Neemya
1 La sa ki Neemya*+ garson Akalya ti dir: Dan mwan Kislev,* dan ventyenm lannen, mon ti dan sato* Sousann.*+ 2 Sa letan, Anani+ enn mon bann frer ti vini avek lezot zonm sorti Zida e mon ti demann zot konsernan larestan Zwif ki ti’n retournen sorti an egzil+ e osi konsernan Zerizalenm. 3 Zot ti dir: “Sa bann dimoun ki’n reste dan sa provens* e ki’n retournen sorti an egzil, zot dan en move sityasyon e zot dan laont.+ Bann miray Zerizalenm in kase+ e son bann baro in ganny brile.”+
4 Dek ki mon ti tann sa ki zot ti’n dir, mon ti asize e konmans plere. Mon ti dan dey pour plizyer zour e mon ti kontinyen zennen*+ e priye devan Bondye lesyel. 5 Mon ti dir: “O Zeova, Bondye lesyel, ou sa Bondye ki gran e enpresyonan, ou gard ou lalyans e ou demontre lanmour fidel anver bann ki kontan ou e ki obeir ou bann komannman,+ 6 silvouple, get mwan e ekout lapriyer ki ou serviter pe fer avek ou ozordi, lizour e aswar,+ konsernan bann Izraelit ou bann serviter. Mon pe osi konfes bann pese ki pep Izrael in fer kont ou. Nou’n fer pese, mwan ek fanmir* mon papa.+ 7 Nou’n vreman mal fer avek ou,+ nou pa’n obeir ou bann komannman, lareg ek lalwa ki ou ti donn Moiz ou serviter.+
8 “Silvouple, mazin sa lord* ki ou ti donn Moiz ou serviter: ‘Si zot pa reste fidel, mon pou dispers zot parmi bann pep.+ 9 Me si zot retourn kot mwan e zot obeir mon bann komannman, menm si zot in ganny disperse ziska dan bout later, mon pou rasanble zot+ e fer zot retourn dan sa landrwa ki mon’n swazir kot mon non pou ganny glorifye.’+ 10 Zot ou bann serviter ek ou pep ki ou ti sove* avek ou gran pwisans ek ou lanmen for.+ 11 O Zeova, silvouple, ekout lapriyer ou serviter ek lapriyer ou bann serviter ki annan en gran respe pour ou non. Silvouple, fer ou serviter reisi ozordi e ki sa zonm i demontre konpasyon anver mwan.”+