TOU le semenn, laplipar kongregasyon Temwen Zeova i organiz en diskour piblik ki baze lo en size Biblik.

Si ou en ansyen oubyen en asistan ministeryel, eski ou pe montre levidans ki ou en orater piblik efikas, en ansennyan? Si wi, ou kapab ganny envite pour donn en diskour piblik. Lekol Minister Teokratik in ed plizyer dizenn milye frer kalifye pour sa privilez. Ler ou ganny dezinyen pour donn en diskour piblik, kote ki ou devret konmanse?

Etidye sa Plan

Avan ki ou fer okenn resers, lir sa plan e medit lo la ziska ki ou konpran li. Gard antet son tenm, ki tit sa diskour. Ki sa ki ou bezwen ansenny ou lodyans? Ki ou lobzektif?

Vin familye avek bann tit prensipal. Analiz sa bann pwen prensipal. Ki mannyer zot relye avek sa tenm? Anba sak pwen prensipal, plizyer pwen segonder i ganny mansyonnen. Bann lide ki siport bann pwen segonder i ganny ekrir anba sa bann pwen segonder. Egzamin konman ki sak seksyon sa plan i batir lo sa enn presedan, i entrodwir sa lot apre, e ede pour akonpli lobzektif sa diskour. Enn fwa ki ou konpran son tenm, lobzektif sa diskour, e konman bann pwen prensipal i akonpli sa bi, alor ou aprezan pare pour konmans devlop sa lenformasyon.

Okonmansman ou kapab vwar li itil pour mazin ou diskour konman kat oubyen senk pti diskour, sakenn avek en pwen prensipal. Prepar zot sakenn son tour.

Sa plan ki ganny fourni i en zouti preparasyon. Plan li menm i pa bann not ki ganny servi pour prezant sa diskour. I parey en leskelet. Ou pou bezwen met lavyann lo la, donn li en leker e donn li lavi.

Servi bann Verse

Zezi Kri ek son bann disip ti batir zot lansennyman lo Lekritir. (Lik 4:16-21; 24:27; Akt 17:2, 3) Ou osi ou kapab fer parey. Labib i devret baz pour ou diskour. Olye ki senpleman eksplik e aplik bann deklarasyon ki annan dan sa plan ki’n ganny fourni, konpran konman sa bann verse i siport sa bann deklarasyon, e apre ansenny par servi Labib.

Pandan ki ou prepar ou diskour, egzamin sak verse ki’n ganny mansyonnen dan sa plan. Not konteks sa bann verse. Serten verse i kapab senpleman fourni bann lenformasyon anplis ki itil. Pa fodre lir tou oubyen fer komanter lo la pandan ou prezantasyon. Swazir sa bann ki pli bon pour ou lodyans. Si ou konsantre lo bann verse ki’n ganny site lo sa plan, i probab ki ou pa pou bezwen servi lezot referans Biblik.

Sikse ou diskour pa depan lo lakantite verse ki ganny servi, me lo kalite lansennyman. Ler ou pe entrodwir bann verse, montre akoz ki zot pe ganny servi. Pran letan pour aplik zot. Apre ki ou’n lir en verse, kit ou Labib ouver anmezir ki ou diskit sa verse. I tre probab ki ou lodyans pou fer parey. Konman ki ou kapab atir latansyon ou lodyans e ed zot pour benefisye pli plennman avek Parol Bondye? (Nee. 8:8, 12) Ou kapab fer sa par leksplikasyon, ilistrasyon, ek laplikasyon.

Leksplikasyon. Ler ou pe prepare pour eksplik en verse kle, demann ou lekor: ‘Ki sa i vedir? Akoz mon pe servi sa verse dan mon diskour? Ki bann dimoun dan lodyans i kapab pe demann zot lekor konsernan sa verse?’ Petet ou bezwen analiz son konteks, sitiasyon zeneral ki ti egziste sa letan, sirkonstans presi sa verse, lenpresyon ki bann parol i transmet, lentansyon sa ekriven enspire. Sa i demann resers. Ou pou trouv en kantite lenformasyon valab dan bann piblikasyon ki ganny fourni par “lesklav fidel e pridan.” (Mat. 24:45-47, NW) Pa esey eksplik tou keksoz lo sa verse, me eksplike akoz ki ou’n envit ou lodyans lir sa verse an rapor avek sa pwen ki pe ganny diskite.

Ilistrasyon. Bi bann ilistrasyon se pour ed ou lodyans konpran pli oprofon en serten pwen oubyen pour ed zot rapel en pwen oubyen en prensip ki ou’n diskite. Bann ilistrasyon i ed dimoun konpran sa ki ou’n dir zot e zot asosye li avek en keksoz ki zot deza konnen. Se sa ki Zezi ti fer ler i ti donn son Sermon lo Montanny ki byen koni. “Bann zwazo ki anvole dan lezer,” “bann lis maron,” ‘en laport ki etrwat,’ en “lakaz lo ros,” ek bokou lezot lekspresyon parey, ki ti fer son lansennyman annan pwa, kler, e inoubliyab.—Mat., sapit 5–7.

Laplikasyon. Leksplikasyon ek ilistrasyon en verse pou transmet konnesans, me se laplikasyon sa konnesans ki anmenn rezilta. I vre, i responsabilite sa bann ki dan ou lodyans pour azir lo mesaz Labib, me ou kapab ed zot konpran kwa ki devret ganny fer. Enn fwa ki ou asire ki ou lodyans i konpran sa verse ki pe ganny diskite e vwar son relasyon avek sa pwen ki pe ganny diskite, pran sifizaman letan pour montre zot konman i devret fer lefe lo zot krwayans ek kondwit. Mansyonn bann benefis pour rezet bann move lide oubyen kondwit ki pa an armoni avek sa laverite ki pe ganny diskite.

Anmezir ki ou reflesir lo konman pour aplik Labib, rapel ki dimoun ki dan ou lodyans i sorti dan diferan nivo lavi e fer fas avek diferan kalite sirkonstans. I kapab annan bann nouvo ki enterese, bann zenn, bann pli aze, ek sa bann ki pe lite avek diferan kalite problenm personnel. Fer ou diskour pratik e ki adapte avek lavi bann dimoun ki dan lodyans. Evite donn konsey ki donn lenpresyon konmsi ou pe target zis en pti gin dimoun.

Desizyon sa Orater

Serten desizyon ki konsern ou diskour in deza ganny fer pour ou. Bann pwen prensipal in ganny klerman endike, ensi ki lakantite letan ki ou devret dedye lo sak pwen prensipal. I ou responsabilite pour fer okenn lezot desizyon. Ou kapab swazir pour pas plis letan lo en serten pwen segonder e mwens lo lezot. Pa panse ki ou devret diskit tou pwen segonder lo menm degre. Sa i kapab fer ou pas vitman lo bann lenformasyon e i kapab vin tro bokou pour ou lodyans. Konman ki ou kapab determinen kwa ki pour devlop plis ek kwa ki ou pour zis mansyonn an bref, oubyen an pasan? Demann ou lekor: ‘Ki pwen ki pou ed mwan pour transmet lide santral sa diskour? Lekel ki ofer pli gran potansyel pour benefisye mon lodyans? Si mon pa koz lo tel verse ki’n ganny mansyonnen ek sa pwen ki relye avek, eski sa pou afeblir mon rezonnman e lafason ki bann pwen i swiv kanmarad?’

Fer zefor pour evite enkli lenformasyon ki ou pa asire si i vre oubyen lopinyon personnel. Menm Garson Bondye, Zezi Kri, ti evite koz dapre ‘son prop orizinalite.’ (Zan 14:10) Rekonnet rezon akoz dimoun i vin bann renyon Temwen Zeova se pour ekout Labib ganny diskite. Si ou’n arive ganny konsidere konman en bon orater, i tre probab se akoz ou fer li en labitid pour atir latansyon, non pa lo ou menm, me lo Parol Bondye. Pour sa, ou bann diskour i ganny apresye.—Fili. 1:10, 11.

Aprezan ki ou’n transform en plan avek zis bann lide zeneral an en leksplikasyon nourisan lo Labib, ou bezwen aprezan repet ou diskour. I bon pour fer li aotvwa. Keksoz enportan se ki ou bezwen fer sir ki ou annan tou pwen byen antet. Ou devret kapab met ou leker dan ou prezantasyon, anim sa lenformasyon, e donn en prezantasyon byen vivan lo laverite. Avan ki ou donn ou diskour, demann ou lekor: ‘Ki mon pe ekspekte akonpli? Eski bann pwen prensipal i evidan? Eski mon’n vreman fer Labib vin baz mon diskour? Eski sak pwen prensipal i swiv kanmarad dan en fason natirel? Eski sa diskour i batir lapresyasyon pour Zeova e pour son bann dispozisyon? Eski son konklizyon i relye etrwatman avek sa tenm, eski i montre lodyans ki zot bezwen fer, e motiv zot pour fer li?’ Si ou kapab reponn wi pour sa bann kestyon, alor ou dan en pozisyon pour ‘fer byen avek konnesans,’ pour benefis kongregasyon e pour loner Zeova!—Prov. 15:2.

KI OU bi kan ou pe ansennyen? Si ou’n fek vin en proklanmater Rwayonm, san dout ou annan sa dezir pour aprann konman pour diriz en letid Labib, vi ki Zezi ti donn son disip sa devwar pour fer bann disip. (Mat. 28:19, 20) Si ou’n deza annan leksperyans dan sa aktivite, petet ou bi se pour vin pli efikas pour tous leker sa bann ki ou pe esey ede. Si ou en paran, sirman ou anvi vin sa kalite ansennyan ki kapab motiv ou zanfan pour dedye zot lavi avek Bondye. (3 Zan 4) Si ou en ansyen oubyen ou pe aspir pour vin enn, petet ou anvi vin en orater piblik ki kapab batir profon lapresyasyon pour Zeova ek son lavolonte dan sa bann ki ekout ou. Konman ki ou kapab akonpli sa bann lobzektif?

Pran en leson avek sa gran Ansennyan, Zezi Kri. (Lik 6:40) Ki swa Zezi ti pe koz avek en lafoul lo en montanny oubyen avek zis detrwa dimoun ki pe marse lo semen avek li, sa ki i ti dir e lafason ki i ti dir ti fer en lenpresyon dirab. Zezi ti stimil lespri ek leker sa bann ki ti ekout li, e i ti fer laplikasyon pratik ki zot ti kapab konpran. Eski ou kapab akonpli menm keksoz?

Depan lo Zeova

Relasyon entim ki Zezi ti annan avek son Papa seles ensi lasistans lespri Bondye ti enfliyans lafason ki i ti ansennyen. Eski ou senserman priy Zeova pour ou kapab diriz en letid Labib dan en fason efikas? Si ou en paran, eski ou regilyerman priy pour gidans divin pour ansenny ou zanfan? Eski ou ofer lapriyer senser ler ou pe prepare pour donn bann diskour oubyen diriz bann renyon? Depan lo Zeova atraver lapriyer pou ed ou vin en ansennyan pli efikas.

Nou osi demontre ki nou depan lo Zeova par depan lo son Parol, Labib. Sa dernyen nwit son lavi lo later konman en zonm parfe, Zezi ti dir avek son Papa dan lapriyer: “Mon’n donn zot ou mesaz.” (Zan 17:14) Kantmenm Zezi ti annan bokou leksperyans, i pa ti zanmen koz lo son prop lotorite. I ti toultan koz sa ki son Papa ti’n ansenny li, an fezan sa i’n kit en legzanp pour nou swiv. (Zan 12:49, 50) Parey i’n ganny prezerve dan Labib, Parol Bondye i annan pouvwar pour enfliyans dimoun—zot aksyon, zot panse profon, ek zot santiman. (Ebr. 4:12) Anmezir ki ou ogmant ou konnesans dan Parol Bondye e aprann pour servi li byen dan ou minister, ou pou devlop sa kalite abilite pour ansennyen ki atir dimoun ver Bondye.—2 Tim. 3:16, 17.

Onor Zeova

Vin en ansennyan ki imit Kris i pa senpleman vedir ki ou kapab donn en diskour enteresan. I vre, dimoun ti etonnen par “bann parol ekstraordiner” Zezi. (Lik 4:22) Me ki ti lobzektif Zezi kan i ti pe koz byen? Se pour onor Zeova, non pa pour atir latansyon lo li menm. (Zan 7:16-18) E i ti ensit son bann disip: “Alor zot lalimyer i devre klere devan tou dimoun, pour ki zot war byen zot bann bonn aksyon e glorifye zot Papa ki dan lesyel.” (Mat. 5:16) Sa konsey i devret enfliyans lafason ki nou ansennyen. I devret vin nou lobzektif pour evit okenn keksoz ki kapab diminyen sa lobzektif. Alor ler nou pe deside ki nou pou dir oubyen konman nou pou dir li, i byen ki nou demann nou lekor, ‘Eski sa pou ogmant lapresyasyon pour Zeova, oubyen i pou atrakte latansyon lo mwan?’

Par egzanp, bann ilistrasyon ek bann legzanp reel i kapab ganny servi dan en fason efikas dan lansennyman. Toutfwa, ler en gran ilistrasyon i ganny devlope oubyen en leksperyans i ganny rakonte tro an detay, sa pwen dan sa lenstriksyon i kapab perdi. Pareyman, rakont zistwar ki senpleman anmizan i diminyen latansyon lo lobzektif nou minister. Annefe, sa ansennyan pe atir latansyon lo li menm olye ki akonpli vre lobzektif sa ledikasyon teokratik.

“Fer en Distenksyon”

Pour en dimoun vreman vin en disip, i devret klerman konpran bann keksoz ki i pe ganny ansennyen. I devret antann laverite e vwar dan ki fason i diferan avek lezot krwayans. Fer konparezon i ede akonpli sa.

Plizyer fwa, Zeova ti enplor son pep pour “fer en distenksyon” ant keksoz ki pir ek sa ki enpir. (Lev. 10:9-11) I ti dir ki sa bann ki pou servi dan son gran tanp spirityel pou enstri lepep “ladiferans ant en keksoz sen ek en keksoz profann.” (Ezek. 44:23) Liv Proverb i ranpli avek konparezon ant ladrwatir ek mesanste, ant lasazes ek sotiz. Menm bann keksoz ki pa opoze avek kanmarad i kapab ganny distenge avek kanmarad. Zapot Pol ti fer en konparezon ant en zonm drwat ek en bon zonm, parey i rikorde dan Romen 5:7. Dan liv Ebre, i ti montre siperyorite servis gran pret Kris lo sa enn pour Aaron. Annefe, parey sa ansennyan dan 17 tyenm syek John Amos Comenius ti ekrir: “Pour ansennyen i preski vedir senpleman montre konman ki keksoz i diferan avek en lot an sa ki konsern son lobzektif, laform, ek lorizin. . . . Alor, sa enn ki kapab eksplik byen ladiferans ant bann diferan keksoz i ansenny byen.”

Pran konman legzanp, ou pe ansenny en dimoun lo Rwayonm Bondye. Si i pa konpran kisisa Rwayonm, ou kapab montre li konman sa ki Labib i dir i diferan avek lide ki Rwayonm i senpleman en santiman dan leker en dimoun. Oubyen ou kapab montre konman ki sa Rwayonm i diferan avek bann gouvernman imen. Toudmenm, pour dimoun ki konn sa bann laverite debaz, ou kapab al dan pli gran detay. Ou kapab montre zot konman ki Rwayonm Mesyanik i diferan avek rwayote iniversel Zeova, parey i ganny dekrir dan Psonm 103:19, oubyen avek “Rwayonm son Garson byenneme” ki ganny mansyonnen dan Kolosyen 1:13, oubyen avek sa “ladministrasyon” mansyonnen dan Efezyen 1:10 (NW). Itilizasyon bann konparezon i kapab ed ou lodyans pour byen konpran sa lansennyman Labib enportan.

Zezi ti servi sa laspe lansennyman plizyer fwa. I ti fer konparezon ant bann krwayans ki ti popiler dan Lalwa Mozaik avek vre lobzektif Lalwa. (Mat. 5:21-48) I ti diferansye vre latasman avek Bondye avek bann aksyon ipokrit bann Farizyen. (Mat. 6:1-18) I ti fer konparezon ant lespri sa bann ki ti “domin lo zot konman met” avek lespri sakrifis ki son bann disip ti pou demontre. (Mat. 20:25-28) Osi rikorde dan Matye 21:28-32, dan en lot lokazyon, Zezi ti envit sa bann ki ti pe ekout li pour fer zot prop konparezon ant sa bann ki krwar zot zis ek bann ki vreman repantir. Sa i anmenn nou lo en lot laspe enportan lo bon lansennyman.

Ankouraz sa bann ki pe ekoute pour reflesir

Ler nou lir Matye 21:28, nou vwar ki Zezi ti entrodwir son konparezon par demande: “Ki zot panse?” En ansennyan kalifye pa selman dir bann fe oubyen donn larepons. Plito, i ankouraz sa bann ki pe ekout li pour devlop abilite pour reflesir. (Prov. 3:21; Rom. 12:1) Dan en serten mezir, sa i posib par demann bann kestyon. Parey i ganny trouve dan Matye 17:25, Zezi ti demande: “Ki ou mazinen Simon, bann lerwa later i fer lekel pey taks, bann sitwayen oubyen bann etranze?” Sa kestyon Zezi ti stimil e ed Pyer tir son prop konklizyon egzakt konsernan pey taks tanp. Pareyman, ler Zezi ti pe reponn sa zonm ki ti demande, “Lekel mon prosen?” Zezi ti fer konparezon ant aksyon en pret ek en Levit avek aksyon en Samariten. Apre i ti poz sa kestyon: “Lekel parmi sa trwa, ki’n azir konman prosen sa zonm ki ti ganny atake par bann bandi?” (Lik 10:29-36) La ankor, plito ki reflesir pour sa enn ki pe ekout li, Zezi ti envit li pour reponn son prop kestyon.—Lik 7:41-43.

Esey tous Leker

Bann ansennyan ki konpran Parol Bondye i realize ki vre ladorasyon pa senpleman en zafer ki enplik memoriz serten fe e konform avek serten lareg. I ganny batir lo en bon relasyon avek Zeova ek lapresyasyon pour sa ki i demann nou fer. En tel ladorasyon i enplik leker. (Det. 10:12, 13; Lik 10:25-27) Dan Labib, sa term “leker” i souvan refer avek sa ki en dimoun i ete anndan, enkli keksoz parey dezir, lafeksyon, santiman, ek motivasyon.

Zezi ti konnen ki tandis ki imen i get laparans deor, Bondye i vwar sa ki leker i ete. (1 Sam. 16:7) Nou servis pour Bondye i devret ganny motive par nou lanmour pour li, non pa par bann zefor pour enpresyonn lezot. (Mat. 6:5-8) Parkont, bann Farizyen ti fer bokou keksoz pour demonstre. Zot ti met bokou lanfaz pour konform avek bann detay dan Lalwa e konform avek zot prop lareg. Me zot pa ti kapab demontre dan zot lavi bann kalite ki ti pou idantifye zot avek sa Bondye ki zot ti pretann adore. (Mat. 9:13; Lik 11:42) Zezi ti ansennyen ki menm si lobeisans anver bann legzizans Bondye i enportan, valer en tel lobeisans i ganny determinen par sa ki dan leker. (Mat. 15:7-9; Mark 7:20-23; Zan 3:36) Nou pou akonpli pli gran byenfe par nou lansennyman si nou imit legzanp Zezi. I enportan ki nou ed dimoun aprann sa ki Bondye i ekspekte avek zot. Me i osi enportan pour zot konnen e kontan Zeova konman en dimoun afen ki zot kondwit i reflekte lenportans ki zot mete lo en relasyon aprouve avek sa vre Bondye.

Byensir, pour benefisye avek en tel lansennyman, zot bezwen onnet pour rekonnet sa ki dan zot prop leker. Zezi ti ankouraz dimoun pour demann zot lekor akoz zot fer tel ou tel keksoz e egzamin zot santiman. Ler i ti pe koriz en move pwenn-vi, i ti pou demann sa bann ki ti pe ekout li akoz zot ti dir, panse, oubyen fer serten keksoz. Me toudmenm, pour pa kit zot konmsa menm, Zezi ti azout en deklarasyon, en ilistrasyon, oubyen fer en aksyon ki ti ankouraz zot pour vwar keksoz korekteman avek son bann kestyon. (Mark 2:8; 4:40; 8:17; Lik 6:41, 46) Nou osi nou kapab ed sa bann ki ekout nou par sizere ki zot demann zot lekor bann kestyon parey: ‘Akoz ki sa fason fer i enteres mwan? Akoz mon reazir anver sa sitiasyon parey mon fer?’ Apre motiv zot pour vwar keksoz dapre pwenn-vi Zeova.

Donn Laplikasyon

En bon ansennyan i konnen ki “lasazes i keksoz prensipal.” (Prov. 4:7) Lasazes i sa abilite pour byen aplik konnesans pour rezourd bann problenm, pour evit danze, pour atenn bann lobzektif, pour ed lezot. I responsabilite en ansennyan pour ed bann etidyan aprann fer sa, me pa pour fer bann desizyon pour zot. Ler ou pe diskit lo plizyer prensip Labib, ed sa etidyan pour rezonnen. Ou kapab mansyonn en sitiasyon dan lavi toulezour e apre demann sa etidyan konman sa prensip Labib ki zot in fek etidye pou kapab ed li si i ganny konfronte avek sa sitiasyon.—Ebr. 5:14.

Dan son diskour zour Lapannkot 33 N.L., zapot Pyer ti fourni en legzanp laplikasyon pratik ki ti afekte lavi bann dimoun. (Akt 2:14-36) Apre i ti diskit trwa verse Labib ki lafoul ti pretann krwar ladan, Pyer ti fer laplikasyon lo sa trwa verse dapre bann levennman ki zot tou zot ti’n vwar. Konman en rezilta, lafoul ti santi sa nesesite pour azir lo sa ki zot ti’n tande. Eski ou lansennyman i annan en lefe parey lo dimoun? Eski ou al pli oprofon ki zis resit bann fe e ed dimoun pour konpran akoz en keksoz i koumsa? Eski ou ankouraz zot pour egzamin ki mannyer sa ki zot pe aprann i devret afekte zot lavi? Petet zot pa pou kriye, “Ki nou devre fer?” parey lafoul ti fer zour Lapannkot, me si ou’n aplik byen bann verse Labib, zot pou ganny motive pour konsider pran aksyon apropriye.—Akt 2:37.

Ler ou lir Labib avek ou zanfan, paran ou annan en bon loportinite pour form ou zanfan pour reflesir, pour aplik dan en fason pratik bann prensip Labib. (Efe. 6:4) Par egzanp, ou kapab, swazir detrwa verse dan progranm lektir Labib lasemenn, diskit zot sinifikasyon, e apre demann bann kestyon parey: ‘Konman sa i fourni gidans pour nou? Ki mannyer nou kapab servi sa bann verse dan predikasyon? Ki sa bann verse i fer nou konnen lo Zeova e lo son fason fer keksoz, e konman ki sa i batir nou lapresyasyon pour li?’ Ankouraz ou fanmiy pour fer komanter lo sa bann pwen pandan diskisyon pwen Biblik enteresan dan Lekol Minister Teokratik. Sa bann verse ki zot fer komanter lo la pou tre probab sa bann ki zot rapel.

Etablir en bon Legzanp

Ou ansenny pa selman par sa ki ou dir me osi par sa ki ou fer. Ou aksyon i fourni en legzanp pratik lo konman pour aplik sa bann keksoz ki ou dir. Sa i fason ki zanfan i aprann. Ler zot imit zot paran, zot donn levidans ki zot anvi vin parey zot paran. Zot anvi konnen ki mannyer i ete pour fer sa ki zot paran pe fer. Pareyman, ler sa bann ki ou ansennyen i ‘imit ou parey ou ou imit Kris,’ zot konmans eksperyans bann benediksyon dan mars dan semen Zeova. (1 Kor. 11:1) Fason azir Bondye avek zot i vin par zot prop leksperyans.

Sa i en rapel ki demann bokou refleksyon konsernan lenportans pour demontre en bon legzanp. Sa “kalite lavi [ki nou annan] . . . en lavi sen e annan respe pour Bondye” pou kontribye bokou pour donn sa bann ki nou ansennyen en demonstrasyon vivan lo konman pour aplik bann prensip Labib. (2 Pyer 3:11) Si ou ankouraz en etidyan Labib pour lir Parol Bondye regilyerman, fer sir ki ou menm ou lir li. Si ou anvi ou zanfan aprann obeir bann prensip Labib, fer sir ki zot vwar ki ou aksyon i an armoni avek lavolonte Bondye. Si ou enstri kongregasyon pour zele dan minister, prevwar ki ou annan en par konplet dan sa travay. Ler ou pratik sa ki ou ansennyen, ou dan en pli bon pozisyon pour motiv lezot.—Rom. 2:21-23.

Avek en lentansyon pour amelyor ou lansennyman, demann ou lekor: ‘Ler mon donn lenstriksyon, eski i ganny fer dan en serten fason ki i fer en diferans dan latitid, parol, oubyen aksyon sa bann ki antann li? Pour fer keksoz kler, eski mon diferansye en lide oubyen en fason fer avek en lot? Ki mon fer pour ed mon etidyan, mon zanfan, oubyen mon lodyans dan renyon pour rapel sa ki mon dir? Eski mon klerman montre sa bann ki pe ekoute konman pour aplik sa ki zot pe aprann? Eski zot kapab vwar sa dan mon legzanp? Eski zot apresye konman ki zot reaksyon anver sa topik ki pe ganny diskite i kapab enfliyans zot relasyon avek Zeova?’ (Prov. 9:10) Kontinyen donn latansyon sa bann keksoz anmezir ki ou esey kontinyen progrese pour vin en pli bon ansennyan. “Vey byen ou lekor e fer byen atansyon avek ou lansennyman, e montre perseverans dan tousala. Si ou azir koumsa, ou ava sov ou lekor ek tou bann ki ekout ou.”—1 Tim. 4:16.