FER FAS AVEK PRI LAVI KI PE OGMANTE

Kontan donnen

Si ou pe vwar li difisil pour fer de bout zwenn, petet ou kapab mazinen ki i enposib pour donn lezot. Me petet ou pou vwar ki ler ou kontan donnen sa pou ed ou fer fas avek bann problenm ekonomik. Ou kapab met en larzan dekote e osi donnen.

AKOZ SA I ENPORTAN

Nou kontan e nou santi nou byen ler nou kontan donnen, menm si i pa bokou. Anfet, bann letid i montre ki donnen i bon pour nou lasante fizikman ek mantalman. Par egzanp, i kapab ed nou pour pa tro enkyet oubyen strese. I kapab fer nou tansyon desann e fer nou ganny mwens douler. I kapab osi fer nou dormi pli byen.

“I annan plis lazwa pour donnen ki pour resevwar.”—Akt 20:35.

Ler nou donn lezot larzan oubyen lezot keksoz, nou pou vwar pli fasil pour aksepte led ler nou bezwen. Howard, ki reste Langleter i dir: “Ler nou rod fason pour donnen e ed lezot, mon madanm ek mwan nou santi ki nou pa tro en fardo pour lezot ler nou osi ganny led.” Byensir dimoun ki kontan donnen avek tou zot leker pa ekspekte nanryen an retour. Me zot kapab ganny bann vre zanmi ki pou pare pour ed zot ler zot dan bezwen.

“Kontinyen donnen e dimoun pou donn zot.”—Lik 6:38.

SA KI OU KAPAB FER

Partaz sa ki ou annan. Si ou napa bokou pour donnen, ou kapab partaz sa pti gin ki ou annan, menm si i zis en repa senp. Duncan ek son fanmir ki reste Ouganda i vreman pov me kantmenm sa, zot kontan donnen. Duncan i dir: “Dan Dimans, mon madanm ek mwan nou envit en dimoun kot nou lakour pour en manze senp. Nou kontan pas letan avek lezot.”

Byensir, ou bezwen rezonnab ler ou donnen. Ou pa anvi fer ou fanmir soufer akoz zot nepli annan sa ki zot bezwen.—Zob 17:5.

Esey sa: Envit en dimoun pour en repa senp oubyen menm pour en keksoz pour bwar. Si ou annan serten keksoz ki ou nepli bezwen, akoz ou pa donn ou bann zanmi oubyen vwazen ki pou kapab servi zot?

Donn dan lezot fason. Serten pli bon kado pa kout en sou. Par egzanp, nou kapab donn nou letan e fer bann pti keksoz pour ed lezot. Menm bann parol dous i kapab en zoli kado. Dir lezot ki kantite ou kontan e apresye zot.

Esey sa: Ed lezot pour fer bann louvraz kot zot lakour, bann pti reparasyon kot lakour oubyen aste konmisyon. Ekrir en kart oubyen anvoy en mesaz pour en zanmi, menm si ou pe zis dir sa dimoun ki ou pe mazin li.

Ler ou rod fason pour donnen ou pou ganny en kantite benediksyon.

“Pa oubliye fer dibyen e partaz sa ki zot annan avek lezot.”—Ebre 13:16.

En koup pe ed en madanm aze pour balye deor. Sa madanm i donn zot en tas dite anmezir zot pe netway deor.