Pran Plezir dan Parol Bondye

ERE sa zonm ki son “plezir i dan lalwa Zeova.” En tel zonm i lir Parol Bondye “dan en lavwa ba lizour ek aswar.” (Pson. 1:1, 2) Eski ou eksperyans sa plezir? Konman ki ou kapab resevwar plis lazwa ki Parol Bondye i ofer ou?

Ekoute pandan ki Zeova i koze

Pa zis lir bann mo. Esey imazin sa bann sitiasyon ki ou lir dan ou lespri. Imazin lavwa sa bann ki pe koze. Ler ou lir bann premye sapit Labib, antann Zeova li menm revel pa par pa, sa ki ti ganny fer pour prepar later pour zonm. Ekoute anmezir ki i dir avek son Garson, sa Zouvriye Abil, ki letan in arive pour anmenn sa premye koup imen an legzistans. Imazin sa senn: Adan ek Ev i rebele, Bondye i pas zizman lo zot e, apre sa, i tir zot dan Paradi. (Zenez sapit 1-3) Santi en respe profon ler ou lir ki en lavwa ki sorti dan lesyel i idantifye Zezi Kri konman Garson Bondye, byenneme, sa enn anvoye par Bondye pour donn son lavi pour limanite. (Mat. 3:16, 17) Esey imazin reaksyon zapot Zan ler i antann deklarasyon Zeova: “Lala mon refer tou keksoz a-nef.” (Rev. 21:5) Wi, lir Parol Bondye dan sa fason i en leksperyans vreman gou!

Kontinyen lir resi enspire, e ou pou arive konn Zeova konman en dimoun ki enspir grander ek respe profon. Ou pou santi ou ganny atire bokou anver sa Enn ki kontan nou, ki azir avek mizerikord avek nou, ki ed nou si avek limilite nou kontinyen esey fer son lavolonte, e ki montre nou konman pour rezwir sikse dan tou sa ki nou fer.—Zoz. 1:8; Pson. 8:1; Iza. 41:10.

Pli ou pas letan pour lir Labib, ou satisfaksyon pou vin pli gran anmezir ki ou pli byen konpran sa ki Bondye i oule ou fer. Me ou pou retir plis satisfaksyon ki sa. Ler ou lektir i fourni ou led ki ou bezwen pour tret bann problenm avek sazes, ou pou santi parey sa ki sa psalmis ti dir: “Ou bann rapel i merveye. Pour sa rezon ki mon nanm in obzerv zot.” (Pson. 119:129) Ou osi ou pou rezwir, letan ki ou rekonnet e konpran bann prensip dan Lekritir ki itil pour form ou panse ek ou bann dezir dan en fason ki Bondye i aprouve.—Iza. 55:8, 9.

Labib i fourni gidans moral ki protez nou kont danze e montre nou sa bon semen. Ler nou lir Labib, nou santi ki Zeova i en Papa ki konn bann problenm ki pou arive ler nou les nou ganny kontrole par nou dezir laser enparfe. I pa anvi nou soufer bann konsekans grav ki pou definitivman arive ler nou mepriz son standar moral onivo. I annan lentere dan nou e i anvi nou rezwir sa pli meyer fason viv. Lir son Parol i ed nou apresye pli plennman konman i en benediksyon pour annan li konman nou Bondye ek Papa seles.

Lir Labib toulezour

“Tou keksoz ki i fer pou reisi” i sa parol ki sa psalmis ti dir konsernan sa zonm ki lir Parol Bondye toulezour. (Pson. 1:3) Wi, kantmenm nou enparfe, kantmenm nou pe viv dan sa sistenm mesan Satan, e kantmenm bann zefor ki Dyab i fer pour devor nou, lir Labib toulezour e osi aplik sa ki dan Parol Bondye pou ed nou reisi dan tou keksoz ki enplik nou relasyon avek Zeova.

Vi ki nou anba presyon sa vye sistenm, absorb bann panse Kreater pour menm enn pti moman presye sak zour i kapab donn nou lafors. Serten ki ti dan prizon akoz zot lafwa ti ganny akse avek selman detrwa verse ant ant ki zot ti trouve dan bann lartik zournal. Zot ti dekoup sa bann verse, memoriz zot, e medit lo zot. Zeova ti beni zot zefor parski zot ti fer tou sa ki zot sirkonstans ti permet fer konsernan pran konnesans lo Parol Bondye. (Mat. 5:3) Laplipar nou i annan bokou plis liberte ki sa. Nou pa devret konklir ki lir en verse Labib vitman enn fwa par zour, ki sa lo li menm, i annan serten lefe mirakilez. Sepandan, nou pou resevwar bann benediksyon, si nou aziste nou bann priyorite pour kapab lir en porsyon Labib sak zour, reflesir lo la, e aplik li dan nou lavi.

An realite, nou pli meyer plan i kapab ganny deranze. Ler sa i arive, nou donn priyorite bann keksoz ki vreman enportan. Par egzanp, nou pa volonterman les pase enn oubyen de zour san bwar delo. Alor, nenport kwa ki arive dan nou lavi toulezour, nou devret pran enpe letan pour rafresi nou avek delo laverite.—Akt 17:11.

Lir Parol Bondye antyerman

Eski ou, ou’n deza lir Labib an antye? Serten in santi ki i tro bokou pour zot lir depi Zenez toudilon ziska Revelasyon. Alor, bokou dimoun ki ti anvi lir Labib an antye ti konmans par lir premyerman Lekritir Grek Kretyen. Akoz? Petet parski zot ti pli fasilman vwar konman ki sa bann liv Labib i aplik pour zot konman bann endividi ki pe esey mars dan lepa Kris. Oubyen petet parski bann Lekritir Grek Kretyen pa ti paret tro bokou pour lir—zis enpe plis ki en kar Labib. Me apre ki zot ti’n fini lir sa 27 liv, zot ti tourn zot latansyon lo sa 39 liv dan Lekritir Ebre e ti konmans lir e apresye zot. Letan ki zot ti’n fini lir Lekritir Ebre, zot ti’n fini etablir en labitid lir Labib regilyerman. Alor zot ti kontinyen lir bann Lekritir Grek Kretyen pour en dezyenm fwa, e zot pa’n zanmen arete. Fotespere ki ou osi ou a fer lektir Parol Bondye toulezour vin konman en labitid toudilon ou lavi.

Eski i annan en dimoun dan ou fanmiy oubyen dan kongregasyon ki pa kapab lir? Akoz ou pa ofer pour lir Labib regilyerman avek sa dimoun? Ou pou benefisye, e li osi i pou benefisye pandan ki i medit lo sa ki i antann e apre aplik sa dan son lavi.—Rev. 1:3.

Avek letan, ou kapab anvi antreprann bann proze spesyal an konneksyon avek ou lektir Labib. Serten sa bann proze i kapab ogmant ou lapresyasyon pour relasyon ki egziste ant bann diferan parti Labib. Si ou Labib i annan bann referans ki refer avek lezot verse, sa i kapab diriz ou ver bann detay istorik ek bann resi ki relye avek sa verse. Zot kapab ed ou pour konpran bann sirkonstans ki ti donn rezon pour ekrir diferan Psonm osi byen bann let ki ti ganny ekrir par bann zapot Zezi Kri. Étude perspicace des Écritures i fourni en kantite lenformasyon adisyonnel lo bann dimoun, lo bann landrwa, ek diferan kalite ki ganny mansyonnen dan Labib. Bann latab i port latansyon lo lakonplisman bann profesi Labib ki montre lekel bann lerwa ek profet ki ti viv sa lepok, e donn bann dat apepre pour bokou levennman Labib.

Anmezir ki ou medit lo sa ki ou aprann, ou pou konpran rezon akoz serten kondisyon ti devlope parmi pep Bondye. Ou pou dekouver akoz ki Zeova ti azir dan en tel fason avek son pep. Ou pou vwar konman ki Zeova i evalye aksyon bann gouvernman, bann pep, ek bann endividi. Sa pou donn ou en pli gran konpreansyon lo bann panse Bondye.

Listwar Labib pou vin pli enteresan pour ou ler ou esey imazin dan ou lespri sa rezyon kot bann levennman ti arive. Map bann pei dan letan Biblik i revel teren osi byen ki distans ant bann landrwa. Par egzanp, apepre ki bor bann Izraelit ti travers Lanmer Rouz? Ki ti grander Later Promiz? Ki kantite distans ki Zezi ti kouver pandan ki i ti akonpli son minister lo later? Ki bann landrwa ki zapot Pol ti vwar dan son bann voyaz misyonner? Bann map ek bann deskripsyon zeografik i transmet bann detay ki pou fer ou lektir vivan. Kote ki ou kapab trouv map bann pei dan letan Biblik? Serten i trouve dan Les Saintes Écritures Traduction du monde nouveau. Sa de volim Étude perspicace i kontyen apepre 70 map e alafen sa premye volim i annan en lalis tou bann map avek zot nimero paz. Ou kapab servi osi Index des publications pour trouv lezot map. Si sa bann resours pa disponib, servi bann map ki’n ganny pibliye dan Latour Veyer pour ed ou dan ou lektir Labib.

Dan Lekritir Ebre, Lerwa David ti glorifye Zeova, an dizan: “Konbyen ki ou bann panse i presye! O Bondye, ki gran kantite zot arive!” (Pson. 139:17) Dan bann Lekritir Grek Kretyen, zapot Pol ti loue Zeova parski “limenm ki’n briye dan nou leker pour donn lalimyer konnesans son laglwar ki iliminen lo figir Kris.” (2 Kor. 4:6) Pol ti viv plizyer letan apre David; me, zot tou le de zot ti pran plezir dan Parol Bondye. Ou osi ou kapab pran plezir si ou pran letan pour lir tou sa ki Zeova in donn ou dan bann paz son parol enspire.