1, 2. Ki bann sirveyan rezyonal in remarke dan bokou kongregasyon?

SIRVEYAN rezyonal ti pros pour fini son renyon avek konsey ansyen. Ler i ti get zot, i ti santi bokou lafeksyon pour zot akoz zot ti pe travay dir pour pran swen avek kongregasyon. Serten ti menm kapab vin son papa. Par kont, i ti annan en keksoz ki ti pe fatig li. I ti demann zot: “Frer, ki zot in fer pour form lezot pour desarz plis responsabilite dan kongregasyon?” Zot ti rapel ki pandan son dernyen vizit i ti’n ankouraz zot pour pran plis letan pour form lezot. Finalman, en ansyen ti reponn: “Fransman, nou pa’n fer preski nanryen.” Lezot ansyen ti balans latet konmkwa ki zot dakor avek sa ki sa ansyen ti’n dir.

² Si ou en ansyen, sirman ou kapab konpran sa ki ti pase dan sa renyon sa zour. Bann sirveyan rezyonal partou dan lemonn in remarke ki bann ansyen i bezwen pran plis letan pour form bann frer, zenn konman vye, pour ede pran zwen avek kongregasyon. Me sa i kapab difisil. Akoz?

3. (a) Ki mannyer Labib i montre ki i enportan pour form lezot e akoz sa i devret enteres nou tou? (Vwar not.) (b) Akoz serten ansyen i kapab vwar li difisil pour form lezot?

³ Konman en ansyen, san dout ou realize ki i enportan pour pran letan pour form lezot frer.a Ou konnen ki nou bezwen plis frer pour ki bann kongregasyon i reste for spirityelman e ede ki bann nouvo kongregasyon i kapab ganny formen. (Lir Izai 60:22.b) Ou osi konnen ki Parol Bondye i ankouraz ou pour “ansenny lezot.” (Lir 2 Timote 2:2.) Me parey sa bann ansyen ki nou’n mansyonnen o konmansman ou kapab vwar li difisil pour fer sa. Apre ki ou’n pran swen avek bezwen ou fanmir, okip ou travay, desarz ou responsabilite dan kongregasyon e fer lezot keksoz irzan, petet ou santi ki ou nepli annan letan pour form lezot. Si sa i leka, annou vwar akoz ou devret konsider li enportan pour form lezot.

I IRZAN POUR FORM LEZOT

4. Kwa ki kapab fer serten ansyen tarde pour form lezot?

⁴ Kwa ki kapab fer serten ansyen vwar li difisil pour met letan de kote pour form lezot? Petet serten i mazinen: ‘I enportan pour form lezot, me pour lemoman i annan keksoz pli irzan pour fer dan kongregasyon. Si mon pa form lezot la konmela, sa pa pou afekte kongregasyon.’ Menm si i vre ki ou bezwen pran swen avek serten keksoz deswit, si ou tarde pour form lezot, sa i kapab annan en move lefe lo byennet spirityel kongregasyon.

5, 6. Ki nou kapab aprann avek legzanp en drayver e lafason ki i pran swen avek son loto? Ki mannyer sa legzanp i kapab ganny konpare avek formasyon ki ganny donnen dan kongregasyon?

⁵ Reflesir lo sa legzanp: En drayver i konnen ki pour pran swen avek son loto e fer sir ki son masin i bon, i bezwen tanzantan sanz delwil. Kantmenm sa, petet pour li i pa sitan irzan pour sanz delwil ki met bennzin dan son loto. Apre tou, si i pa met bennzin, byento son loto pou aret mars net. Me sa dimoun i kapab dir dan li menm, ‘Si mon pa ganny letan sanz delwil, toutfason mon loto pour kontinyen roule, omwen pour en pe letan.’ Me ki danze i annan? Si en drayver i tarde pour sanz delwil, to ou tar sa loto pou nepli marse. Si sa i arive, i pou bezwen depans plis larzan ek letan pour fer reparasyon lo sa loto. Ki leson nou tire avek sa legzanp?

⁶ Bann ansyen i bezwen okip deswit bann keksoz enportan dan kongregasyon, si non sa pou annan en move lefe lo kongregasyon. Alor zis parey sa drayver dan sa legzanp i fer sir ki i kontinyen met bennzin dan son loto, bann ansyen i bezwen “verifye sa ki pli enportan.” (Fili. 1:10, NW) Me serten ansyen i telman okipe pe pran swen avek bann keksoz enportan dan kongregasyon ki zot neglize form lezot, zis parey sa drayver ki neglize pran swen avek son masin loto. Me si bann ansyen i tarde pour form lezot frer, to ou tar i pou napa ase frer kalifye pour pran swen avek sa ki bezwen ganny fer dan kongregasyon.

7. Ki mannyer nou devret vwar bann ansyen ki met letan de kote pour form lezot?

⁷ I kler alor ki nou pa devret krwar ki formasyon pa sitan enportan. Bann ansyen ki enterese avek byennet kongregasyon e ki pran letan pour form lezot i bann administrater ki saz e zot en vre benediksyon pour tou dimoun dan kongregasyon. (Lir 1 Pyer 4:10.) Ki mannyer kongregasyon i benefisye?

EN BON FASON POUR SERVI OU LETAN

8. (a) Kwa ki fer bann ansyen anvi form lezot? (b) Ki responsabilite irzan tou ansyen ki servi kot i annan en pli gran bezwen i annan? (Vwar sa bwat “En misyon irzan.”)

⁸ Menm bann ansyen pli eksperyanse i devret modes e realize ki vi ki laz pe antre sa pou diminyen lakantite louvraz ki zot kapab fer pour kongregasyon. (Mik. 6:8) Zot devret osi pran kont ki “letan ek levennman san ekspekte” i kapab fer ki en sel kou zot pa kapab desarz bann responsabilite dan kongregasyon. (Ekle. 9:11, 12; Zak 4:13, 14) Alor bann ansyen ki annan lentere senser e byennet bann serviter Zeova aker, i travay dir pour ansenny bann zenn frer sa ki zot in aprann diran bann lannen ki zot in servi Zeova fidelman.​—Lir Psonm 71:17, 18.c

9. Ki levennman ki pe vini ki fer sa formasyon vreman enportan?

⁹ Bann ansyen ki form lezot i osi en benediksyon pour kongregasyon dan lezot fason. Zot fer kongregasyon pli solid. Ki mannyer sa? Zefor ki bann ansyen i fer pour form lezot i fer ki plis frer i pare pour ed kongregasyon reste ferm e ini, pa zis la konmela, me sirtou pandan gran ladetres ki pe vini. (Ezek. 38:10-12; Mik. 5:5, 6) Alor bann ansyen, depi la konmela regilyerman pran letan pour form lezot dan ou servis pour Zeova.

10. Ki en ansyen i kapab bezwen fer pour trouv letan pour form lezot?

¹⁰ Byensir, nou konpran ki letan ki ou pase pour pran swen avek bann keksoz enportan dan kongregasyon i kapab fer ou santi ki ou deza napa ase letan. Alor, petet ou bezwen pran en pe lo sa letan ki ou servi pour pran swen avek kongregasyon pour form lezot. (Ekle. 3:1) Sa ti pou en bon fason pour servi ou letan.

KREE EN BON LATMOSFER

11. (a) Kwa ki enteresan konsernan bann sizesyon ki bann ansyen sorti dan diferan pei in donnen lo formasyon? (b) Dapre Proverb 15:22, akoz i itil pour egzamin sizesyon lezot ansyen?

¹¹ Resaman, en group ansyen ki’n reisi ed bann frer spirityelman ti ganny demande ki mannyer zot form lezot.d Menm si sirkonstans sa bann frer i diferan, konsey ki zot ti donnen ti preski parey. Ki sa i montre? Sa i montre ki bann formasyon ki baze lo Labib i aplik pour tou bann ki pe ganny formen “partou dan tou bann [“kongregasyon,” NW]” zis parey dan letan zapot Pol. (1 Kor. 4:17, nou ki’n met an italik.) Alor dan sa lartik ek sa lot, nou pou vwar serten sizesyon ki sa bann ansyen ti fer. (Prov. 15:22) Pour fer li fasil, dan sa de lartik nou pou apel bann ki pe donn formasyon konman “ansenyan” e bann ki pe ganny formen konman “zelev.”

12. Ki en ansenyan i bezwen fer e akoz?

¹² En ansenyan i bezwen kree en bon latmosfer pour form lezot. Zis parey en zardinyen i bezwen kas later avan i senm lagrenn, en ansenyan i bezwen prepar leker sa zelev avan ansenny li bann nouvo keksoz. Alor, ki mannyer bann ansenyan i kapab kree en bon latmosfer pour form lezot? Par servi menm lapros ki en profet dan lepase. Ki lapros i ti servi?

13-15. (a) Ki Zeova ti demann Samyel pour fer? (b) Ki mannyer Samyel ti akonpli son responsabilite? (Vwar portre lo paz 3.) (c) Akoz bann ansyen ozordi i devret enterese avek sa resi konsernan Samyel?

¹³ En zour, anviron 3,000 an pase Zeova ti dir profet Samyel ki ti en bon laz sa letan: “Demen ver sa ler mon pou anvoy en zonm kot ou sorti dan pei Benzamen. Ou devret swazir li konman sef lo mon pep Izrael.” (1 Sam. 9:15, 16) Samyel ti realize ki i ti pou nepli gid nasyon Izrael e ki Zeova ti’n demann li pour swazir en sikseser. Petet Samyel ti demann son lekor, ‘Ki mannyer mon kapab form sa zonm pour akonpli son travay?’ Samyel ti annan en plan antet ki mannyer pour fer li.

¹⁴ Lannmen, kan Samyel ti vwar Sail, Zeova ti dir li: “Lala sa zonm.” Deswit Samyel ti fer sa ki i ti’n plàn. I ti envit Sail pour en repa dan lasal a manze. I ti donn Sail ek son serviter sa pli bon landrwa asize e apre i ti donn Sail sa pli bon bout lavyann e Samyel ti dir: “Manze akoz zot in anmas li pour ou pour sa lokazyon.” Apre ki zot ti’n manze, Samyel ti envit Sail kot li. Lo semen zot ti ganny en konversasyon enteresan. Apre sa bon repa ek sa pti marse, Samyel ti anvi profit sa bon latmosfer, alor i ti envit Sail pour vin lo twa son lakaz. Dan sa bon pti ler labrin, Samyel ti “kontinyen koz avek Sail lo twa lakaz” ziska ki zot ti al dormi. Son lannmen Samyel ti swazir Sail par vers delwil lo son latet, anbras li e donn li plis formasyon. Apre sa Sail ti ale, i ti’n fini pare pour sa ki ti pou arive.​—1 Sam. 9:17-27; 10:1.

¹⁵ Ou pou dakor ki swazir en zonm pour vin sef en nasyon i pa parey form en frer pour vin en ansyen oubyen en asistan ministeryel dan kongregasyon. Me kantmenm sa, bann ansyen ozordi i kapab aprann plizyer leson enportan atraver lafason ki Samyel ti prepar leker Sail. Annou vwar de leson.

BANN ANSENYAN KI PARE POUR FORMEN E BANN VRE ZANMI

16. (a) Ki mannyer Samyel ti santi ler nasyon Izrael ti demande pour ganny en lerwa? (b) Ki mannyer Samyel ti reazir ler Zeova ti dir li swazir Sail konman lerwa?

¹⁶ Pare pour formen, pa ezite. Ler Samyel ti fek tande ki bann Izraelit ti anvi en lerwa imen, i ti dezapwente e santi ki i ti’n ganny rezete par son pep. (1 Sam. 8:4-8) Anfet, telman i pa ti anvi fer sa ki zot ti’n demande, trwa fwa Zeova ti bezwen dir li ekout zot. (1 Sam. 8:7, 9, 22) Kantmenm sa, Samyel pa ti ankoler, ni zalou sa zonm ki ti pou ranplas li. Ler Zeova ti demann sa profet pour swazir Sail konman lerwa, i ti obei, pa akoz i ti son devwar me i ti pare pour fer li akoz i ti kontan Zeova.

17. Ki mannyer bann ansyen denozour i imit legzanp Samyel e ki satisfaksyon zot gannyen?

¹⁷ Parey Samyel, bann ansyen ki annan leksperyans i tret bann ki zot pe formen dan en fason zantiy. (1 Pyer 5:2) Sa bann ansyen pa ezite form lezot e zot pa per pour partaz serten privilez dan kongregasyon avek bann zelev. Bann ansyen ki pare pour ansenny lezot i rekonnet ki bann ki pare pour aprann i bann kado presye dan kongregasyon, ki “travay ansanm avek zot,” me pa konman bann ki pe fer konpetisyon avek zot. (2 Kor. 1:24; Ebr. 13:16) Pa bann ansenyan ki met lentere lezot premye i ganny en gran lazwa ler zot vwar bann zelev servi zot abilite pour benefisye kongregasyon!​—Akt 20:35.

18, 19. Ki mannyer en ansyen i kapab prepar leker en zelev e akoz i enportan pour fer keksoz dan sa fason?

¹⁸ Vin en zanmi, pa zis en ansenyan. Sa zour ki profet Samyel ti zwenn Sail i ti’n kapab tir son fyol delwil, vitman vitman vid li lo latet Sail, swazir li pour vin lerwa e dir li ale, me i pa ti pou’n prepar li. Samyel pa ti fer sa, o kontrer i ti pran son letan pour prepar leker Sail ptitapti. Sa profet ti pran en repa avek li, zot ti fer en pti pronmnad, en gran konversasyon e apre zot ti byen repoze. I ti zis apre sa ki Samyel ti vwar ki i ti sa bon moman pour swazir Sail konman lerwa.

¹⁹ Pareyman, en ansenyan ozordi i devret konmans son formasyon par pran letan pour devlop en bon latmosfer ek lanmitye avek sa zelev. Lafason ki en ansyen i devlop sa kalite lanmitye pou varye tou depan lo son pei, sirkonstans ek kiltir. Par kont, nenport landrwa ki ou reste, menm si ou en ansyen ki tre okipe me ou met letan dekote pour pas avek en zelev, sa i konmsi ou pe dir li, “Ou enportan pour mwan.” (Lir Romen 12:10.) Sertennman, bann zelev dan nenport ki landrwa pou vreman apresye sa swen ek latansyon ki ou donn zot.

20, 21. (a) Ki mannyer ou ti pou dekrir en bon ansenyan? (b) Ki nou pou diskit lo la dan sa lartik swivan?

²⁰ Ansyen, rapel: En bon ansenyan pa zis enn ki kontan pour form lezot, me enn ki kontan sa dimoun ki i pe formen. (Konpar Zan 5:20.) Sa i enportan akoz ler sa zelev i santi ki ou vreman enterese avek li, i pou pare pour aprann. I pour sa rezon ansyen, anmezir ki ou form lezot, fer zefor pour vin plis ki en ansenyan, vin en zanmi.​—Prov. 17:17; Zan 15:15.

²¹ Apre ki en ansyen in prepar leker sa zelev, i kapab konmans ed li devlop son abilite. Ki mannyer sa ansyen i kapab fer sa? Nou pou diskit lo la dan sa lartik swivan.

1. (a) Ki bann serviter Bondye in konpran depi lontan konsernan formasyon e ki mannyer nou kapab aplik sa ozordi? (b) Ki nou pou egzaminen dan sa lartik?

DEPI lontan bann serviter Bondye in konpran ki formasyon i ede pour kapab reisi. Par egzanp, Abram ti “ralye son bann zonm ki ti’n ganny formen” pour al sov Lot e zot ti reisi. (Zen. 14:14-16) Pandan letan Lerwa David, bann ki ti sante dan tanp ti “ganny formen pour sant pour Zeova” e anmenn loner lo Bondye. (1 Kron. 25:7) Ozordi nou pe lager dan en lager spirityel kont Satan ek bann ki swiv li. (Efe. 6:11-13) Nou pe osi fer tou zefor pour loue Zeova. (Ebr. 13:15, 16) Alor, parey bann serviter Bondye dan lepase, pour nou reisi nou bezwen ganny formen. Dan kongregasyon, Zeova in konfye bann ansyen sa responsabilite pour form lezot. (2 Tim. 2:2) Ki metod bann ansyen eksperyanse pe servi pour form bann frer pour pran swen avek kongregasyon?

RANFORSI SPIRITYALITE SA ZELEV

2. Avan ki en ansyen i ansenny en zelev serten abilite, ki i kapab deside fer e akoz?

² Konman en ansyen ou kapab ganny konpare avek en zardinyen. Avan ki en zardinyen i plant lagrenn, i bezwen met langre dan later pour fer li pli prodiktif. Pareyman, avan ki ou ansenny en frer ki annan mwens leksperyans ki mannyer pour devlop serten abilite, petet ou remarke ki ou pou bezwen ankouraz li atraver serten verse Labib pour li pli pare pour aksepte sa formasyon.​—1 Tim. 4:6.

3. (a) Ki mannyer parol Zezi dan Mark 12:29, 30 i kapab ganny servi dan en konversasyon avek en zelev? (b) Ki lefe lapriyer en ansyen i kapab annan lo en zelev?

³ Pour konnen ki kantite laverite in enfliyans panse ek fason azir sa zelev, ou kapab demann li, ‘Ki mannyer ou dedikasyon avek Zeova in sanz lafason ki ou viv ou lavi?’ Sa kestyon i kapab fer ou konmans en bon konversasyon pour montre lafason ki nou kapab servi Zeova avek tou nou leker. (Lir Mark 12:29, 30.) Petet a lafen sa konversasyon, ou kapab priye pour ki Zeova i donn sa zelev lespri sen ki i bezwen pour fini son formasyon. Pa i pou ankourazan pour sa frer tann ou priy pour li!

4. (a) Donn legzanp bann resi Labib ki kapab ed en zelev progrese spirityelman. (b) Ki lobzektif bann ansyen i annan antet kan zot pe form lezot?

⁴ Kan ou konmans form sa zelev, i ti a byen ki ou egzamin serten resi Labib avek sa zelev pour montre nesesite pour toultan pare pour ede, pour diny konfyans e annan limilite. (1 Rwa. 19:19-21; Nee. 7:2; 13:13; Akt 18:24-26) Sa bann kalite i vreman enportan pour sa zelev zis parey langre i enportan pour later. Sa i fer li progrese pli vit spirityelman. Jean-Claude, en ansyen Lafrans ti dir: “Mon lobzektif ler mon form en zelev i pour ed li vin matir spirityelman. Mon rod bann lokazyon kot nou kapab lir en verse presi ansanm pour ‘ouver lizye’ sa zelev lo ‘bann keksoz merveye’ ki dan Parol Bondye.” (Ps. 119:18) Dan ki lezot fason bann ansyen i kapab ranforsi en zelev?

PROPOZ BANN LOBZEKTIF E EKSPLIKE AKOZ

5. (a) Akoz i enportan pour koz avek en zelev lo bann lobzektif spirityel? (b) Akoz bann ansyen i bezwen form bann ki ankor zenn? (Vwar not.)

⁵ Demann en zelev, ‘Ki lobzektif spirityel ou annan?’ Si i napa enn antet, ed li pour etabli en lobzektif rezonnab ki i kapab atenn. Rakont li avek lantouzyasm lo en lobzektif spirityel ki ou’n deza annan e ki mannyer ou ti kontan ler ou ti atenn sa lobzektif. Menm si sa metod i paret senp, i efikas. Victor, en ansyen ki en pionye Lafrik i rapel: “Kan mon ti zenn, en ansyen ti demann mwan detrwa kestyon konsernan mon bann lobzektif. Sa bann kestyon ti ed mwan pour konmans reflesir seryezman lo mon minister.” Bann ansyen eksperyanse i osi fer resorti ki i enportan pour konmans form bann frer kan zot ankor zenn, petet menm ler zot ankor adolesan. Ou kapab donn zot bann responsabilite dan kongregasyon dapre zot laz. Sa formasyon ki bann zenn i gannyen depi byen boner pou ed zot reste konsantre lo bann lobzektif spirityel anmezir ki zot grandi menm si i annan en kantite keksoz ki kapab distrer zot.​—Lir Psonm 71:5, 17.ab

6. Dan ki fason Zezi ti form lezot?

⁶ En lot fason ki ou kapab motiv en zelev pour anvi servi lezot dan kongregasyon i pour eksplik li akoz i bezwen fer en keksoz olye ki zis dir li kwa ki i bezwen fer. Ler ou fer sa, ou pe imit Zezi, sa Gran Ansenyan. Par egzanp, avan ki Zezi ti donn bann zapot lord pour fer disip, i ti eksplik zot akoz zot devret obeir. I ti dir: “Mon’n ganny tou pouvwar dan lesyel ek lo later.” Apre i ti azoute: “Ale e fer tou pep vin mon bann disip.” (Mat. 28:18, 19) Ki mannyer ou kapab imit lafason ki Zezi ti form lezot?

7, 8. (a) Ki mannyer bann ansyen i kapab imit lafason ki Zezi ti form lezot? (b) Akoz i enportan pour felisit en zelev? (c) Ki sizesyon ki kapab ed bann ansyen pour form lezot? (Vwar sa bwat “Ki mannyer pour form lezot.”)

⁷ Servi Labib pour ed en zelev konpran akoz i bezwen fer sa ki i’n ganny demande pour fer. Dan sa fason ou ansenny li pour fer keksoz akoz bann prensip Labib, pa zis akoz bann lareg. Par egzanp, meton ou demann en frer pour fer sir ki larantre Lasal Rwayonm i reste prop e napa nanryen ki pe bar larantre. Ou kapab montre li Tit 2:10 e eksplike ki son travay dan Lasal Rwayonm pou “fer loner lansennyman . . . Bondye, nou Sover.” Ou osi kapab demann sa zelev pour mazin bann aze dan kongregasyon e lafason ki sa travay pou benefisye zot. Par fer sa bann kalite konversasyon ler ou pe form sa zelev, ou pou ed li konsantre plis lo dimoun dan plas bann lareg. I pou ganny lazwa ler i vwar ki bann frer ek ser i benefisye avek sa servis ki i rann zot.

⁸ Deplis, pa bliye felisit sa zelev ler i fer zefor pour aplik ou bann sizesyon. Akoz i enportan pour fer sa? Ler ou felisit en zelev senserman sa i konmsi ou pe aroz en plant, i fer li pouse.​—Konpar Matye 3:17.

EN LOT DIFIKILTE

9. (a) Akoz i kapab difisil pour bann ansyen form lezot dan bann pei devlope? (b) Akoz laverite pa en priyorite dan lavi serten zenn frer?

⁹ Bann ansyen dan bann pei devlope i kapab vwar li difisil pour ankouraz bann frer batize ki dan zot 20 oubyen 30 an pour fer plis dan kongregasyon. Nou ti demann bann ansyen eksperyanse dan apepre 20 pei pour dir nou akoz zot krwar ki serten zenn frer i ezite pour aksepte bann privilez dan kongregasyon. Laplipar zot ti dir ki ler serten frer ti zenn, zot paran pa ti ankouraz zot pour fikse bann lobzektif dan servis Zeova. Anfet, dan serten ka, ler bann zenn ti anvi fikse sa bann lobzektif, zot paran ti ankouraz zot pour plito pourswiv bann letid avanse oubyen en karyer dan sa lemonn. Laverite pa ti zanmen vin en priyorite dan lavi sa bann zenn.​—Mat. 10:24.

10, 11. (a) Ki mannyer en ansyen i kapab ptitapti ed en frer sanz son fason panse? (b) Ki verse Labib en ansyen i kapab servi avek sa frer e akoz? (Vwar not.)

¹⁰ Si en frer pa paret enterese pour fer plis dan kongregasyon, i pou demann en ta travay ek pasyans pour sanz son fason panse, me i posib pour fer sa. Parey en zardinyen i kapab ed son plant pour pous drwat par servi en pike, ptitapti ou kapab ed serten frer pour rekonnet ki zot bezwen sanz zot latitid pour aksepte plis responsabilite dan kongregasyon. Me ki mannyer ou kapab fer sa?

¹¹ Pran letan pour devlop en bon lanmitye avek li. Dir li ki kongregasyon i bezwen son led. Apre, anmezir ki letan i pase, asiz avek li e rezonn avek li lo bann verse Labib ki kapab ed li pour reflesir lo son dedikasyon avek Zeova. (Ekle. 5:4; Iza. 6:8; Mat. 6:24, 33; Lik 9:57-62; 1 Kor. 15:58; 2 Kor. 5:15; 13:5) Petet ou kapab demann li, ‘Ki ou ti promet Zeova ler ou ti dedye ou lavi avek li?’ Esey tous son leker par demann li, ‘Ki mannyer ou krwar Zeova ti santi ler ou ti batize?’ (Prov. 27:11) ‘Ki mannyer Satan ti santi?’ (1 Pyer 5:8) Pa zanmen souzestim lefe ki bann verse Labib apropriye i kapab annan lo en frer.​—Lir Ebre 4:12.c

BANN ZELEV, RESTE FIDEL

12, 13. (a) Ki latitid Elisa ti demontre konman en zelev? (b) Ki mannyer Zeova ti rekonpans Elisa pour son fidelite?

¹² Zenn frer, kongregasyon i bezwen ou led! Kwa ki pou ed ou reisi dan ou servis pour Bondye? Pour trouv larepons, annou diskit lo serten levennman ki ti arive dan lavi en zelev dan lepase.

¹³ Apepre 3,000 pase, profet Eliya ti envit Elisa, en zenn, pour vin son asistan. Deswit Elisa ti aksepte e i ti fidelman servi sa profet par fer bann travay vreman senp. (2 Rwa. 3:11) Eliya ti form Elisa pour anviron si-z-an. Apre sa, ler Eliya ti pros pour fini son travay Izrael, i ti demann son asistan pour aret swiv li. Me trwa fwa Elisa ti dir avek Eliya: “Mon pa pou kit ou.” I ti determinen pour reste avek son ansenyan pli lontan posib. An retour, Zeova ti rekonpans Elisa pour son lwayote ek fidelite par permet li vwar ler Eliya ti ganny pran dan en tanpet divan.​—2 Rwa. 2:1-12.

14. (a) Ki mannyer bann zelev ozordi i kapab imit Elisa? (b) Akoz i vreman enportan pour en zelev fidel?

¹⁴ Konman en zelev, ki mannyer ou kapab imit legzanp Elisa ozordi? Deswit aksepte travay ki ou ganny demande pour fer, menm bann ki pli senp. Konsider ou ansenyan konman en zanmi e les li konnen ki kantite ou apresye zefor ki i fer pour ou. Annefe, lafason ki ou reazir i kapab konmsi ou pe dir li: “Mon pa pou kit ou.” Par lao tou, desarz sa responsabilite ki ou’n gannyen avek fidelite. Akoz sa i sitan enportan? Parski i zis apre ki ou’n demontre ki ou fidel e diny konfyans ki bann ansyen pou asire ki Zeova i anvi konfye ou avek plis responsabilite dan kongregasyon.​—Ps. 101:6; lir 2 Timote 2:2.

RESPEKTE BANN ANSYEN KI ANNAN LEKSPERYANS

15, 16. (a) Dan ki fason Elisa ti demontre respe pour son ansenyan? (Vwar portre lo paz 9.) (b) Kwa ki ti fer lezot profet annan konfyans dan Elisa?

¹⁵ Sa resi konsernan Elisa ki ti sikseser Eliya, i osi montre ki mannyer bann frer ozordi i kapab demontre respe anver bann ansyen ki annan leksperyans. Apre ki Eliya ek Elisa ti’n vizit en group profet Zeriko, sa de zonm ti mars ziska Larivyer Zourden. Laba, “Eliya ti pran son lenz ofisyel, roul li e tap delo e zot ti separ an de.” Apre ki zot ti’n travers sa larivyer ki ti’n sek, sa de zonm ti kontinyen “marse . . . an menm tan [ki zot ti] pe diskite.” I kler ki Elisa pa ti krwar ki aprezan i ti konn tou. I ti kontinyen pran aker tou sa ki i ti’n ganny ansennyen ziska ki Eliya ti kit li. Apre sa, Eliya ti mont dan lesyel dan en tanpet divan. Pli tar, ler Elisa ti ariv ankor kot Larivyer Zourden, i ti tap delo avek lenz Eliya e dir: “Oli Zeova, Bondye Eliya?” Ankor enn fwa, delo ti separ an de.​—2 Rwa. 2:8-14.

¹⁶ Eski ou’n remarke ki premye mirak ki Elisa ti fer ti egzakteman parey avek dernyen mirak Eliya? Akoz sa i enteresan? Aparaman, Elisa pa ti krwar ki vi ki aprezan li ki ti ansarz ki i ti bezwen fer keksoz dan son fason. O kontrer, Elisa ti kontinyen swiv metod Eliya, par fer sa i ti montre respe pour son ansenyan e sa ti fer lezot profet annan konfyans dan Elisa. (2 Rwa. 2:15) Me pli tar, pandan sa 60 lannen ki Elisa ti servi konman profet, Zeova ti permet li fer bokou plis mirak ki Eliya. Konman en zelev, ki leson ou kapab aprann avek legzanp Elisa?

17. (a) Ki mannyer bann zelev ozordi i kapab imit latitid Elisa? (b) Avek letan, ki mannyer petet Zeova i servi bann zelev?

¹⁷ Pa mazinen ki dek ki ou resevwar serten responsabilite dan kongregasyon, ou bezwen fer keksoz dan en fason konpletman diferan avek sa ki ti ganny fer oparavan. Pa bliye ki rezon akoz i annan sanzman i pa akoz ou ki anvi me sa i depan lo bezwen kongregasyon ek direksyon ki nou gannyen avek lorganizasyon Zeova. Lefet ki Elisa ti kontinyen servi metod Eliya, i ti demontre respe pour son ansenyan e ed lezot profet pour annan konfyans dan li. Pareyman, si ou kontinyen servi bann metod baze lo Labib ki ou bann ansenyan, setadir bann ansyen eksperyanse ti servi, ou pou demontre respe pour zot e bann frer ek ser pou annan konfyans dan ou. (Lir 1 Korentyen 4:17.) Me, anmezir ki ou ganny plis leksperyans, san dout ou pou arive aplik bann sanzman ki pou ed kongregasyon reste azour avek lorganizasyon Zeova ki pe kontinyen al annavan. Anfet, parey dan ka Elisa, petet avek letan Zeova pou ed ou fer plis travay ki ou bann ansenyan, zis parey i ti ed Elisa.​—Zan 14:12.

18. Akoz i vreman enportan pour form bann frer dan kongregasyon?

¹⁸ Nou swete ki bann sizesyon dan sa lartik ek sa enn avan pou motiv plis ansyen pour pran letan pour form bann frer. I ti a byen ki bann frer kalifye i pare pour aksepte pour ganny formen e servi sa ki zot aprann pour pran swen avek pep Zeova. Si zot fer sa, sa pou fortifye lafwa bann frer ek ser dan lemonn antye e ed sakenn de nou pour reste fidel pandan bann moman eksitan ki pe vini.