FER FAS AVEK PRI LAVI KI PE OGMANTE

Devlop kontantman

Bann dimoun ki kontant zot avek sa ki zot annan i satisfe avek zot lavi. Anmezir ki zot sirkonstans i sanze, zot fer sa ki neseser pour zot viv dapre zot mwayen.

AKOZ SA I ENPORTAN

Jessica Koehler ki en psikolog ti remarke ki dimoun ki kontant zot avek sa ki zot annan i tant pour annan en latitid pozitif. I ti osi remarke ki zot pa ti tro zalou lezot dimoun. Alor i pa drol ki bann dimoun ki kontant zot avek sa ki zot annan i pli zwaye e zot annan mwens stres. Anfet, serten dimoun ki pli zwaye i napa bokou keksoz materyel. Sa i vre sirtou pour bann ki konsantre lo bann keksoz ki larzan pa kapab aste, parey lazwa ki zot gannyen ler zot pas letan avek zot fanmir ek zanmi.

“Si nou annan manze ek lenz, nou pou kontant nou avek sa bann keksoz.”—1 Timote 6:8.

SA KI OU KAPAB FER

Evite konpare. Si ou konpar ou lavi senp avek lavi en lot dimoun ki annan en kantite keksoz ser, ou kapab anvi plis keksoz ki ou deza annan e menm zalou sa dimoun. An plis ki sa, sa ki ou pe mazinen lo sa dimoun i kapab pa vre. Serten dimoun ki annan en kantite keksoz materyel i kapab ki zot annan bann gro det. Nicole, ki reste Senegal, i dir: “Mon pa bezwen en kantite keksoz pour mwan zwaye. Si mon kontant mwan avek sa ki mon annan, mon kapab zwaye menm ler lezot i annan plis keksoz ki mwan.”

Esey sa: Evite get bann lavertisman oubyen bann keksoz ki dimoun i met lo rezo sosyal pour montre zot larises ek lakantite keksoz ser ki zot annan.

“Menm ler en dimoun i annan en kantite keksoz, pa sa bann keksoz ki donn li lavi.”—Lik 12:15.

Apresye sa ki ou annan. Pour bann dimoun ki apresye sa ki zot annan, i pli fasil pour zot kontant zot avek sa ki zot annan e zot pa krwar ki zot bezwen oubyen zot devret ganny plis keksoz. Roberton, sorti Ayti, i dir: “Mon pran letan pour reflesir lo ki mannyer lezot in demontre labonte anver mwan ek mon fanmir. Apre, mon dir sa bann dimoun ki kantite mon apresye sa ki zot in fer pour nou. Mon osi montre mon pti garson ki annan wit an pour dir mersi pour tou keksoz ki i gannyen.”

Esey sa: Toulezour ekri en keksoz ki ou apresye. Par egzanp, en bon lasante, en fanmir pros, bann vre zanmi oubyen menm en zoli soley kouse.

“Sa enn ki annan en leker zwaye i toultan pe fete.”—Proverb 15:15.

Parfwa i difisil pour kontant nou avek sa ki nou annan. Me i vo lapenn fer zefor! Ler nou swazir pour kontant nou avek sa ki nou annan, nou pou ere e sa i en keksoz ki larzan pa kapab aste.