FER FAS AVEK PRI LAVI KI PE OGMANTE
Aksepte realite
Nou kapab pa remarke ki pri lavi pe ogmante, sirtou si nou saler pe ogmante. Par kont, ler pri lavi i mont en sel kou e nou saler i reste parey, nou kapab enkyet e strese sirtou si nou annan en fanmir pour pran swen avek.
Nou pa kapab anpes pri lavi kontinyen ogmante. Me ler nou aksepte ki sa i en realite, sa i kapab ed nou.
AKOZ SA I ENPORTAN
Dimoun ki aksepte realite konsernan pri lavi ki pe kontinyen ogmante i kapab vwar li pli fasil pour . . .
reste kalm. Ler nou kalm, nou reflesir pli byen e nou fer pli bon desizyon.
evite fer keksoz ki pa saz. Par egzanp, i pa pou saz pour nou pa pey nou bann bil oubyen pour gaspiy nou larzan.
evite dispit avek nou fanmir konsernan larzan.
rod bann fason pour fer fas avek sa sityasyon, sa i enkli gete kwa ki nou priyorite e dan ki fason nou abitye depans nou larzan.
SA KI OU KAPAB FER
Pare pour adapte. Ler lenflasyon i o i saz pour redwir nou depans si i posib. Serten dimoun i esey viv en kalite lavi me zot napa sa mwayen pour fer li, sa i konmsi zot pe esey naz kont kouran dan en larivyer! Finalman zot zis fatige. Si ou annan en fanmir ou kapab osi konsernen lo ki mannyer pour pran swen avek zot e sa i normal! Me gard sa antet: Ou fanmir i bezwen ou lanmour, ou letan ek ou latansyon plis ki okenn lezot keksoz.
Esey viv en kalite lavi ki ou napa mwayen pour fer li i konmsi ou pe naz kont kouran dan en larivyer