FER FAS AVEK PRI LAVI KI PE OGMANTE

Servi byen ou larzan

Nou tou nou vwar li difisil ler pri lavi i kontinyen ogmante. Me ou pa bezwen dekouraze. I kapab annan keksoz ki ou kapab fer pour amelyor ou sityasyon.

AKOZ SA I ENPORTAN

Si ou pa esey servi byen ou larzan, ou pou napa kontrol lo ou bann depans e sa pou fer ou pli trakase e enkyet. Menm si ou napa bokou larzan, ou kapab fer plizyer keksoz ki pou ed ou servi byen ou larzan.

SA KI OU KAPAB FER

Viv dapre ou mwayen. Ler ou fer sa, ou pou santi ki ou annan plis kontrol lo ou larzan e ou pou santi ou pli konfidan ki ou kapab pey depans ki ou pa ti pe ekspekte fer.

Pour ed ou viv dapre ou mwayen, fer en bidze, sa i vedir fer en plan pour konte larzan ki ou gannyen e depanse. Anmezir ki ou pe fer ou bidze, gete kwa ki ou vreman bezwen. Apre fer ou mye pour aste zis sa ki ou’n plàn e aziste ou bidze anmezir ki bann pri i sanze. Byensir, si ou marye, enplik ou konzwen dan okenn desizyon ki ou fer.

Esey sa: Olye servi kart kredi pour aste bann keksoz, servi larzan pour pey sa bann keksoz si ou kapab. Serten dimoun i vwar ki ler zot fer sa, zot pli byen kapab kontrol zot bidze e zot menm evite annan det. Pran letan pour lir byen bann dokiman sorti kot ou labank ki montre kantite larzan ou met lo ou kont e konbyen ou’n depanse dan en mwan. Ler ou konnen ki kantite larzan i annan lo ou kont ou pa pou tro strese.

I kapab difisil pour viv dapre ou mwayen. Me ler ou annan en bon bidze ki ou’n byen kalkile, sa i kapab ed ou en kantite. Ou osi kapab annan plis kontrol lo ou larzan.

‘Kalkile konbyen i pou koute.’—Lik 14:28.

Protez ou lanplwa. Ki bann keksoz ou kapab fer pour gard ou travay? La detrwa keksoz ki ou kapab fer: Toultan aler. Annan en bon latitid anver ou travay. Pran linisyativ e travay dir. Annan respe. Swiv lenstriksyon e esey amelyor ou bann abilite.

Evite gaspiy ou larzan. Demann ou lekor, ‘Eski mon annan bann labitid ki fer mwan depans tro bokou oubyen gaspiy larzan?’ Par egzanp, en kantite dimoun i gaspiy zot larzan ki zot in travay dir pour gannyen, ler zot servi drog, zwe larzan, fimen oubyen bwar tro bokou lalkol. Sa bann keksoz i kapab afekte zot lasante e fer zot perdi zot travay.

“Sa dimoun ki trouv lasazes . . . pou ere. I pli bon pour vin saz ki ganny larzan.”—Proverb 3:13, 14.

Met en pti larzan dekote pour bann ka irzan. Ler ou kapab, met en pti larzan dekote pour bann depans ki ou pa ekspekte oubyen bann ka irzan. Sa larzan i kapab ed ou oubyen en manm fanmir si zot fer fas avek en problenm lasante irzan, si zot perdi zot travay oubyen lezot keksoz ki ou pa ti pe ekspekte.

“Letan ek levennman ki dimoun pa pe ekspekte i ariv avek [nou] tou.”—Eklezyas 9:11.

Sizesyon lo ki mannyer pour met en pti larzan dekote

Kwi manze kot lakour.

Nou depans plis ler nou souvan manz dan bann restoran souvan oubyen ler nou souvan aste bann manze oubyen bann labwason ki’n fini prepare. I vre, i pran letan ek zefor pour kwi manze kot lakour me nou depans mwens. Ou pou osi konnen ki ou pe manze.

Reflesir byen ler ou pe aste manze.

Fer en lalis bann keksoz ki ou bezwen aste e aste zis sa ki lo sa lalis. Evite aste keksoz ki ou pa’n plàn pour aste.
Rod bann landrwa ki vann bann keksoz ki bon marse e aste an gro si ou bidze i permet ou. Fer sir ki ou kapab stok byen ou bann manze pour ki zot pa gate.
Gete si ou kapab aste bann keksoz ki pli bon marse si son kalite i rezonnab.
Aste keksoz lo Enternet pour ganny bann keksoz pli bon marse pour evite aste keksoz ki ou pa’n plàn pour aste e vey byen ki mannyer ou depans ou larzan. Si dan sa landrwa kot ou reste i annan sa posibilite pour aste keksoz lo Enternet, eski ou kapab eseye?
Rod bann landrwa ki fer promosyon lo bann keksoz. Konpar pri bann keksoz, enkli kantite lenerzi ki bann lekipman elektronik i servi e kantite larzan ki ou pou servi pour pey elektrik ek delo.

Mazin de fwa avan ou aste nouvo keksoz.

Bann lakonpannyen ki fer telefonn ek lezot prodwi i kontinyen fer bann nouvo model pour zot ganny plis profi. Avan ou aste en keksoz demann ou lekor: ‘Eski mon pou benefisye si mon aste sa dernyen model? Eski mon bezwen aste sa nouvo keksoz la konmela? Si mon bezwen aste sa nouvo keksoz, eski mon vreman bezwen aste sa dernyen model?’

Aranz bann keksoz e reservi zot.

Pran swen avek ou bann lekipman elektronik pour kapab servi zot pli lontan e si i pou kout ou pli bon marse, aranz zot ler zot kase. Ou osi kapab aste bann keksoz dezyenmmen.

Plant kot ou.

Eski ou kapab fer lespas pour plant ou prop manze? Apard ki redwir depans lo manze, ou kapab servi sa bann keksoz ki ou plante pour fer lesanz avek lezot, pour vann oubyen pour partaze.

“Bann plan en dimoun ki travay dir pou reisi.”—Proverb 21:5.

“Nou vey byen pri bann keksoz ki nou abitye servi e ki kantite fwa nou servi nou kart kredi.”—Miles, Langleter.

“Avan ki nou al aste nou bann keksoz laboutik, mwan ek mon fanmir nou toultan prepar en lalis bann keksoz ki nou bezwen.”—Jeremy, Leta-z-ini.

“Souvan nou revwar nou bidze fanmir pour met li azour avek sityasyon ekonomik e nou met en pti larzan dekote pour bann depans ki nou pa pe ekspekte fer.”—Yael, Izrael.

“Nou montre nou bann zanfan ki mannyer pour aranz bann keksoz ki’n kase dan plas aste bann nouvo keksoz. Sa i enkli nou loto ek bann keksoz elektronik. Mwan ek mon madanm nou osi evite aste dernyen model bann keksoz.—Jeffrey, Leta-z-ini.

“Mon plant mon prop legim e mon sonny poul e sa i fer mwan pa depans bokou larzan. Mon menm kapab partaz en pe mon legim avek lezot dimoun.”—Hono, Myannmar.

En msye pe rekolte bann legim dan zarden.