pouvwar Mondyal Angle e Ameriken in touy en kantite dimoun e zot in fer en kantite destriksyon. Par egzanp, pandan Dezyenm Lager Mondyal, Lanmerik ti larg de bonm atomik lo en pei ki ti lennmi Langleter ek Lanmerik. Sa de bonm ti fer plis destriksyon ki okenn lezot bonm oparavan.

• 

  Verse Dan. 11:31, (NWT); Rev. 17:3, 7-11

  Profesi Sa “bebet sovaz rouz” ki annan dis korn i sorti dan en labim e i en wityenm lerwa. Liv Danyel i dir ki sa lerwa i “sa keksoz degoutan ki anmenn destriksyon.”

  Lakonplisman Pandan Dezyenm Lager Mondyal, Lasosyete bann Nasyon i aret fonksyonnen. Apre Dezyenm Lager Mondyal, Nasyon-z-ini i ganny “met an plas.” Zis parey Lasosyete bann Nasyon, Nasyon-z-ini i ganny laglwar ki merit al pour Rwayonm Bondye. Nasyon-z-ini pou atak larelizyon.

• 

  

  Verse 1 Tesa. 5:3; Rev. 17:16

  Profesi Bann nasyon i anonse ki i annan “lape ek sekirite,” apre “sa dis korn” ek “sa bebet sovaz” i atak “sa prostitye” e detri li. Apre sa, bann nasyon i ganny detrir.

  Lakonplisman Bann nasyon pou anonse konmkwa zot in reisi anmenn lape ek sekirite lo later antye. Apre sa, bann nasyon ki form parti Nasyon-z-ini pou detri bann fo larelizyon. Sa pou konmansman gran ladetres ki pou fini ler Zezi pou detri larestan lemonn Satan pandan lager Armagedon.

• 

  Verse Ezek. 38:11, 14-17; Mat. 24:31

  Profesi Gog i anvair pei pep Bondye. Apre sa, bann lanz i rasanble “bann ki’n ganny swazir.”

  Lakonplisman Lerwa nor ansanm avek lezot gouvernman dan lemonn pou atak pep Bondye. Apre ki sa latak in konmanse, bann Kretyen swazir ki ankor lo later i ganny anmennen dan lesyel.

• 

  Verse Ezek. 38:18-23, (NWT); Dan. 2:34, 35, 44, 45; Rev. 6:2; 16:14, 16; 17:14; 19:20

  Profesi “Sa enn” ki asiz lo en “seval blan” i fini “ranport laviktwar” ler i detri Gog ansanm avek son larme. “Sa bebet sovaz” i “ganny zete vivan dan lak dife” e en ros i detri sa gran stati.

  Lakonplisman Zezi ki Lerwa dan Rwayonm Bondye pou vin sov pep Bondye. Zezi ansanm avek sa 144,000 Kretyen swazir ek bann lanz pou detri tou bann nasyon ki atak pep Bondye. Zot pou detri lemonn Satan konpletman.