Lekel zot?

BANN Temwen Zeova i anvi ou konn zot pli byen. Petet ou reste obor zot e zot travay menm landrwa avek ou oubyen ou’n vwar zot lezot landrwa. Kekfwa ou’n deza vwar zot pe donn zot magazin avek dimoun lo semen. Oubyen petet ou’n deza koz avek zot devan ou laport.

An realite, bann Temwen Zeova i enterese avek ou ek ou byennet. Zot oule vin ou zanmi. Zot anvi ou konn plis lenformasyon lo zot, zot krwayans, zot lorganizasyon, e ki mannyer zot santi konsernan dimoun an zeneral ek sa lemonn kot nou tou nou viv. Pour zot reisi fer sa, zot in prepar sa brosir pour ou.

Bann Temwen Zeova i parey tou dimoun dan bokou fason. Zot rankontre problenm ki egziste dan lavi toulezour, savedir problenm larzan, lasante, e emosyonnel. Parler zot fer fot akoz zot pa parfe. Me zot fer zefor pour aprann atraver zot leksperyans e zot etidye Labib seryezman pour koriz zot fot. Zot in dedye zot lavi avek Bondye pour fer son lavolonte e zot fer tou sa ki zot kapab pour viv an akor avek sa dedikasyon ki zot in fer. Dan tou sa ki zot fer, zot rod gidans dan Parol Bondye ek led son lespri sen.

Temwen Zeova i vwar li tre enportan pour zot krwayans baze lo Labib me pa lo panse zonm oubyen lo en serten krwayans relizye. Zot dakor avek sa ki zapot Pol ti dir anba lenspirasyon Bondye: “Les Bondye ganny prouve vre, menm si tou zonm i ganny prouve manter.” (Romen 3:4, New World Translation of the Holy Scripturesa) Ler en dimoun i dir ki i pe ansenny laverite ki annan dan Labib, bann Temwen i vwar li tre apropriye pour fer parey bann Bereen ler zot ti antann zapot Pol prese: “Zot ti resevwar Parol Bondye avek bokou lentere. Toulezour zot ti etidye Lekritir pour war si sa ki Pol ti dir zot ti vre.” (Akt 17:11) Bann Temwen Zeova i krwar ki tou lansennyman relizye i devret ganny egzaminen pour vwar si i an armoni avek Parol enspire Bondye, ki swa sa lansennyman i sorti kot zot menm oubyen kot en lot dimoun. Zot envit ou e ankouraz ou pour egzamin Labib dan bann diskisyon ki ou fer avek zot.

I evidan alor ki bann Temwen Zeova i krwar ki Labib i Parol Bondye. Pour zot sa 66 liv dan Labib i enspire par Bondye e i an armoni avek listwar. Sa ki dimoun i apel Nouvo Testaman zot apel li Lekritir Grek, e Ansyen Testaman zot apel Lekritir Ebre. Zot servi tou le de, Lekritir Grek ek Ebre, e zot konpran li parey i’n ganny ekrir eksepte ler en lekspresyon oubyen konteks i klerman endike ki sa lekspresyon pe ganny servi dan en fason senbolik. Zot konpran ki bokou profesi Labib in ganny akonpli, serten pe akonpli e lezot pou akonpli alavenir.

ZOT NON

Temwen Zeova? Wi, sa i fason ki zot apel zot lekor. I en non ki dir en keksoz lo zot. I endike ki zot rann temwannyaz lo Zeova, lo son lotorite konman Bondye, e lo son plan. “Bondye,” “Senyer,” ek “Kreater,” zis parey “Prezidan,” “Lerwa,” ek “Zeneral” i bann tit e i kapab aplik avek diferan dimoun. Me “Zeova” i en non personnel e i non Bondye tou pwisan ek Kreater liniver. Sa i evidan dapre sa ki versyon Labib King James i dir dan Psonm 83:18: “Ki zonm i kapab konnen ki ou, ki ou non tousel i ZEOVA, ou ki Tre O lo later antye.”

Sa non Zeova (oubyen Yahweh, parey versyon Katolik Jerusalem Bible ek serten spesyalis Labib i prefere) i aparet preski 7,000 fwa dan Labib dan langaz Ebre orizinal. Dan laplipar Labib sa non pa aparet me i ganny ranplase par “Bondye” oubyen “Senyer.” Me menm dan sa bann Labib, normalman en dimoun i kapab konnen ki bor sa non Zeova ti aparet dan versyon orizinal Ebre akoz non Bondye in ganny ranplase par en mo parey: BONDYE oubyen SENYER ki ganny ekrir an gro let. Detrwa tradiksyon modern pe servi sa non Zeova oubyen Yahweh. Alor, Izai 42:8 dan New World Translation i lir koumsa: “Mwan Zeova. Sa i mon non.”

Bann Temwen Zeova in pran zot non baze lo sa resi Labib dan Izai sapit 43. Dan sa resi, lemonn i ganny vwar parey en zafer ki pe deroule ankour: Bondye bann nasyon i ganny envite pour prezant zot temwen pour prouve ki zot byen ouswa pour ekout bann temwen ki lo kote Zeova e rekonnet laverite. La Zeova i anons avek son pep: “Zot mon bann temwen, e mon serviter ki mon’n swazir; pour ki zot konnen e krwar mwan, e konpran ki mon pa’n sanze: ti napa Bondye avan mwan, ni apre mwan. Mwan, mon Zeova; e napa okenn sover apard mwan.”—Izai 43:10, 11, American Standard Version.

Pandan sa plizyer milye lannen avan ki Zezi ti ne, Zeova ti annan bann temwen lo later. Ebre sapit 11 i mansyonn detrwa sa bann zonm fidel, apre Ebre 12:1 i dir: “Alor, parski nou ganny antoure avek en si gro nyaz temwen, debaras nou avek tou fardo ki zenn nou e tou pese ki anvlop nou si fasilman e avek determinasyon annou fer sa lakours ki i’n propoz nou.” Zezi ti dir Pons Pilat: “Mon’n ne e mon’n vin dan lemonn pour servi temwen pour laverite.” Zezi i ganny apele “temwen fidel e vre.” (Zan 18:37; Revelasyon 3:14) Zezi ti dir son bann disip: “Me zot, zot pou ranpli avek en pouvwar ler Sent-Espri pou desann lo zot. Alor zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.”—Akt 1:8.

Pour sa rezon ozordi plis ki 6,500,000 dimoun ki pe anons sa bon nouvel lo Rwayonm Zeova par Kris Zezi i vwar li apropriye pour apel zot lekor Temwen Zeova.

[Not anba lo paz]

[Ekstre lo paz 4]

Zot in dedye zot lavi avek Bondye pour fer son lavolonte

[Ekstre lo paz 4]

Zot krwar ki Labib i Parol Bondye

[Portre lo paz 5]

Non Bondye i ganny asosye avek en zafer ki pe deroule ankour

[Portre lo paz 5]

Plis ki 6,500,000 Temwen dan plis ki 235 pei

[Ekstre lo paz 3]

Zot enterese avek ou

[Ekstre lo paz 4]

Non personnel Bondye dan ansyen langaz Ebre